ເນື່ອງໃນໂອກາດຄົບຮອບ 100 ປີ ແຫ່ງການສ້າງຕັ້ງພັກກອມມູນິດຈີນ, ທ່ານ ນາງ ແສງແກ້ວ ( MO Xiao Ling) ຫົວໜ້າວິທະຍຸສາກົນແຫ່ງປະເທດຈີນ (CRI) ປະຈຳລາວ ໄດ້ໃຫ້ສຳພາດຕໍ່ສື່ມວນຊົນເມື່ອວັນທີ 30 ມິຖຸນານີ້ ທີ່ສຳນັກງານ CRI ວ່າ: ຕະຫຼອດໄລຍະ 100 ປີ ທີ່ຜ່ານມາ, ພັກກອມມູນິດຈີນໄດ້ຂະຫຍາຍຕົວຈາກ 50 ກວ່າຄົນໃນເບື້ອງຕົ້ນ ມາເປັນພັກກໍາອໍານາດ ລັດທິມາກ ທີ່ໃຫຍ່ທີ່ສຸດໃນໂລກ ຊຶ່ງມີສະມາຊິກພັກຫຼາຍກວ່າ 91 ລ້ານຄົນ, ພັກກອມມູນິດຈີນ ໄດ້ນໍາພາປະຊາຊົນຈີນບັນລຸການກ້າວກະໂດດຢ່າງຍິ່ງໃຫຍ່ ຈາກການລຸກຂຶ້ນ, ຮັ່ງມີຂຶ້ນ, ເຂັ້ມແຂງຂຶ້ນ, ພັກກອມມູນິດຈີນໄດ້ຊຸກຍູ້ສ້າງປະຊາຄົມຮ່ວມຊາຕາກໍາຂອງມວນມະນຸດ ຊຶ່ງໄດ້ນໍາພາກະແສ ຟອງການພັດທະນາກ້າວໜ້າຂອງໂລກ. ພິເສດ, ໃນປີທີ່ພັກກອມມູນິດຈີນ ສ້າງຕັ້ງຂຶ້ນມີອາຍຸຄົບຮອບ 100 ປີ, ແມ່ນຜົນສຳເລັດໄລຍະທຳອິດຂອງການປະຕິບັດເປົ້າໝາຍໜຶ່ງຮ້ອຍປີ ສອງເຫດການຂອງພັກກອມມູນິດຈີນ ແລະ ປະຊາຊົນຈີນ.
ພາຍໃຕ້ການນໍາພາອັນສະຫຼາດສ່ອງໃສ, ປະດິດສ້າງຂອງພັກກອມມູນິດຈີນ ໂດຍມີ ສະຫາຍ ສີ ຈິ້ນຜິງ ເປັນເລຂາທິການໃຫຍ່ ປະທານປະເທດນັ້ນ ປະຊາຊົນຈີນໄດ້ຜ່ານຜ່າການທົດສອບນາໆປະການ ແລະ ສາມາດຍາດໄດ້ຜົນສໍາເລັດອັນສໍາຄັນ, ຮອບດ້ານ ແລະ ໜັກແໜ້ນໃນການສ້າງສັງຄົມນິຍົມທີ່ມີສີສັນພິເສດຂອງຈີນ. ໃນນັ້ນ, ການລຶບລ້າງຄວາມທຸກຍາກຂອງ ສປ ຈີນ ຊຶ່ງແມ່ນໜຶ່ງໃນວຽກງານຈຸດສຸມຍຸດທະສາດ ທີ່ສ້າງສັງຄົມອີ່ມໜໍາສຳລານຢ່າງຮອບດ້ານ ຂອງ ສປ ຈີນ ກໍໄດ້ບັນລຸຜົນສຳເລັດ ເຮັດໃຫ້ຄວາມໄຝ່ຝັນຂອງຈີນໃນການຟື້ນຟູຄວາມຈະ ເລີນຮຸ່ງເຮືອງອັນຍິ່ງໃຫຍ່ຂອງຊົນຊາດຈີນປະກົດຜົນເປັນຈິງ.
