ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໂດຍ: ວັນໄຊ ຕະວິນຍານ
ໃນໄລຍະ 6 ເດືອນຕົ້ນປີ 2024.ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງເມືອງໄຊສະຖານ ແຂວງໄຊຍະບູລີ ແມ່ນໄດ້ຮັບຜົນກະທົບຈາກໄພທໍາມະຊາດ ແລະ ອັດຕາການອ່ອນຄ່າຂອງເງິນກີບ.ການຈັດຕັ້ງປະຕິບັດໂຄງການລົງທຶນຂອງລັດມິລັກສະນະຊັກຊ້າ, ບໍ່ປະຕິບັດຕາມສັນຍາ,ບໍ່ເປັນປັດໄຈກະຕຸ້ນການພັດທະນາເສດຖະກິດໄດ້ເທົ່າທີ່ຄວນ.ການພັດທະນາເສດຖະກິດໄລຍະ 6 ເດືອນຕົ້ນປີ 2024 ສ່ວນໃຫຍ່ແມ່ນອີງໃສ່ການລົງທຶນ ຂອງເອກະຊົນ, ຂອງປະຊາຊົນ ແລະ ຜູ້ປະກອບການພາຍໃນ ແລະ ຕ່າງປະເທດ, ການເຂົ້າ-ອອກ ແລະ ການຂົນສົ່ງສິນຄ້າມີຄວາມຫຍຸ້ງຍາກ, ຍິ່ງໄປກວ່ານັ້ນຕະຫຼາດຮອງຮັບເພື່ອຈຳໜ່າຍຜົນຜະລິດຍັງມີຄວາມສ່ຽງ.ຄວາມເປັນເຈົ້າການຂອງຂະແໜງການໃນການຊຸກຍູ້ການຜະລິດ ເພື່ອທົດແທນການນໍາເຂົ້າ ແລະ ເພີ່ມການສົ່ງອອກຍັງບໍ່ທັນຕັ້ງໜ້າ, ການຄຸ້ມຄອງການຄ້າພາຍໃນຍັງເຮັດບໍ່ທັນໄດ້ດີ, ລາຄາສິນຄ້າເພີ່ມຂຶ້ນສູງເປັນຕົ້ນນໍ້ມັນເຊື້ອໄຟ, ປັດໄຈການຜະລິດ, ສິນຄ້າອຸປະໂພກ-ບໍລິໂພກ ສົ່ງຜົນໃຫ້ຕົ້ນທຶນການຜະລິດສູງ, ຄ່າຄອງຊີບສູງ ແລະ ອັດຕາເງິນເຟີ້ມີທ່າອ່ຽງສູງ. ຈຶ່ງເຮັດໃຫ້ການຈັດຕັ້ງປະຕິບັດບາງຄາດໝາຍສູ້ຊົນບາງດ້ານບໍ່ໄດ້ຕາມແຜນການທີ່ວາງໄວ້.
ເຖິງແນວໃດກໍຕາມ ເມືອງໄຊສະຖານ ກໍຍັງຮັກສາໄດ້ ຄວາມສະຫງົບຄວາມເປັນລະບຽບຮຽບຮ້ອຍໂດຍພື້ນຖານ ໂດຍອີງໃສ່ທ່າແຮງ ຄະນະພັກທຸກຂັ້ນໄດ້ເຄື່ອນໄຫວຊີ້ນໍາ-ນໍາພາຢ່າງໃກ້ຊິດ ຢູ່ແຕ່ລະຮາກຖານ ຊຸກຍູ້ການຜະລິດຂອງປະຊາຊົນທີ່ເປັນມູນເຊື້ອໃຫ້ຂະຫຍາຍຕົວໄປຕາມທ່າແຮງຂອງຕະຫຼາດ,ປະຊາຊົນມີຄວາມສະດຸ້ງໄວຕໍ່ກັບສະພາບຕະຫຼາດຂອງຜົນຜະລິດກະສິກຳ, ບັນດາບໍລິສັດ ຜູ້ເກັບຊື້ເພື່ອສົ່ງອອກກໍໄດ້ໃຫ້ການສະໜັບສະໜູນຜູ້ຜະລິດໄປຕາມຄວາມຕ້ອງການຂອງຕະຫຼາດ. ໄດ້ເປີດໂອກາດໃນພາກເອກະຊົນທາງພາຍໃນ ແລະ ຕ່າງປະເທດເຂົ້າຮ່ວມໃນຂະບວນການຜະລິດ.