ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໄດ້ກິນເຂົ້າໃຫ້ຄິດເຖິງຄຸນນາ ໄດ້ກິນປາຂໍໃຫ້ຄິດເຖິງຄຸນນໍ້າ
==========
ນັບແຕ່ໄດ້ຮັບການສ້າງຕັ້ງຂຶ້ນ ໃນວັນທີ 20 ມັງກອນ 1949 ກອງທັບລາວອິດສະຫລະ ກໍຄືກອງທັບປະຊາຊົນລາວໃນປະຈຸບັນ ກໍໄດ້ຮັບພາລະກໍາອັນໜັກໜ່ວງຕໍ່ສູ້ກັບຈັກກະພັດຜູ້ຮຸກຮານ ແລະລູກແຫລ້ງຕີນມືທີ່ມີອາວຸດ, ພາຫະນະສົງຄາມ ແລະກໍາລັງພົນທີ່ເໜືອກວ່າ ເພື່ອທໍາການຕໍ່ສູ້ປົດປ່ອຍຊາດ. ບັນດານັກຮົບປະຕິວັດ ໄດ້ຕໍ່ສູ້ກັບສັດຕູຜູ້ຮຸກຮານຢ່າງອົງອາດກ້າຫານ ຍອມເສຍສະຫລະທຸກຢ່າງຈົນສາມາດປົດປ່ອຍປະເທດຊາດໄດ້ຢ່າງສົມບູນ ໃນວັນທີ 2 ທັນວາ 1975 ມີນັກຮົບຫລາຍທ່ານເສຍສະຫລະຊີວິດ, ເສຍອົງຄະ ຫລື ສູນເສຍຄົນຮັກໃນຄອບຄົວ, ຍ້ອນການເສຍສະຫລະອັນສູງສົ່ງຂອງນັກຮົບປະຕິວັດໃນມື້ນັ້ນ ຈີ່ງເຮັດໃຫ້ປະເທດຊາດ ແລະປະຊາຊົນລາວບັນດາເຜົ່າຢູ່ເຢັນເປັນສຸກ ແລະຈະເລີນຮຸ່ງເຮືອງມາເຖິງທຸກວັນນີ້.
ພັນໂທ ຄໍາໝັ້ນ ຂຸນຈັນທະ, ວິລະຊົນແຫ່ງຊາດ ແມ່ນຜູ້ໜື່ງທີ່ໄດ້ຮ່ວມກັບນັກຮົບປະຕິວັດທ່ານອື່ນໆໃນຂະບວນການຕໍສູ້ປົດປ່ອຍຊາດ, ໂດຍທ່ານໄດ້ຫວນຄືນໂດຍຫຍໍ້ໃຫ້ຟັງວ່າ: ທ່ານໄດ້ເຂົ້າເປັນທະຫານປະຕິວັດ ໃນປີ 1966 ຢູ່ສະຫະເມືອງ90 ເຊິ່ງແມ່ນເມືອງຄໍາເກີດ ແຂວງບໍລິຄໍາໄຊ ໃນປະຈຸບັນ, ຈາກນັ້ນສືບຕໍ່ໄປຮຽນວິຊາການທະຫານຢູ່ຫວຽດນາມ 9 ເດືອນ ພາຍຫລັງຮຽນຈົບແລ້ວ ໄດ້ຮັບການຊັບຊ້ອນໄປປະຕິບັດໜ້າທີ່ຢູ່ກອງຮ້ອຍ 15 ກອງພັນທີສອງ ຕົ້ນຕໍແມ່ນເຄື່ອນໄຫວສູ້ຮົບຢູ່ເຂດຊຽງຂວາງ, ຫລວງພະບາງ , ຫົວພັນ ແລະຜົ້ງສາລີ ລວມທັງໝົດ 22 ບັ້ນຮົບທີ່ທ່ານໄດ້ເຂົ້າຮ່ວມ, ໃນນັ້ນບັ້ນຮົບໃຫ່ຍໆມີ 4 ບັ້ນຮົບຄື: ໂອເດແອນ, ທະນົງກຽດ, ກູ້ກຽດ ແລະບັ້ນຮົບບໍ່ຕ່າວຄືນ.