ສປ ຈີນ ໃຊ້ເວລາສັ້ນ ແຕ່ສາມາດລຶບລ້າງຄວາມທຸກຍາກໃຫ້ຄົນນັບ 100 ລ້ານ ຊຶ່ງບໍ່ມີປະເທດໃດ ແລະ ພັກການເມືອງໃດຂອງໂລກເຮັດໄດ້ມາກ່ອນ. ນີ້ແມ່ນຜົນສຳເລັດຂອງແນວຄິດສັງຄົມນິຍົມທີ່ມີລັກສະນະສີສັນພິເສດຂອງຈີນໃນຍຸກໃໝ່ຂອງ ສະຫາຍ ສີ ຈິ້ນຜິງ ແມ່ນຜົນສຳເລັດຂອງການລຶບລ້າງຄວາມທຸກຍາກຂອງ ສປ ຈີນ ແມ່ນແນວຄິດພັດທະນາທີ່ຖືປະຊາຊົນເປັນໃຈກາງຂອງພັກກອມມູນິດຈີນ, ສປ ຈີນ ແມ່ນປະເທດພວມພັດທະນາ ປະເທດທຳອິດຂອງໂລກທີ່ບັນລຸເປົ້າໝາຍການຫຼຸດຜ່ອນຄວາມທຸກຍາກໃນເປົ້າໝາຍສະຫັດສະວັດດ້ານການພັດທະ ນາຂອງອົງການ ສປຊ ໄດ້ກຳນົດໄວ້ເມື່ອປີ 2015.
ຜົນສຳເລັດໃໝ່ ແລະ ໃຫຍ່ຫຼວງທີ່ຊາວໂລກຍ້ອງຍໍຊົມເຊີຍຈີນແມ່ນໄຊຊະນະໃນການຮັບມືສູ້ກັບພະຍາດໂຄວິດ-19, ພາຍໃຕ້ການນໍາພາຂອງພັກກອມມູນິດຈີນ, ໃນປີ 2019 ຜ່ານມາທົ່ວໂລກເຫັນວ່າຈີນສາມາດຄວບຄຸມພະຍາດໂຄວິດ-19 ໄດ້, ໃນຂະນະທີ່ຫຼາຍປະເທດຍັງມີການລະບາດຢູ່ ແລະ ດ້ວຍຄວາມຕັດສິນໃຈຢ່າງເດັດດ່ຽວຈາກການນໍາ ພາຂອງພັກກອມມູນິດຈີນໂດຍມີ ສະຫາຍ ສີ ຈິ້ນຜິງ ເປັນແກນກາງ ແລະ ໄດ້ຮັບການປະກອບ ສ່ວນຂອງປະຊາຊົນທຸກຊັ້ນຄົນ, ພະນັກງານ, ທະຫານ, ຕໍາຫຼວດຢ່າງແຂງແຮງ.
ສປ ຈີນ ສາມາດເອົາຊະນະກັບ ພະຍາດດັ່ງກ່າວໄດ້ ຊຶ່ງປະສົບການນີ້ຫຼາຍປະເທດໄດ້ເອົາບົດຮຽນຂອງຈີນໄປໃຊ້ຖືວ່າມີຄວາມເຂັ້ມງວດແທ້ ໃນການຕໍ່ສູ້, ອັນນີ້ສະແດງເຖິງຄວາມເປັນປຶກແຜ່ນຂອງພັກກອມມູນິດຈີນ. ມາຮອດປັດຈຸບັນ, ສປ ຈີນ ໄດ້ສືບຕໍ່ ຊ່ວຍເຫຼືອຫຼາຍປະເທດໃນການຮັບມືກັບພະຍາດດັ່ງກ່າວນັ້ນ, ລວມທັງ ສປປ ລາວ ກໍໄດ້ຮັບການຊ່ວຍເຫຼືອ ນັບທັງຢາວັກຊິນ-ອຸປະກອນການແພດລວມທັງໄດ້ສົ່ງຊ່ຽວຊານການແພດຈີນ ແລະ ອື່ນໆມາຊ່ວຍລາວ.