ບັນດາພື້ນຖານໂຄງລ່າງເສດຖະກິດຍັງໄດ້ຮັບການພັດທະນາຢ່າງຕໍ່ເນື່ອງເປັນຕົ້ນ ແມ່ນເສັ້ນທາງ ຊົນລະປະທານ,ໄຟຟ້າ, ນ້ຳລິນ,ອື່ນໆແມ່ນໄດ້ຮັບການພັດທະນາ ແລະ ປັບປຸງດີຂຶ້ນເທື່ອລະກ້າວ; ທ່ານ ສີສະໝອນ ນາມວົງ ລາຍງານໃຫ້ຮູ້ວ່າ: ເມືອງໄດ້ພະຍາຍາມຊີ້ນໍາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໄດ້ດໍາເນີນໄປຕາມທິດທີ່ກຳນົດເຮັດໃຫ້ເສດຖະກິດມະຫາພາກຢູ່ໃນລະດັບດີສົມຄວນ,ລວມຍອດລາຍຮັບທັງໝົດຂອງເມືອງ 138,27 ຕື້ກີບ, ທຽບໃສ່ແຜນຄາດຄະເນ ປະຕິບັດໄດ້ 90% ສະເລ່ຍໃສ່ຫົວຄົນໜຶ່ງໄດ້ 8 ລ້ານກວ່າກີບ ຫຼື ເທົ່າກັບ 400 ໂດລາຕໍ່ຄົນຕໍ່ປີ ໃນນີ້:ລາຍຮັບກະສິກໍາ ກວມ 65,47% ເທົ່າກັບ 90,53 ຕື້ກີບ.ລາຍຮັບອຸດສາຫະກໍາ ກວມ 0,77% ເທົ່າກັບ 1,07 ຕື້ກີບ.ລາຍຮັບບໍລິການ ກວມ 33,76% ເທົ່າກັບ 46,67 ຕື້ກີບ ຂອງລາຍຮັບທັງໝົດ; ການຜະລິດພືດລະດູຝົນໃນ 2024 ມີເນື້ອທີ່ທັງໝົດ 5.384 ຮຕ ມາຮອດປັດຈຸບັນ,ປະຕິບັດໄດ້ 4.504 ຮຕ ເທົ່າກັບ 83,66% ຂອງແຜນການປີ,ມີພືດທັງໝົດ 21 ຊະນິດ ໃນນີ້: ເຂົ້ານາປີ 138 ຮຕ, ທຽບໃສ່ແຜນການປີປະຕິບັດໄດ້ 100%, ເຂົ້າໄຮ່ເນີນສູງ ເນື້ອທີ່ 2.400 ຮຕ ທຽບໃສ່ແຜນການໄດ້ 100% ແລະ ພືດພັກຕ່າງໆ ຈໍານວນ 2.846 ຮຕ; ປັດຈຸບັນ ທົ່ວເມືອງມີສັດລ້ຽງທັງໝົດ 72.984 ໂຕ ໃນນີ້: ງົວ 7.611 ໂຕ, ຄວາຍ 2.334 ໂຕ, ແບ້ 7.390 ໂຕ, ໝູ 12.790 ໂຕ, ໝາ 1.706 ໂຕ ແລະ ສັດປີກ 41.184 ໂຕ, ສັກຢາປ້ອງກັນພະຍາດສັດລ້ຽງໄດ້ທັງຫມົດ 3.571 ໂຕ ທຽບໃສ່ແຜນປະຕິບັດໄດ້ 7,52%, ເຄື່ອນຍ້າຍຜົນຜະລິດກະສິກໍາ ອອກນອກເມືອງ ທັງໝົດ 140 ໂຕນ, ກ້າເບ້ຍໄມ້ໄດ້ 741.200 ເບ້ຍ ເທົ່າກັບ 26%ຂອງແຜນ, ປູກໄມ້ໄດ້ 311,92 ຮຕ ເທົ່າກັບ 10,39% ຂອງແຜນ.
