ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມສະຫຼຸບຖອດຖອນບົດຮຽນການເຄື່ອນ ໄຫວວຽກງານ ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ໃນໄລຍະກາງສະໄໝ ຂອງແຜນການ 5 ປີ ແຕ່ປີ (2021-2025) ໄຂຂຶ້ນໃນຕອນເຊົ້າວັນທີ 21 ທັນວາ 2023 ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ. ມີ ພົນເອກຈັນສະໝອນ ຈັນຍາລາດ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ພ້ອມດ້ວຍສະພາແຫ່ງຊາດ ຊຸດທີ IX, ສະພາປະຊາຊົນຂັ້ນແຂວງ ຊຸດທີ II ແລະ ແຂກຮັບເຊີນ ເຂົ້າຮ່ວມ.
ກອງປະຊຸມຈະສະຫຼຸບຕີລາຄາຖອດຖອນບົດຮຽນການເຄື່ອນໄຫວວຽກງານຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄລຍະກາງ ສະໄໝ ຊຶ່ງຈະໄດ້ຍົກໃຫ້ເຫັນດ້ານດີ ເພື່ອເສີມຂະຫຍາຍ, ຕີລາຄາຢ່າງກົງໄປກົງມາ ດ້ານອ່ອນຄົງຄ້າງ ທີ່ ຕ້ອງສືບຕໍ່ປັບປຸງແກ້ໄຂ. ພ້ອມນີ້ ກອງປະຊຸມຈະໄດ້ຮັບຟັງ, ປຶກສາຫາລື ແລະ ປ່ຽນບົດຮຽນນຳກັນຕໍ່ບັນດາເນື້ອໃນສຳຄັນ ຄື:
– ບົດລາຍງານຂອງຄະນະປະຈຳສະພາແຫ່ງຊາດ ກ່ຽວກັບການເຄື່ອນໄຫວວຽກງານ ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ໄລຍະກາງສະໄໝ (2021-2023) ແລະ ທິດທາງແຜນການເຄື່ອນ ໄຫວວຽກງານທ້າຍສະໄໝ (2023-2025);
– ການປະກອບຄຳເຫັນໃນຫົວຂໍ້ຕ່າງໆຂອງບັນດາກຳມາທິການສະພາແຫ່ງຊາດ ແລະ ຄະປະຈຳສະພາປະຊາ ຊົນຂັ້ນແຂວງ ຈຳນວນ 8 ຫົວຂໍ້; ໃນນີ້ ສະພາແຫ່ງຊາດ ປະກອບມີ 4 ຫົວຂໍ້ ຄື: ການຍົກສູງຄຸນນະພາບໃນການສ້າງ ແລະ ປັບປຸງກົດໝາຍ; ປະສິດທິຜົນ ການຮັບຮອງ ແລະ ການ ຈັດຕັ້ງປະຕິບັດ ບັນຫາສໍາຄັນພື້ນຖານຂອງຊາດ; ເພີ່ມທະວີວຽກງານຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອຮັບປະກັນການຄຸ້ມຄອງລັດຢ່າງມີປະສິດທິຜົນ ແລະ ການພິຈາລະແກ້ໄຂຄໍາຮ້ອງຂໍຄວາມເປັນທຳຂອງສະພາແຫ່ງຊາດ,
ສ່ວນສະພາປະຊາຊົນຂັ້ນແຂວງ ຈະມີບົດປະກອບຄຳເຫັນ 4 ຫົວຂໍ້ ຄື: ການສ້າງ ແລະ ປັບປຸງນິຕິກຳທີ່ສໍາຄັນ ຂອງທ້ອງຖິ່ນ ເພື່ອຮັບປະກັນທັງປະລິມານ ແລະ ຄຸນນະພາບ ຈະຊ່ວຍເປັນເຄື່ອງມືສໍາຄັນແກ່ການພັດທະນາເສດຖະ ກິດ-ສັງຄົມ ຂອງທ້ອງຖິ່ນໃຫ້ເຂັ້ມແຂງ; ປະສິດທິຜົນການຮັບຮອງ ແລະ ຈັດຕັ້ງປະຕິບັດບັນຫາສໍາຄັນພື້ນຖານທີ່ສຳຄັນ ຂອງທ້ອງຖິ່ນ; ການຕິດຕາມກວດກາ ຂອງສະພາປະຊາຊົນແຂວງມີຄວາມເຂັ້ມແຂງ ຈະຊ່ວຍ ໃຫ້ການພັດທະນາທ້ອງຖິ່ນມີປະສິດທິຜົນ ແລະ ການພົບປະປະຊາຊົນ ຂອງສະມາຊິກສະພາແຫ່ງຊາດ, ສະພາປະຊາຊົນຂັ້ນແຂວງ ເປັນການປະກອບສ່ວນປັບປຸງວຽກງານການເມືອງຢູ່ຂັ້ນຮາກຖານ.
