ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໝາກຂາມຫວານ ຊຶ່ງເປັນສິນຄ້າໜຶ່ງເມືອງໜຶ່ງຜະລິດຕະພັນ (ໂອດ໊ອປ) ໄດ້ກາຍເປັນສິນຄ້າສໍາຄັນທີ່ສ້າງລາຍຮັບໃຫ້ປະຊາຊົນພາຍໃນເມືອງຊະນະຄາມ, ແຂວງວຽງຈັນ. ປັດຈຸບັນ ໝາກຂາມຫວານຈາກເມືອງດັ່ງກ່າວໄດ້ເປັນທີ່ຮູ້ຈັກ ແລະ ຍອມ ຮັບຢ່າງກວ້າງຂວາງໃນທົ່ວປະເທດ.
ທ່ານ ແກ້ວ ພິມມະວົງ, ເຈົ້າເມືອງຊະນະຄາມ ໃຫ້ສໍາພາດຜ່ານລາຍການຮອບບ້ານຜ່ານເມືອງຂອງວິທະຍຸກະ ຈາຍສຽງແຫ່ງຊາດລາວ ເມື່ອບໍ່ດົນມານີ້ວ່າ: ໝາກຂາມຫວານເມືອງຊະນະຄາມ ເປັນທີ່ຍອມຮັບ ແລະ ຮູ້ຈັກຢ່າງກວ້າງຂວາໃນທົ່ວປະ ເທດ, ພາຍຫລັງທີ່ອົງການປົກຄອງເມືອງຈັດງານເທສະການໝາກຂາມຫວານມາແລ້ວຫລາຍຄັ້ງ ເຮັດໃຫ້ປະຊາຊົນພາຍໃນເມືອງຫັນມາປູກໝາກໄມ້ດັ່ງກ່າວນັບມື້ຫລາຍຂຶ້ນ. ປັດຈຸບັນ ເນື້ອທີ່ປູກໝາກຂາມຫວານທົ່ວເມືອງເພີ່ມຂຶ້ນເປັນ 275 ເຮັກ ຕາ, ມີໝາກຂາມຫວານຫລາຍກວ່າ 27.000 ຕົ້ນ, ໃນນີ້ ສາມາດເກັບໝາກໄດ້ແລ້ວ 180 ເຮັກຕາ, ຜົນຜະລິດ 389 ໂຕນ/ປີ, ສ້າງລາຍຮັບສະເລ່ຍ 9.725.000.000 ກີບ/ປີ. ໃນນີ້ ໄດ້ຮັບຄວາມນິຍົມຫລາຍກວ່າໝູ່ແມ່ນພັນສີທອງ.
ເຈົ້າເມືອງຊະນະຄາມ ໃຫ້ຮູ້ຕື່ມວ່າ: ຜົນຜະລິດໝາກຂາມຫວານຢູ່ເມືອງຊະນະຄາມ ໃນແຕ່ລະປີແມ່ນແຕກຕ່າງກັນ ຍ້ອນຂຶ້ນກັບສະພາບດິນຟ້າອາກາດ, ສະເພາະປີນີ້ ຄາດວ່າຜົນຜະລິດຈະຫນ້ອຍກວ່າປີຜ່ານມາ ເພາະຟ້າຝົນບໍ່ອໍານວຍ, ຕົ້ນໝາກຂາມມີດອກຫລາຍແຕ່ບໍ່ຈັບໝາກ. ຢ່າງໃດກໍຕາມ, ມູນຄ່າການຈໍາໜ່າຍໃນປີນີ້ຈະເພີ່ມຂຶ້ນກວ່າ ຍ້ອນລາຄາຈໍາໜ່າຍເພີ່ມຂຶ້ນທົບເຄີ່ງເມືອທຽບໃສ່ປີຜ່ານມາ,
ອົງການປົກຄອງເມືອງ ຈະເອົາໃຈໃສ່ຊຸດຍູ້ສົ່ງເສີມການປູກໝາກຂາມຫວານຢ່າງຕໍ່ເນື່ອງ, ຕິດພັນກັບການຊອກຫາຕະຫລາດຈໍາໜ່າຍໃຫ້ປະຊາຊົນ ໂດຍສະເພາະການຈັດເທສະການໝາກຂາມຫວານ. ສະເພາະປີນີ້ຈັດຂຶ້ນເປັນປີທີ 3 ໃນລະຫວ່າງວັນທີ 27 ມັງກອນ- 3 ກຸມພາ 2024 ນີ້, ຊຶ່ງນອກຈາກເປັນການສົ່ງເສີມການຊື້-ຂາຍໝາກຂາມຫວານ ຍັງເປັນການສົ່ງເສີມການທ່ອງທ່ຽວພາຍໃນເມືອງໃນໂອກາດປີທ່ອງທ່ຽວລາວ 2024 ຕື່ມອີກ.
Cr: ຂ່າວອອນລາຍ, ວສລ