ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ໄຊສົມບູນ ສຸມໃສ່ສ້າງບ້ານສາມັກຄີປອງດອງຕິດພັນກັບການແກ້ໄຂຄວາມທຸກຍາກຂອງປະຊາຊົນ

ມາຮອດປັດຈຸບັນ, ແຂວງໄຊສົມບູນ ສາມາດປະກາດຮັບ ຮອງຄອບຄົວສາມັກຄີປອງດອງໄດ້ແລ້ວ 8.907 ຄອບຄົວ ແລະ ຮັບຮອງບ້ານສາມັກຄີປອງດອງໄດ້ 55 ບ້ານ ໃນຈໍານວນຄອບຄົວທີ່ໄດ້ເກັບກໍາຂໍ້ມູນ ແລະ ວາງແຜນການທັງໝົດ 12.482 ຄອບ ຄົວ, 78 ບ້ານພາຍໃນແຂວງ.

ທ່ານ ເລັ່ງຊົ່ງ ຕົ່ງສີ, ປະທານແນວລາວສ້າງຊາດແຂວງໄຊສົມບູນ ໃຫ້ຮູ້ໃນໂອກາດລາຍງານຕໍ່ກອງປະຊຸມຄົບຄະນະກໍາມະການສູນກາງແນວລາວສ້າງຊາດ ຄັ້ງທີ 5 ສະໄໝທີ X ຈັດຂຶ້ນຢູ່ນະຄອນຫລວງວຽງຈັນ ໃນວັນທີ 11-12 ສິງ ຫາ 2020 ວ່າ: ການສ້າງຄອບຄົວ ແລະ ບ້ານສາມັກຄີປອງ ດອງຢູ່ແຂວງໄຊສົມບູນ ໄດ້ເລີ່ມຈັດຕັ້ງປະຕິບັດມາແຕ່ປີ 2017 ໂດຍປະຕິບັດຕາມການຕົກລົງ ແລະ ການແນະນໍາຕ່າງຯ ຂອງສູນກາງແນວລາວສ້າງຊາດ ເຊີ່ງປະຕິບັດຕາມ 5 ຂັ້ນຕອນ ຄື: 1). ລົງເກັບກໍາຂໍ້ມູນຂອງຄອບຄົວ ຫລື ບ້ານ ແລະ ເອົາຂໍ້ມູນດັ່ງກ່າວມາຄົ້ນຄ້ວາ, ຂຽນແຜນ. 2). ຈັດກອງປະຊຸມເຊື່ອມຊຶມເອກະສານທີ່ກ່ຽວຂ້ອງ, ຜ່ານແຜນການ ແລະ ເປີດຂະບວນການແຂ່ງຂັນ. 3). ຕິດຕາມ, ຊຸກຍູ້. 4). ກວດກາ ແລະ ປະເມີນຜົນ ແລະ 5). ຈັດພິທີຮອງຮັບ.

ປະທານແນວລາວສ້າງຊາດແຂວງໄຊສົມບູນ ໃຫ້ຮູ້ຕື່ມວ່າ: ດ້ວຍຄວາມເປັນຫ່ວງເປັນໄຍຕໍ່ຊີວິດການເປັນຢູ່ຂອງປະຊາຊົນ, ສູນກາງແນວລາວສ້າງຊາດ ໄດ້ລະດົມເອົາກຸ່ມ ບໍລິສັດພົງສະຫວັນ ຈໍາກັດ ເຂົ້່ໄປລົງທຶນຈັດຕັ້ງປະຕິບັດໂຄງການທົດລອງສ້າງຄອບຄົວ ແລະ ບ້ານສາມັກຄີປອງ ດອງຕິດພັນກັບການແກ້ໄຂຄວາມທຸກຍາກຂອງປະຊາຊົນຢູ່ຈຸດສຸມໂພນສະຫວາດ, ເມືອງລ້ອງຊານ, ກວມເອົາ 8 ບ້ານ, ມີ 1.313 ຄອບຄົວ ເຊີ່ງເປັນໂຄງການຊຸກຍູ້ສົ່ງເສີມພັດທະນາກະສິກໍາຄົບວົງຈອນ ແລະ ພັດທະນາການທ່ອງ ທ່ຽວປະຫວັດສາດ, ວັດທະນທໍາ ແລະ ທໍາມະຊາດ. ມາຮອດປັດຈຸບັນ ໂຄງການດັ່ງກ່າວ ໄດ້ສໍາເລັດແລ້ວຫລາຍໜ້າວຽກ ເປັນຕົ້ນ: ສ້າງສູນເຝິກວິຊາຊີບ, ຄອກສັດ, ມອບສັດລ້ຽງ, ສ້າງກອງທຶນບ້ານ ແລະ ອື່ນຯ ລວມມູນຄ່າ 12 ຕື້ກ່ວາກີບ.

ແຂວງໄຊສົມບູນ ໄດ້ຮັບການປະກາດສ້າງຕັ້ງຂຶ້ນໃນວັັນທີ 13 ທັນວາ 2013, ເປັນແຂວງທີ 18 ຂອງ ສປປ ລາວ, ປະກອບມີ 5 ເມືອງ, 89 ບ້ານ, 14.504 ຄອບຄົວ, ພົນລະເມືອງທັງໝົດ 89.853 ຄົນ, ຍິງ 43.129 ຄົນ, ປະກອບມີທັງໝົດ 10 ຊົນເຜົ່າ.

ຂ່າວ: ບຸນຕຽງ ຈັນທະວົງ