ນອກຈາກນີ້, ກອງປະຊຸມຈະໄດ້ຮັບຟັງການໂອ້ລົມຂອງ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິ ຫານງານສູນກາງພັກ, ປະທານປະເທດ.
ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ກ່າວໄຂກອງປະຊຸມວ່າ: ບັນດາເນື້ອໃນທີ່ນໍາເຂົ້າລາຍງານ ແລະ ການປະກອບຄວາມເຫັນ, ປຶກສາຫາລື ໃນກອງປະຊຸມ ຄັ້ງນີ້ ລ້ວນແລ້ວເປັນເນື້ອໃນວຽກງານສໍາຄັນຢູ່ໃນພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດແລະ ສະພາປະຊາ ຊົນຂັ້ນແຂວງ ແລະ ພົວພັນກັບວຽກງານຂອງບັນດາອົງການອຳນາດລັດ ທັງຂັ້ນສູນກາງ ແລະ ຂັ້ນທ້ອງຖິ່ນ. ພ້ອມນີ້ ທ່ານໄດ້ຮຽກຮ້ອງໃຫ້ທຸກທ່ານ ໄດ້ເອົາໃຈໃສ່ຄົ້ນຄວ້າ ແລະ ເປັນເຈົ້າການ ປະກອບຄວາມຄິດຄວາມເຫັນ ຕໍ່ແຕ່ລະເນື້ອໃນ ຢ່າງກົງໄປກົງມາ, ມີເຫດມີຜົນ, ຖືກກັບສະພາບຕົວຈິງ ບົນພື້ນຖານແນວທາງປ່ຽນແປງໃໝ່ຂອງພັກ, ລັດຖະທຳມະນູນ, ກົດໝາຍຂອງລັດ, ພ້ອມທັງພ້ອມກັນຊອກຫາວິທີການ, ມາດຕະການແກ້ໄຂບັນດາບັນຫາທີ່ຍັງເປັນ ຄວາມບົກຜ່ອງ, ມີຄວາມຫຍຸ້ງຍາກອຸດຕັນ ເພື່ອເຮັດແນວໃດໃຫ້ການຈັດຕັ້ງປະຕິບັດບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ, ສະພາປະຊາຊົນຂັ້ນແຂວງ ກໍຄືບັນດາອົງການລັດທຸກຂັ້ນ ມີຄວາມຖືກຕ້ອງຕາມລັດຖະທຳມະນູນ ແລະ ກົດໝາຍ ຮ່ວມກັບລັດຖະບານ ແລະ ອົງການຕ່າງໆ ທັງຢູ່ສູນກາງ ແລະ ທ້ອງຖິ່ນ ເພື່ອນໍາພາປະເທດພວກ ເຮົາ ຈະເລີນກ້າວໜ້າ ຍິ່ງຂຶ້ນ, ນໍາເອົາປະເທດຫຼຸດພົ້ນອອກຈາກຄວາມຫຍຸ້ງຍາກທີ່ພວມປະເຊີນໃນປັດຈຸບັນ.
ສໍາລັບກອງຊຸມສະຫຼຸບຖອດຖອນບົດຮຽນການເຄື່ອນໄຫວວຽກງານ ຂອງສະພາແຫ່ງຊາດ ຊຸດທີ IX ແລະ ສະພາ ປະຊາຊົນຂັ້ນແຂວງ ຊຸດທີ II ໃນໄລຍະກາງສະໄໝ ຂອງແຜນການ 5 ປີ (2021-2025) ຢ່າງເປັນທາງ ການ ນັບແຕ່ເວລານີ້ເປັນຕົ້ນໄປ.
ຂ່າວ: BT
ພາບ: ຄໍາກອງ