ວຽກງານອຸດສາຫະກໍາ ແລະ ການຄ້າ ເມືອງໄດ້ຂຶ້ນທະບຽນຫົວໜ່ວຍທຸລະກິດໄດ້ 5 ທະບຽນ ທຶນຈົດທະບຽນ 250 ລ້ານກີບ, ຈັດພິທີທໍາລາຍສິນຄ້າໝົດອາຍຸ 1 ຄັ້ງ ລວມມູນຄ່າ 1.338.000 ກີບ, ອອກໃບເຄື່ອນຍ້າຍສິນຄ້າອອກທັງໝົດ 247,2 ໂຕ່ນ ແລະ ສັດລ້ຽງຈໍານວນໜຶ່ງ ແລະ ລົງກວດກາມາດຕະຖານຊິງຊັ່ງສໍາເລັດທົ່ວເມືອງ ມີ 106 ໜ່ວຍ. ວຽກງານ ໂຍທາທິການ ແລະ ຂົນສົງ ເມືອງໄດ້ຊຸກຍູ້ໂຄງການທີ່ກໍາລັງຈັດຕັ້ງປະຕິບັດຢູ່ເມືອງໄຊສະຖານຈໍານວນ 10 ໂຄງການ ມູນຄ່າ 14,2 ຕື້ກີບ ຄື: ໂຄງການກໍ່ສ້າງຫ້ອງການຍຸຕິທໍາປະຕິບັດໄດ້ 26%,ໂຄງການກໍ່ສ້າງຕ້ານເຈື່ອນຈຸດສາມແຍກປະຕິບັດໄດ້ 45%, ໂຄງການ ກໍ່ສ້າງຕ້ານເຈື່ອນຈຸດກ້ອງເຮືອນທ່ານ ແສງຈັນ ປະຕິບັດໄດ້ 29%, ໂຄງການກໍ່ສ້າງ ຮ.ຮ ມໍຕົ້ນ ຊະນະໄຊ ປະຕິບັດໄດ້ 50% ແລະ ໂຄງການກໍ່ສ້າງສ້ອມທາງແປງຫຼັງລະດຸຝົນສໍາເລັດແລ້ວ 6 ເສັ້ນ.ເມືອງໄດ້ຂຶ້ນທະບຽນອອກໃບຕາດິນໄດ້ 150 ຕອນ ທຽບໃສ່ແຜນປະຕິບັດໄດ້ 30%, ຢັ້ງຢືນສິ່ງແວດລ້ອມໃຫ້ບັນດາຫົວໜ່ວຍທຸລະກິດໄດ້ 3 ຫົວໜ່ວຍ ແລະ ປະກາດບ້ານ ແລະ ໂຮງຮຽນຂຽວ, ສະອາດ, ງາມຕາໄດ້ 2 ບ້ານ, 4 ໂຮງຮຽນ. ໄປປຄ່ຽງຄູ່ກັນນີ້,ເມືອງໄດ້ເພີ່ມຄວາມເອົາໃຈໃສ່ຕໍ່ວຽກງານ ສຶກສາທິການ ແລະ ກິລາ ໄດ້ປະຕິບັດ 16 ຄາດຫມາຍ 20 ຕົວຊີ້ບອກ ທີ່ສະພາແຫ່ງຊາດ ແລະ ສະພາປະຊາຊົນແຂວງຮັບຮອງ ບັນລຸ 2 ຄາດໝາຍຄື: ອັດຕາເຂົ້າຮຽນໃໝ່ສຸດທິ ປ.1 ແລະ ຄູສອນແຕ່ລະຊັ້ນຮຽນໄດ້ຮັບການຝຶກອົບຮົມ,ຄັດເລືອກນັກຮຽນເກັ່ງ ສອບເສັງຂັ້ນເມືອງ ແລະ ນຳພາໄປສອບເສັງລະດັບແຂວງ ສາມາດຍາດໄດ້ອັນດັບທີ່ 3 ຂອງແຂວງ (ວິຊາຄຸນສົມບັດ), ສໍາເລັດການແຂ່ງຂັນກິລາປະຈໍາປີ 2024 ແລະ ສໍາເລັດການສອບເສັງພາກຮຽນທີ່ 2 ຊັ້ນປະຖົມທົ່ວເມືອງ ແລະ ເສັງເລື່ອນຂັ້ນ ມ1 ຫາ ມ3 ແລະ ຂັ້ນ ມ5 ຫາ ມ6.
ວຽກງານສາທາລະນະສຸກ ເມືອງໄດ້ຈັດຕັ້ງປະຕິບັດ 11 ຕົວຊີ້ບອກທີ່ສະພາແຫ່ງຊາດ ແລະ ສະພາປະຊາ ຊົນແຂວງ ຮັບຮອງ ບັນລຸແລ້ວ 9 ຕົວຊີ້ວັດ, ຍັງບໍ່ທັນບັນລຸ 2 ຕົວຊີ້ວັດຄື: ອັດຕາການຕາຍຂອງແມ່ ແລະ ອັດຕາການຊົມໃຊ້ນໍ້າສະອາດ.ສໍາເລັດການເປີດຂະບວນການສັກຢາກັນພະຍາດໝາກແດງໃນທົ່ວເມືອງ ໃນນີ້: ມີເດັກມາສັກຢາ 1.640 ຄົນ ເທົ່າກັບ 100% ຂອງເດັກທັງໝົດ, ຄົນເຈັບເຂົ້າກວດເຂດນອກ 6.793 ເທື່ອຄົນ, ຄົນເຈັບນອນໂຮງໝໍ 307 ເທື່ອຄົນ, ແມ່ຍິງໄວຈະເລີນພັນມາຮັບໃຊ້ບໍລິການລູກຫ່າງ 1.003 ຈັກຄົນ ທຽບໃສ່ແຜນປະຕິບັດໄດ້ 33,60%, ແມ່ຍິງມາເກີດລູກສະຖານທີ່ບໍລິການ 134 ຄົນ ເທົ່າກັບ 100%, ປັດຈຸບັນອັດຕາການຊົມໃຊ້ນໍ້າລິນປະຕິບັດໄດ້ 94,8% ແລະ ບ້ານສາທາລະນະສຸກແບບຢ່າງໄດ້ 100% ຂອງບ້ານທັງໝົດ; ທ່ານ ສີສະໝອນ ນາມວົງ ກ່າວຕື່ມອີກວ່າ: ໃນໄລຍະ 6 ເດືອນຕົ້ນປີນີ້,ເມືອງສາມາດຈັດເກັບລາຍຮັບໄດ້ທັງໝົດ 268.929.810 ກີບ, ເທົ່າກັບ 93,66% ຂອງແຜນ 6 ເດືອນ, ທຽບໃສ່ແຜນປີ ປະຕິບັດໄດ້ 46, ມູນຄ່າສິນຄ້ານໍາເຂົ້າທັງໝົດ 988 ລ້ານກີບ ແລະ ມູນຄ່າການສົ່ງອອກສິນຄ້າໄດ້ທັງໝົດ 1,45 ຕື້ກີບ ທຽບໃສ່ແຜນການປີປະຕິບັດໄດ້ 34,66%.
