ໂດຍ: ວັນເພັງ
ໜຶ່ງປີຜ່ານມາແມ່ຍິງກະຊວງແຮງງານ ແລະ ສະຫວັດດີການສັງຄົມ (ຮສສ) ມີຜົນງານພົ່ນເດັ່ນຫຼາຍດ້ານ, ເນື່ອງໃນໂອກາດວັນສ້າງຕັ້ງແມ່ຍິງລາວ ຄົບຮອບ 69 ປີ (20 ກໍລະກົດ 1955-20 ກໍລະກົດ 2024)ທ່ານ ນາງ ມອນທອງ ອິນທະວົງ ປະທານສະຫະພັນແມ່ຍິງກະຊວງ ຮສສ ໄດ້ໃຫ້ສໍາພາດ ຜ່ານນັກຂ່າວໜັງສືພິມປະຊາຊົນ ເມື່ອບໍ່ດົນມານີ້ວ່າ: ວັນສ້າງຕັ້ງແມ່ຍິງລາວເປັນໜຶ່ງວັນທີ່ມີຄວາມໝາຍ-ຄວາມສຳຄັນ. ພ້ອມນັ້ນ, ອົງການຈັດຕັ້ງແມ່ຍິງ ຊຶ່ງເປັນພື້ນຖານໃຫ້ແກ່ການສ້າງຕັ້ງເປັນອົງການຈັດຕັ້ງສະຫະພັນແມ່ຍິງລາວ ໂດຍເລີ່ມມາຈາກບັນດາໜ່ວຍຍຸວັນນາລີ, ໜ່ວຍແມ່ນັກຮົບ, ໜ່ວຍເອື້ອຍນັກຮົບ ໄດ້ກຳເນີດຂຶ້ນແຕ່ໄລຍະຕົ້ນສະໄໝຕໍ່ຕ້ານຈັກກະພັດລ່າເມືອງຂຶ້ນແບບເກົ່າເປັນຕົ້ນມາ. ໃນວັນທີ 22 ມີນາ 1955 ພັກປະຊາຊົນລາວ ໄດ້ຮັບການສ້າງຕັ້ງຂຶ້ນເພື່ອຮັບຜິດຊອບໂດຍກົງຕໍ່ພາລະກິດປະຫວັດສາດຂອງການປະຕິວັດລາວ, ນັບແຕ່ຫົວທີ ທີ່ພັກປະຊາຊົນລາວໄດ້ຮັບການສ້າງຕັ້ງ, ພັກກໍໄດ້ເອົາໃຈໃສ່ຢ່າງຈົດຈໍ່ຕໍ່ການປຸກລະດົມຂົນຂວາຍ, ກໍ່ສ້າງແມ່ຍິງໃຫ້ມີຄວາມຕື່ນຕົວປະກອບສ່ວນໃນພາລະກິດປະຕິວັດ ແລະ ຖືແມ່ຍິງເປັນພາກສ່ວນໜຶ່ງໃນກຳລັງແຮງທີ່ສຳຄັນຂອງພັກ. ດັ່ງນັ້ນ, ມາຮອດ ວັນທີ 20 ກໍລະກົດ ປີ 1955 ພັກໄດ້ຈັດຕັ້ງໜ່ວຍຄົ້ນຄວ້າວຽກງານແມ່ຍິງຂຶ້ນຢ່າງເປັນທາງການ ຊຶ່ງເປັນຕົ້ນກຳເນີດຂອງອົງການຈັດຕັ້ງສະຫະພັນແມ່ຍິງລາວປັດຈຸບັນນັບຕັ້ງແຕ່ມື້ສ້າງຕັ້ງເປັນຕົ້ນມາ ອົງການຈັດຕັ້ງແມ່ຍິງກໍໄດ້ເຄື່ອນໄຫວຕາມພາລະບົດບາດທີ່ໄດ້ກຳນົດໄວ້ໃນກົດລະບຽບຂອງແມ່ຍິງລາວ ໂດຍມີແຜນດຳເນີນງານຂອງຕົນ ແລະ ໄດ້ປັບປຸງໃຫ້ສອດຄ່ອງກັບຄວາມຮຽກຮ້ອງຕ້ອງການຕາມໜ້າທີ່ການເມືອງຂອງພັກໃນແຕ່ລະໄລຍະ.
