ເມື່ອຮອດວັນທີ 1 ກໍລະກົດ 2022, ກໍ່ຈະເປັນວັນປະກາດການສ້າງຕັ້ງພັກຄອມມູນິດ ຈີນ ຄົບຮອບ 101 ປີ. ການສ້າງຕັ້ງພັກຄອມມູນິດຈີນ ແມ່ນເປັນການເປີດສັງກາດໃໝ່ ໃນປະຫວັດສາດ ຈີນ ທີ່ມີອົງການຈັດຕັ້ງພັກ ເປັນແກນນຳ ຂອງປະຊາຊົນ ໃນການຕໍ່ສູ້ເພື່ອກອບກູ້ກຽດສັກສີ ແລະ ພະຍາຍາມຟື້ນຟູຄວາມຈະເລີນຮຸ່ງເຮືອງຂອງປະເທດຊາດຈີນຄືນໃໝ່. ນັບຕັ້ງແຕ່ມື້ທີ່ໄດ້ກໍ່ຮ່າງສ້າງຕົວເປັນຕົ້ນມາ, ພັກຄອມມູນິດຈີນ ໄດ້ສຸມທຸກຄວາມພະຍາຍາມໃນການປັບປຸງ ບຳລຸງສ້າງໃຫ້ພັກຄອມມູນິດຈີນ ມີຄວາມເຂັ້ມແຂງ ໜັກແໜ້ນທາງດ້ານແນວຄິດທິດສະດີ, ເສີມຂະຫຍາຍບົດບາດການນຳພາຂອງພັກ ເພື່ອເຕົ້າໂຮມຄວາມສາມັກຄີປະຊາຊົນຈີນບັນດາເຜົ່າໃຫ້ເປັນປຶກແຜ່ນ, ໃຫ້ມີຄວາມເປັນເອກະພາບຢ່າງແໜ້ນແຟ້ນ, ເປັນອັນໜຶ່ງອັນດຽວກັນ ໃນການຕໍ່ສູ້ກູ້ຊາດ, ເພື່ອຄວາມເປັນເອກະລາດແຫ່ງຊາດ ແລະ ສະຖາປະນາປະເທດ ສາທາລະນະລັດ ປະຊາຊົນຈີນ ໃນວັນທີ 1 ຕຸລາ 1949. ຈາກນັ້ນກໍໄດ້ ສືບຕໍ່ນຳພາປະຊາຊົນ ຈີນ ໃນການສ້າງສາພັດທະນາເສດຖະກິດ-ສັງຄົມຂອງປະເທດ ທີ່ຕ້ອງໄດ້ຕໍ່ສູ້ຜ່ານຜ່າຄວາມຫຍຸ້ງຍາກສັບສົນຂອງສະພາບ ແລະ ວິກິດການພາຍໃນປະເທດ ລວມທັງສະພາບແວດລ້ອມຂອງພາກພື້ນ ແລະ ສາກົນ ທີ່ມີການປ່ຽນແປງຢ່າງສັບສົນ ຊຶ່ງມີທັງການຮ່ວມມື, ການແກ່ງແຍ່ງແຂ່ງຂັນ ແລະ ການກົດດັນປິດລ້ອມ.