ສໍາລັບແຫຼ່ງທຶນເພື່ອການພັດທະນາເມືອງ.ໝົດປີ 2024 ເມືອງໄຊສະຖານ ໄດ້ຮັບທຶນໂຄງການລົງທຶນຂອງລັດທັງໝົດ 42 ໂຄງການ ມູນຄ່າ 261.250,11 ລ້ານກີບ ຊໍາລະຜ່ານມາແລ້ວ 161.600,09 ລ້ານກີບ.ໃນນີ້,ທຶນໂຄງການສືບຕໍ່ ແລະ ໂຄງການໃໝ່ (ບ້ວງທຶນພັດທະນາເມືອງໃໝ່) ມີ 6 ໂຄງການ ມູນຄ່າ 24.115,56 ລ້ານກີບ ຊໍາລະແລ້ວ 5.211,54 ລ້ານກີບ.ທຶນໂຄງການປະຕິບັດສໍາເລັດ 100% ໜີ້ສິນປີ 2024 (ບ້ວງທຶນພັດທະນາເມືອງໃໝ່) ມີ 16 ໂຄງການມູນຄ່າ 177.757,44 ລ້ານກີບ ຊໍາລະແລ້ວ 121.581,13 ລ້ານກີບ.ທຶນໂຄງການປະຕິບັດສໍາເລັດ 100% ໜີ້ສິນປີ 2024(ໂຄງການພັດທະນາພື້ນຖານໂຄງລ່າງຊົນນະບົດ ແລະ ຈັດສັນບ່ອນທໍາມາຫາກິນຂອງປະຊາຊົນ)ມີທັງໝົດ 20 ໂຄງການ ມູນຄ່າ 59.377,11 ລ້ານກີບ ຊໍາລະຜ່ານມາແລ້ວ 34.807,42 ລ້ານກີບ. ນອກຈາກໂຄງການລົງທຶນຂອງລັດແລ້ວ ເມືອງຂອງພວກເຮົາຍັງມີ ນັກລົງທຶນເອກະຊົນທັງພາຍໃນ ແລະ ຕ່າງປະເທດເຂົ້າມາລົງທຶນສົ່ງເສີມປູກ ແລະ ເກັບຊື້ຈໍານວນ 8 ໂຄງການ ມູນຄ່າ 47.666 ລ້ານກີບ ໃນນີ້: ການລົງທຶນຂອງພາຍໃນ ມູນຄ່າ 1.666 ລ້ານກີບ; ເມືອງໄດ້ຊຸກຍູ້ສົ່ງເສີມດ້ານສິນເຊື່ອທະນາຄານໃຫ້ຜູ້ຜະລິດ 6 ເດືອນຕົ້ນປີນີ້,ສາຂາທະນາຄານຕ່າງໆປ່ອຍສິນເຊື່ອໄດ້ທັງໝົດ 300 ລ້ານກີບ ທຽບໃສ່ແຜນການປີປະຕິບັດໄດ້ 54,54%, ເກັບຕົ້ນທຶນຄືນໄດ້ 485 ລ້ານກີບ ທຽບໃສ່ແຜນການປີປະຕິບັດໄດ້ 77,84%, ເກັບດອກເບ້ຍໄດ້ທັງໝົດ 126 ລ້ານກີບ, ທຽບໃສ່ແຜນການປີປະຕິບັດໄດ້ 44,52%. ປັດຈຸບັນ,ຍັງມີເກັບໜີ້ກາຍສັນຍາ NPL ໄດ້ 655 ລ້ານກີບ ເທົ່າກັບ 15,81%ຂອງຍອດສິນເຊື່ອ ແລະ ດອກເບ້ຍຄ້າງ 90 ລ້ານກີບ.
ທິດທາງແຜນການປະຈໍາ 6 ເດືອນທ້າຍປີ 2024.
