ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຂວງອັດຕະປື ສະໄໝທີ XI ໄດ້ໄຂຂຶ້ນ ໃນຕອນເຊົ້າ ວັນທີ 29 ພຶດສະພາ 2023 ທີ່ສະໂມ ສອນໃຫຍ່ຂອງແຂວງ, ໂດຍການໃຫ້ກຽດເຂົ້າຮ່ວມເປັນປະທານ ຂອງສະຫາຍ ສອນໄຊ ສີພັນດອນ, ກຳມະການກົມການເມືອງສູນກາງພັກ, ນາຍົກລັດຖະມົນຕີ; ມີສະຫາຍ ເລັດ ໄຊຍະພອນ, ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງອັດຕະປື; ສະຫາຍ ອາລຸນໄຊ ສູນນະລາດ, ກຳມະການສູນກາງພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ; ຜູ້ຕາງໜ້າຄະນະຈັດຕັ້ງສູນກາງພັກ ແລະ ຄະນະກວດກາສູນກາງພັກ; ບັນດາສະຫາຍ ຄະນະບໍລິຫານງານພັກແຂວງ, ຫົວໜ້າ-ຮອງຫົວໜ້າກອງບັນ ຊາການ ປກຊ ແລະ ປກສ ແຂວງ, ສະມາຊິກສະພາແຫ່ງຊາດ ແລະ ສະມາຊິກປະຊາຊົນແຂວງ ທີ່ປະຈຳຢູ່ແຂວງ, ສະມາຊິກພັກສົມບູນ ທີ່ມີຕຳແໜ່ງບໍລິຫານຮອງຫົວໜ້າພະແນກ-ທຽບເທົ່າ, ຄະນະບໍລິຫານງານພັກ ບັນດາເມືອງ, ຄະນະພັກຮາກຖານ-ຄະນະໜ່ວຍພັກຮາກຖານ ທີ່ຂຶ້ນກັບອົງຄະນະພັກແຂວງ ແລະ ແຂກຖືກເຊີນ ເຂົ້າຮ່ວມ.
ກອງປະຊຸມຄັ້ງນີ້ ຈະດໍາເນີນໃນລະຫວ່າງວັນທີ 29 ພຶດສະພາ ຫາ ວັນທີ 1 ມິຖຸນາ 2023 ໂດຍມີ 3 ວາລະໃຫຍ່ ຄື: ວາລະທີ 1: ປະຊຸມທາບທາມຄວາມໄວ້ວາງໃຈ ຕໍ່ການນໍາພາລວມ ແລະ ບຸກຄົນ ຄະນະບໍລິຫານງານພັກແຂວງ ສະໄໝທີ XI; ວາລະທີ 2: ປະຊຸມເປີດກວ້າງຄົບຄະນະກາງສະໄໝ; ແລະ ວາລະທີ 3: ປະຊຸມດໍາເນີນຊີວິດການເມືອງ ພາຍໃນອົງຄະນະພັກແຂວງ.
