ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ໄຊຍະບູລີ ປ່ອຍປາລົງສູ່ແຫຼ່ງນໍ້າ 42 ລ້ານໂຕ

ໃນຕອນເຊົ້າຂອງວັນທີ 12 ກໍລະກົດ ປີນີ້, ເມືອງ ໄຊຍະບູລີ ໄດ້ຈັດພິທີປ່ອຍປາຄືນສູ່ແຫຼ່ງນໍ້າ, ເນື່ອງໃນໂອກາດວັນປ່ອຍປາ ແລະ ອານຸລັກສັດນໍ້າ-ສັດປ່າ ແຫ່ງຊາດຄົບຮອບ 14 ປີຂຶ້ນ, ເປັນກຽດເຂົ້າຮ່ວມມີ ທ່ານ ປອ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປລາວ, ມີ ທ່ານ ພົງສະຫວັນ ສິດທະວົງ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ໄຊຍະບູລີ, ມີບັນບັນດາເຈົ້າເມືອງ 11 ເມືອງ, ມີຫົວໜ້າ, ຮອງຫົວໜ້າພະແນກການ, ກົມກອງອ້ອມຂ້າງແຂວງ, ຫ້ອງການອ້ອມຂ້າງເມືອງ, ຕະຫຼອດຮອດພໍ່ປະຊາຊົນຊາວເມືອງ ໄຊຍະບູລີເຂົ້າຮ່ວມຢ່າງຫຼວງຫຼາຍ.

          ໃນພິທີ ທ່ານ ສົມຫວັງ ແກ້ວວິໄລສັກ  ກໍາມະການພັກແຂວງ, ຫົວໜ້າພະແນກ ກະສິກໍາ ແລະ ປ່າໄມ້ແຂວງ ໄດ້ຂຶ້ນກ່າວລາຍງານການກະກຽມ ໃນການປ່ອຍປາ, ທ່ານໄດ້ກ່າວວ່າ: ເພື່ອຊຸກຍູ້ສົ່ງເສີມໃຫ້ທຸກພາກສ່ວນເຂົ້າໃນຂະບວນການ ປ່ອຍປາ ແລະ ອານຸລັກສັດນໍ້າ-ສັດປ່າ ແລະ ເຮັດໃຫ້ຊັບພະຍາກອນປ່າໄມ້, ສັດນໍ້າ, ສັດປ່າມີຄວາມອຸດົມສົມບູນ, ມີການຄຸ້ມຄອງ, ບໍ່ມີວັນບົກແຫ້ງ ແລະ ເປັນການສົ່ງເສີມການລ້ຽງປາແບບຄອບຄົວ, ແບບເປັນໜອງ ແລະ ປ່ອຍປາລົງສູ່ທໍາມະຊາດ, ພ້ອມທັງມີມາດຕະການໃນການຄຸ້ມຄອງ ແລະ ປົກປັກຮັກສາເຮັດໃຫ້ວຽກງານດັ່ງກ່າວກາຍເປັນຄວາມຮັບຜິດຊອບຂອງໝົດທຸກຄົນ ແລະ ກາຍເປັນຮູບປະທໍາຕົວຈິງຢູ່ທ້ອງຖິ່ນຮາກຖານ, ເຊິ່ງຜ່ານມາເມືອງ ໄຊຍະບູລີ ໄດ້ມີການບວດວັງນໍ້າ, ຫ້າມບໍ່ໃຫ້ຫາປາ ແລະ ສັດນໍ້າອື່ນໆໃນບໍລິເວນດັ່ງກ່າວ, ສໍາລັບການປ່ອຍປາໃນວັນປ່ອຍປາ ແລະ ອານຸລັກສັດນໍ້າ-ສັດປ່າແຫ່ງຊາດ ຄົບຮອບ 14 ປີ, ປີນີ້ ທົ່ວແຂວງມີແຜນປ່ອຍປາທັງໝົດ 42 ລ້ານໂຕ, ໃນນັ້ນປ່ອຍປາຂອງລວມໝູ່ 55 ຈຸດ, ມີປາທັງໝົດ 873.500 ໂຕ, ສ່ວນຢູ່ເມືອງ ໄຊຍະບູລີ ມີ 7 ຈຸດ, ປ່ອຍປາທັງໝົດ 3 ແສນໂຕ, ໃນນັ້ນໄດ້ປ່ອຍກ່ອນ 14.500 ໂຕ ແລະ ປ່ອຍໃນວັນນີ້ 873.600 ໂຕ,  ປາທີ່ນໍາມາປ່ອຍມີ: ປານິນ, ປາໄນ, ປາປາກ, ປາອິນເດຍ, ປາກິນຫຍ້າ, ປາເກັດແລບ ແລະ ໄດ້ປ່ອຍກົບອີກ 12 ພັນກວ່າໂຕ, ໂອກາດດັ່ງກ່າວ ທ່ານ ສົມຫວັງ ແກ້ວວິໄລສັກ ຍັງໄດ້ຮຽກຮ້ອງມາຍັງທຸກພາກສ່ວນຈົ່ງຮ່ວມແຮງຮ່ວມໃຈ ປ່ອຍປາລົງສູ່ໜອງນໍ້າ ແລະ ແຫຼ່ງນໍ້າທໍາມະຊາດ ເພື່ອຄືນຄວາມອຸດົມສົມບູນໃຫ້ກັບທໍາມະຊາດ ແລະ ພ້ອມກັນອານຸລັກ, ປົກປັກຮັກສາ ສັດນໍ້າ-ສັດປ່າ ເພື່ອໃຫ້ຊັບພະຍາກອນອັນລໍ້າຄ່າດັ່ງກ່າວຢູ່ຄູ່ກັບພວກເຮົາຕະຫຼອດໄປ, ຈາກນັ້ນກໍ່ໄດ້ມີການຕັດແຖບຜ້າ ແລະ ປ່ອຍປາລົງສູ່ແມ່ນໍ້າຮຸ່ງຢ່າງເປັນທາງການ.

ຂ່າວຈາກ: ຫ້ອງວ່າການແຂວງ ໄຊຍະບູລີ

ໂດຍ: ອຸ່ນເຮືອນ ໂພທິລັກ