ກອງປະຊຸມໃຫຍ່ຜູ້ແທນ ອົງຄະນະພັກແຂວງຊຽງຂວາງ ຄັ້ງທີ VIII ໄດ້ໄຂຂຶ້ນຢ່າງເປັນທາງການ ໃນວັນທີ 5 ພະຈິກ 2020 ນີ້ ທີ່ຫ້ອງປະຊຸມຫ້ອງວ່າການປົກຄອງແຂວງ, ພາຍໃຕ້ການເປັນປະທານຂອງ ສະຫາຍ ບຸນຕົ້ນ ຈັນທະພອນ ເລຂາພັກແຂວງ ເຈົ້າແຂວງຊຽງຂວາງ. ໂດຍການເປັນກຽດເຂົ້າຮ່ວມ ຂອງສະຫາຍນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ, ສະຫາຍ ຄຳສວນ ຈັນທະວົງ ຮອງປະທານ ຄະນະກວດກາສູນກາງພັກ, ສະຫາຍ ຈັນທະບູນ ລັດຕະນະວົງ ຮອງຫົວໜ້າຫ້ອງວ່າການສູນກາງພັກ, ມີຜູ້ແທນສົມບຸນເຂົ້າຮ່ວມ 250 ສະຫາຍ, ຍິງ 32 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກໃນທົ່ວແຂວງ, ມີອະດີດການນຳ ແລະ ແຂກຖືກເຊີນຈາກພາກສ່ວນຕ່າງໆເຂົ້າຮ່ວມ ຢ່າງພ້ອມພຽງ.
ສະຫາຍ ບົວສອນ ສີນວນທອງ ຮອງເລຂາພັກແຂວງ ໄດ້ຂຶ້ນຜ່ານຮ່າງບົດລາຍງານການເມືອງຕໍ່ກອງປະຊຸມ ເຊິງໄດ້ຍົກໃຫ້ເຫັນສະພາບລວມຂອງແຂວງ ທົ່ວແຂວງມີ 7 ເມືອງ, 53 ກຸ່ມບ້ານ, ມີ 477ບ້ານ, ມີພົນລະເມືອງ 264.263 ຄົນ, ຍິງ 129.624 ຄົນ; ທົ່ວແຂວງມີ 88 ຄະນະພັກຮາກຖານ, ມີໜ່ວຍພັກ 1.057 ໜ່ວຍ, ສາມາດສ້າງໜ່ວຍພັກແຂງຮູ້ນຳພາຮອບດ້ານໄດ້ 662 ໜ່ວຍ ກວມ 64,39%, ພ້ອມນີ້ ໄດ້ຍົກໃຫ້ເຫັນເຖິງໝາກຜົນຂອງການຊີ້ນຳ-ນຳພາຈັດຕັ້ງປະຕິບັດ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ VII ຢ່າງມີຜົນສຳເລັດ ເຮັດໃຫ້ແຂວງມີຄວາມສະຫງົບ, ເສດຖະກິດ, ວັດທະນະທຳສັງຄົມໄດ້ຮັບການເອົາໃຈໃສ່ຢ່າງຕັ້ງໜ້າ ເຮັດໃຫ້ເສດຖະກິດມີທ່າກ້າວຂະຫຍາຍຕົວ, ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການປັງປຸງດີຂຶ້ນເປັນກ້າວໆ. ເສດຖະກິດຂະຫຍາຍຕົວ 7,5% ຕໍ່ປີ, ລວມຍອດຜະລິດຕະພັນພາຍໃນ(GDP) ບັນລຸ 16.731 ຕື້ກີບ, ສະເລ່ຍລາຍຮັບໄດ້ 1.622 ໂດລາສະຫະລັດ/ຄົນ/ປີ, ການປູກພືດເປັນສິ້ນຄ້າ ໄດ້ຮັບການຊຸກຍູ້ສົ່ງເສີມຢ່າງແຂງແຮງ ແລະ ກວ້າງຂວາງ, ການຜະລິດເປັນສິນຄ້າຕິດພັນກັບການປຸງແຕ່ງ ໄດ້ສົ່ງເສີມນັກທຸລະກິດມາລົງທຶນໂດຍສະເພາະການລ້ຽງສັດໃຫຍ່, ການຂະຫຍາຍແນວພັນສັດ.
ສຳລັບໃນທິດທາງຕໍ່ໜ້າ ກໍໄດ້ວາງຄາດໝາຍສູ້ຊົນແຕ່ 2021-2025 ແລະ ວິໄສທັດຮອດປີ 2030 ໂດຍສູ້ຊົນເຮັດໃຫ້ລະບົບການເມືອງພາຍໃຕ້ການນຳພາຂອງພັກມີຄວາມປອດໃສ, ເຂັ້ມແຂງ ແລະໜັກແໜ້ນ, ສັງຄົມມີຄວາມສະຫງົບມີຄວາມເປັນລະບຽບຮຽບຮ້ອຍ, ເສດຖະກິດມີການຂະຫຍາຍຕົວ, ໝັ້ນທ່ຽງ ແລະ ຖືກທິດ, ໂດຍຖືເອົາກະສິກຳ ຕິດພັນກັບອຸດສາຫະກຳປຸງແຕ່ງ, ການບໍລິການ-ການຄ້າ, ການທ່ອງທ່ຽວເປັນບັນຫາສຳຄັນ; ພ້ອມທັງຍົກລະດັບການພັດທະນາຊັບພະຍາກອນມະນຸດ ໃຫ້ມີຄຸນນະ ພາບ, ປະຊາຊົນມີອາຊີບໝັ້ນຄົງ, ມີສຸຂະພາບສົມບູນ ແລະ ໄດ້ຮັບການສຶກສາຢ່າງທົ່ວເຖິງ; ສູ້ຊົນເຮັດໃຫ້ເສດຖະກິດຂະຫຍາຍຕົວ ໂດຍສະເລ່ຍບໍ່ລຸດ 6,8%/ປີ, ຮອດປີ 2025 ສະເລ່ຍລາຍຮັບໃຫ້ໄດ້ 2.000 ໂດລາສະຫະລັດ/ຄົນ/ປີ.
ກອງປະຊຸມ ຈະດຳເນີນໄປເປັນເວລາ 2 ວັນ ແຕ່ວັນທີ 5-6 ພະຈິກ 2020 ຈຶ່ງສຳເລັດ ໂດຍຈະມີການປ່ອນບັດຄັດເລືອກເອົາຄະນະບໍລິຫານງານພັກແຂວງ ຊຸດໃໝ່ອີກດ້ວຍ.

 
ພາບ-ຂ່າວ: ຕຽງບູລົມ

Loading...