ໃນໂອກາດນີ້, ສະຫາຍ ເລຂາຄະນະບໍລິຫານງານພັກແຂວງ ໄດ້ມີຄຳເຫັນກ່າວເປີດກອງປະຊຸມ ຢ່າງເປັນທາງການ ເຊິ່ງສະຫາຍໄດ້ມີຄໍາເຫັນກ່ຽວກັບ ການດຳເນີນກອງປະຊຸມ ແມ່ນຈັດຕັ້ງປະຕິບັດຕາມກົດລະບຽບຂອງພັກ ກໍຄື ຄຳສັ່ງ, ຄຳແນະນຳຂອງສູນກາງພັກ ແມ່ນການກວດກາຕີລາຄາ ແລະ ທົບທວນຄືນໝາກຜົນແຫ່ງການຊີ້ນຳ-ນຳພາ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ກົດລະບຽບພັກ, ມະຕິກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ 5 ປີ ຂອງແຂວງ ຕະຫຼອດໄລຍະແຫ່ງການນຳພາ-ຊີ້ນຳໃນ 2 ປີເຄິ່ງຜ່ານມາ ເພື່ອຊອກໃຫ້ເຫັນຜົນສຳເລັດທີ່ຕັ້ງໜ້າ ແລະ ວຽກທີ່ຈະຕ້ອງໄດ້ ສືບຕໍ່ເສີມຂະຫຍາຍ ແລະ ຍົກລະດັບໃນແຕ່ລະຂົງເຂດວຽກງານ, ລວມທັງ ການດັດປັບບັນດາເນື້ອໃນ, ວິທີການ, ມາດຕະການຈັດຕັ້ງປະຕິບັດ ໃຫ້ມີປະສິດທິຜົນສູງຂຶ້ນກວ່າເກົ່າ, ສາມາດຕີລາຄາຊອກໃຫ້ເຫັນບັນດາຈຸດອ່ອນ, ສາເຫດ, ຂໍ້ຄົງຄ້າງ ແລະ ປັດໄຈທີ່ພົວພັນເຖິງບັນຫາດັ່ງກ່າວ ເພື່ອມີວິທີການ, ມາດຕະການແກ້ໄຂຢ່າງຖືກຕ້ອງ, ສອດຄ່ອງ ແລະ ທັນການ; ແນໃສ່ເພື່ອສ້າງ ແລະ ຍົກສູງຄວາມສາມາດນຳພາຂອງພັກ, ຄວາມເປັນແບບຢ່າງນຳໜ້າຂອງ ບັນດາສະຫາຍຄະນະບໍລິຫານງານພັກແຂວງ, ສ້າງຄວາມເອກະພາບ ແລະ ຄວາມຕັດສິນໃຈສູງ ໃນທົ່ວອົງຄະນະພັກແຂວງ, ເຮັດໃຫ້ທົ່ວອົງຄະນະພັກ ມີຄວາມປອດໃສ, ໜັກແໜ້ນ, ເຂັ້ມແຂງ ທັງເປັນການຍົກສູງພາລະບົດບາດຄວາມສາມາດນຳພາຂອງຄະນະພັກ ໃຫ້ສົມຄູ່ກັບໜ້າທີ່ການເມືອງໃນໄລຍະໃໝ່. ຫຼັງຈາກນັ້ນ, ຜູ້ຕາງໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 268/ຄລສພ, ລົງວັນທີ 20 ມັງກອນ 2023 ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ແຕ່ລະຂັ້ນ, ຜ່ານມາດຕະຖານຄະນະບໍລິຫານງານພັກແຂວງ, ສິດ ແລະ ໜ້າທີ່ຂອງຄະນະພັກດັ່ງກ່າວ, ຂໍ້ຫ້າມສຳລັບສະມາຊິກພັກ ແລະ ມີການປ່ອນບັດທາບທາມລົງຄະແນນສຽງຄວາມໄວ້ວາງໃຈ ການນຳພາລວມ, ບຸກຄົນ ຂອງຄະນະບໍລິຫານງານພັກແຂວງອັດຕະປື.
