ກອງປະຊຸມເຈົ້າໜ້າທີ່ອາວຸໂສອາຊຽນ ໄດ້ໄຂຂຶ້ນໃນວັນທີ 21 ສິງຫາ 2024 ທີ່ນະຄອນ ຫລວງພະບາງ ໂດຍການເປັນປະທານຂອງທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ, ມີບັນດາຫົວໜ້າເຈົ້າໜ້າທີ່ອາວຸໂສອາຊຽນ, ຕີມໍແລັດສະເຕ ແລະ ຮອງເລຂາທິການໃຫຍ່ອາຊຽນ ພ້ອມດ້ວຍຄະນະ ເຂົ້າຮ່ວມ.
ກອງປະຊຸມຄັ້ງນີ້, ບັນດາຜູ້ເຂົ້າຮ່ວມ ໄດ້ປຶກສາຫາລື ການຈັດຕັ້ງຜັນຂະຫຍາຍຜົນ ຂອງກອງປະຊຸມ ລັດຖະມົນຕີຕ່າງປະເທດ ອາຊຽນ ຄັ້ງທີ 57 ແລະ ບັນດາກອງປະຊຸມທີ່ກ່ຽວຂ້ອງ ທີ່ໄດ້ຈັດຂຶ້ນໃນລະຫວ່າງວັນທີ 21-27 ກໍລະກົດ 2024 ຜ່ານມາ ແລະ ການຈັດຕັ້ງປະຕິບັດ 9 ບຸລິມະສິດ (ການເຊື່ອມໂຍງ ແລະ ການເຊື່ອມຈອດດ້ານເສດຖະກິດ, ການສ້າງອະນາຄົດແບບມີສ່ວນຮ່ວມຢ່າງທົ່ວເຖິງແລະຍືນຍົງ, ການຫັນປ່ຽນເພື່ອກ້າວໄປສູ່ດິຈິຕອນໃນອະນາຄົດ, ວັດທະນະທໍາ ແລະ ສິລະປະ, ສ້າງແຜນຍຸດທະສາດ ເພື່ອຈັດຕັ້ງປະຕິບັດວິໄສທັດປະຊາຄົມອາຊຽນ 2045, ຮັດແໜ້ນຄວາມເປັນແກນກາງຂອງອາຊຽນ, ການສົ່ງເສີມການຮ່ວມມືດ້ານສິ່ງແວດລ້ອມ, ແມ່ຍິງ ແລະ ເດັກນ້ອຍ, ສາທາລະນະສຸກ: ການຫັນໄປສູ່ຄວາມເຂັ້ມແຂງ ທາງດ້ານສາທາລະນະສຸກ ຂອງອາຊຽນໃນສະພາບການໃໝ່) ສຳລັບການເປັນປະທານອາຊຽນ ຂອງ ສປປ ລາວ ເພື່ອຜັນຂະຫຍາຍຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ຊຶ່ງໂດຍລວມແມ່ນມີຄວາມຄືບໜ້າດີ.
ໃນກອງປະຊຸມ ຍັງໄດ້ປຶກສາຫາລື ການຈັດຕັ້ງປັດຕິບັດແຜນດໍາເນີນງານ ສຳລັບ ຕີມໍແລັດສະເຕ ເພື່ອກຽມເຂົ້າເປັນສະມາຊິກສົມບູນອາຊຽນ; ການສະໝັກຂອງບັນດາປະເທດ ນອກພາກພື້ນ ເພື່ອເຂົ້າເປັນພາຄີຂອງສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສຽງໃຕ້ (TAC). ພ້ອມນັ້ນ, ກໍໄດ້ປຶກສາຫາລື ການຮ່ວມມືອາຊຽນກັບພາຍນອກ ແລະ ໄດ້ປຶກສາຫາລືການກະກຽມດ້ານຕ່າງໆ ແກ່ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ທີ່ຈະຈັດຂຶ້ນໃນວັນທີ 8-11 ພະຈິກ 2024 ທີ່ນະຄອນຫລວງວຽງຈັນ, ຊຶ່ງຈະມີປະມຸກລັດ ແລະ ຫົວໜ້າລັດຖະບານ ຂອງບັນດາປະເທດສະມາຊິກອາຊຽນ ແລະ ຄູ່ເຈລະຈາຂອງອາຊຽນເຂົ້າຮ່ວມ.