1. ທິດທາງລວມ: ສືບຕໍ່ໃຫ້ເມືອງໄຊສະຖານມີສະຖຽນລະພາບທາງດ້ານການເມືອງ, ສັງຄົມມີຄວາມ ສະຫງົບ ແລະ ເປັນລະບຽບຮຽບຮ້ອຍ.
– ພັດທະນາເສດຖະກິດໃຫ້ສືບຕໍ່ຂະຫຍາຍຕົວຕໍ່ເນື່ອງໄປພ້ອມກັບການແກ້ໄຂຄວາມຫຍຸ້ງຍາກທາງດ້ານເສດຖະກິດການເງີນ, ຮັບປະກັນການພັດທະນາຕາມທິດສົມດູນ, ສີຂຽວ ແລະ ຍືນຍົງ.
-ພັດທະນາຊັບພະຍາກອນທໍາມະຊາດໃຫ້ມີຄຸນນະພາບ ປັບປຸງຄຸນນະພາບການສຶກສາ, ສາທາລະ ນະສຸກ, ສ້າງໃຫ້ໄດ້ບຸກຄະລະກອນມີຄວາມຮູ້ ຄວາມສາມາດ, ມີສຸຂະພາບແຂງແຮງ, ມີລະບຽບວິໄນ ເປັນປັດໃຈຊຸກຍູ້ການພັດທະນາເສດຖະກິດ-ສັງຄົມ, ພັດທະນາຊົນນະບົດ, ແກ້ໄຂຄວາມທຸກຍາກ ເພື່ອຍົກສູງຄຸນນະພາບຊີວິດຂອງປະຊາຊົນໃຫ້ດີຂຶ້ນ.
– ຫັນປ່ຽນໂຄງປະກອບເສດຖະກິດໄປຕາມທິດຫັນເປັນອຸດສະຫະກໍາຂະໜາດນ້ອຍເທື່ອລະກ້າວ, ຊຸກຍູ້ການຜະລິດພາຍໃນທົດແທນການນໍາເຂົ້າ ແລະ ເປັນສິນຄ້າສົ່ງອອກຕາມທ່າແຮງຂອງເມືອງ.
– ການຜະລິດເສດຖະກິດຕິດພັນກັບການພັດທະນາສັງຄົມ, ການຮັກສາສິ່ງແວດລ້ອມ ແລະ ປ້ອງກັນຊາດ ປ້ອງກັນຄວາມສະຫງົບ.
2. ຄາດໝາຍສູ້ຊົນ: ຄາດຄະເນ ຮອດທ້າຍປີ 2024 ລວມຍອດລາຍຮັບປະມານ 151,95 ຕື້ກີບ, ສະເລ່ຍໃສ່ຫົວຄົນໜື່ງໄດ້ 8,8 ລ້ານກີບ ຫຼື ເທົ່າກັບ 440 ກວ່າໂດລາຕໍ່ຄົນຕໍ່ປີ, ການເພີ່ມຂຶ້ນຂອງເສດຖະກິດຕາມແຕ່ລະຂະແໜງການມີດັ່ງນີ້:
– ລາຍຮັບດ້ານກະສິກໍາ ກວມ 63% ເທົ່າກັບ 96,69 ຕື້ກີບ.
– ລາຍຮັບດ້ານອຸດສາຫະກໍາ ກວມ 4% ເທົ່າກັບ 5,26 ຕື້ກີບ.
– ລາຍຮັບດ້ານບໍລິການ ກວມເອົາ 33% ເທົ່າກັບ 50 ຕື້ກີບ ຂອງລາຍຮັບທັງໝົດ.
2.1. ດ້ານງົບປະມານ: ຄາດຄະເນລາຍຮັບ 6 ເດືອນທ້າຍປີ 2024 ຈັດເກັບໃຫ້ໄດ້ 305 ລ້ານກວ່າກີບ.
2.2 ມູນຄ່າການນໍາເຂົ້າ-ສົ່ງອອກ: ສູ້ຊົນເຮັດໃຫ້ມູນຄ່າການສົ່ງອອກສິນຄ້າໃຫ້ໄດ້ຕື່ມ 3,8 ຕື້ກີບ.
2.3 ດ້ານແຫຼ່ງທຶນເພື່ອການພັດທະນາ: ຕິດຕາມ, ຊຸກຍູ້ໂຄງການທີ່ຍັງຈັດຕັ້ງປະຕິບັດຢູ່ພາຍໃນເມືອງເປັນຕົ້ນແມ່ນ: ໂຄງການກໍ່ສ້າງຕ້ານເຈືອນເທດສະບານຈໍານວນ 4 ຈຸດ, ໂຄງການກໍ່ສ້າງຫ້ອງ ການຍຸຕິທໍາເມືອງ, ໂຄງການກໍ່ສ້າງ ຮ.ຮ ມຕົ້ນ ຊະນະໄຊ, ໂຄງການສ້ອມແປງຫຼັງລະດູຝົນຈໍານວນ 6 ໂຄງການ ໃຫ້ໄດ້ຈັດຕັ້ງປະຕິບັດທັນເວລາ ແລະ ຊຸກຍູ້ການລົງທຶນເອກະຊົນພາຍໃນ ແລະ ຕ່າງ ປະເທດຈໍານວນ 8 ໂຄງການໃຫ້ຢູ່ໃນຂອບເຂດຂອງກົດໝາຍ ແລະ ລະບຽບການ.
