ກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງຫຼວງພະບາງ ຊຸດທີ II ໄດ້ໄຂຂຶ້ນຢ່າງເປັນທາງການ, ໃນຕອນ ເຊົ້າຂອງວັນທີ່ 1 ກຸມພາ 2023 ນີ້ ໂດຍເປັນປະທານຂອງ ທ່ານ ວົງສະຫວັນ ເທບພະຈັນ ຮອງເລຂາພັກແຂວງ ປະທານສະພາປະຊາຊົນແຂວງ, ມີ ທ່ານ ຄຳຂັນ ຈັນທະວີສຸກ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຫຼວງພະບາງ, ພ້ອມດ້ວຍອະດີດພະນັກງານການນຳແຂວງ, ອາດີດສະ ມາຊິກສະພາແຫ່ງຊາດ, ອາດີດສະມາຊິກສະພາປະຊາຊົນແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະແຂກຮັບເຊີນ ເຂົ້າຮ່ວມ.
ທ່ານ ວົງສະຫວັນ ເທບພະຈັນ ໄດ້ກ່າວໄຂກອງປະຊຸມວ່າ: ກອງປະຊຸມ ຄັ້ງນີ້ ເນື່ອງຈາກໃຊ້ເວລາສັ້ນ, ແຕ່ບັນດາວຽກ ງານທີ່ນຳມາລາຍງານ, ພິຈາລະນາ ແລະຮັບຮອງ ຢູ່ໃນກອງປະຊຸມຄັ້ງນີ້ ແມ່ນມີຄວາມສຳຄັນ ຈຶ່ງຂໍຮຽກຮ້ອງ ໃຫ້ບັນດາສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ພ້ອມກັນຍົກສູງຄວາມຮັບຜິດຊອບທາງດ້ານການເມືອງຂອງຕົນ, ສຸມທຸກສະຕິປັນຍາ, ເຫື່ອແຮງ ແລະຄວາມຮູ້, ຄວາມສາມາດ ເຂົ້າໃນການຄົ້ນຄວ້າ, ປະກອບຄຳເຫັນ ຕໍ່ແຕ່ລະວຽກງານໃຫ້ເລິກເຊິ່ງ, ຮັບປະກັນ ໃຫ້ຖືກ ຕ້ອງຕາມລັດຖະທຳມະນູນ-ກົດໝາຍ, ນິຕິກຳໃຕ້ກົດໝາຍ ແລະຄວາມເປັນຈິງຂອງສັງຄົມໃນປັດຈຸບັນ, ເພື່ອຄວາມເປັນເອກະພາບກັນ ກ້າວໄປເຖິງການຮັບຮອງ ເອົາແຕ່ລະບັນຫາດ້ວຍຄຸນນະພາບສູງ, ຮຽກຮ້ອງເຖີງພະນັກງານ, ທະຫານ, ຕຳ ຫຼວດ, ແພດໝໍ, ສື່ມວນຊົນ ແລະປະຊາ ຊົນລາວບັນດາເຜົ່າ ຈົ່ງໄດ້ພ້ອມກັນຕິດ ຕາມຮັບຟັງ ການດຳເນີນກອງປະຊຸມຄັ້ງນີ້ ພ້ອມທັງໃຫ້ຄຳເຫັນຕຳນິຕິຊົມ ແລະສະເໜີບັນຫາ ຜ່ານໂທລະສັບສາຍດ່ວນ ໝາຍເລກ 071 156 ເພື່ອເຮັດໃຫ້ກອງປະຊຸມຄັ້ງນີ້ ມີເນື້ອໃນຄົບຖ້ວນ, ສົມບູນ ແລະບັນລຸຜົນສຳເລັດຕາມຄາດໝາຍທີ່ວາງໄວ້.
ກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຄັ້ງນີ້, ຈະດຳເນີນໄປເປັນເວລາ 03 ວັນ ໃນນັ້ນ, ຈະໄດ້ຮັບຟັງການລາຍງານ, ພິຈາລະນາ ແລະຮັບ ຮອງເອົາ ບັນຫາສຳຄັນພື້ນຖານຂອງແຂວງ ຈຳນວນໜຶ່ງ ເປັນຕົ້ນ ຮັບຟັງການລາຍງານໂດຍສັງເຂບ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະ ກິດ- ສັງຄົມຂອງແຂວງ ປະຈຳປີ 2022 ແລະທິດທາງແຜນການ ປະຈໍາປີ 2023; ຮັບຟັງການລາຍງານ ຂອງພະແນກແຜນການ ແລະ ການລົງທຶນແຂວງ ກ່ຽວກັບການຈັດຕັ້ງປະຕິບັດ ແຜນພັດທະນາເສດ ຖະກິດ-ສັງຄົມ ຂອງແຂວງ ປະຈຳປີ 2022 ແລະທິດທາງແຜນການ ປະຈໍາ ປີ 2023; ຮັບຟັງການລາຍງານ ຂອງພະແນກການເງິນແຂວງ ກ່ຽວການຈັດຕັ້ງປະຕິບັດແຜນງົບປະມານ ຂອງແຂວງ ປະຈຳປີ 2022 ແລະທິດທາງແຜນການປະຈໍາ ປີ 2023; ຮັບຟັງການລາຍງານ ຂອງທ່ານຮອງເຈົ້າແຂວງ ຜູ້ຊີ້ນຳຂົງເຂດເສດຖະ ກິດ ກ່ຽວກັບຜົນການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ປະຈຳປີ 2022 ແລະ ທິດທາງແຜນການ ປະຈໍາປີ 2023; ຮັບຟັງການ ລາຍງານ ຂອງອົງການກວດສອບ ປະຈຳພາກເໜືອ ກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2022, ທິດທາງແຜນການເຄື່ອນໄຫວວຽກງານ ປະຈໍາປີ 2023 ແລະບົດລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2021 ຂອງແຂວງ; ຮັບຟັງການລາຍງານ
