ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສະຖາປະນາ ສປປ ລາວ ຄົບຮອບ 45 ປີ
( 02 ທັນວາ 1975 – 2020 ) ຢ່າງສຸດໃຈ

1 ປີຜ່ານມາທະຫານແຂວງ ອຸດົມໄຊ ສ້າງລາຍຮັບໄດ້ 2 ຕື້ກ່ວາກີບ

ໂດຍປະຕິບັດຕາມທິດຊີ້ນຳ ຂອງຄະນະພັກກະຊວງປ້ອງກັນປະເທດ ກໍ່ຄືກົມໃຫຍ່ພະລາທິການກອງທັບ ເວົ້າລວມ, ເວົ້າສະເພາະແມ່ນການຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານ ທີ່ກະຊວງປ້ອງກັນປະເທດວາງອອກ ໂດຍສະເພາະແມ່ນແຜນງານໃຫຍ່ທີ 3 ວຽກງານພະລາທິການ, ຄະນະພັກ-ຄະນະກອງບັນຊາການທະຫານແຂວງອຸດົມໄຊ ໄດ້ອຳນວຍຄວາມສະດວກໃຫ້ບັນດາກົມກອງເປັນຢ່າງດີ ເຮັດໃຫ້ພື້ນຖານໂຄງລ່າງໄດ້ຮັບການປັບປຸງ ແລະຂະຫຍາຍຕົວດີຂຶ້ນ ອັນເປັນເງື່ອນໄຂທ່າແຮງໃນການກໍ່ສ້າງພະລາທິການກັບທີ່ ເຂົ້າມາພັດທະນາເສດຖະກິດແກ້ໄຂຊີວິດການເປັນຢູ່ຢ່າງຕໍ່ເນື່ອງ ເຖິງແມ່ນວ່າແຂວງອຸດົມໄຊສ່ວນຫຼາຍແມ່ນເຂດພູດອຍ, ສູງຊັນ ບວກໃສ່ບັນຫາໄພພິບັດທາງທຳມະຊາດ ລ້ວນແຕ່ສ້າງຄວາມຫຍຸ້ງຍາກ ແລະທ້າທາຍໃຫ້ແກ່ການຈັດຕັ້ງປະຕິບັດໜ້າທີ່ພະລາທິການ ແຕ່ຍ້ອນມີທິດຊີ້ນຳໂດຍກົງຮອບດ້ານ ຈາກກົມໃຫຍ່ພະລາທິການກອງທັບ ແລະກອງບັນຊາການທະຫານແຂວງອຸດົມໄຊ ບວກໃສ່ຄວາມເປັນເຈົ້າການຂອງຄະນະພັກ-ຄະນະບັນຊາແຕ່ລະຂັ້ນ ກັບການປະກອບສ່ວນຢ່າງແຂງແຮງຂອງເຫຼົ່າລົບພະລາທິການເຮັດໃຫ້ການຈັດຕັ້ງປະຕິບັດວຽກງານພະລາທິການໃນປີ 2019 ບັນລຸຫຼາຍດ້ານ.

ສະຫາຍ ພັນໂທ ບຸນທອງ ໄຊຍະແສງ ຄະນະພັກກອງບັນຊາການ ຫົວໜ້າຫ້ອງພະລາທິການ ລາຍງານໃຫ້ຮູ້ວ່າ: ຄະນະພັກ-ຄະນະບັນຊາໄດ້ເອົາຊີ້ນຳ-ນຳພາ ແລະເປັນເຈົ້າການຊອກຄົ້ນເອົາທ່າແຮງບົ່ມຊ້ອນ ມາພັດທະນາເສດຖະກິດຂອງກົມກອງຕາມສະ ພາບເງື່ອນໄຂຕົວຈິງ, ຍົກສູງສະມັດຕະພາບການຜະລິດໃຫ້ດີຂຶ້ນ ຕາມທິດ 4 ປູກ 4 ລ້ຽງຂອງກົມໃຫຍ່ພະລາທິການວາງອອກ ເພື່ອໃຫ້ສາມາດຕອບສະໜອງໄດ້ຕາມລະບອບອັດຕາ ແລະເປັນສິນຄ້າສົ່ງອອກຂາຍຕາມທ້ອງຕະຫຼາດ, ສາມາດຮັບປະກັນຊີວິດການເປັນຢູ່, ການລ້ຽງດູທັບ ເຮັດໃຫ້ອ້າຍ-ນ້ອງໂສດໄດ້ກິນເຂົ້າ 3 ຄາບ ຢ່າງເປັນປົກກະຕິ ພ້ອມທັງຮັບປະກັນໃຫ້ແກ່ການເຄື່ອນໄຫວ, ຫັດແອບ, ກຽມພ້ອມສູ້ຮົບໄດ້ເປັນຢ່າງດີ ແລະມີສ່ວນແຮ່ສຳຮອງໄວ້ໃນຍາມຈຳເປັນອີກ. ໃນປີຜ່ານມາກອງບັນຊາການທະຫານແຂວງອຸດົມໄຊ ປູກຜືດຜັກຊະນິດຕ່າງໆໄດ້ 70.022 ກິໂລ, ປຸກຜືດເປັນສິນຄ້າໄດ້ 22.042 ກິໂລ, ລ້ຽງງົວ 174 ໂຕ, ໝູ 208 ໂຕ, ແບ້ 33 ໂຕ, ສັດປີກ 6.829 ໂຕ, ປ່ອຍປາ45.010 ໂຕ ສາມາດສ້າງລາຍຮັບໄດ້ທັງໝົດ 2.049.000.000 ກີບ ໃນນີ້ຮັບຈາກການລ້ຽງສັດ 756.680.000 ກີບ, ຮັບຈາກການປູກຝັງໄດ້ທັງໝົດ 632.400.000 ກີບ ແລະຮັບຈາກບໍລິການອື່ນໆໄດ້ 660.000.000 ກີບ ທຽບໃສ່ແຜນການປະຕິບັດໄດ້ 82.2 % ສະເລ່ຍໃສ່ຫົວຄົນ 1 ໄດ້ 937.328 ກີບຕໍ່ຄົນຕໍ່ປີ.

