ໃນວັນທີ 19 ສິງຫານີ້, ພະແນກເຕັກໂນໂລຊີ ແລະ ການສື່ສານ ແຂວງໄຊຍະບູລີ ໄດ້ຈັດກອງປະຊຸມສຳມະນາກ່ຽວກັບແຜນພັດທະນາ ເສດຖະກິດດິຈິຕອນ ຂອງ ສປປ ລາວ ໃຫ້ແກ່ພະນັກງານຫຼັກແຫ່ງອ້ອມຂ້າງເມືອງໄຊຍະບູລີ ທີ່ຫ້ອງວ່າການເມືອງ ໂດຍການໃຫ້ກຽດເຂົ້າຮ່ວມຂອງ ທ່ານ ສົມຈິດ ຮັ່ງເຊັ່ງຊົວ ກຳມະການພັກເມືອງ ຮອງເຈົ້າເມືອງໄຊຍະບູລີ, ທ່ານ ນິລັນດອນ ຈິດຕະກອນ ຮອງຫົວໜ້າພະແນກເຕັກໂນໂລຊີ ແລະ ການສື່ສານ ແຂວງ, ມີທີມງານວິທະຍາກອນຈາກ ພະແນກເຕັກໂນໂລຊີ ແລະ ການສື່ສານ ແຂວງ, ຫົວໜ້າ ຫຼື ຮອງຫົວໜ້າຫ້ອງການ, ມີຫົວໜ້າ, ຮອງຫົວໜ້າໜ່ວຍງານ, ພະນັກງານວິຊາການ, ອົງການ ກົມກອງ ອ້ອມຂ້າງເມືອງ ເຂົ້າຮ່ວມຢ່າງພ້ອມພຽງ.
ທ່ານ ສົມຈິດ ຮັ່ງເຊັ່ງຊົວ ກຳມະການພັກເມືອງ ຮອງເຈົ້າເມືອງ ໄຊຍະບູລີ ໄດ້ກ່າວເປີດກອງປະຊຸມຢ່າງເປັນທາງການ, ຈາກນັ້ນທ່ານ ນິລັນດອນ ຈິດຕະກອນ ຮອງຫົວໜ້າ ພະແນກເຕັກໂນໂລຊີ ແລະ ການສື່ສານແຂວງ ໄດ້ຂຶ້ນເຜີຍແຜ່ຄວາມຮູ້ພື້ນຖານດ້ານເຕັກໂນໂລຊີການສື່ສານ ແລະ ແຜນພັດທະນາເສດຖະກິດດິຈິຕອນ ຂອງ ສປປ ລາວ ທ່ານໃຫ້ຮູ້ວ່າ: ເຕັກໂນໂລຊີ ແມ່ນການໃຊ້ຄວາມຮູ້ທາງດ້ານວິທະຍາສາດ ມາພັດທະນາເປັນເຄື່ອງຈັກ, ເຄື່ອງມື ແລະ ອຸປະກອນຕ່າງໆທີ່ທັນສະໄໝ ເພື່ອໃຊ້ຊ່ວຍວຽກຄົນໃນການເຮັດວຽກງານໃດໜຶ່ງໃຫ້ມີປະສິດທິຜົນ ແລະ ປະສິດທິພາບສູງຂຶ້ນການສື່ສານ (Telecommunications) ໝາຍເຖິງການສື່ສານໄລຍະໄກໂດຍນໍາໃຊ້ ເຕັກໂນໂລຊີຕ່າງໆ ໃນການຕິດຕໍ່ສື່ສານຜ່ານຄື້ນແມ່ເຫຼັກໄຟຟ້າ, ແສງ, ສຽງຜ່ານຮູບແບບມີສາຍ (Cable) ແລະ ບໍ່ມີສາຍ (Wireless) ເຊັ່ນ: ວິທະຍຸ, ໂທລະທັດ, ດາວທຽມ, ໂທລະສັບ, ອິນເຕີເນັດ, ຮູບແບບການສົ່ງຂໍ້ມູນເຊັ່ນ: ຕົວເລກ, ຕົວອັກສອນ, ພາບ, ສຽງ ແລະ ວິດີໂອ ປັດຈຸບັນ ເຕັກໂນໂລຊີການສື່ສານໄດ້ເຂົ້າມາມີບົດບາດສຳຄັນໃນຊີວິດປະຈຳວັນບໍ່ວ່າຈະເປັນການບໍລິຫານຈັດການຂໍ້ມູນ, ການສື່ສານ ຊຶ່ງຈະສ້າງຄວາມສະດວກສະບາຍໃນດ້ານຕ່າງໆເຊັ່ນ: ວຽກງານການສຶກສາ, ວຽກງານດ້ານການແພດ, ດ້ານກະສິກຳ ແລະ ອຸດສາຫະກຳ, ດ້ານການເງິນ ການທະນາຄານ, ດ້ານຄວາມໝັ້ນຄົງ, ດ້ານການຄົມມະນາຄົມ, ດ້ານສະຖາປັດຕະຍະກໍາ ແລະ ດ້ານການຄ້າ, ຊຶ່ງລະບົບ ເຕັກໂນໂລຊີການສື່ສານ ປະກອບມີ 5 ລະບົບພື້ນຖານ: ເຕັກໂນໂລຊີບັນທຶກຂໍ້ມູນ (Input Technology) ເຕັກໂນໂລຊີຈັດເກັບຂໍ້ມູນ (Storage Technology). ເຕັກໂນໂລຊີໃຊ້ໃນການປະມວນຜົນ (Process). ເຕັກໂນໂລຊີໃຊ້ໃນການສະແດງຜົນ (Display). ເຕັກໂນໂລຊີການສື່ສານຂໍ້ມູນ (Communication) ແລະ ຍັງໄດ້ຮັບຟັງ ການເຜີຍແຜ່ ຄວາມຮູ້ເບື້ອງຕົ້ນ ກ່ຽວກັບອາຊະຍາກຳທາງໄຊເບີ, ຄວາມຮູ້ກ່ຽວກັບການນຳໃຊ້ ສື່ສັງຄົມອອນລາຍ, ເຜີຍແຜ່ກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກຳທາງໄຊເບີ. ຈາກນັ້ນບັນດາທ່ານຜູ້ເຂົ້າຮ່ວມກໍໄດ້ປະກອບຄຳຄິດຄຳເຫັນຢ່າງກົງໄປກົງມາ ພ້ອມທັງ ສັງລວມຄຳເຫັນແກ້ໄຂຂໍ້ຂ້ອງໃຈ; ຕອນທ້າຍຂອງກອງປະຊຸມ ທ່ານ ສົມຈິດ ຮັ່ງເຊັ່ງຊົວ ກໍໄດ້ມີຄຳເຫັນໂອ້ລົມຕໍ່ວຽກງານດັ່ງກ່າວຕື່ມອີກ.
ຂ່າວພາບ: ລັດດາວອນ ແກ້ວໄພທູນ
