ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ໄລຍະ 12 ມື້ຜ່ານມາ ສປປ ລາວ ບໍ່ມີຜູ້ຕິດເຊື້ອພະຍາດ ໂກວິດ19 ເພີ່ມ

ທ່ານພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ຜູ້ປະຈໍາການຄະນະສະເພາະກິດ ຄວບຄຸມພະຍາດພະຍາດ ໂກວິດ 19 ຖະແຫລງໃນຕອນບ່າຍ ວັນທີ 24 ເມສານີ້ ເຖິງການເຝົ້າລະວັງ ແລະ ວິເຄາະວ່າ: ວັນທີ 23 ເມສາ 2020, ໄດ້ເກັບຕົວຢ່າງມາກວດທັງໝົດ 83 ຄົນ, ໃນນັ້ນມີ ຜູ້ມີມີອາການສົງໄສມາກວດຢູ່ໂຮງໝໍ 12 ຄົນ ແລະ ແຮງງານລາວທີ່ກັບມາຈາກ ປະເທດໄທ 71 ຄົນ ໃນນີ້ມີອາການ 2 ຄົນ ແລະ ບໍ່ມີອາການ 69 ຄົນ.ໃນນັ້ນ ມີ ນະຄອນຫຼວງວຽງຈັນ 9 ຄົນ ແລະ ຕ່າງແຂວງ 74 ຄົນ. ຜົນກວດທັງໝົດ 83 ກໍລະນີ ບໍ່ພົບເຊື້ອ. ໝາຍຄວາມວ່າໃນວັນທີ 23 ເມສາ 2020 ບໍ່ມີກໍລະນີໃໝ່.

ນັບແຕ່ເດືອນມັງກອນ ມາຮອດ ວັນທີ 23 ເມສາ 2020 ໄດ້ເກັບຕົວຢ່າງມາກວດທັງໝົດ ມີ 1,611 ຄົນ, 12 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ.

ຈໍານວນຜູ້ສໍາຜັດໃກ້ຊິດກັບຜູ້ຕິດເຊື້ອທັງໝົດ ທີ່ໄດ້ຕິດຕາມ ແຕ່ວັນທີ 9 ມີນາ ຮອດ 23 ເມສາ 2020 ມີ ທັງໝົດ 313 ຄົນ,  ໝົດກໍານົດຕິດຕາມ ທັງໝົດ 311 ຄົນ, ຍັງສືບຕໍ່ຕິດຕາມ 2 ຄົນ ທັງໝົດແມ່ນຢູ່ນະຄອນຫຼວງວຽງຈັນ ແລະ ຕິດຕາມຢູ່ໂຮງໝໍ 103, ຍັງອີກ 1 ມື້ ແມ່ນຈະຄົບກຳນົດຕິດຕາມ 14 ວັນ, ຖືວ່າຜູ້ສໍາພັດໃກ້ຊິດກັບຄົນເຈັບ ທັງໝົດແມ່ນຢູ່ນະຄອນຫຼວງວຽງຈັນ.

ມາຮອດວັນທີ 23 ເມສາ 2020 ທົ່ວປະເທດ ຍັງມີ ສູນຈໍາກັດບໍລິເວນ ທັງໝົດ 292 ສູນ, ມີຜູ້ຈຳກັດບໍລິເວນຢູ່ສູນ 1,228 ຄົນ, ຈໍາກັດບໍລິເວນຢູ່ເຮືອນ 880 ຄົນ, ເກັບຕົວຢ່າງມາກວດວິເຄາະຫາເຊື້ອ ມີທັງໝົດ 366 ຄົນ. ທັງໝົດບໍ່ພົບເຊື້ອ.

ສ່ວນການຕິດຕາມປີ່ນປົວຄົນເຈັບຢູ່ໂຮງໝໍ

  • ປະຈຸບັນຍັງເຫຼືອມີຜູ້ຕິດເຊື້ອນອນຕິດຕາມ ປິ່ນປົວຢູ່ໂຮງໝໍທັງໝົດ 15 ຄົນ.
  • ຢູ່ໂຮງໝໍແຂວງຫຼວງພະບາງ ມີ 1 ຄົນ ເປັນເພດຊາຍ, ເຫັນວ່າມີອາການຄົງຕົວ ຂັ້ນເບົາບາງ ແລະ ຍັງຕິດຕາມປິ່ນປົວຕາມອາການ ແລະ ກວດຫາເຊື້ອເພື່ອຢັ້ງຢືນ.
  • ຢູ່ໂຮງໝໍມິດຕະພາບ ມີ 14 ຄົນ ທັງໝົດເຫັນວ່າ ມີອາການເບົາບາງ ແລະ ຍັງຕິດຕາມປິ່ນປົວຕາມອາການ ແລະ ກວດຫາເຊື້ອເພື່ອຢັ້ງຢືນ.

ທ່ານພູທອນ ເມືອງປາກ ໃຫ້ຮູ້ອີກວ່າ: ໃນວັນທີ 24 ເມສາ 2020, ໄດ້ມີ ຖະແຫຼງຂ່າວກ່ຽວກັບກອງປະຊຸມ ລັດຖະບານ ສະໄໝສາມັນ ປະຈຳເດືອນ ເມສາ 2020. ໂດຍໄດ້ເນັ້ນໃຫ້ ຄະນະສະເພາະກິດ ບັນດາຂະແໜງການທີ່ກ່ຽວຂ້ອງ ທ້ອງຖິ່ນ ແລະ ທົ່ວສັງຄົມ ເອົາໃຈໃສ່ການຈັດຕັ້ງປະຕິບັດ ຄຳສັ່ງເລກທີ 06/ນຍ ແລະ ແຈ້ງການ ຫຼື ຄຳແນະນຳ ຂອງ ຄະນະສະເພາະກິດ, ຂະແໜງການທີ່ກ່ຽວຂ້ອງຢ່າງເຂັ້ມງວດຈົນຮອດວັນທີ່ 3 ພຶດສະພາ 2020.

ສະນັ້ນ ຈຶ່ງຮຽກຮ້ອງໃຫ້ພໍ່ແມ່ປະຊາຊົນບັນດາເຜົ່າ, ອົງການຈັດຕັ້ງທຸກພາກສ່ວນ ຈົ່ງສືບຕໍ່ຮ່ວມໄມ້ຮ່ວມມື ເປັນເຈົ້າການສືບຕໍ່ ຈັດຕັ້ງປະຕິບັດຄຳສັ່ງ ເລກທີ 06/ນຍ ແລະ ບັນດາຂໍ້ແນະນຳຕ່າງໆຢ່າງຖືກຕ້ອງ ແລະ ເຂັ້ມງວດ.

ມາຮອດປະຈຸບັນ ທົ່ວໂລກມີຜູ້ຕິດເຊື້ອທັງໝົດ 2.928.990ຄົນ,  ເພີ່ມຂຶ້ນ 84.006ຄົນ, ເສຍຊີວິດ  190 .860 ຄົນ, ປົວຫາຍດີ  738.630ຄົນ, ສະເພາະສະຫະລັດອາເມຣິກາ ມີຜູ້ຕິດເຊື້ອທັງໝົດ   890.406   , ເສຍຊີວິດ  50.048 ຄົນ.