ໃນຕອນເຊົ້າວັນທີ 24 ກໍລະກົດນີ້, ທີ່ຫໍວັດທະນະທຳ ໄກສອນ ພົມວິຫານ ໄດ້ໄຂກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ (ສພຂ) ສະຫວັນນະເຂດ ຊຸດທີ II ຂຶ້ນ ໂດຍການເປັນປະທານຂອງ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ, ປະທານສະພາປະຊາຊົນແຂວງ, ມີ ທ່ານ ນາງ ສູນທອນ ໄຊຍະຈັກ ຄະນະເລຂາທິການສູນກາງພັກ ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດ ເຂດເລືອກຕັ້ງທີ 13, ທ່ານ ບຸນໂຈມ ອຸບົນປະເສີດ ກຳມະການສູນກາງພັກເລຂາພັກແຂວງ ເຈົ້າແຂວງສະຫວັນນະເຂດ, ບັນດາທ່ານສະມາຊິກສະພາແຫ່ງຊາດ(ສສຊ) ປະຈໍາເຂດ 13, ສະມາຊິກສະພາປະຊາຊົນແຂວງ (ສສຂ) ແລະແຂກຮັບເຊີນເຂົ້າຮ່ວມ.
ກອງປະຊຸມຈະໄດ້ຮັບຟັງການລາຍງານ ພ້ອມທັງພິຈາລະນາ, ຮັບຮອງເອົາບັນຫາສຳຄັນຂອງແຂວງດັ່ງນີ້: 1. ບົດລາຍງານໂດຍຫຍໍ້ຂອງທ່ານເຈົ້າແຂວງສະຫວັນນະເຂດ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ, ແຜນເງິນຕາ ຕິດພັນກັບການຈັດຕັ້ງປະຕິ ບັດສອງວາລະແຫ່ງຊາດ ໄລຍະ 6 ເດືອນຕົ້ນປີ ແລະທິດທາງແຜນການ 6 ທ້າຍປີ 2024; 2. ບົດລາຍງານຂອງພະແນກແຜນການ ແລະການລົງທຶນແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ປະຈຳ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2024; 3. ບົດລາຍງານຂອງພະແນກການເງິນແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ປະຈໍາ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2024; 4. ບົດລາຍ ງານຂອງສາຂາທະນາຄານ ແຫ່ງ ສປປ ລາວ ພາກກາງ ແຂວງສະຫວັນນະເຂດ ກ່ຽວກັບການຈັດຕັ້ງປະຕິບັດແຜນເງິນ ຕາ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2024; 5. ບົດລາຍງານຂອງພະແນກພະລັງງານ ແລະບໍ່ແຮ່ ກ່ຽວກັບການຈັດຕັ້ງປະຕິບັດບັນດາໂຄງການລົງທຶນແຮ່ທາດ ໃນແຕ່ລະໄລຍະ ແລະການກຳນົດແຜນການຈັດຕັ້ງປະຕິບັດແຜນການດັ່ງກ່າວໃນຕໍ່ໜ້າ; 6. ບົດລາຍງານຂອງພະແນກກະສິກຳ ແລະປ່າໄມ້ແຂວງ ກ່ຽວກັບການຈັດຕັ້ງປະຕິບັດບັນດາຄາດໝາຍການພັດ ທະນາຊົນນະບົດ ແລະການແກ້ໄຂຄວາມທຸກຍາກ ໃນໄລຍະຜ່ານມາ ແລະທິດທາງແຜນການໃນຕໍ່ໜ້າ.
ພ້ອມນີ້ ກອງປະຊຸມຍັງຈະພິຈາລະນາ, ຮັບຮອງການສ້າງ ແລະປັບປຸງນິຕິກຳໃຕ້ກົດໝາຍ ທີ່ສ້າງໃໝ່ຈຳນວນ 2 ສະບັບຄື: ຮ່າງຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງກອງທຶນໄພພິບັດແຂວງ ແລະຮ່າງຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງ ແລະນຳໃຊ້ທີ່ດິນກະສິກຳ; 7. ບົດລາຍງານການເຄື່ອນໄຫວວຽກງານ ແຕ່ກອງປະຊຸມສະໄໝສາມັນ ເທື່ອທີ 6 ຫາກອງປະຊຸມສະໄໝສາມັນ ເທື່ອທີ 7 ແລະທິດທາງແຜນການຮອດກອງປະຊຸມສະໄໝສາມັນ ເທື່ອທີ 8 ຂອງຄະນະປະຈຳສະພາປະຊາຊົນແຂວງ.
ນອກຈາກນີ້, ກອງປະຊຸມຄັ້ງນີ້ ຍັງຈະໄດ້ຮັບຟັງການຊີ້ແຈງຂອງອົງການປົກຄອງແຂວງ ແລະ ພາກສ່ວນທີ່ກ່ຽວຂ້ອງຕໍ່ຄຳຖາມຂອງບັນດາສະມາຊິກສະພາແຫ່ງຊາດ ແລະສະມາຊິກສະພາປະຊາຊົນແຂວງ. ກອງປະຊຸມຈະດໍາເນີນໄປຮອດວັນທີ 26 ກໍລະກົດ 2024 ຈິ່ງຈະສໍາເລັດ.
ທີ່ມາ: ຂ່າວສະຫວັນນະເຂດ
