ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເຫດການໄຟໄໝ້ລາມປ່າຢູ່ບ້ານນາຍາງໃຕ້ ເມືອງນໍ້າບາກ ໄດ້ເກີດຂື້ນໃນວັນທີ 28 ເມສາຜ່ານມາ ສາເຫດເນື່ອງຈາກປະຊາຊົນທີ່ຖາງປ່າເພື່ອເຮັດສວນ ຢູ່ໃກ້ກັບຂອບເຂດປ່າສະຫງວນຂອງບ້ານ ດ້ວຍຄວາມຂາດສະຕິ ບໍ່ເຮັດແລວປ້ອງກັນໄຟ ເຮັດໃຫ້ສ້າງຄວາມເສຍຫາຍກັບພື້ນທີ່ປ່າສະຫງວນຂອງບ້ານຫຼາຍກວ່າ 20 ເຮັກຕາ.
ທ່ານ ບຸນທັນ ຈັນທະສັກ ຮອງເຈົ້າເມືອງນ້ຳບາກ ໄດ້ໃຫ້ສຳພາດຕໍ່ນັກຂ່າວວິທະຍຸ ໃນວັນທີ 1 ພຶດສະພາ 2024 ນີ້ ວ່າ: ພາຍຫຼັງເກີດເຫດໄຟໄໝ້ ຜູ້ກ່ຽວໄດ້ເຂົ້າໄປແຈ້ງກັນຈັດຕັ້ງບ້ານ ເພື່ອເຂົ້າຊ່ວຍດັບມອດໄຟທີ່ກຳລັງລຸກໄໝ້ ແຕ່ເບື້ອງຕົ້ນແມ່ນບໍ່ສາມາດດັບມອດໄດ້ ຈາກນັ້ນໄດ້ມີການວາງແຜນການເຂົ້າດັບມອດແຕ່ລະຈຸດ ເຮັດໃຫ້ສາມາດດັບມອດໄດ້ຕາມແຜນການ ປັດຈຸບັນສາມາດດັບມອດໄດ້ແຕ່ອົງການປົກຄອງເມືອງ ໄດ້ແຈ້ງໃຫ້ແຕ່ລະບ້ານສືບຕໍ່ເຝົ້າລະວັງຢູ່ແຕ່ລະຈຸດຕື່ມ ເພື່ອບໍ່ໃຫ້ເກີດໄຟລຸກລາມຂື້ນອີກ, ຜົນເສຍຫາຍຈາກໄຟໄໝ້ລາມປ່າຄັ້ງນີ້ ສ້າງຄວາມເສຍຫາຍປະມານ 20 ເຮັກຕາ. ສຳລັບມາດຕະການຕໍ່ຜູ້ກະທຳຜິດ ອົງການປົກຄອງເມືອງ ໄດ້ຊີ້ນຳໃຫ້ພາກສ່ວນກ່ຽວຂ້ອງ ນຳເອົາຜູ້ກ່ຽວເຂົ້າມາສຶກສາອົບຮົມ ແລະດຳເນີນການປະຕິບັດໂທດຕາມລະບຽບກົດໝາຍ.
ໂອກາດນີ້ ທ່ານຮອງເຈົ້າເມືອງນ້ຳບາກ ໄດ້ຮຽກຮ້ອງໃຫ້ປະຊາຊົນພາຍໃນເມືອງນ້ຳບາກ ພ້ອມກັນມີສະຕິໃນການດຳລົງຊີວິດ ໂດຍສະເພາະການຖາງປ່າເພື່ອເຮັດສວນ ເນື່ອງຈາກໄລຍະນີ້ ເປັນໄລຍະທີ່ມີອາກາດຮ້ອນອົບເອົ້າ ອັນຈະເຮັດໃຫ້ເກີດໄຟໄໝ້ລາມປ່າໄດ້ງ່າຍ.