ສ່ວນວຽກງານປັບປຸງກໍ່ສ້າງຄ້າຍຄູ, ບັນດາກົມກອງໃນທົ່ວທະຫານແຂວງອຸດົມໄຊ ແມ່ນໄດ້ຍົກສູງຄວາມເປັນເຈົ້າການໃນການຂຸດຄົ້ນຊອກແຫຼ່ງລາຍຮັບມາພັດທະນາກົມກອງ ບວກໃສ່ການປະຢັດມັດທະຍັດ, ຜະລິດເປັນສິນຄ້າມາບໍລິຫານພາຍໃນກົມກອງ ໃນ 1 ປີຜ່ານມາສຳເລັດການກໍ່ສ້າງທັງໝົດໄດ້ 14 ໂຄງການ, ຕັ້ງຫໍສະມຸດ ເປັນທຶນຊ່ວຍເຫຼືອຈາກ ສສ ຫວຽດນາມ , ກະລາລົດ, ປ້າຍປະໂນ, ເຮືອນຄົວໝວດ, ໂຮງງານນ້ຳດື່ມໂຮງຮຽນທ້ອງຖິ່ນ, ເຮືອນຮົ່ມ, ກໍ່ຕ້ານເຈື່ອນ, ຄອກໄກ່ກອງຮ້ອຍ 12, ຫ້ອງການກົດລັບ, ຫ້ອງນ້ຳລວມ, ອ່າງເກັບນ້ຳ, ຕະຄ່າຍໄຟຟ້າ, ກົງເຕີ້ໄຟຟ້າກອງພັນນ້ອຍ 414, ເຮືອນນອນຄົນເຈັບໂຮງໝໍທະຫານແຂວງ ເປັນທຶນຊ່ວຍເຫຼືອຈາກ ສສ ຫວຽດນາມ ລວມມູນຄ່າການກໍ່ສ້າງທັງໝົດ 4.232.493.342 ກີບ, ໃນນີ້ເປັນທຶນກອງບັນຊາການທະຫານແຂວງອຸດົມໄຊ 1.816.238.324 ກີບ, ທຶນຊ່ວຍເຫຼືອຈາກ ສສ ຫວຽດນາມ 2.112.000.000 ກີບ, ທຶນຂອງກົມກອງຮາກຖານ 216.885.000ກີບ ແລະທຶນຈາກການນຳເມືອງໄຊ, ບໍລິສັດຊ່ວຍເຫຼືອ 9.370.000 ກີບ. ໃນປະຈຸບັນກອງບັນຊາການທະຫານແຂວງອຸດົມໄຊມີສິ່ງປຸກສ້າງເປັນເຮືອນຖາວອນ 196 ຫຼັງ, ເຮືອນເຄິ່ງຖາວອນ 84 ຫຼັງ ທຽບໃສ່ປີຜ່ານມາເພີ່ມຂຶ້ນ 2,5%.

ໃນທິດທາງແຜນການປີ 2020 ນີ້, ກອງບັນຊາການທະຫານແຂວງອຸດົມໄຊຈະສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ່ X ຂອງພັກ, ມະຕິ IV ຂອງຄະນະພັກກະຊວງປ້ອງກັນປະເທດ ວ່າດ້ວຍ 4 ໜ້າທີ່ໃຫຍ່ 26 ແຜນງານ ບົນຈິດໃຈບຸກທະລຸແຜນງານໃຫຍ່ທີ່ 3 ວຽກງານພະລາທິການໃຫ້ມີທ່າກ້າວຂະຫຍາຍຕົວຂຶ້ນຫຼາຍກ່ວາເກົ່າ, ເຊີດຊູນ້ຳໃຈເພິ່ງຕົນເອງ, ກຸ້ມຕົນເອງ ແລະສ້າງຄວາມເຂັ້ມແຂງດ້ວຍຕົນເອງ, ສຸມໃສ່ຂຸດຄົ້ນທ່າແຮງບົ່ມຊ້ອນທີ່ມີພາຍກົມກອງ, ເປັນເຈົ້າການອອກແຮງງານ ເພີ່ມພູນຜະລິດຜົນ ແກ້ໄຂຊີວິດການເປັນຢູ່, ປັບປຸງກໍ່ສ້າງກົມກອງ ຕາມທິດແບບແຜນ ແລະແໜ້ນໜາຖາວອນ, ຄຸ້ມຄອງປົກປັກຮັກສາວັດຖຸອຸປະກອນຮັບໃຊ້ວຽກງານພະລາທິການໃຫ້ດີ ບົນຈິດໃຈປະຢັດສັດທ່ຽງ, ເອົາໃຈໃສ່ກໍ່ສ້າງພະນັກງານຖັນແຖວເຫຼົ່າລົບພະລາທິການໃຫ້ມີຄວາມຮູ້ຄວາມສາມາດດ້ານຄຸນນະພາບ ແລະປະລິມານ ເພື່ອເຮັດສຳເລັດໜ້າທີ່ຕາມການມອບໝາຍຂອງຂັ້ນເທິງ.

ບົດພາບ: ທະນູວັນ ແກ້ວມະນີ