ລັດວິສາຫະກິດໄຟຟ້າລາວ ໄດ້ສະຫລຸບການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ໃນວັນທີ 30 ກໍລະກົດ 2024 ໂດຍມີ ທ່ານ ທອງພັດ ອິນທະວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ປະທານສະພາບໍລິຫານ ລັດວິສາຫະກິດໄຟຟ້າລາວ, ມີຄະນະອຳນວຍການ, ພະນັກງານຫລັກແຫລ່ງ ຂອງລັດວິສາຫະກິດໄຟຟ້າລາວ, ພ້ອມດ້ວຍພາກສ່ວນທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ ເຂົ້າຮ່ວມ ແບບເຊິ່ງໜ້າ ແລະ ແບບອອນລາຍ. ໃນຂະນະ 6 ເດືອນຕົ້ນປີ 2024 ນີ້, ລັດວິສາຫະກິດໄຟຟ້າລາວ ໄດ້ສຸມໃສ່ວຽກງານການປັບປຸງ-ຂະຫຍາຍລະບົບສາຍສົ່ງ-ສະຖານີໄຟຟ້າ ແລະ ລະບົບຈຳໜ່າຍໄຟຟ້າ ເພື່ອໃຫ້ສາມາດນໍາສົ່ງພະລັງງານໄຟຟ້າ ຈາກແຫລ່ງຜະລິດ 98 ແຫ່ງ, ກໍາລັງຕິດຕັ້ງ 4.511,8 MW ໃຫ້ໄປເຖິງຜູ້ຊົມໃຊ້ໄຟຟ້າທົ່ວປະເທດ ທີ່ມີກໍາລັງຊົມໃຊ້ໄຟຟ້າສູງສຸດ 2.015 MW ຢ່າງພຽງພໍ ແລະ ມີຄວາມສະຖຽນລະພາບ.
ທ່ານ ວົງສະກຸນ ຍິ່ງຍົງ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ໄດ້ໃຫ້ຮູ້ວ່າ: ໃນໄລຍະ 6 ເດືອນຕົ້ນປີ 2024 ຜ່ານມາ ລັດວິສາຫະກິດໄຟຟ້າລາວ ໄດ້ສຸມໃສ່ຈັດຕັ້ງປະຕິບັດຫລັກການ ແລະ ນະໂຍບາຍ ການດໍາເນີນທຸລະກິດຂອງ ໄຟຟ້າລາວ ໃນໄລຍະໃໝ່, ຕີຖອຍບັນດາປາກົດການຫຍໍ້ທໍ້ຕ່າງໆ ທີ່ກະທົບໃສ່ ເພື່ອເປັນພື້ນຖານໃຫ້ການດໍາເນີນວຽກງານອື່ນໆ ໃຫ້ມີປະສິດທິຜົນ. ພ້ອມນັ້ນ, ກໍໄດ້ພະຍາຍາມທຸກວິທີທາງ ເພື່ອນໍາໃຊ້ທ່າແຮງທີ່ມີຢູ່ ສ້າງລາຍຮັບເພີ່ມເຂົ້າ ໄຟຟ້າລາວ ຈໍານວນໜຶ່ງ ແລະ ປະຢັດລາຍຈ່າຍບໍລິຫານຕ່າງໆ ເພື່ອຫລຸດຜ່ອນລາຍຈ່າຍ ທີ່ບໍ່ຈໍາເປັນລົງ ເຊິ່ງໃນໄລຍະ 6 ເດືອນຕົ້ນປີ 2024 ນີ້, ລັດວິສາຫະກິດໄຟຟ້າລາວ ໄດ້ສຸມໃສ່ວຽກງານການປັບປຸງ-ຂະຫຍາຍລະບົບສາຍສົ່ງ-ສະຖານີໄຟຟ້າ ແລະ ລະບົບຈຳໜ່າຍໄຟຟ້າ ເພື່ອໃຫ້ສາມາດນໍາສົ່ງພະລັງງານໄຟຟ້າ ຈາກແຫລ່ງຜະລິດ 98 ແຫ່ງ, ກໍາລັງຕິດຕັ້ງ 4.511,8 MW ໃຫ້ໄປເຖິງຜູ້ຊົມໃຊ້ໄຟຟ້າທົ່ວປະເທດ ທີ່ມີກໍາລັງຊົມໃຊ້ໄຟຟ້າສູງສຸດ 2.015 MW ຢ່າງພຽງພໍ ແລະ ມີຄວາມສະຖຽນລະພາບ. ມາຮອດປັດຈຸບັນ ທົ່ວປະເທດ ມີສະຖານີໄຟຟ້າແຮງສູງ ທັງໝົດ 80 ແຫ່ງ, ລວມກໍາລັງຕິດຕັ້ງ ທັງໝົດ 8.884 MVA. ໃນນັ້ນ, ມີລະບົບສາຍສົ່ງໄຟຟ້າແຮງສູງ 500 kV ລວງຍາວ ທັງໝົດ 372 km/ວົງຈອນ, 230 kV ລວງຍາວ ທັງໝົດ 3.530 km/ວົງຈອນ ແລະ ລະບົບສາຍສົ່ງໄຟຟ້າ 115 kV ລວງຍາວ ທັງໝົດ 7.085 km/ວົງຈອນ; ມີລະບົບຕາຂ່າຍແຮງດັນກາງ 22 kV-35 kV ລວງຍາວທັງໝົດ 37,949 km/ວົງຈອນ, ລະບົບຕາຂ່າຍແຮງດັນຕໍ່າ 0.4 kV ລວງຍາວທັງໝົດ 22.262,58 km/ວົງຈອນ, ມີໝໍ້ແປງລະບົບຈໍາໜ່າຍທັງໝົດ 39.041 ໜ່ວຍ, ລວມກໍາລັງຕິດຕັ້ງ 9.404.983 kVA, ມີຈໍານວນໝໍ້ນັບໄຟ ທີ່ຢູ່ໃນການຄຸ້ມຄອງ ຂອງ ໄຟຟ້າລາວ ທັງໝົດ 1.744.819 ໜ່ວຍ.
ພ້ອມນີ້, ລັດວິສາຫະກິດໄຟຟ້າລາວ ຍັງໄດ້ສຸມໃສ່ ແກ້ໄຂສະພາບບັນຫາໄຟຕົກ-ໄຟມອດ-ໄຟບໍ່ພໍ ເພື່ອໃຫ້ປະຊາຊົນ ໄດ້ຊົມໃຊ້ໄຟຟ້າ ໄດ້ຢ່າງໂລ່ງລ່ຽນ ໂດຍໄດ້ສຸມໃສ່ວຽກງານການປັບປຸງລະບົບຈໍາໜ່າຍ ໃນຂອບເຂດທົ່ວປະເທດ ໂດຍສະເພາະ ນະຄອນຫລວງວຽງຈັນ ໃຫ້ມີຄວາມຮັບປະກັນສູງຂຶ້ນ ເພື່ອຫລຸດຜ່ອນບັນຫາແຮງດັນຕົກ (ໄຟບໍ່ພໍ) ແນໃສ່ການປັບປຸງປ່ຽນສາຍຈາກສາຍຂະໜາດນ້ອຍ ເປັນສາຍຂະໜາດໃຫຍ່, ເສີມໝໍ້ແປງໄຟຟ້າ ເພື່ອໃຫ້ແທດເໝາະກັບສະພາບຂອງການຊົມໃຊ້ໄຟຟ້າຕົວຈິງ ໃນແຕ່ລະເຂດ, ເຮັດໃຫ້ການສະໜອງໄຟມີທ່າອ່ຽງສະຖຽນລະພາບສູງຂຶ້ນ ແລະ ຫລຸດຜ່ອນບັນຫາແຮງດັນຕົກໄດ້ຫລາຍຈຸດ ໂດຍສະເພາະ ໃນຂອບເຂດຕົວເມືອງນະຄອນ ຫລວງວຽງຈັນ. ອັນທີ່ພົ້ນເດັ່ນ ໄດ້ສໍາເລັດການກະກຽມຄວາມພ້ອມ ໃນການສະໜອງໄຟຮັບໃຊ້ກອງປະຊຸມ ສຸດຍອດອາຊຽນ ທີ່ ສປປ ລາວ ໄດ້ຮັບກຽດເປັນເຈົ້າພາບ ໃນທ້າຍປີນີ້ ເຊິ່ງຄວາມຄືບໜ້າມາຮອດປັດຈຸບັນ ໄດ້ສຳເລັດ ການແຕ່ງຕັ້ງຄະນະກຳມະການ ຮັບຜິດຊອບແຕ່ລະໜ້າວຽກ, ສຳເລັດວາງແຜນການສະໜອງໄຟ 2 ທິດທາງໃຫ້ມີຄວາມຮັບປະກັນ ໃຫ້ບັນດາສະຖານທີ່ ຈຸດສຸມສໍາຄັນໃນການຈັດງານຕ່າງໆຂອງກອງປະຊຸມ ເຊັ່ນ: ຫໍປະຊຸມແຫ່ງຊາດ, ບັນດາໂຮງແຮມ, ຮ້ານອາຫານ ແລະ ອື່ນໆ. ນອກນັ້ນ, ຍັງໄດ້ລົງເຮັດວຽກຮ່ວມກັບ ບັນດາໂຮງແຮມໃຫ້ມີລະບົບໄຟສໍາຮອງ ເພື່ອຮັບມືໃນກໍລະນີສຸກເສີນຕ່າງໆ.