ໃນປະຫວັດສາດໄດ້ຈາລຶກໄວ້ວ່າ ເມື່ອຫ້າພັນປີກ່ອນ ປະເທດຈີນ ເປັນປະເທດໜຶ່ງທີ່ເຄີຍປະກອບສ່ວນສ້າງວິລະກຳ ທີ່ສໍາຄັນທີ່ສຸດໃຫ້ແກ່ຄວາມສີວິໄລຂອງມວນມະນຸດໃນໄລຍະນັ້ນ. ແຕ່ພາຍຫລັງການເກີດສົງຄາມຢາຝິ່ນ ໃນປີ 1840, ປະເທດຈີນ ໄດ້ເລີ່ມເຊື່ອມຖອຍລົງເລື້ອຍໆ ຈົນຕົກເປັນປະເທດເຄິ່ງຫົວເມືອງຂຶ້ນຂອງຕ່າງຊາດ, ກາຍເປັນສັງຄົມເຄິ່ງສັກດີນາ ແລະ ທີ່ຮ້າຍແຮງກວ່ານັ້ນແມ່ນຖືກສົງຄາມທຳລາຍຢ່າງໜັກໜ່ວງ. ເຫດການຕ່າງໆເຫຼົ່ານັ້ນໄດ້ສ້າງຄວາມອັບອາຍຂາຍໜ້າ ແລະ ຄວາມເຈັບແຄ້ນແໜ້ນໃຈໃຫ້ແກ່ປະຊາຊົນຈີນທີ່ສຸດ, ເພາະໃນເມື່ອກ່ອນ ຈີນເຄີຍເປັນປະເທດທີ່ສີວິໄລ ມີຄວາມເຂັ້ມແຂງ, ແຕ່ພັດກາຍມາເປັນປະເທດທີ່ຕົກຕໍ່າອ່ອນແອ ແລະ ຖືກຂົ່ມເຫັງຍໍ່າຍີ, ຖືກແບ່ງແຍກດິນແດນ. ປະຊາຊົນຈີນ ທີ່ມີຄວາມຄຽດແຄ້ນ ແລະ ມີຄວາມໄຝ່ຝັນທີ່ຢາກຟື້ນຟູ ແລະ ກູ້ກຽດປະເທດຈີນຄືນໃໝ່ໃນໄລຍະນັ້ນ ໄດ້ມີຄວາມພະຍາຍາມໃນການຕໍ່ສູ້ເພື່ອເຕົ້າໂຮມປະເທດຊາດ ແລະ ໄດ້ມີຫລາຍຂະບວນການຕໍ່ສູ້ເກີດຂຶ້ນຢ່າງຕໍ່ເນື່ອງ. ຄວາມພະຍາຍາມໃນການຕໍ່ສູ້ແຕ່ລະຄັ້ງຂອງທຸກຂະບວນການ ລ້ວນແລ້ວແຕ່ໄດ້ສິ້ນສຸດລົງດ້ວຍຄວາມປະລາໄຊ. ບົດຮຽນທີ່ຖອດຖອນໄດ້ຈາກຄວາມປະລາໄຊ ຂອງຂະບວນການຕໍ່ສູ້ເພື່ອຟື້ນຟູປະເທດຊາດຜ່ານມາ ໄດ້ຊີ້ໃຫ້ເຫັນວ່າ ປະຊາຊົນຈີນ ມີຄວາມຈຳເປັນຕ້ອງມີອົງການຈັດຕັ້ງທີ່ເປັນແກນນຳ, ເປັນຕົວແທນໃຫ້ແກ່ປະຊາຊົນຢ່າງແທ້ຈິງ ພ້ອມທັງມີຜູ້ນໍາທີ່ມີແນວຄິດ ແລະ ທິດສະດີ ໃໝ່ທີ່ສອດຄ່ອງ ເພື່ອນຳພາການເຕົ້າໂຮມກ້ອນກຳລັງສາມັກຄີ ປະຊາຊົນຈີນ ໃນການດໍາເນີນການຕໍ່ສູ້ປະຕິວັດຊາດດ້ວຍກໍາລັງອາວຸດ. ຍ້ອນຜົນສຳເລັດຂອງກະແສຟອງປະຕິວັດເດືອນ ຕຸລາ 1917 ຢູ່ ຣັດເຊຍ, ແນວຄິດ ທິດສະດີສັງຄົມນິຍົມໄດ້ເລີ່ມເປັນທີ່ຮັບຮູ້ ແລະ ຖືກຖອດຖອນ ເຂົ້າໃນຂະບວນການນໍາພາເຄື່ອນໄຫວປະຕິວັດ ຂອງຊົນຊັ້ນຜູ້ອອກແຮງງານໃນປະເທດຈີນ. ຫລັງຈາກນັ້ນ 4 ປີ ຄືວັນທີ 1 ກໍລະກົດ 1921, ພັກຄອມມູນິດຈີນ ກໍໄດ້ຮັບການປະກາດສ້າງຕັ້ງຂຶ້ນຢ່າງເປັນທາງການ, ຊຶ່ງໃນເວລານັ້ນຈໍານວນສະມາຊິກພັກຄອມມູນິດຈີນ ມີບໍ່ເຖິງ 60 ສະຫາຍ, ການເວລາໄດ້ຜ່ານໄປ, ພັກຄອມມູນິດຈີນ ໄດ້ມີການພັດທະນາຕົນເອງ ແລະ ມີຄວາມເຕີບໃຫຍ່ຂະຫຍາຍຕົວທັງດ້ານ ປະລິມານ ແລະ ຄຸນນະພາບ, ປັດຈຸບັນ ມີສະມາຊິກເຖິງ 95 ລ້ານຄົນ, ເຊິ່ງເປັນພັກການເມືອງ ທີ່ມີສະມາຊິກຫລາຍທີ່ສຸດໃນໂລກ ທີ່ຕາງໜ້າໃຫ້ປະຊາຊົນຈີນຫລາຍກວ່າ 1,4 ຕື້ຄົນ.