ສຳລັບການດຳເນີນກອງປະຊຸມ ໃນວາລະ ທາບທາມຄວາມໄວ້ວາງໃຈ ຕໍ່ການນໍາພາລວມ ແລະ ບຸກຄົນ ຄະນະບໍລິຫານງານພັກແຂວງ ສະໄໝທີ XI, ສະຫາຍ ສອນໄຊ ສີພັນດອນ ໄດ້ມີຄໍາເຫັນໂອ້ລົມ ແລະ ຊີ້ນໍາຕໍ່ການດໍາເນີນກອງປະຊຸມ ໂດຍໄດ້ຍົກໃຫ້ເຫັນ ຄວາມໝາຍຄວາມສຳຄັນ, ລວມທັງ ຈຸດປະສົງ ແລະ ເປົ້າໝາຍໃນການດຳເນີນກອງປະຊຸມຄັ້ງນີ້. ອັນສຳຄັນ, ສະຫາຍ ໄດ້ຮຽກຮ້ອງຜູ້ເຂົ້າຮ່ວມ ໂດຍສະເພາະ ຜູ້ແທນແຕ່ລະສະຫາຍ ຕ້ອງມີສະຕິໃນການໃຊ້ສິດຂອງຕົນຢ່າງເປັນເຈົ້າການ, ບໍ່ໃຫ້ຫຼົງເຊື່ອການໂຄສະນາຊັກຊວນຂອງຜູ້ອື່ນ ກໍ່ຄື ກຸ່ມຄົນບໍ່ຫວັງດີ ດ້ວຍຮູບການຕ່າງໆ ເປັນຕົ້ນ ການຊວນເຊື່ອຈາກສັງຄົມອອນລາຍ ຕໍ່ການນຳພາລວມ ກໍຄືຕໍ່ບຸກຄົນໃນຄະນະບໍລິຫານງານພັກແຂວງ; ຕ້ອງຍົກສູງຄວາມເປັນເຈົ້າຕົນເອງ, ເຊື່ອໝັ້ນຕົນເອງ, ມີຄວາມເປັນເອກະລາດທາງດ້ານແນວຄິດ, ຈິດຕະນາການ ເພື່ອກັ່ນຕອງ, ສົ່ງຂ່າວ; ຕຳນິຕິຊົມເພື່ອນສະຫາຍ ໃນຄະນະບໍລິຫານງານພັກ ໃຫ້ມີລັກສະນະສ້າງສັນ, ຖືກກັບຄວາມຈິງ; ທຸກບັນຫາທີ່ຜູ້ແທນສ່ອງແສງ ຫຼື ສົ່ງຂ່າວ ຕ້ອງມີຄວາມເປັນຈິງ ແລະ ກວດສອບໄດ້; ຄະນະຮັບຜິດຊອບການທາບທາມ ຕ້ອງໄດ້ເອົາໃຈໃສ່ສັງລວມຄຳຄິດເຫັນ ໃຫ້ໄປຕາມຄວາມຈິງ, ບໍ່ຕື່ມບໍ່ແຖມ, ດຳເນີນຖືກຕ້ອງຕາມລະບຽບຫຼັກການ ກໍ່ຄື ຄໍາສັ່ງຂອງພັກ ທີ່ກຳນົດໄວ້ ຢ່າງເຂັ້ມງວດ.
ໃນຕອນທ້າຍ, ສະຫາຍ ປະທານກອງປະຊຸມ ໄດ້ຮຽກຮ້ອງບັນດາສະຫາຍຜູ້ແທນກອງປະຊຸມ ຕ້ອງໄດ້ເອົາໃຈໃສ່ຄົ້ນຄິດຢ່າງຖີ່ຖ້ວນ, ຮອບຄອບ, ບໍ່ຟ້າວຟັ່ງ, ບໍ່ມະລຸມມະລ້ວຍ, ຕ້ອງພິຈາລະນາບັນຫາຕ່າງໆ ດ້ວຍຄວາມຮັບຜິດຊອບດ້ານການເມືອງ ສູງ, ພ້ອມກັນປະກອບສ່ວນ ເຮັດໃຫ້ກອງປະຊຸມຄັ້ງນີ້ ດຳເນີນໄປຕາມວາລະ, ມີຜົນສຳເລັດ ຕາມຈຸດປະສົງ ແລະ ລະດັບຄາດໝາຍ ທີ່ວາງໄວ້ ຢ່າງສະຫງ່າງາມ.
ຂ່າວ;ພາບ: ກົມປະຊາສຳພັນ ສຳນັກງານ ນາຍົກລັດຖະມົນຕີ
