ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີໄຂງານວາງສະແດງຜະລິດຕະພັນທ່ອງທ່ຽວ ອາຊຽນ 2024 ພາຍໃຕ້ຫົວຂໍ້ “ການທ່ອງທ່ຽວທີ່ມີຄຸນນະພາບ ແລະ ຄວາມຮັບຜິດຊອບຍືນຍົງໃນອະນາຄົດຂອງອາຊຽນ” ຈັດຂຶ້ນໃນວັນທີ 24 ມັງກອນ 2024 ທີ່ສູນການຄ້າລາວ-ໄອເຕັກ, ນະຄອນ ຫລວງວຽງຈັນ ໂດຍມີ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍຜູ້ຕາງໜ້າຈາກບັນດາປະເທດສະມາຊິກອາຊຽນ ເຂົ້າຮ່ວມ.
ທ່ານ ນາງ ມະນີສາຄອນ ທໍາມະວົງໄຊ, ຮອງຫົວຫນ້າກົມໂຄສະນາການທ່ອງທ່ຽວ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໃຫ້ສໍາພາດວ່າ: ງານວາງສະແດງຄັ້ງນີ້ ຖືເປັນໂອກາດດີ ແລະ ເປັນເວທີໜຶ່ງ ເພື່ອສົ່ງເສີມການພົບປະຊື້-ຂາຍ ລາຍການທ່ອງທ່ຽວພາຍໃນອາຊຽນ ເເລະ ບັນດາປະເທດໃນທົ່ວມູມໂລກ, ເປັນການສ້າງການເຊື່ອມໂຍງທຸລະກິດໃໝ່ ແລະ ຮັດແໜ້ນສາຍພົວພັນຄູ່ຮ່ວມມືທີ່ມີຢູ່ແລ້ວ. ນອກຈາກນີ້ ຍັງເປັນການໂຄສະນາ, ກະຕຸກຊູກຍູ້ການທ່ອງທ່ຽວພາຍໃນອາຊຽນໃຫ້ກັບມາມີບັນຍາກາດຄຶກຄື້ນ ທັງເປັນການເປີດໂອກາດໃຫ້ ຜູ້ບໍລິການດ້ານການ ທ່ອງທ່ຽວ, ບໍລິສັດທ່ອງທ່ຽວ, ໂຮງແຮມ ແລະ ສາຍການບິນ ໄດ້ພົບປະໂອ້ລົມ ເພື່ອແນໃສ່ເຮັດໃຫ້ຕະຫລາດທ່ອງທ່ຽວອາຊຽນ ແລະ ພາກພື້ນສາກົນນັບມື້ດີຂຶ້ນກວ່ວາເກົ່າ. ໃນງານຄັ້ງນີ້ ມີຈໍານວນຜູ້ຊື້ທັງຫມົດ 70 ພາກສ່ວນທີ່ເຂົ້າຮ່ວມງານ ຊຶ່ງເປັນຕົວແທນຂອງຫຼາຍປະເທດ ໂດຍມີທັງໝົດ 34 ບູດທີ່ຕາງໜ້າໃຫ້ 105 ບໍລິສັດ.
ງານວາງສະແດງທ່ອງທ່ຽວອາຊຽນ ໃນໂອກາດງານມະຫະກໍາທ່ອງທ່ຽວອາຊຽນ 2024 ຈະດໍາເນີນໄປຮອດວັນທີ 27 ມັງກອນຈິ່ງຈະສໍາເລັດ.
ຂ່າວ: BT
ພາບ: ບຸນອູ້ມ