2.4 ດ້ານສິນເຊື່ອທະນາຄານ: ປ່ອຍສິນເຊື່ອໃຫ້ໄດ້ 430 ລ້ານກີບ, ເກັບໜີ້ຄົບສັນຍາ ແລະ ກາຍສັນຍາໃຫ້ໄດ້ 170 ລ້ານກີບ ແລະ ເກັບດອກເບ້ຍໃຫ້ໄດ້ 157 ລ້ານກີບ.
3. ການຈັດຕັ້ງປະຕິບັດບັນດາຄາດໝາຍດ້ານເສດຖະກິດ:
3.1 ວຽກງານກະສິກໍາ ແລະ ປ່າໄມ້: ລົງຕິດຕາມຊຸກຍູ້ການປູກ, ການບົວລະບັດຮັກສາພືດລະດູຝົນ, ຊຸກຍູ້ຕິດຕາມການເກັບກູ້ຜົນຜະລິດຂອງປະຊົນ 21 ບ້ານໃນເນື້ອທີ່ 5.384 ຮຕ ໃນນີ້: ເຂົ້ານາປີເນື້ອທີ່ 138 ຮຕ, ເຂົ້າເນີນສູງ 2.400 ຮຕ ແລະ ອື່ນໆ 2.846 ຮຕ, ເຝົ້າລະວັງການລະບາດຂອງສັດຕູພືດ, ສັກຢາປ້ອງກັນພະຍາດສັດຕາມລະດູການໃຫ້ໄດ້ 35% ຂອງຈໍານວນຝຸງສັດ (ງົວ-ຄວາຍ).
3.2 ວຽກງານອຸດສາຫະກໍາ ແລະ ການຄ້າ: ຕິດຕາມຄຸ້ມຄອງ, ປັບປຸງຫົວໜ່ວຍທຸລະກິດ ແລະ ຂຶ້ນທະບຽນວິສາຫະກິດໃຫ້ໄດ້ 3 ທະບຽນ, ອອກໃບຢັ້ງຢືນການມີຕົວຕົນໃຫ້ແກ່ຫົວໜ່ວຍທຸລະກິດທີ່ມີການເຄື່ອນໄຫວ ດໍາເນີນທຸລະກິດໃຫ້ສໍາເລັດ, ຕິດຕາມກວດກາ ແລະ ຄຸ້ມຄອງລາຄາສິນຄ້າການເຄື່ອນຍ້າຍໃຫ້ຖືກຕ້ອງຕາມລະບຽບການ.
3.3 ວຽກງານພະລັງງານ ແລະ ໄຟຟ້າ: ຕິດຕັ້ງໄຟຟ້າເຂົ້າເຮືອນປະຊາຊົນໃຫ້ໄດ້ 10 ຄອບຄົວຂຶ້ນໄປ, ຄາດຄະເນການນໍາຊື້ໄຟຟ້າເຂົ້າໃຫ້ໄດ້ 481.000 Kwh, ຈໍາໜ່າຍໃຫ້ໄດ້ 430.000 Kwh ແລະ ຄາດຄະເນພະລັງງານຕົກເຮ່ຍໃຫ້ຢູ່ໃນລະດັບບໍ່ເກີນ 10%
3.4 ວຽກງານໂຍທາທິການ ແລະ ຂົນສົງ: ສືບຕໍ່ຕິດຕາມ ກວດກາການກໍ່ສ້າງໂຄງການຢູ່ພາຍໃນເມືອງເປັນຕົ້ນແມ່ນ ໂຄງການຕ້ານເຈື່ອນ 4 ຈຸດຢູ່ເທດສະບານ, ໂຄງການກໍ່ສ້າງຫ້ອງການຍຸຕິທໍາ ແລະ ໂຄງການກໍ່ສ້າງໂຮງຮຽນເພີ່ມ ມ ຕົ້ນ ຊະນະໄຊ ໃຫ້ໄດ້ຮັບການຈັດຕັ້ງປະຕິບັດສໍາເລັດຕາມສັນຍາ.
3.5 ວຽກງານຊັບພະຍາກອນທໍາມະຊາດ ແລະ ສິ່ງແວດລ້ອມ: ຂຶ້ນທະບຽນອອກໃບຕາດິນໃຫ້ໄດ້ 500 ຕອນ, ຢັ້ງຢືນສິ່ງແວດລ້ອມໃຫ້ບັນດາຫົວໜ່ວຍທຸລະກິດໃຫ້ໄດ້ 10 ຫົວໜ່ວຍ.
