ປກສ ເມືອງສິງ ແຂວງຫຼວງນ້ຳທາ ລາຍງານວ່າ: ວັນທີ 25 ມີນາ 2024 ຜ່ານມານີ້ ມີເຫດການອັກຄີໄພ ໄຟໄໝ້ເຮືອນຂອງປະຊາຊົນຢູ່ ບ້ານທົ່ງໃໝ່ ເມືອງສິງ 3 ຫລັງຄາ.
ຫຼັງທີ 1 ຖືກໄຟໄໝ້ຈົນໝົດ ປະເພດເຮືອນໄມ້ຍົກສຸງ ປູພື້ນດ້ວຍໄມ້ແປ້ນ, ແອ້ມດ້ວຍໄມ້ແປ້ນ, ມຸງດ້ວຍສັງກະສີ ມູນຄ່າເສຍຫາຍປະມານ 345.000.000 ກີບ
ຫຼັງທີ 2 ແມ່ນເຮືອນຂອງ ທ້າວ ໜານແອນ ອາຍຸ 34 ປີ ຖືກໄຟໄໝ້ແຈເຮືອນ ມູນຄ່າເສຍຫາຍປະມານ 15.000.000 ກີບ.
ຫຼັງທີ 3 ໄດ້ຮັບຜົນກະທົບ ເລັກໜ້ອຍແມ່ນເຮືອນຂອງ ທ້າວ ຈອມ ອາຍຸ 51 ປີ ມູນຄ່າເສຍຫາຍປະມານ 1.500.000 ກີບ. ລວມມູນຄ່າເສຍຫາຍທັງໝົດ ປະມານ 361.500.000 ກີບ.
ນາງ ອ່ອນ ອາຍຸ 37 ປີ ເຈົ້າຂອງເຮືອນຫຼັງທີ່ຖືກໄຟໄໝ້ໄດ້ໃຫ້ການວ່າ: ຕອນເຊົ້າມືດວັນທີ 25 ມີນາ 2024 ເວລາ 5:00 ນາທີ ຕົນໄດ້ຕື່ນມາໜຶ້ງເຂົ້າ, ແຕ່ງກິນຢູ່ເຮືອນຄົວ ຊັ້ນລຸ່ມ ຈົນ ຮອດເວລາ 7:10 ນາທີ ຈຶ່ງໄດ້ສຳເລັດ ແລ້ວພາກັນກິນເຂົ້າເຊົ້າ ຈາກນັ້ນຈຶ່ງແຍກຍ້າຍກັນໄປເຮັດວຽກຂອງໃຜລາວ ຍັງເຫຼືອແຕ່ຕົນເອງທີ່ຢູ່ເຮືອນຄົນດຽວ ຈຶ່ງໄດ້ໄປເອົາດົ້ນຟືນທີ່ໃຊ້ດັງໄຟແຕ່ງກິນອອກຈາກເຕົາໄຟ ມາປະໄວ້ຢູ່ຂ້າງເຕົາໄຟ ພ້ອມທັງໄດ້ເອົານ້ຳຫົດ ແຕ່ໄຟບໍ່ມອດໃຫ້ລະອຽດ ຮອດເວລາ 8:30 ນາທີ ໄດ້ອອກ ໄປຊື້ເຄື່ອງໃຊ້ຢູ່ພາຍໃນບ້ານ ໃນຂະນະທີ່ຕົນເອງກຳລັງຍ່າງກັບເຮືອນ ຈຶ່ງໄດ້ມີຄົນຢູອ້ອມຂ້າງແຄມເຮືອນ ແລ່ນມາເອີ້ນໃສ່ວ່າໄຟໄໝ້ເຮືອນ.
