ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີມອບທຶນພັດທະນາບ້ານ ຂອງໂຄງການພູມີທັດ ແລະ ຊີວິດການເປັນຢູ່ ກອງອຸທິຍານແຫ່ງຊາດ ພູເຂົາຄວາຍ ຈັດຂຶ້ນ ຕອນເຊົ້າວັນທີ 3 ມິຖຸນາ 2024 ຢູ່ທີ່ວັດບ້ານໂພນງາມນາຝ້າຍ ເມືອງທຸລະຄົມ ແຂວງວຽງຈັນ, ເປັນກຽດເຂົ້າຮ່ວມຂອງ ທ່ານ ນາງ ວົງເດືອນ ວັດຕະໂສ ເຈົ້າເມືອງໆທຸລະຄົມ, ມີ ທ່ານ ມະນີແສງເພັດ ພະຄຸນທອງ ຮອງຫົວໜ້າກອງອຸທິຍານແຫ່ງຊາດ ພູເຂົາຄວາຍ, ທ່ານ ຄໍາສອນ ກຸນນະວົງ ຮັກສາການ ຫົວໜ້າຫ້ອງການກະສິກໍາ ແລະ ປ່າໄມ້ ເມືອງທຸລະຄົມ, ພ້ອມດ້ວຍຄະນະຮັບຜິດຊອບກອງທຶນ, ນາຍບ້ານ-ຄະນະບ້ານ 10 ບ້ານ ຄື: ບ້ານ ໂພນງາມນາຝ້າຍ, ໂພນໂຮງນາຝ້າຍ, ພູເກົ້່ານາງ, ນໍ້າອ່າງ, ນາຫວ້າ, ວັງເຮືອ, ພູເຂົາຄວາຍໃໝ່, ນໍ້າຫຍາມ, ບ້ານນາເງິນ ແລະ ບ້ານນາຍາງ ຊຶ່ງເປັນບ້ານເປົ້າໝາຍຂອງໂຄງການເຂົ້າຮ່ວມ.
ພາຍຫລັງຄະນະຮັບຜິດຊອບກອງທຶນໄດ້ອະທິບາຍເບື້ອງຕົ້ນ ກ່ຽວກັບຈຸດປະສົງໃນການຈັດພິທິມອບເງິນທຶນພັດທະນາບ້ານໃນເທື່ອນີ້, ການຄຸ້ມຄອງ-ນໍາໃຊ້ເງິນກອງທຶນ ແລະ ຂັ້ນຕອນໃນການຈັດຕັ້ງປະຕິບັດແຜນວຽກຕົວຈິງ ຕາມຈຸດປະສົງຂອງໂຄງການກໍານົດໄວ້ແລ້ວ; ຈາກນັ້ນ ທ່ານ ເຈົ້າເມືອງ ແລະ ທ່ານ ຮອງຫົວໜ້າກອງອຸທິຍານແຫ່ງຊາດພູເຂົາຄວາຍ ໄດ້ຜັດປ່ຽນກັນມີຄໍາເຫັນໂອ້ລົມ, ໂດຍເນັ້ນໜັກໃຫ້ຄະນະຄຸ້ມຄອງກອງທຶນເອົາໃຈໃສ່ ປະຕິບັດບັນດາແຜນກິດຈະກໍາຂອງວຽກງານດັ່ງກ່າວໃຫ້ມີປະສິດທິຜົນ, ພົວພັນປະສານງານກັບພາກສ່ວນກ່ຽວຂ້ອງ, ນໍາພາຂຶ້ນແຜນປະຕິບັດກິດຈະກໍາ ຕາມທ່າແຮງຂອງບ້ານ ແລະ ຄວາມມຸ່ງມາດປາຖະໜາຂອງປະຊາຊົນ ເພື່ອເປົ້້າໝາຍນໍາໃຊ້ເງິນທຶນເຂົ້າໃນການອານຸລັກປ່າໄມ້, ສັດນໍ້າ-ສັດປ່າໃຫ້ມີຄວາມຍືນຍົງ, ເກີດຜົນປະໂຫຍດສູງສຸດ, ສ້າງລາຍຮັບໃຫ້ປະຊາຊົນແລະ ຄອບຄົວທຸກຍາກໃຫ້ພົ້ນທຸກ, ຈາກນັ້ນ ໄດ້ມີພິທີມອບເງິນທຶນພັດທະນາບ້ານໃຫ້ 10 ບ້ານ, ເປັນຈໍານວນເງິນ ບ້ານລະ 10.000 ໂດລາສະຫະລັດ ໂດຍຜ່ານປື້ມລະບົບບັນຊີຂອງທະນາຄານ, ເປັນກຽດກ່າວມອບຂອງ ທ່ານ ນາງ ວົງເດືອນ ວັດຕະໂສ ເຈົ້າເມືອງໆທຸລະຄົມ ແລະ ທ່ານ ນາຍບ້ານ 10 ບ້ານຂຶ້ນຮັບ.
ຂ່າວ: ເມືອງທຸລະຄົມ.