ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ອັດຕະປື ຊຸດທີ II ໄດ້ໄຂຂຶ້ນຢ່າງເປັນທາງການໃນຕອນ ເຊົ້າຂອງວັນທີ 30 ກໍລະກົດ 2024 ນີ້ ໂດຍການເປັນປະທານຂອງ ທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 17 ປະທານສະພາປະຊາຊົນແຂວງ.
ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ຄັ້ງນີ້ ຈະໄດ້ຮັບຟັງການລາຍງານພ້ອມທັງ ພິຈາລະນາ ແລະ ຮັບຮອງບັນຫາສຳຄັນຕ່າງໆດັ່ງນີ້:
❖ ພາກວຽກງານ ຂອງອົງການປົກຄອງແຂວງ
1) ຮັບຟັງບົດລາຍງານໂດຍສັງເຂບ ຂອງທ່ານເຈົ້າແຂວງ ກ່ຽວ ກັບບັນຫາທີ່ພົ້ນເດັ່ນ ຂອງແຂວງປະຈຳ 6 ເດືອນຕົ້ນປີ 2024 ແລະ ທິດທາງແຜນການ 6 ເດືອນທ້າຍປີ 2024 ຕິດພັນກັບການຈັດຕັ້ງປະຕິບັດແກ້ໄຂ 2 ວາລະແຫ່ງຊາດ.
2) ຮັບຟັງບົດລາຍງານ ຂອງພະແນກແຜນການ ແລະ ການລົງ ທຶນ ກ່ຽວກັບການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ປະຈຳ 6 ເດືອນຕົ້ນປີ 2024 ແລະ ທິດທາງແຜນ ການ ປະຈຳ 6 ເດືອນທ້າຍປີ 2024.
3) ຮັບຟັງບົດລາຍງານພະແນກການເງິນແຂວງ ກ່ຽວກັບການຈັດຕັ້ງປະຕິບັດ ແຜນງົບປະມານແຫ່ງລັດປະຈໍາ 6 ເດືອນຕົ້ນປີ 2024 ແລະ ທິດທາງແຜນການ ປະຈຳ 6 ເດືອນທ້າຍປີ 2024.
4) ຮັບຟັງບົດລາຍງານຜົນການປະເມີນການຈັດຕັ້ງປະຕິບັດນິຕິກໍາໃຕ້ກົດໝາຍ 02 ສະບັບ: ຂໍ້
ຕົກລົງ ຂອງທ່ານເຈົ້າແຂວງວ່າດ້ວຍການຄຸ້ມຄອງ ແລະ ນໍາ ໃຊ້ທີ່ດິນທົ່ວແຂວງອັດຕະປື ຂອງພະແນກຊັບພະ ຍາກອນທຳມະ ຊາດ ແລະ ສິ່ງແວດລ້ອມແຂວງ ແລະ ຂໍ້ຕົກລົງຂອງທ່ານເຈົ້າແຂວງວ່າດ້ວຍກອງທຶນຊ່ວຍເຫຼືອເຊິ່ງກັນ ແລະ ກັນ ຂອງສະຫະພັນກຳມະບານແຂວງ.
