ໃນວັນທີ 19 ມີນາ 2024 ຜ່ານມານີ້, ທ່ານ ບົວລີ ເພັດມີໄຊ ຫົວໜ້າກົມຕິດ ຕາມກວດກາ ຄ້າຍຄຸມຂັງ-ດັດສ້າງ ອົງການໄອຍະການປະຊາຊົນສູງສຸດ ແລະ ທ່ານ ພັອ ໄຊຍະວົງ ແກ້ວສຸລິວົງ ຮອງຫົວໜ້າກົມຕໍາຫລວດຄຸມຂັງ-ດັດສ້າງ ກະຊວງປ້ອງ ກັນຄວາມສະຫງົບ ພ້ອມດ້ວຍຄະນະ ໄດ້ຮ່ວມກັນປຶກສາຫາລື ທີ່ນະຄອນຫລວງວຽງ ຈັນ ເພື່ອສ້າງກົນໄກການປະສານສົມທົບ ໃນການຕິດຕາມ ກວດກາ ຄ້າຍຄຸມຂັງ-ດັດສ້າງ ເພື່ອຮັບປະກັນ ແລະ ປັບປຸງກົນໄກການ ເຄື່ອນໄຫວ, ການປະສານສົມທົບໃນວຽກງານການຕິດຕາມກວດກາ ແລະ ການຄຸ້ມຄອງຜູ້ຖືກຫາ, ຜູ້ຖືກດັດສ້າງ ແລະ ນັກໂທດ ໃຫ້ມີຄວາມເປັນເອກະພາບ, ຖືກຕ້ອງ ແລະ ສອດຄ່ອງຕາມກົດ ໝາຍ, ລະບຽບການ ນັບແຕ່ສູນກາງລົງຮອດທ້ອງຖິ່ນ.
ສອງຝ່າຍ ຍັງໄດ້ປຶກສາຫາລື, ຄົ້ນຄ້ວາ ຈັດຕັ້ງຜັນຂະຫຍາຍບົດບັນທຶກຮ່ວມລະ ຫວ່າງ ອົງການໄອຍະການປະຊາຊົນສູງສຸດ ແລະ ກະຊວງປ້ອງກັນຄວາມສະຫງົບ ເພື່ອເປັນບ່ອນອີງໃນການເຄື່ອນໄຫວວຽກງານໃຫ້ແກ່ກົມຕິດຕາມກວດກາ ຄ້າຍຄຸມຂັງ-ດັດສ້າງ ອົງການໄອຍະການປະຊາຊົນສູງສຸດ ແລະ ກົມຕຳຫລວດຄຸມຂັງ-ດັດສ້າງ ກະຊວງປ້ອງກັນຄວາມສະຫງົບ, ທັງເປັນການ ແລະ ເປັນບ່ອນອີງ ໃຫ້ແກ່ການຄົ້ນຄ້ວາວຽກງານອະໄພຍະໂທດ, ການປ່ອຍຕົວນັກໂທດກ່ອນກໍານົດໂດຍມີເງື່ອນໄຂ ຕາມກົດໝາຍ, ພ້ອມທັງການອະນຸຍາດປີ່ນປົວນັກໂທດທີ່ມີການເຈັບປ່ວຍ ໃນເວລາປະຕິບັດໂທດ ແລະ ບັນຫາອື່ນ ທີ່ກ່ຽວຂ້ອງ.
ນອກຈາກນີ້, ສອງຝ່າຍໄດ້ແລກປ່ຽນຄໍາຄິດຄໍາເຫັນໃນການປະຕິບັດຕາມສິດ ແລະ ໜ້າທີ່ຂອງຕົນໃຫ້ຖືກຕ້ອງຕາມກົດໝາຍທີ່ກຳນົດໄວ້ ເພື່ອຄວາມເປັນເອກະພາບໃຫ້ສອດຄ່ອງ ຕາມລະບຽບການ, ກົດໝາຍ ແລະ ລາຍງານບັນ ຫາທີ່ປຶກສາຄັ້ງນີ້ ຕໍ່ຂັ້ນເທິງເພື່ອພິຈາລະນາເນື້ອໃນທັງໝົດ ແລ້ວຈະໄດ້ລົງນາມບົດບັນ ທຶກຮ່ວມ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານດັ່ງກ່າວໃນຕໍ່ໜ້າ.
ຂ່າວ-ພາບ: ອານຸສັກ ກວາງວັນ
