ໄຫຫຼໍາ ໃຫ້ບໍລິການສ້ອມແປງເຮືອບິນຄົບວົງຈອນທີ່ໄດ້ມາດຕະ ຖານລະດັບໂລກ
ສູນສ້ອມແປງເຮືອບິນທ່າການຄ້າເສລີໄຫຫຼໍາ ເຊິ່ງຕັ້ງຢູ່ໃນເຂດໄຫໂຂວຈຽງຕົງທີ່ເປັນເຂດນິຄົມອຸດສາຫະກໍາສໍາຄັນຂອງເຂດທ່າການຄ້າເສລີໄຫຫຼໍາ, ແຂວງໄຫຫຼໍາ ແຫ່ງ ສປ ຈີນ ໄດ້ໃຫ້ບໍລິການສ້ອມແປງ ຫລື ບໍາລຸງຮັກສາເຮືອບິນຄົບວົງຈອນລະດັບໂລກ. ມາຮອດຕົ້ນປີ 2024 ໄດ້ບໍລິການໄປແລ້ວຫລາຍກວ່າ 40 ສາຍການບິນ, ໃນນັ້ນ ເປັນຕ່າງປະເທດຫລາຍກວ່າ 10 ສາຍການບິນ ແລະມີຫລາຍລາຍການທີ່ນອນໃນການບໍລິການຂອງຖານສ້ອມ ແປງດັ່ງກ່າວ ໄດ້ຖືກຮັບຮອງຄຸນນະພາບຈາກສະຫະລັດອາເມລິການ, ສະຫະພາບເອີລົບ ແລະ ອື່ນໆ.
ໃນວັນທີ 27 ເມສາ 2024, ສື່ມວນຊົນຈີນ-ອາຊຽນ ຫລາຍກວ່າ 50 ຄົນ ທີ່ເຂົ້າຮ່ວມກິດຈະກໍາ “ຄູ່ຮ່ວມສື່ມວນຊົນອາຊຽນ ເບິ່ງຈີນຮ່ວມກັນ” ຈັດຂຶ້ນໂດຍວິທະຍຸໂທລະພາບຖານກາງຈີນ (CMG) ໄດ້ຢ້ຽມຢາມຖານສ້ອມ ແປງເຮືອບິນທ່າການຄ້າເສລີໄຫຫຼໍາ.
ທ່ານ ນາງ Wang Haiye ຜູ້ຈັດການທົ່ວໄປຂອງ ບໍລິສັດ ໄຫໄຂວສ້ອມແປງເຮືອບິນ ຈໍາກັດ ໃຫ້ຮູ້ວ່າ: ສູນສ້ອມແປງເຮືອ ບິນແຫ່ງນີ້ມີເນື້ອທີ່ທັງໝົດ 148.000 ຕາແມັດ ເຊິ່ງປະກອບ ດ້ວຍ 3 ສູນສ້ອມແປງທີ່ໃຫ້ບໍລິການຫລາຍຢ່າງ ເຊັ່ນ: ການບໍາລຸງຮັກສາ ຫລື ສ້ອມແປງເຮືອບິນ, ບ່ອນເກັບມ້ຽນເຮືອບິນສໍາລັບການກວດສອບ, ທາສີເຮືອບິນ, ການເກັບຮັກສາວັດຖຸສິ່ງ ຂອງການບິນລະດັບສາກົນ.
ຍ້ອນລັດຖະບານຈີນ ມີນະໂຍບາຍອໍານວຍຄວາມສະດວກໃຫ້ເຂດທ່າການຄ້າເສລີໄຫຫຼໍາເພື່ອປະກອບສ່ວນພັດທະນະເສດ ຖະກິດ ກໍຄື ການສົ່ງເສີມດ້ານອຸດສາຫະກໍາຂອງແຂວງໄຫຫຼໍາ ໃຫ້ນັບມື້ຂະຫຍາຍຕົວ, ດັ່ງນັ້ນ ການສ້າງຖານບໍາລຸງຮັກສາເຮືອບິນແບບຄົບວົງຈອນໃນເຂດທ່າການຄ້າດັ່ງກ່າວກໍແມ່ນສ່ວນສໍາຄັນໜຶ່ງ ທີ່ບໍລິການດ້ວຍມືອາຊີບ ເຊິ່ງມາຮອດປັດຈຸບັນ ສາມາດດຶງດູດເຮືອບິນທັງພາຍໃນ ແລະ ຕ່າງປະເທດເຂົ້າມາໃຊ້ບໍລິການແລ້ວເປັນຈໍານວນຫລາຍ, ທັງໄດ້ຮັບການຢັ້ງຢືນຄຸນນະພາບຈາກໜ່ວຍງານການບິນພົນລະເຮືອນຂອງຫລາຍປະເທດໃນທົ່ວໂລກ. ນອກຈາກນີ້ ການສົ່ງອອກເຮືອບິນທີ່ສ້າງຂຶ້ນໃໝ່ຍັງຕ້ອງການການປະກອບສ່ວນຈາກຖານສ້ອມແປງທີ່ທ່າການຄ້າເສລີໄຫຫຼໍາເຊັ່ນດຽວກັນ.