ທ່ານ ນາງມອນທອງ ອິນທະວົງ ໄດ້ໃຫ້ຮູ້ຕື່ມວ່າ: ໃນໄລຍະ 1 ປີຜ່ານມາສະຫະພັນແມ່ຍິງກະຊວງ ຮສສມີຜົນງານພົ່ນເດັ່ນຫຼາຍດ້ານເປັນຕົ້ນໄດ້ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ ທີ່ໄດ້ກຳນົດໄວ້ໃນກົດໝາຍ, ກົດລະບຽບຂອງແມ່ຍິງລາວ ກໍຄືແຜນພັດທະນາວຽກງານແຮງງານ ແລະ ສະຫວັດດີການສັງຄົມ ປະຈຳປີ 2024, ໄດ້ຖືເອົາວຽກງານສຶກສາອົບຮົມການເມືອງແນວຄິດໃຫ້ແກ່ເອື້ອຍນ້ອງແມ່ຍິງທົ່ວກະຊວງ ຮສສ ເປັນກົກ, ນຳພາເອື້ອຍນ້ອງແມ່ຍິງເຄື່ອນໄຫວກິດຈະກໍາຕ່າງໆ ຕາມແຈ້ງການຂອງສູນກາງສະຫະພັນແມ່ຍິງລາວ (ສສຍລ) ກໍຄືຄະນະພັກ, ຄະນະນຳກະຊວງວາງອອກ ເພື່ອສ້າງຂະບວນການຂໍ່ານັບຮັບຕ້ອນວັນສຳຄັນຕ່າງໆຂອງຊາດເຊັ່ນ:ໄດ້ເຂົ້າຮ່ວມງານສະເຫຼີມສະຫຼອງ ແມ່ຍິງສາກົນທີ 8 ມີນາ ຄົບຮອບ 114ປີ; ໄດ້ຕ້ອນຮັບທີມງານຄະນະປະທານສສຍລ ທີ່ໄດ້ລົງມາຕິດຕາມຊຸກຍູ້ວຽກງານສ້າງພະນັກງານນໍາພາ-ຄຸ້ມຄອງເພດຍິງ ແລະ ການກະກຽມກອງປະຊຸມໃຫຍ່ສະຫະພັນແມ່ຍິງລາວຕິດພັນກັບການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກ,ໄດ້ເຂົ້າຮ່ວມກອງປະຊຸມທົບທວນ ແລະ ປັບປຸງເນື້ອໃນຂໍ້ແຂ່ງຂັນ 3 ດີ, ການສ້າງຄອບຄົວ ແລະ ບ້ານແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດ 3 ສ້າງ ແລະວຽກກຸ່ມທ້ອນເງິນ/ກອງທຶນ; ໄດ້ເຂົ້າຮ່ວມພິທີສະເຫຼີມສະຫຼອງວັນເດັກນ້ອຍສາກົນ, ວັນປູກຕົ້ນໄມ້ແຫ່ງຊາດ, ວັນຢຸດຕິສູບຢາສາກົນ ແລະ ວັນສິ່ງແວດລ້ອມໂລກ,ເຂົ້າຮ່ວມກອງປະຊຸມປຶກສາຫາລື ຫົວຂໍ້: ການໃຫ້ຄຸນຄ່າວຽກງານການເບິ່ງແຍງດູແລທີ່ບໍ່ໄດ້ຮັບຄ່າຈ້າງ ແລະ ແຮງງານທີ່ເຮັດວຽກໃນຄົວເຮືອນ ແລະ ການລົງທຶນໃສ່ວຽກງານເສດຖະກິດການເບິ່ງແຍງດູແລໃນ ສປປລາວ.