4. ການຈັດຕັ້ງປະຕິບັດຄາດໝາຍດ້ານວັດທະນະທໍາ-ສັງຄົມ:
4.1 ວຽກງານສຶກສາທິການ ແລະ ກິລາ: ຊຸກຍູ້ໃຫ້ບັນດາຕົວເລກຄາດໝາຍດ້ານການສຶກສາທີ່ຍັງບໍ່ທັນບັນລຸໃຫ້ບັນລຸຕື່ມອີກ 5 ຄາດໝາຍ ແລະ ຈັດຕັ້ງການສອບເສັງຈົບຊັ້ນມັດທະຍົມຕອນປາຍ ມ4 ແລະ ມ7.
1.2 ວຽກງານສາທາລະນະສຸກ: ກຽມປະກາດບ້ານຢຸດຕິການຖ່າຍຊະຊາຍໃຫ້ໄດ້ ຈໍານວນ 4 ບ້ານ ແລະ ປະກາດເມືອງເປັນເມືອງຢຸດຕິການຖ່າຍຊະຊາຍໃຫ້ສໍາເລັດ. ລົງປະເມີນບ້ານແບບຢ່າງສາທາລະນະສຸກແບບຍືນຍົງໃຫ້ໄດ້ 21 ບ້ານ, ລົງເຄື່ອນທີ່ວຽກງານກວດພະຍາດຈໍານວນ 21 ບ້ານ, ສ້າງບ້ານໂພຊະນາການຕົວແບບໃຫ້ໄດ້ 2 ບ້ານ.
1.3 ວຽກງານແຮງງານ ແລະ ສະຫວັດດີການ-ສັງຄົມ: ສົມທົບກັບພາກສ່ວນທີ່ກ່ຽວຂ້ອງລົງກວດກາບັນດາຫົວຫນ່ວຍແຮງງານພາຍໃນເມືອງໃຫ້ໄດ້ 2 ຄັ້ງ, ປະເມີນຄອບຄົວພັດທະນາດ້ານແຮງານຂັ້ນບ້ານໃຫ້ໄດ້ 1 ບ້ານ, ປະກອບເອກະສານເຮັດບັດ ອປລ ໃຫ້ພະນັກງານ-ລັດ ຖະກອນໃຫ້ໄດ້ 7 ທ່ານ ແລະ ລະດົມເງິນກອງທຶນໄພພິບັດໃຫ້ໄດ້ 8 ລ້ານຂຶ້ນເມືອ.
1.4 ວຽກງານ ຖະແຫຼ່ງຂ່າວ, ວັດຖະນະທໍາ ແລະ ທ່ອງທ່ຽວ: ເກັບກໍາຂ່າວ, ຂຽນຂ່າວອ່ານອອກໂທລະໂຄ່ງຂອງເມືອງໃຫ້ໄດ້ 73 ຂ່າວຂຶ້ນໄປ, ສ້າງຄອບຄົວວັດທະນະທໍາໃຫ້ໄດ້ 93 ຄອບ ຄົວ, ກະກຽມ ຮັບຮອງເປັນບ້ານວັດທະນະທໍາໃໝ່ໃຫ້ໄດ້ 2 ບ້ານ 3 ກົມກອງ, ດຶງດູດນັກທ່ອງທ່ຽວໃຫ້ເຂົ້າມາທ່ອງທ່ຽວຢູ່ພາຍໃນເມືອງ ໃຫ້ໄດ້ 268 ເທື່ອຄົນ ແລະ ກຽມຄວາມພ້ອມເປີດປີທ່ອງທ່ຽວລາວປີ 2024 ຕິດພັນກັບບຸນດອກແດງຂອງເຜົ່າໄປຣ່.
4.5 ວຽກງານ ອື່ນໆ ລວມທັງການພົວພັນກັບຫຼາຍຂະແໜງການ: ສືບຕໍ່ປະຕິບັດຕາມແຜນການກຳນົດພະນັກງານນຳພາ-ຄຸ້ມຄອງ ແລະ ຄວາມຮຽກຮ້ອງຕ້ອງການຂອງໜ້າທີ່ວຽກງານຕິດພັນກັບການໝູນ ວຽນສັບປ່ຽນໜ້າທີ່ ແລະ ບ່ອນປະຈຳການ ຂອງພະນັກງານ ຢູ່ບັນດາຫ້ອງການ, ກົມກອງອ້ອມຂ້າງເມືອງ ໃຫ້ແທດເໝາະກັບສະພາບຕົວຈິງໃນປັດຈຸບັນ.