❖ ພາກວຽກງານ ຂອງສະພາປະຊາຊົນຂັ້ນແຂວງ
1) ບົດລາຍງານການຈັດຕັ້ງປະຕິບັດວຽກງານ ປະຈຳ 6 ເດືອນຕົ້ນປີ 2024 ແລະ ທິດທາງແຜນການ 6 ເດືອນທ້າຍປີ 2024 ຂອງຄະນະປະຈຳສະພາປະຊາຊົນແຂວງ ຊຸດທີ II. ນອກຈາກນີ້, ໃນລະຫວ່າງການດໍາເນີນກອງປະຊຸມ ຍັງຈະໄດ້ຮັບຟັງການຊີ້ແຈງເພີ້ມເຕີມຕໍ່ຄຳຊັກຖາມ ຂອງຄະນະປະຈຳສະພາປະຊາຊົນແຂວງຈາກ ພະແນກກະສິກຳ ແລະ ປ່າໄມ້ແຂວງ (ກ່ຽວກັບການຈັດຕັ້ງປະຕິບັກວຽກງານພັດທະນາຊົນນະບົດ ແລະ ລຶບລ້າງຄວາມ ທຸກຍາກພາຍໃນ ແຂວງ ອັດຕະປື; ການປູກປ່າ, ການຟື້ນຟູ 3 ປະເພດປ່າ, ແຜນຈັດສັນປ່າໄມ້ບ້ານລວມທັງແຜນຈັດສັນພື້ນຟູປ່າໄມ້ຄືນໃໝ່ຕາມແຄມແມ່ນໍ້າເຊປຽນ ທີ່ໄດ້ຮັບຜົນກະທົບຈາກເຂື່ອນໄຟຟ້າເຊປຽນແຕກຕາມມະຕິ 05/ສພຂ, ລົງວັນທີ 07 ກຸມພາ 2024 ທີ່ໄດ້ຮັບຮອງ), ພະແນກຊັບພະຍາກອນທຳມະ ຊາດ ແລະ ສິ່ງແວດ ລ້ອມແຂວງ (ກ່ຽວກັບໂຄງການລົງທຶນທີ່ລັດອະນຸຍາດໃຫ້ເຊົ່າ-ສຳປະທານ ເພື່ອຂຸດຄົ້ນແຮ່ທາດ-ໂຄງການພັດ ທະນາເຂື່ອນໄຟຟ້າ, ພັດທະນາກະສິກຳທີ່ຈັດຕັ້ງປະຕິບັດໄປແລ້ວແຕ່ຍັງບໍ່ທັນມີໃບຢັ້ງຢືນດ້ານສິ່ງແວດລ້ອມ) ແລະ ພະແນກພະລັງງານ ແລະ ບໍ່ແຮ່ແຂວງ (ກ່ຽວກັບການຄຸ້ມຄອງໂຄງການຂຸດຄົ້ນແຮ່ທາດ, ເຂື່ອນໄຟຟ້າ ທີ່ລັດຖະບານອະນຸຍາດ ເພື່ອເຮັດໃຫ້ທ້ອງຖິ່ນມີສ່ວນຮ່ວມໃນການຄຸ້ມຄອງທີ່ມີປະສິດທິພາບປະສິດທິຜົນຕໍ່ການດຳເນີນໂຄງການດັ່ງກ່າວ).
ກອງປະຊຸມ ຍັງຈະໄດ້ຮັບຟັງການປະກອບຄໍາເຫັນ ຂອງຕາງ ໜ້າຄະນະປະຈໍາສະພາປະຊາຊົນແຂວງ, ຕາງໜ້າຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງເຂດທີ 17, ຮັບຟັງການຊີ້ແຈງເພີ່ມເຕີມຈາກ ທ່ານເຈົ້າແຂວງ ແລະ ການຊີ້ແຈງ ຂອງພະແນກການ, ກົມກອງ ແລະ ພາກສ່ວນກ່ຽວຂ້ອງຈໍານວນໜຶ່ງ ຕໍ່ຄໍາຊັກຖາມ ຂອງບັນດາສະມາຊິກສະພາປະຊາຊົນແຂວງ.
ຕະຫຼອດໄລຍະດຳເນີນກອງປະຊຸມ, ສະພາປະຊາຊົນແຂວງ ໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍດ່ວນ ທີ່ເບີໂທ 036 156 ໂດຍບໍ່ເສັຍຄ່າ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກພໍ່ແມ່ປະຊາຊົນ ທີ່ຈະສົ່ງໄປຍັງກອງປະຊຸມ ແລະ ສະເໜີໃຫ້ຮັບຟັງການຖ່າຍທອດສົດສຽງຜ່ານທາງວີທະຍຸກະຈາຍສຽງຂອງແຂວງ FM 102,4 ເມັກກາເຮີດ ໃນໄລຍະຂອງການດໍາເນີນກອງປະຊຸມ ແລະ ກອງປະຊຸມໃຊ້ເວລາ 3 ວັນຈຶ່ງສໍາເລັດ.
ໂດຍ: ໄພບູນ