ພ້ອມນັ້ນ, ຕະຫຼອດໄລຍະຜ່ານມາ ເຫັນວ່າພັກ ແລະ ລັດຖະບານເຮົາຍາມໃດກໍຖືແມ່ຍິງເປັນກໍາລັງແຮງອັນສໍາຄັນ ແລະ ໃຫຍ່ຫຼວງໃນທຸກຂົງເຂດວຽກງານເນື່ອງຈາກວ່າແມ່ຍິງໄດ້ກວມຈຳນວນກວ່າເຄິ່ງໜຶ່ງຂອງພົນລະເມືອງ, ມີບົດບາດສູງໃນດ້ານການຜະລິດ ແລະ ເປັນກຳລັງແຮງພິເສດທີ່ຜະລິດຊັບພະຍາກອນມະນຸດທາງດ້ານປະລິມານ ແລະ ຄຸນນະພາບ ຊຶ່ງພັກ ແລະ ລັດຖະບານເຫັນໄດ້ບົດບາດຄວາມສຳຄັນຂອງແມ່ຍິງລາວບັນດາເຜົ່າ, ພ້ອມທັງມີທິດຊີ້ນຳຕໍ່ວຽກງານແມ່ຍິງຢ່າງລະອຽດເພື່ອປຸກລະດົມຂົນຂວາຍເອື້ອຍນ້ອງແມ່ຍິງປະກອບສ່ວນເຂົ້າໃນທຸກຂົງເຂດວຽກງານເວົ້າລວມ, ເວົ້າສະເພາະເອື້ອຍນ້ອງແມ່ຍິງກະຊວງ ຮສສ ກໍໄດ້ຮັບການສະໜັບສະໜູນຈາກຄະນະພັກ ຄະນະນຳກະຊວງ ໂດຍປະຕິບັດຕາມມະຕິກອງປະຊຸມໃຫຍ່ຄັ້ງທີ VIຂອງອົງຄະນະພັກກະຊວງ, ຄະນະປະຈຳພັກໄດ້ເອົາໃຈໃສ່ຕໍ່ການບຳລຸງ-ກໍ່ສ້າງພະນັກງານ-ລັດຖະກອນພາຍໃນກະຊວງໃນການຍົກລະດັບດ້ານຕ່າງໆເປັນຕົ້ນ ບຳລຸງທິດສະດີການເມືອງທັງໄລຍະສັ້ນ ແລະ ໄລຍະຍາວ ໄດ້ 41 ຄົນ ຍິງ 13 ຄົນ ກວມ 31.70%, ກໍ່ສ້າງດ້ານວິຊາສະເພາະໄລຍະຍາວ ໄດ້ 26 ຄົນ ຍິງ 10 ຄົນ ກວມ 38,46% ແລະ ຝຶກອົບຮົມໄລຍະສັ້ນ 772 ເທື່ອຄົນ ຍິງ 269 ເທື່ອຄົນ ກວມ 34,84%.ປັດຈຸບັນ ເອື້ອຍນ້ອງແມ່ຍິງກະຊວງ ຮສສ ທີ່ຮັບຕໍາແໜ່ງ ຮອງຫົວໜ້າພະແນກ ມີ 46 ທ່ານກວມ 48,94%, ຫົວໜ້າພະແນກ ມີ 27 ທ່ານ ກວມ 50%, ຮອງຫົວໜ້າກົມ ມີ 6 ທ່ານ ກວມ 22,22%, ຫົວໜ້າກົມ ມີ 3 ຄົນ ກວມ 30% ແລະ ລັດຖະມົນຕີ 1 ທ່ານ ກວມ 100%.
ເນື່ອງໃນໂອກາດວັນສ້າງຕັ້ງແມ່ຍິງລາວ ຄົບຮອບ 69 ປີ ໃກ້ຈະມາເຖິງນີ້, ທ່ານ ນາງມອນທອງ ອິນທະວົງ ຍັງຕາງໜ້າໃຫ້ແກ່ເອື້ອຍນ້ອງແມ່ຍິງກະຊວງ ຮສສ ອວຍພອນໄຊອັນປະເສີດແດ່ການນຳພັກ-ລັດກໍຄືຄະນະພັກ, ຄະນະນຳຊວງ ຮສສ ຕະຫຼອດຮອດບັນດາເອື້ອຍນ້ອງແມ່ຍິງລາວ ບັນດາເຜົ່າໃນຂອບເຂດທົ່ວປະເທດ ຈົ່ງມີສຸຂະພາບແຂງແຮງ,ມີພະລານາໄມທີ່ສົມບູນ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວຂອງທ່ານ ພ້ອມກັນສືບຕໍ່ຮັກສາມູນເຊື້ອອັນດີງາມຂອງຊາດໃຫ້ຖ່າຍທອດຈາກຮຸ່ນສູ່ຮຸ່ນຕະຫຼອດໄປ.
