ງານວາງສະແດງສິນຄ້ານຳເຂົ້າສາກົນຈີນ ຄັ້ງທີ 5 ແລະກອງປະຊຸມເວທີປຶກສາຫາລືເສດຖະກິດສາກົນຫົງສຽວ ທີ່ນະຄອນຊຽງໄຮ້, ສປ ຈີນ ໄຂຂຶ້ນຢ່າງເປັນທາງການໃນຕອນຄໍ່າວັນທີ 4 ພະຈິກ 2022 ໂດຍການໃຫ້ກຽດເຂົ້າ ຮ່ວມ ແລະກ່າວເປີດງານຜ່ານລະບົບອອນລາຍຂອງ ທ່ານ ສີ ຈິ້ນຜິງ, ປະທານປະເທດ ແຫ່ງ ສປຈີນ.
ພາຍໃນງານຄັ້ງນີ້ ມີຫລາຍກວ່າ 280 ຫົວໜ່ວຍທຸລະ ກິດທີ່ນອນຢູ່ໃນບັນດາ 500 ບໍລິສັດໃຫຍ່ລະດັບແຖວໜ້າຂອງໂລກ ຈາກ 145 ປະເທດ, ເຂດແຄ້ວນ ແລະ ອົງການຈັດຕັ້ງສາກົນເຂົ້າຮ່ວມ ເຊີ່ງຖືເປັນເວທີໃນການຊຸກຍູ້ສົ່ງ ເສີມການຊື້-ຂາຍສິນຄ້າ, ການສົ່ງເສີມການລົງທຶນ, ການແລກປ່ຽນວັດທະນະທຳ, ການເປີດປະຕູສູ່ພາຍນອກ ແລະ ອື່ນໆ.
ໃນໂອກາດກ່າວຄຳປາໄສເປີດງານໃນຄັ້ງນີ້, ທ່ານ ສີ ຈິ້ນ ຜິງ ໄດ້ກ່າວວ່າ: ການຕັດ ສິນໃຈຈັດງານວາງສະແດງສິນຄ້ານຳເຂົ້າສາກົນຈີນ ເມື່ອ 5 ປີກ່ອນ ມີຈຸດປະສົງເພື່ອແນໃສ່ຂະຫຍາຍການເປີດປະຕູສູ່ພາຍນອກຂອງຈີນ ແລະປ່ຽນຈີນທີ່ເປັນຕະຫລາດຂະຫນາດໃຫຍ່ໃຫ້ກາຍເປັນໂອກາດໃຫຍ່ສຳລັບໂລກ. ງານວາງສະແດງດັ່ງກ່າວນີ້ ໄດ້ສະແດງໃຫ້ເຫັນເຖິິງມາດຕະ ຖານການພັດທະນາໃຫມ່ຂອງຈີນ, ທັງເປັນເວທີສຳລັບການເປີດກວ້າງທີ່ມີມາດຕະຖານສູງ, ເປັນຜະລິດຕະພັນ ແລະການບໍລິການສາທາລະນະສໍາລັບໂລກ.
ທ່ານກ່າວຕື່ມວ່າ: ໃນກອງປະຊຸມໃຫຍ່ຜູ້ແທນທົ່ວປະ ເທດ ຄັ້ງທີ 20 ຂອງພັກກອມມູນິດຈີນ ໄດ້ປະກາດແຈ້ງວ່າ ຈີນຈະສືບຕໍ່ມຸ່ງຫມັ້ນສູ້ຊົນສ້າງໂອກາດໃຫມ່ໃຫ້ກັບໂລກ ດ້ວຍການພັດທະນາຕົນເອງ ແລະປະກອບສ່ວນເຂົ້າໃນການສ້າງເສດຖະກິດຂອງໂລກທີ່ເປີດກວ້າງ, ຈະຮ່ວມມືກັບທຸກປະເທດ ແລະທຸກຝ່າຍເພື່ອແບ່ງປັນໂອກາດທີ່ມີໃນ ສປ ຈີນ, ເພີ່ມຄວາມພະຍາຍາມສ້າງຕະຫລາດພາຍໃນທີ່ເຂັ້ມແຂງ, ຍົກລະດັບການຄ້າ, ສ້າງກົນໄກສຳລັບການຄ້າ ແລະ ການບໍລິການໃຫມ່ ແລະ ນຳເຂົ້າຜະລິດຕະພັນທີ່ມີຄຸນນະພາບໃຫ້ຫລາຍຂຶ້ນ. ຂະນະດຽວກັນ ຈະສ້າງເຂດຮ່ວມມືການຄ້າເອເລັກໂຕຣນິກເສັ້ນທາງສາຍໃຫມ ແລະ ສ້າງເຂດທົດລອງການພັດທະນາການຄ້າທີ່ເປັນການບໍລິິການ ເພື່ອສົ່ງເສີມນະວັດຕະກຳໃນຂະແຫນງການຄ້າ ແລະ ສົ່ງເສີມການຮ່ວມມືຕາມຂໍ້ລິເລີ່ມ ຫນຶ່ງແລວ ຫນຶ່ງເສັ້ນ ທາງທີ່ມີຄຸນນະພາບສູງ ແລະ ແນໃສ່ການ “ເຮັດວຽກຮ່ວມກັນ ເພື່ອອະນາຄົດທີ່ສົດໃສຂອງການເປີດກວ້າງ ແລະຄວາມຈະເລີນຮຸ່ງເຮືອງ”.
ງານວາງສະແດງສິນຄ້ານຳເຂົ້າສາກົນຈີນ ເລີ່ມຈັດຂຶ້ນນັບແຕ່ປີ 2018 ເປັນຕົ້ນມາ ເພື່ອສົ່ງເສີມການເປີດປະຕູສູ່ພາຍນອກໃນລະດັບສູງໃນໄລຍະໃຫມ່ ເຊີ່ງ ທ່ານ ສີ ຈິ້ນຜິງ ໄດ້ໃຫ້ກຽດເຂົ້່າຮ່ວມ ແລະກ່າວຄຳປາໄສເປີດງານດ້ວຍຕົນ ເອງໃນແຕ່ລະປີ ເຮັດໃຫ້ງານດັ່ງກ່າວກາຍເປັນປະຕູຂອງການພັດທະນາຮູບແບບໃຫມ່, ເປັນເວທີສົ່ງເສີມການເປີດກວ້າງລະດັບໃຫມ່ ແລະການຮ່ວມມືຫລາຍຝ່າຍດ້ວຍການຍົກໃຫ້ເຫັນບົດບາດຂອງການຈັດຊື້-ຈັດຈ້າງລະຫວ່າງປະເທດ, ການສົ່ງເສີມການລົງທຶນ, ການໄປມາຫາສູ່ກັນ, ການເປີດກ້ວາງ ແລະການຮ່ວມມື.
ສໍາລັບງານວາງສະແດງສິນຄ້ານຳເຂົ້າສາກົນຈີນ ຄັ້ງທີ 5 ຈະດໍາເນີນໄປຮອດວັນທີ 10 ພະຈິກນີ້ ຈິ່ງຈະສໍາເລັດ.
Cr: BT
