ທ່ານ ເພັດພິໄຊ ສູນວິໄລ ຮອງເຈົ້າແຂວງ ຫົວໜ້າຄະນະສະເພາະກິດ, ປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດ ໂຄວິດ-19 ຂັ້ນແຂວງໄຊຍະບູລີ ໄດ້ຕາງໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ-19 ຂັ້ນແຂວງ ຖະແຫຼງຂ່າວຕໍ່ສື່ມວນຊົນ ວັນທີ 25 ພຶດສະພາ ນີ້ ທີ່ພະແນກສາທາລະນະສຸກແຂວງວ່າ: ແຂວງໄຊຍະບູລີ ມີຜູ້ຕິດເຊື້ອ 3 ຄົນ, ປັດຈຸບັນຜູ້ຕິດເຊື້ອທັງໝົດ 3 ຄົນໄດ້ຮັບການເອົາໃຈໃສ່ປິ່ນປົວຢູ່ໂຮງໝໍແຂວງ ທັງ 3 ຄົນ ແມ່ນມີອາການປົກກະຕິດີ, ກໍລະນີທີ 1 ໄດ້ກວດ 4 ຄັ້ງເປັນຜົນລົບ 2 ຄັ້ງ, ກໍລະນີທີ 2 ກວດ 3 ຄັ້ງ ຍັງເປັນຜົນບວກ, ກໍລະນີທີ 3 ກວດ 3 ຄັ້ງ ເປັນຜົນລົບ 2 ຄັ້ງ, ກໍລະນີທີ 1 ແລະ ກໍລະນີທີ 3 ນັ້ນແມ່ນປິ່ນປົວຫາຍດີແລ້ວ ແຕ່ຈະຕ້ອງສືບຕໍ່ກັກກັນຢູ່ເຮືອນຈົນຄົບ 14 ວັນ ແລະ ຈະໄດ້ເກັບຕົວຢ່າງຄືນອີກ ໃນວັນທີ 27 ພຶດສະພານີ້, ປັດຈຸບັນແຂວງພວກເຮົາໄດ້ມີຜູ້ສໍາຜັດໃກ້ຊິດຜູ້ຕິດເຊື້ອຈາກປະເທດໃກ້ຄຽງ 8 ຄົນ ໄດ້ກັກກັນຢູ່ໂຮງຮຽນການເມືອງ-ການປົກຄອງ, ເກັບຕົວຢ່າງ 2 ຄັ້ງ ເປັນຜົນລົບ ແລະ ຈະໄດ້ສືບຕໍ່ກັກກັນຄົບ 14 ວັນ, ໃນວັນທີ 27 ພຶດສະພາ 2021 ກໍຈະໄດ້ຮັບການສົ່ງຄືນໃຫ້ແກ່ຄອບຄົວ ແລະ ສັງຄົມ, ຢູ່ພາຍໃນແຂວງຍັງມີເປົ້າໝາຍທີ່ມີຄວາມສ່ຽງໄດ້ກັກຕົວໄວ້ຢູ່ສູນກັກກັນມີຈໍານວນ 396 ຄົນ ຍິງ 113 ຄົນ ໄດ້ເກັບຕົວຢ່າງຜົນກວດທັງໝົດເປັນຜົນລົບ, ແຕ່ກໍຍັງສືບຕໍ່ກັກຕົວເພື່ອໃຫ້ຄົບກໍານົດ 14 ວັນ ຈຶ່ງຈະໄດ້ອອກຈາກສູນກັກກັນ.
ທ່ານຮອງເຈົ້າແຂວງຍັງໄດ້ໃຫ້ຮູ້ຕື່ມອີກວ່າ: ໄດ້ຮຽກຮ້ອງເຖິງບັນດາທ່ານທັງໝົດໃນການຈັດຕັ້ງ ພັກ-ລັດ, ນັກທຸລະກິດ ແລະ ປະຊາຊົນທຸກຖ້ວນໜ້າ ຈົ່ງໄດ້ເປັນເຈົ້າການຍົກສູງຄວາມມີສະຕິ ສືບຕໍ່ເພີ່ມທະວີຄວາມສາມັກຄີເປັນຈິດໜຶ່ງໃຈດຽວ, ປ້ອງກັນບໍ່ໃຫ້ມີການແຜ່ເຊື້ອຂອງພະຍາດດັ່ງກ່າວມາສູ່ສັງຄົມ, ອີກດ້ານໜຶ່ງຈົ່ງມີສະຕິໃນການຮັບຟັງຂໍ້ມູນຂ່າວສານ ບໍ່ໃຫ້ສັງຄົມອອນລາຍທີ່ບໍ່ມີຄວາມຈິງມາທໍາລາຍພວກເຮົາໄດ້, ພ້ອມກັນນັ້ນ ຈົ່ງພ້ອມໃຈກັນໄປສັກວັກຊິນຕ້ານພະຍາດ ໂຄວິດ-19 ຢູ່ໂຮງໝໍເມືອງ, ໂຮງໝໍແຂວງ, ເພື່ອຊີວິດ ແລະ ຄອບຄົວຂອງທ່ານ, ເພາະຢາວັກຊິນຈະໄປສ້າງພູມຕ້ານທານຕໍ່ຕ້ານຄວາມຮຸນແຮງຂອງພະຍາດດັງກ່າວ.
(ຂ່າວ-ພາບ: ອຸ່ນເຮືອນ ໂພທິລັກ)
Loading...