ພາຍຫລັງບັ້ນຮົບກູ້ກຽດ ທ່ານໄດ້ຮັບນາມມະຍົດນັກຮົບແຂ່ງຂັນ ຈາກນັ້ນໄດ້ໄປຮຽນວິຊາການທະຫານຕີພິເສດ ແລ້ວກັບຄືນໄປຮັບໃຊ້ຢູ່ບັ້ນຮົບຢູ່ຊຽງຂວາງ ຄື: ບັ້ນຮົບ ຢູ່ສັນໂຈ, ພູວຽງ ຈາກນັ້ນສືບຕໍ່ເຄື່ອນໄຫວຕີສັດຕູລົງຮອດເມືອງກາສີ ແຂວງວຽງຈັນ ເຊິ່ງປັ້ນຮົບຕີປ້ອມປືນໃຫ່ຍສັດຕູຢູ່ເມືອງກາສີນີ້ ເຮັດໃຫ້ ພັນໂທ ຄໍາໝັ້ນ ຂຸນຈັນທະ ໄດ້ນາມມະຍົດວິລະຊົນແຫ່ງຊາດຢູ່ສະໜາມຮົບແຫ່ງນີ້.
ການວາງແຜນຕີຄ້າຍປືນໃຫ່ຍຂອງສັດຕູຢູ່ເມືອງກາສີ ເລີ່ມຂື້ນໃນເດືອນ ກຸມພາ 1971 ໂດຍແມ່ນກອງຮ້ອຍ 15 ແລະ ກອງຮ້ອຍ16 ກອງພັນທີສອງ ໃນນັ້ນໝວດຂອງພັນໂທຄໍາໝັ້ນ ຂຸນຈັນທະ ປະກອບມີ 8ສະຫາຍ ໂດຍເພິ່ນເປັນຜູ້ບັນຊາ ເຊິ່ງຂະນະນັ້ນຍັງເປັນຮອງໝວດ ຍ້ອນຫົວໜ້າໝວດຄາວຽກຄອບຄົວ, ຈຸດທີ່ໄປຕີແມ່ນປ້ອມປືນໃຫ່ຍ 105 ແລະ 155 ມມ ຂອງຝ່າຍສັດຕູ ພາຍຫລັງພະຍາຍາມໄປສືບຂ່າວເຖິງ 3 ຄັ້ງ ເຊິ່ງ 2 ຄັ້ງ ພົບເຫັນປະຊາຊົນຖືວ່າເສຍລັບ ແລ້ວກັບຄືນກົມກອງ ເຊິ່ງຄັ້ງທີ 3 ຈຶ່ງໄປກາງຄືນ ເພື່ອເກັບກໍາສະພາບທີ່ຕັ້ງຄ້າຍຂອງທະຫານສັດຕູໃຫ້ລະອຽດ.
ຄ້າຍປືນໃຫ່ຍເມືອງກາສີ ຕັ້ງຢູ່ເທິງພູສູງ ເຊິ່ງຈະເຂົ້າເມືອງກາສີ ຕ້ອງຜ່ານພູໜ່ວຍນີ້. ເປັນພູສູງກວ່າໝູ່ໃນເຂດນີ້ ສັດຕູໄດ້ສ້າງສິ່ງກີດຂວາງໄວ້ຢ່າງແໜ້ນໜາເຖິງ 3 ຊັ້ນ, ຊັ້ນທີ1 ແມ່ນຮົ້ວໜາມໝາກຈັບຖີ່ 4 ຮາວ ຈາກນັ້ນເອົາໜາມໝາກຈັບສານໄຂ່ວກັນໄປມາ ຄົນ ແລະ ສັດບໍ່ສາມາດຜ່ານໄດ້, ຊັ້ນທີ 2 ແມ່ນຮົ້ວໜາມໝາກຈັບໃຍໝາກບວບ ໂດຍເອົາສອງໂຄ້ງມາວາງຮຽງກັນ ແລ້ວເອົາອີກໂຄ້ງໜຶ່ງມາວາງຢອງໄວ້, ຊັ້ນທີ3 ແມ່ນໃຊ້ໜາມໝາກຈັບລ້ອມແໜ້ນໜາຄືຄອກໝູ.