ສໍາລັບທິດທາງວຽກງານຈຸດສຸມ ໃນ 6 ເດືອນທ້າຍປີ 2024, ລັດວິສາຫະກິດໄຟຟ້າລາວ ຈະສືບຕໍ່ຄົ້ນຄວ້າ ແລະ ຄັດເລືອກຜູ້ພັດທະນາ ເພື່ອມາພັດທະນາໂຄງການພະລັງງານໄຟຟ້າແສງຕາເວັນ ຕາມຈຸດທີ່ລັດວິສາຫະກິດໄຟຟ້າລາວ ໄດ້ມີການສຶກສາ ແລະ ຮັບຮອງຈາກ ກະຊວງພະລັງງານ ແລະບໍ່ແຮ່ (ໃນກອບ 650 MW) ເພື່ອຮັບປະກັນການສະໜອງໄຟພາຍໃນປະເທດ ໃຫ້ພຽງພໍ ໃນໄລຍະເລັ່ງດ່ວນ ປີ 2024-2027 ໃຫ້ສໍາເລັດໂດຍໄວ; ຈະສືບຕໍ່ຄົ້ນຄວ້າປັບປຸງ ນະໂຍບາຍການຮັບຊື້ໄຟ ຈາກພະລັງງານແສງຕາເວັນ ທີ່ຕິດຕັ້ງເທິງຫລັງຄາ (Solar Rooftop) ສໍາລັບພາກທີ່ຢູ່ອາໄສ ແນໃສ່ການສົ່ງເສີມ ແລະ ດຶງດູດໃຫ້ຜູ້ຊົມໃຊ້ໄຟຟ້າພາກທີ່ຢູ່ອາໄສ ລົງທຶນຕິດຕັ້ງ Solar Rooftop ຊົມໃຊ້ໄຟເອງ; ສືບຕໍ່ເລັ່ງຈັດຕັ້ງປະຕິບັດໂຄງການສາຍສົ່ງ 500/230 kV ອ້ອມນະຄອນຫລວງວຽງຈັນ ໃຫ້ສຳເລັດໃນທ້າຍປີ 2024 ໂດຍສະເພາະແລວສາຍສົ່ງ 230 kV ນາບົງ-ດົງໂພສີ ແລະ ຈະເພີ່ມທະວີຄວາມເອົາໃຈໃສ່ ການສະໜອງໄຟໃຫ້ມີຄວາມສະຖຽນລະພາບ ຫລີກລ່ຽງບັນຫາໄຟຕົກ-ໄຟມອດ ເປັນບໍລິເວນກວ້າງ ເພື່ອຮັບປະກັນການສະໜອງໄຟ ຮັບໃຊ້ກອງປະຊຸມສຸດຍອດອາຊຽນ ທີ່ ສປປ ລາວ ໄດ້ຮັບກຽດເປັນເຈົ້າພາບ ໃນປີນີ້.
ຂ່າວ: ທະນູທອງ
ພາບ: ຂັນໄຊ
