ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ແຂວງໄຊຍະບູລີ ໄດ້ຈັດພິທີຈູດທຳລາຍ ຢາເສບຕິດ ເນື່ອງໃນໂອກາດສະເຫຼີມສະຫຼອງວັນສາກົນຕ້ານຢາເສບຕິດ ຄົບຮອບ 37 ປີ ໃນວັນທີ 26 ມິຖຸນານີ້ ທີ່ເດີ່ນສະໜາມຫຼວງແຂວງ ໃຫ້ກຽດເຂົ້າຮ່ວມຂອງ ທ່ານ ພົຈວ ຄໍາແພງ ເພັດ ຫົວໜ້າກອງບັນຊາການປ້ອງກັນຄວາມສະຫົງບ ( ປກສ ) ແຂວງ ຮອງປະທານຄະນະກຳມະການກວດກາ ແລະ ຄວບຄຸມຢາເສບຕິດຂັ້ນແຂວງໄຊຍະບູລີ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ພົຈວ ຄໍາແພງ ເພັດ ກ່າວວ່າ: ໃນຊຸມປີຜ່ານມາ ພັກ-ລັດຖະບານ, ອົງການປົກຄອງແຂວງ ກໍຄືກຳລັງ ປກສ ແຂວງ, ເມືອງ, ການຈັດຕັ້ງທຸກຂັ້ນໄດ້ຖືເອົາການສະກັດກັ້ນ ແລະ ແກ້ໄຂບັນຫາຢາເສບຕິດ ເປັນວຽກບຸລິມາສິດທີ່ສຳຄັນ ໂດຍສົມທົບຫຼາຍມາດຕະການເພື່ອແກ້ໄຂບັນຫາດັ່ງກ່າວເຊັ່ນ: ການລົງໂຄສະນາເຜີຍແຜ່ແນວທາງນະໂຍບາຍ, ລະບຽບກົດໝາຍ, ມະຕິ, ຄຳສັ່ງ, ຄຳແນະນຳຂອງພັກ-ລັດກ່ຽວກັບບັນຫາຢາເສບຕິດ ເປັນຕົ້ນເອົາໃຈໃສ່ໂຄສະນາສຶກສາອົບຮົມ ໃຫ້ປະຊາຊົນບັນດາເຜົ່າຮັບຮູ້ເຖິງຜົນຮ້າຍຂອງຢາເສບຕິດ ໄດ້ 1.082 ຄັ້ງ, ມີຜູ້ເຂົ້າຮ່ວມ 177.141 ເທື່ອຄົນ, ຍິງ 84.862 ຄົນ, ເອົາໃຈໃສ່ສ້າງບ້ານ, ສະຖາບັນການສຶກສາໃຫ້ປອດຢາເສບຕິດ, ທົ່ວແຂວງມີໂຮງຮຽນປອດຢາເສບຕິດ 81 ແຫ່ງ, ບ້ານປອດຢາເສບຕິດ 178 ບ້ານ, ສ້າງເງື່ອນໄຂໃຫ້ປະຊາຊົນຫັນໄປປະກອບອາຊີບອື່ນທີ່ໝັ້ນຄົງ ໃນໂຄງການປູກພືດທົດແທນການປູກຝິ່ນ, ໄດ້ຮັບຜູ້ຖືກເຄາະຮ້າຍຈາກຢາເສບຕິດເຂົ້າບໍາບັດ, ປິ່ນປົວຢູ່ບັນດາສູນ, ໂຮງໝໍຊຸມຊົນ ແລະ ຄ້າຍດັດສ້າງບັນດາເມືອງ 3.132 ຄົນ, ຍິງ 117 ຄົນ, ບຳບັດປິ່ນປົວດີສົ່ງໃຫ້ຄອບຄົວສຶກສາອົບຮົມ 2.369 ຄົນ, ຍິງ 89 ຄົນ, ໃນປີ 2023 ທົ່ວແຂວງສາມາດມ້າງລາຍຄະດີໄດ້ 249 ເລື່ອງ, ມີຜູ້ຖືກຫາ 291 ຄົນ, ຍິງ 34 ຄົນ, ຢຶດຢາເສບຕິດປະເພດຢາບ້າໄດ້ 12.217.594 ເມັດ, ຢາໄອສ 0,6 ກຣາມ, ຢາຝິ່ນ 0,4 ກຣາມ, ໃນປີ 2023 ສານຕັດສິນໃຊ້ໄດ້ຢ່າງເດັດຂາດ ນັບແຕ່ວັນທີ 12 ຕຸລາ 2023-26 ມິຖຸນາ 2024 ມີ 311 ເລື່ອງ, ມີນັກໂທດ 402 ຄົນ, ຍິງ 53 ຄົນ, ຢາບ້າ 374.422 ເມັດ, ນໍ້າໜັກ 41.834,4 ກຣາມ, ຢາຝິ່ນ 971,5 ກຣາມ ແລະ ຢາໄອ້ 42,1 ກຣາມ ສະແດງໃຫ້ເຫັນເຖິງຄວາມເອົາໃຈໃສ່ ຂອງເຈົ້າໜ້າທີ່ຕຳຫຼວດ ແລະ ພາກສ່ວນທີ່ກ່ຽວຂ້ອງໃນການສະກັດກັ້ນ ແລະ ຕ້ານຢາເສບຕິດຢູ່ແຂວງໄຊຍະບູລີ.
ຮຽກຮ້ອງມາຍັງທຸກພາກສ່ວນໃນສັງຄົມ ຈົ່ງໃຫ້ຄວາມຮ່ວມມື ພ້ອມກັນຄວບຄຸມສະກັດກັ້ນ ແລະ ໃຫ້ຖືເປັນຄວາມຮັບຜິດຊອບຂອງທົ່ວສັງຄົມ ເພື່ອເຮັດໃຫ້ແຂວງໄຊຍະບູລີ ເປັນແຂວງປອດຢາເສບຕິດ.
ຈາກນັ້ນຜູ້ເຂົ້າຮ່ວມໄດ້ຈູດທຳລາຍຢາເສບຕິດທີ່ສານຕັດສິນໃຊ້ໄດ້ຢ່າງເດັດຂາດ ຊຶ່ງມີຢາບ້າ 374.422 ເມັດ, ນໍ້າໜັກ 41.834,4 ກຣາມ, ຢາຝິ່ນ 971,5 ກຣາມ ແລະ ຢາໄອສ 42,1 ກຣາມ.
ຂ່າວ-ພາບ: ຄໍາໝັ້ນ
May be an image of 8 people, fire and text