ໄຫຫຼໍາ ແມ່ນແຂວງທີ່ຢູ່ໃຕ້ສຸດຂອງ ສປ ຈີນ. ໃນເດືອນເມສາ ປີ 2018 ລັດຖະບານຈີນ ໄດ້ປະກາດການຊຸກຍູ້ການພັດທະນາແຂວງດັ່ງກ່າວເປັນເຂດທົດລອງການຄ້າເສລີ, ພອ້ມທັງສົ່ງເສີມການສ້າງທ່າການຄ້າເສລີໄຫຫຼໍາ. ພາຍໃຕ້ນະໂຍບາຍດັ່ງກ່າວໃນໄລຍະຫລາຍປີຜ່ານມາ ແຂວງໄຫຫລຳ ໄດ້ປະກາດມາດຕະການຍົກເວັ້ນພາສີ ແລະ ອຳນວຍຄວາມສະດວກທາງການຄ້າ ແລະ ການລົງທຶນ ເພື່ອສະໜັບສະໜຸນທ່າການຄ້າເສລີໄຫຫລໍາແລ້ວຫລາຍກວ່າ 180 ກວ່າລາຍການ, ລວມທັງການຍົກເວັ້ນພາສີນຳເຂົ້າສິນຄ້າ ແລະ ວັດຖຸດິບທີ່ນຳມາແປຮູບເພື່ອການສົ່ງອອກ, ການຫລຸດຜອ່ນຂັ້ນຕອນການກວດເອກກະສານໃຫ້ແກ່ນັກທອ່ງທ່ຽວຕ່າງປະເທດ ແລະ ການຈຳກັດອັດຕາພາສີລາຍໄດ້ບໍ່ເກີນ 15% ສຳລັບບໍລິສັດທີ່ຈົດທະບຽນໃນແຂວງໄຫຫລຳແລະອື່ນໆ.
ນອກຈາກນີ້ ສະເພາະຢູ່ຖານສ້ອມແປງເຮືອບິນທ່າການຄ້າເສລີໄຫຫຼໍາ ໄດ້ຮັບສິດທິພິເສດຫລາຍຢ່າງ ເຊັ່ນ: ການຍົກເວັ້ນພາສີນໍາເຂົ້າຊິ້ນສ່ວນເຮືອບິນ, ອຸປະກອນສໍາລັບບໍາລຸງຮັກສາເຮືອບິນ, ນໍ້າມັນສໍາລັບເຮືອບິນ ແລະ ອື່ນໆ ເຮັດໃຫ້ເຮືອບິນຈາກສາຍການບິນໃນປະເທດອາຊີຕາເວັນອອກສ່ຽງໃຕ້ ແລະ ອາຊີໃຕ້ ຫັນມາໃຊ້ການບໍລິການຢູ່ສູນສ້ອມແປງເຮືອບິນທ່າການຄ້າເສລີໄຫຫຼໍານັບມື້ເພີ່ມຂຶ້ນ.
ອີງຕາມຂໍ້ມູນຈາກການລາຍງານຂອງສື່ມວນຊົນພາຍໃນແຂວງໄຫຫຼໍາ ເມື່ອບໍ່ດົນມານີ້ ໃຫ້ຮູ້ວ່າ: ລັດຖະບານຈີນ ມີເປົ້າ ໝາຍຈະສ້າງທ່າການຄ້າເສລີໄຫຫຼໍາໃຫ້ເປັນທ່າການຄ້າເສລີທີ່ມີຂະໜາດໃຫຍ່ທີ່ສຸດໃນໂລກພາຍໃນປີ 2025 ແລະ ຈະສ້າງໃຫ້ແຂວງໄຫຫຼໍາເປັນຖານກາງດ້ານການເງິນລະຫວ່າງປະເທດ ພອ້ມທັງໄດ້ສ້າງຫ້າງສັບພະສິນຄ້າປອດພາສີ ເພື່ອດຶງດູດຜູ້ບໍລິໂພກແລະນັກທ່ອງທ່ຽວຈາກທົ່ວໂລກ. ເຊິ່ງແນ່ນອນວ່າ ສູນສ້ອມແປງເຮືອບິນທ່າການຄ້າເສລີໄຫຫຼໍາ ຈະປະກອບສ່ວນສໍາຄັນເຮັດໃຫ້ແຜນພັດທະນາທ່າການຄ້າເສລີໄຫຫຼໍາຕາມທີ່ອົງການປົກຄອງແຂວງໄຫຫຼໍາ ກໍຄື ລັດຖະບານຈີນວາງໄວ້ໃຫ້ນັບມື້ປະກົດຜົນເປັນຈິງ.
