ພິທີພົບປະສອງຝ່າຍ ແລະ ເຊັນບົດບັນທຶກການຮ່ວມມືລະຫວ່າງໜັງສືພິມປະຊາຊົນສຽງຂອງສູນກາງພັກປະຊາຊົນປະຕິວັດລາວ ກັບ ໜັງສືພິມເຢິນເຢິນ ສຽງຂອງສູນກາງພັກ-ລັດ ແລະ ປະຊາ ຊົນຫວຽດນາມຈັດຂຶ້ນໃນວັນທີ 25 ທັນວານີ້ ທີ່ສໍານັກງານໜັງສືພິມປະຊາຊົນ ນະຄອນຫຼວງວຽງຈັນ ຝ່າຍໜັງສືພິມປະຊາຊົນ ນໍາໂດຍທ່ານ ວັນໄຊ ຕະວິນຍານ ຮອງຫົວໜ້າໂຄສະ ນາອົບຮົມສຸນກາງພັກ, ຫົວໜ້າບັນນາທິການໃຫຍ່ໜັງສືພິມປະຊາຊົນ ແລະ ຝ່າຍໜັງສືພິມ ເຢິນເຢິນ ສຽງຂອງສູນກາງພັກ-ລັດ ແລະ ປະຊາຊົນຫວຽດນາມ ນໍາໂດຍ ທ່ານ ດິງຍື ຮວານ ຮອງຫົວໜ້າບັນນາທິການໃຫຍ່ ໜັງສືພິມ ເຢິນເຢິນ
ການພົບປະຄັ້ງນີ້, ສອງຝ່າຍໄດ້ລາຍງານໂດຍຫຍໍ້ກ່ຽວກັບສະພາບການເຄື່ອນໄຫວວຽກງານໜັງສືພິມຂອງແຕ່ລະຝ່າຍໃຫ້ກັນຊາບ ພ້ອມທັງໄດ້ທົບທວນຕີລາຄາຜົນການພົວພັນຮ່ວມມືກັນໃນໄລຍະຜ່ານມາ ໂດຍສະເພາະເມື່ອບໍ່ດົນມານີ້ໄດ້ຍົກສູງການຮ່ວມມືໃຫ້ຮັດແໜ້ນເພີ່ມຂຶ້ນກໍຄືການຮ່ວມມືຊ່ວຍປັບປຸງເວບໄຊ, ລະບົບໄອຊີທີ ເພື່ອໃຫ້ໜັງສືພິມປະຊາຊົນໄດ້ສືບຕໍ່ຍູ້ແຮງການຜັນຂະຫຍາຍແນວທາງການປ່ຽນແປງໃໝ່ເຂົ້າສູ່ລວງເລິກ, ສ້າງການຫັນປ່ຽນທີ່ແຮງແຂງ, ເລິກ ເຊິ່ງ ແລະ ຮອບ ດ້ານ ຕອບສະໜອງໄດ້ທັນກັບຍຸກສະໄໝແຫ່ງການປະຕິວັດອຸດສາຫະກຳ 4.0, ຫັນເປັນທັນສະໄໝ, ຫັນເປັນດິຈີຕອນໃຫ້ເປັນລະບົບຈະແຈ້ງ ແລະ ໜັກແໜ້ນ ຕາມທິດທາງການນໍາພາຂອງພັກປະຊາຊົນປະຕິວັດລາວ ປະກອບສ່ວນໃນການສ້າງການຫັນປ່ຽນຢ່າງແຂງແຮງໃນວຽກງານໂຄສະນາອົບຮົມໄປສູ່ຄຸນນະພາບໃໝ່.
ໂອກາດນີ້, ທ່ານ ວັນໄຊ ຕະວິນຍານ ຮອງຫົວໜ້າໂຄສະນາອົບຮົມສຸນກາງພັກ, ຫົວໜ້າບັນນາທິການໃຫຍ່ໜັງສືພິມປະຊາຊົນໄດ້ກ່າວຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ລາວ ຂອງຄະນະຜູ້ແທນດັ່ງກ່າວໃນຄັ້ງນີ້ ຊຶ່ງໄດ້ສະແດງໃຫ້ເຫັນເຖິງຄວາມຮັກແພງອັນສະໜິດສະໜົມ, ການພົວພັນຮ່ວມມືທີ່ມີມາແຕ່ດົນນານໃຫ້ແຕກດອກອອກຜົນຍິ່ງໆຂຶ້ນໄປ, ເປັນການເສີມຂະຫຍາຍມູນເຊື້ອຄວາມສາມັກຄີອັນດີງາມ, ການພົວພັນແບບພິເສດລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມໃຫ້ໝັ້ນຄົງທະນົງແກ່ນຕະຫຼອດໄປ. ພ້ອມດຽວກັນນີ້, ທ່ານ ຍັງໄດ້ກ່າວສະແດງຄວາມຂອບໃຈມາຍັງໜັງສືພິມເຍິນເຢິນທີ່ໄລຍະຜ່ານມາ ໄດ້ໃຫ້ການຊ່ວຍເຫຼືອໜັງສືພິມປະຊາຊົນມາໂດຍຕະຫຼອດ.