ສືບຕໍ່ລົງເຜີຍແຜ່ດໍາລັດວ່າດ້ວຍການຊ່ວຍເຫຼືອທາງດ້ານກົດໝາຍ ແລະ ໃຫ້ຄໍາປຶກສາທາງດ້ານກົດໝາຍແບບເຄື່ອນທີ່ໃຫ້ໄດ້ 15 ບ້ານ, ລົງໂຄສະນາ ແລະ ເຜີຍແຜ່ ພ້ອມທັງຝຶກອົບຮົມໃຫ້ຄະນະໄກ່ເກ່ຍຂໍ້ຂັດແຍ່ງຂັ້ນບ້ານໃຫ້ 15 ບ້ານ ແລະ 5 ໂຮງຮຽນ ແລະ ສ້າງໃຫ້ໄດ້ບ້ານແບບຢ່າງປະຕິບັດກົດໝາຍໃຫ້ໄດ້ 1 ບ້ານ.
5. ມາດຕະການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປະຈໍາ 6 ເດືອນທ້າຍປີ 2024.
1. ບັນດາຫ້ອງການ, ຂະແໜງການ, ບັນດາລັດວິສະຫະກິດອ້ອມຂ້າງ ຕ້ອງນຳເອົາແຜນການດັ່ງກ່າວ ໄປຈັດຕັ້ງຜັນຂະຫຍາຍເປັນແຜນການ, ແຜນງານ, ໂຄງການລະອຽດຂອງຕົນປະກອບດ້ວຍແຜນວຽກ, ແຜນງົບປະມານ ແລະ ແຜນຄົນຢ່າງລະອຽດຈະແຈ້ງ, ພ້ອມທັງຊີ້ນຳຈັດຕັ້ງປະຕິບັດ ສອດ ຄ່ອງແທດເໝາະກັບສະພາບເງື່ອນໄຂຕົວຈິງຂອງເມືອງໃນປັດຈຸບັນ.
2. ສືບຕໍ່ຍາດແຍ່ງການຊ່ວຍເຫຼືອ ການສະໜັບສະໜູນດ້ານທຶນຮອນຈາກຫຼາຍພາກສ່ວນທັງພາຍໃນ ແລະ ຕ່າງປະເທດ, ເພື່ອຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມ, ສ້າງເງື່ອນໄຂໃຫ້ມີສ່ວນຮ່ວມຈາກທຸກຫົວໜ່ວຍທຸລະກິດ, ລັດ, ເອກະຊົນ, ລວມໝູ່, ບຸກຄົນ ປະກອບສ່ວນເຂົ້າໃນການພັດທະນາຂອງເມືອງ.
3. ເຂັ້ມງວດໃນການຈັດເກັບລາຍຮັບພາຍໃນໃຫ້ຄົບຖ້ວນ ແລະ ໃຫ້ສາມາດບັນລຸຕາມແຜນການ, ກໍານົດໃຫ້ໄດ້ຢ່າງລະອຽດກ່ຽວກັບຖານລາຍຮັບທີ່ມີ ແລະ ຄົ້ນຄວ້າຖານລາຍຮັບໃໝ່ໃນໄລຍະຍາວໂດຍສະເພາະແມ່ນໃຫ້ເລັ່ງໃສ່ດ້ານທີ່ດິນ ແລະ ການລົງທຶນເອກະຊົນໃຫ້ຫຼາຍຂຶ້ນ.
4. ສືບຕໍ່ເອົາໃຈໃສ່ຊຸກຍູ້ການຈັດຕັ້ງໂຄງການລົງທຶນຂອງລັດໃຫ້ສຳເລັດ,ມີປະສິດທິຜົນຫຼຸດຜ່ອນໜີ້ສິນຫຼີກລ່ຽງປະຕິບັດໂຄງການກ່ອນເອົາເຂົ້າແຜນ, ໂດຍເພີ່ມການຕິດຕາມກວດກາເປັນປະຈຳ.
5. ສ້າງລະບຽບການຄຸ້ມຄອງ, ການສົ່ງເສີມຫົວໜ່ວຍທຸລະກິດ, ໂຄງສ້າງ ແລະ ການຈັດຕັ້ງການຜະ ລິດຄຸ້ມຄອງລາຄາສິນຄ້າພາຍໃນທີ່ກະທົບຕໍ່ການດຳລົງຊີວິດປະຈຳວັນໃຫ້ສົມເຫດສົມຜົນ ມີຖານຂໍ້ມູນດ້ານການສົ່ງອອກໃຫ້ຊັດເຈນ.
ນຳໃຊ້ທ່າແຮງຂອງເມືອງໃຫ້ມີປະສິດທິຜົນໂດຍສຶກສາເປັນໂຄງການລະອຽດ ເພື່ອດຶງດູດໃຫ້ນັກລົງທຶນເຂົ້າມາລົງທຶນໃນເມືອງຕາມທ່າແຮງ ແລະ ຄວາມອາດສາມາດຕົວຈິງ.