ພາຍຫລັງເປີດສາກບຸກຕີ ແລະທໍາລາຍຄ້າຍສັດຕູໄປໄດ້ໄລຍະໜຶ່ງ ກອງຮ້ອຍ 16 ກໍຖອຍອອກໄປບ່ອນປອດໄພ ຍັງເຫລືອແຕ່ກອງຮ້ອຍ15 ເຊິ່ງແມ່ນໝວດຂອງສະຫາຍຄໍາໝັ້ນ ມີພຽງແຕ່ 3 ສະຫາຍ ຍ້ອນບໍ່ມີເຄື່ອງສື່ສານຕິດຕໍ່ກັບຂັ້ນເທິງ, ເຊິ່ງລະບຽບຂອງທະຫານປະຕິວັດບໍ່ມີຄໍາສັ່ງໃຫ້ຖອນ ຈໍາເປັນຕ້ອງສູ້ຮົບຕໍ່ໄປ ເຊິ່ງການສູ້ຮົບເລີ່ມແຕ່ເວລາ 5ໂມງເຊົ້າ ຈົນເຖິງ 17ໂມງ ພໍເຖິງຕອນສວຍສັດຕູໃຊ້ກໍາລັງໜຶ່ງກອງພັນປິດລ້ອມ ພ້ອມບຸກຕີເຂົ້າໃສ່ກາງຄ້າຍໝົດມື້ ໂດຍໃຊ້ຍົນເຕ28, ແອຟ105ຖິ້ມລະເບີດລົງມາໃສ່ ບວກກັບທະຫານລາບ ແລະ ລົດອາແອມ 3 ຄັນ ບຸກຕີຢ່າງຮ້າຍແຮງ ເວລານັ້ນພວກເຮົາອາໄສຂຸມມໍລະກົດຂອງສັດຕູ, ອາວຸດຝ່າຍພວກເຮົາໝົດແລ້ວ ຍັງເຫລືອແຕ່ ເບ40 ຈໍານວນ 2ລູກ ດັ່ງນັ້ນຈຶ່ງໃຊ້ປືນທີ່ຍຶດໄດ້ຈາກສັດຕູ ແລະ ເບ40 ສອງລູກສຸດທ້າຍທໍາລາຍລົດອາແອມ2ຄັນ ພັງລະລາຍ ສ່ວນເຫລືອອີກໜຶ່ງຄັນກໍຖອຍໜີອອກໄປ ພວກເຮົາກໍອາໄສເວລານີ້ຖອນອອກມາບ່ອນປອດໄພ.
ໃນບັ້ນຮົບນີ້ ສາມາດທໍາລາຍປືນໃຫ່ຍ 105 ແລະ155 ມມ ຂອງສັດຕູໄດ້ 4ກະບອກ, ໂດຍແມ່ນທ່ານຄໍາໝັ້ນ ເອົາລະເບີດມືປ່ອນລົງເລົາປືນທັງ 4 ກະບອກ, ທໍາລາຍລົດອາແອມໄດ້ 2 ຄັນ, ຍຶດປືນແອມ 16 ໄດ້ 35 ກະບອກ, ຍຶດລະເບີດມືໄດ້ 8 ແກັດ ແລະ ເຄື່ອງສິນເສິກອື່ນໆຈໍານວນຫລວງ ຫລາຍ.