ທ່ານດິງ ຍືຮວານ ໄດ້ຕີລາຄາສູງ ຕໍ່ການພົວພັນຮ່ວມມືຂອງສອງຝ່າຍທີ່ນັບມື້ນັບຮັກແໜ້ນ ແລະ ແໜ້ນແຟ້ນຂຶ້ນຫຼາຍກວ່າເກົ່າ ພ້ອມທັງສະແດງຄວາມຍິນດີໃນການຮ່ວມມື, ການສະໜັບສະໜູນດ້ານຕ່າງໆ ຕາມທີ່ໄດ້ຕົກລົງເຫັນດີເປັນເອກະພາບກັນຂອງສອງຝ່າຍ,ພ້ອມດຽວກັນນີ້, ຝ່າຍຫວຽດນາມໄດ້ລາຍງານກ່ຽວກັບຄວາມຄືບໜ້າຂອງແຜນການປັບປຸງເວບໄຊຂອງໜັງສືພິມປະຊາຊົນ ທີ່ທັນສະໄໝ ລວມທັງບັນຫາອື່ນໆ.
ພາຍຫຼັງການພົບປະສອງຝ່າຍແລ້ວ ທ່ານ ວັນໄຊ ຕະວິນຍານ ແລະ ທ່ານ ດິງ ຍືຮວານ ໄດ້ລົງນາມໃນບົດບັນທຶກຊ່ວຍຈໍາ ໂດຍໜັງສືພິມເຍິນເຢິນເປັນທີ່ປຶກສາ, ພ້ອມທັງຈະໄດ້ສ້າງ ແລະ ມອບ-ຮັບ ພາຍຫຼັງສໍາເລັດບັນດາໜ້າວຽກທີ່ສອງຝ່າຍເຫັນດີເປັນເອກະພາບຮ່ວມກັນຂອງບັນດາເນື້ອໃນທີ່ບັນທຶກ ໂດຍສະເພາະເຫັນດີເປັນເອກະພາບກ່ຽວກັບການສ້າງໜ້າເວບໄຊໃໝ່ຂອງໜັງສືພິມປະຊາຊົນ ແລະ ເນື້ອໃນລະບົບຈໍາໜ່າຍ (CMS) ຊິ່ງແມ່ນລະບົບເວບໄຊໃໝ່ທັງໝົດທີ່ຈະໄດ້ສ້າງຂຶ້ນໜັງສືພິມເຍິນເຢີນ ເປັນທີ່ປຶກສາໃຫ້ໜັງສືພິມ ປະຊາຊົນ ກ່ຽວກັບຄວາມຕ້ອງການດ້ານເຕັກນິກ ໂຄງລ່າງອິນເຕີເນັດ ແລະ ເຊີເວີ ຮັບປະກັນໄດ້ລະບົບເວບໄຊໃໝ່ ມີຄວາມໝັ້ນຄົງ, ຄວາມປອດໄພ, ປະສິດທິຜົນ ເພື່ອໃຫ້ ໜັງສືພິມປະຊາຊົນຈັດຕັ້ງປະຕິບັດ, ນອກນີ້ ໜັງສືພິມ ເຍິນເຢີນ ຍັງໄດ້ສະໜັບສະໜູນວຽກຕິດຕັ້ງສະພາບແວດລ້ອມເຄື່ອງເຊີເວີ ແລະ ບໍລິການໃນລະບົບໜັງສືພິມປະຊາຊົນທີ່ໄດ້ກະກຽມຕາມທີ່ໜັງສືພິມເຍິນເຢີນໃຫ້ຄໍາປຶກສາ ພ້ອມທັງຝຶກອົບຮົມໃຫ້ບຸກຄະລາກອນ ໃຫ້ໜັງສືພິມປະຊາຊົນໃນວຽກເຄື່ອນໄຫວ ແລະ ນໍາໃຊ້ລະບົບເວບໄຊໃໝ່ ແລະ ອື່ນໆ.%
ຂຽນໂດຍ: ບຸນຍັງ ພຸດສະຫວັດ