ທ່ານນາງ ແສງແກ້ວ ກ່າວໃຫ້ຮູ້ຕື່ມອີກວ່າ: ວິທະຍຸສາກົນແຫ່ງປະເທດຈີນ ແມ່ນພາກສ່ວນໜຶ່ງຂອງສື່ ມວນຊົນຈີນທີ່ປະຕິບັດໜ້າທີ່ປະຈຳຢູ່ ສປປ ລາວ ມາຮອດປັດຈຸບັນການພົວພັນຮ່ວມມືລະຫວ່າງສອງປະເທດ ພວກເຮົາເວົ້າລວມ, ກໍຄືການພົວພັນລະຫວ່າງສື່ມວນຊົນຈີນ ແລະ ລາວ ນັບມື້ໄດ້ຮັບການເສີມຂະຫຍາຍເຂົ້າສູ່ ລວງເລິກເປັນໄລຍະທີ່ດີທີ່ສຸດໃນປະຫວັດສາດຂອງການພົວພັນຂອງສອງປະເທດລາວ-ຈີນ, ສື່ພວກເຮົາໄດ້ມີ ການພົວພັນຮ່ວມມືແລກປ່ຽນຂໍ້ມູນຂ່າວສານ, ໂຄສະນາຊຶ່ງກັນ ແລະ ກັນດ້ວຍດີຕະຫຼອດມາ. ພິເສດພວກເຮົາ ໄດ້ນຳເອົາຜົນງານການພັດທະນາຂອງປະເທດລາວໄປໂຄສະນາຢູ່ຈີນໃຫ້ສັງຄົມຈີນໄດ້ຮັບຮູ້ ແລະ ເອົາສັງຄົມ ວັດທະນະທໍາຂອງຈີນມາໂຄສະນາຢູ່ລາວໃຫ້ປະຊາຊົນລາວໄດ້ຮັບຮູ້, ອັນນີ້ຖືວ່າເປັນເຫດການສໍາຄັນທີ່ສຸດທີ່ສື່ ພວກເຮົາໄດ້ແລກປ່ຽນກັນ ໂດຍລວມຕະຫຼອດໄລຍະຜ່ານມາພວກເຮົາໄດ້ມີການຈັດຫຼາຍກິດຈະກຳຮ່ວມກັນກັບ ສື່ມວນຊົນລາວ, ສະເພາະເມື່ອຕົ້ນປີ 2021 ກໍໄດ້ຮ່ວມມືກັບກົມຮູບເງົາສືບຕໍ່ສາຍຮູບເງົາດີເດັ່ນລາວ-ຈີນເປັນຄັ້ງທີ 4 ຢູ່ນະຄອນຫຼວງວຽງຈັນ ແລະ ຕ່າງແຂວງຈຳນວນໜຶ່ງ, ຈັດງານແຂ່ງຂັນວິດີໂອສັ້ນລາວ-ຈີນ 2021 ພາຍໃຕ້ຫົວຂໍ້ “ຄຽງຂ້າງກັນ”. ຜົນງານດັ່ງກ່າວໄດ້ປະກອບສ່ວນເຮັດໃຫ້ສາຍພົວພັນຮ່ວມມືຍຸດທະສາດຮອບດ້ານໝັ້ນຄົງ ຍາວນານຕາມທິດ 4 ດີ ກໍຄືຄູ່ຮ່ວມຊາຕາກໍາລາວ-ຈີນ, ຈີນ-ລາວ ໄດ້ຮັບການເພີ່ມພູນຄູນສ້າງໃຫ້ເຕີບໃຫຍ່ ຂະຫຍາຍ ຕົວ ແລະ ເກີດດອກອອກຜົນເປັນກ້າວໆ ເພື່ອຜົນປະໂຫຍດລວມຂອງປະຊາຊົນສອງຊາດພວກເຮົາ ແລະ ປີນີ້ກໍເປັນປີຄົບຮອບວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 60 ປີ ແລະ ປີມິດຕະພາບລາວ-ຈີນ, ຈີນ-ລາວ ອີກດ້ວຍ.
Loading...