ສິ່ງທີ່ຍັງຈົດຈໍາບໍ່ລືມໃນບັ້ນຮົບນີ້ ພາຍຫລັງຕີປ້ອມປືນໃຫ່ຍກາສີແລ້ວ ພວກເຮົາໄດ້ຖອນກໍາລັງອອກມາ , ແຕ່ຂະນະທີ່ກໍາລັງຖອນອອກມານັ້ນ ມີອ້າຍນ້ອງຫວຽດນາມທີ່ເປັນຊ່ຽວຊານຊ່ວຍວຽກຢູ່ສໍານັັກກອງພັນເຂົ້າມາຊ່ວຍພວກເຮົາ ແຕ່ເຂົ້າມາທາງຂ້າງ ໃນເວລາດຽວກັນ ພວກເຮົາກໍບໍ່ສາມາດສື່ສານກັນໄດ້ ທັງບໍ່ຮູ້ສັນຍານລັບ ຝ່າຍອ້າຍນ້ອງຫວຽດນາມເຂົ້າໃຈວ່າພວກເຮົາເປັນຝ່າຍສັດຕູ ຈຶ່ງເກີດຍິງປະທະກັນຢ່າງໜັກ ແຕ່ທ່ານຄໍາໝັ້ນສັງເກດເຫັນໝວກຂອງອ້າຍນ້ອງຫວຽດນາມ ແລະສຽງປືນທີ່ດັງອອກມາແມ່ນສຽງປືນອາກາ ທ່ານຄໍາໝັ້ນຄິດໃນໃຈວ່າຕ້ອງແມ່ນອ້າຍນ້ອງທະຫານຫວຽດນາມ ຈຶ່ງຮ້ອງອອກໄປໃສ່ວ່າ: ຢ່າຍິງ ! ພວກເຮົາແມ່ນກອງພັນທີສອງ ! ຈາກນັ້ນສຽງງປືນກໍງຽບລົງທັນທີ ແລ້ວຕ່າງຝ່າຍກໍແລ່ນເຂົ້າຫາກັນ ແລະໂອບກອດກັນດ້ວຍຄວາມດີອົກດີໃຈ ສະຫາຍຫວຽດນາມກ່າວວ່າ ພວກສະຫາຍເກັ່ງຫລາຍ ໝວດດຽວ ກໍສາມາດຕີສັດຕູເປັນກອງພັນຈົນແຕກທະລາຍໄປໄດ້.
ໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75ປີ ພັນໂທ ຄໍາໝັ້ນ ຂຸນຈັນທະ ວິລະຊົນແຫ່ງຊາດ ໄດ້ອວຍພອນໃຫ້ການນໍາພັກ- ລັດ ພ້ອມດ້ວຍນາຍ ແລະ ພົນທະຫານທຸກທົ່ວໜ້າໃນທົ່ວກໍາລັງປະກອບອາວຸດ ຈົ່ງເສີມຂະຫຍາຍບົດບາດເປັນກໍາລັງຫລັກແຫ່ງ ໃນການປົກປັກຮັກສາ ແລະ ສ້າງສາປະເທດຊາດ ພັດທະນາກອງທັບ ນໍາເອົາສິ່ງກ້າວໜ້າ ເຕັກນິກທັນສະໄໝມາພັດທະນາກອງທັບໃຫ້ທັນສະໄໝຂຶ້ນເທື່ອລະກ້າວ, ພ້ອມກັນນັ້ນກໍໃຫ້ຄິດເຫັນບຸນຄຸນຂອງຄົນຮຸ່ນກອນ ທີ່ຍອມເສຍສະຫລະທຸກສິ່ງຢ່າງເພື່ອພາລະກິດຂອງການປະຕິວັດ ດັ່ງຄໍາພັງເພີຍບູຮານເພິ່ນວ່າ ໄດ້ກິນເຂົ້າໃຫ້ຄິດເຖິງຄຸນນາ ໄດ້ກິນປາຂໍໃຫ້ຄິດເຖິງຄຸນນໍ້າ.
ໂດຍ: ຄໍາກອງ