ຂອງອົງການກວດກາລັດແຂວງ ກ່ຽວກັບຜົນຂອງການກວດກາ ຕາມຜົນຂອງອົງການກວດສອບ ປະຈຳພາກເໜືອ, ຕາມມະຕິຂອງກອງປະຊຸມສະພາປະຊາຊົນແຂວງ, ຕາມການກວດກາໂຄງການລົງທຶນຂອງລັດທີ່ມີມູນຄ່າ 10 ຕື້ກີບລົງມາ ແລະວຽກງານ ສະກັດກັ້ນ- ຕ້ານການສໍ້ລາດບັງຫຼວງ ໃນຊຸມປີຜ່ານມາ; ຮັບຟັງການລາຍງານ ຂອງພະແນກອຸດສາຫະກຳ ແລະການຄ້າແຂວງ ກ່ຽວກັບຜົນການຈັດຕັ້ງປະຕິບັດການຄຸ້ມຄອງລາຄາສິນຄ້າປະເພດສະບຽງອາຫານ ແລະ ນະໂຍບາຍສົ່ງເສີມການຜະລິດສິນຄ້າ ທີ່ຕິດພັນກັບການຜະລິດ; ຮັບຟັງການລາຍງານ ຂອງພະແນກກະສິກຳ ແລະປ່າໄມ້ແຂວງ ກ່ຽວກັບການຈັດຕັ້ງປະຕິບັດແຜນການຜະລິດສິນຄ້າຕາມແລວທາງລົດໄຟ ລາວ-ຈີນ ແລະ ການຈັດຕັ້ງປະຕິບັດຂໍ້ຕົກລົງຂອງທ່ານເຈົ້າແຂວງຫຼວງພະບາງ ວ່າດ້ວຍການຄຸ້ມຄອງການປູກຫຍ້າລ້ຽງສັດ; ຮັບຟັງການລາຍງານ ຂອງພະແນກໂຍທາທິການ ແລະ ຂົນສົ່ງແຂວງ ກ່ຽວກັບການແກ້ໄຂຜົນກະທົບຈາກໂຄງການກໍ່ສ້າງເສັ້ນທາງເວັ້ນຕົວເມືອງ (ບ້ານກົກງິ້ວ-ບ້ານພອນໄຊ) ແລະລາຍງານການແກ້ໄຂຜົນກະທົບ ຈາກໂຄງການກໍ່ສ້າງເສັ້ນທາງລົດໄຟລາວ-ຈີນ; ຮັບຟັງການລາຍງານ ຂອງພະແນກສຶກສາທິການ ແລະ ກິລາແຂວງ ກ່ຽວກັບການຈັດຕັ້ງປະຕິບັດຕົວຊີ້ວັດ, ການແກ້ໄຂບັນຫາຄູເຫຼືອ-ບໍ່ພໍ ແລະຄູອາສາສະໝັກຢູ່ພາຍໃນແຂວງ; ຮັບຟັງການລາຍງານ ຂອງກອງບັນຊາການປ້ອງກັນຄວາມສະຫງົບແຂວງ ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ປະຈຳປີ 2022 ແລະທິດທາງແຜນການ ປະຈໍາ 6 ເດືອນຕົ້ນ ປີ 2023; ຮັບຟັງການລາຍງານ ຂອງອົງການໄອຍະການປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານ ປະຈຳປີ 2022 ແລະ ທິດທາງແຜນການ ປະຈຳ ປີ 2023; ຮັບຟັງການລາຍງານ ຂອງສານປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານ ປະຈຳປີ 2022 ແລະ ທິດທາງແຜນການ ປະຈໍາ ປີ 2023; ພ້ອມນີ້ ຈະໄດ້ຮັບຟັງການປະກອບຄຳເຫັນ ຈາກຄະນະປະຈຳສະພາປະຊາຊົນແຂວງ ຕໍ່ບົດລາຍງານແຕ່ລະຂົງເຂດ, ຮັບຟັງການປະກອບຄຳເຫັນ ຂອງແນວລາວສ້າງຊາດແຂວງ ຕໍ່ກັບການຈັດຕັ້ງປະຕິບັດໜ້າທີ່ ຂອງສະພາປະຊາຊົນແຂວງ ແລະບັນດາສະມາຊິກສະພາປະຊາຊົນແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 6 ຈະໄດ້ປະກອບຄໍາເຫັນ ໃສ່ແຕ່ລະບັນຫາ ທັງຈະໄດ້ມີການຊັກຖາມເພີ່ມເຕີມ ຕໍ່ບັນຫາທີ່ກຳລັງພົ້ນເດັ່ນ ເຊິ່ງເປັນຈຸດສົນໃຈຂອງຜູ້ແທນ ກໍຄືປະຊາຊົນບັນດາເຜົ່າ ແລະຜູ້ຕາງໜ້າອົງການປົກຄອງແຂວງ ກໍຄືບັນດາຂະແໜງການທີ່ກ່ຽວຂ້ອງ ຈະໄດ້ມີການຊີ້ແຈງ, ອະທິບາຍ ແລະຕອບຂໍ້ຊັກຖາມ ເປັນແຕ່ລະກໍລະນີ ຕາມພາລະບົດບາດ, ສິດ, ໜ້າທີ່ ແລະ ຄວາມຮັບຜິດຊອບການເມືອງຂອງຕົນ ບົນພື້ນຖານເຫດຜົນ ແລະ ຄວາມເປັນຈິງ.
ຂ່າວ: ອາພຸດເດດ ບຸບຜາ, ພາບ: ເພັດສາຄອນ ສີມມະວົງ