ຕະຫລອດໄລຍະ ໜຶ່ງສັດຕະວັດຜ່ານມາ, ພັກຄອມມູນິດຈີນ ໄດ້ສຸມຄວາມພະຍາຍາມໃນການຊີ້ນໍາ ແລະ ນໍາພາປະຊາຊົນຈີນ ເພື່ອບັນລຸເປົ້າໝາຍໃນການພັດທະນາເສດຖະກິດ-ສັງຄົມຂອງປະເທດ ແລະ ເຫັນວ່າຄວາມພະຍາຍາມທີ່ຜ່ານມານັ້ນ ໄດ້ປະສົບຜົນສຳເລັດຕາມຄວາມມຸ້ງມາດປາຖະໜາຂອງພັກ ແລະ ຂອງປະຊາຊາດ ຈີນ ໃນການນຳເອົາຄວາມສົມບູນພູນສຸກມາໃຫ້ແກ່ປະຊາຊົນ ແລະ ເອົາຄວາມຈະເລີນຮຸ່ງເຮືອງມາສູ່ປະເທດຊາດ. ສຳຄັນທີ່ສຸດແມ່ນລັດຖະບານ ສປຈີນ ສາມາດບັນລຸເປົ້າໝາຍທີ່ເປັນປະຫວັດສາດ ໃນການລົບລ້າງຄວາມທຸກຍາກໄດ້ຢ່າງສິ້ນເຊີງ, ຖືເປັນໄຊຊະນະທີ່ຍິ່ງໃຫຍ່ທີ່ສຸດ ແລະ ເປັນຄວາມພາກພູມໃຈຂອງພັກຄອມມູນິດຈີນ ແລະ ປະຊາຊາດຈີນ ທັງໝົດ. ປັດຈຸບັນພັກຄອມມູນິດຈີນກຳລັງນໍາພາປະຊາຊົນຈີນ ກ້າວເດີນໄປຂ້າງໜ້າດ້ວຍຄວາມໜັກແໜ້ນ ແລະ ດ້ວຍເຈດຕະນາລົມທີ່ແນ້ວແນ່ ໃນການກ້າວສູ່ເປົ້າໝາຍໃໝ່ ໃນສັດຕະວັດທີ່ສອງ ເພື່ອສ້າງປະເທດຈີນໃຫ້ເປັນປະເທດສັງຄົມນິຍົມທີ່ທັນສະໄໝຮອບດ້ານ.
ນັບແຕ່ມື້ສ້າງຕັ້ງພັກຄອມມູນິດຈີນເປັນຕົ້ນມາ, ພັກ ມີຄວາມມຸ້ງມາດປາຖະໜາ ທີ່ຈະນຳເອົາຄວາມເພິ່ງພໍໃຈ ແລະ ຄວາມສົມບູນພູນສຸກມາສູ່ປະຊາຊົນ ແລະ ປະເທດຊາດຈີນ ໃຫ້ໄດ້ມີການຟື້ນຕົວຄືນມາໃໝ່. ພັກໄດ້ນຳພາທຸກໆການຕໍ່ສູ້, ການເສຍສະຫລະ ແລະ ການສ້າງສາພັດທະນາ ໂດຍການເຕົ້າໂຮມຄວາມສາມັກຄີຂອງປະຊາຊົນ ໃຫ້ເປັນກ້ອນກຳລັງອັນດຽວພາຍໃຕ້ຄໍາຂວັນດຽວກັນ ຄື ສ້າງປະເທດຊາດຈີນໃຫ້ເຂັ້ມແຂງ ແລະ ຍິ່ງໃຫຍ່. ເພື່ອບັນລຸຜົນສຳເລັດໃນການສ້າງປະເທດຊາດຈີນໃຫ້ເຂັ້ມແຂງນັ້ນ, ພັກຄອມມູນິດຈີນ ໄດ້ເຕົ້າໂຮມ ແລະ ນໍາພາປະຊາຊົນຈີນ ໃນການຕໍ່ສູ້ ຢ່າງນອງເລືອດໃນສະໜາມຮົບຕ່າງໆ ຢ່າງເດັດດ່ຽວ ແລະ ອົງອາດກ້າຫານ ເພື່ອບັນລຸໄຊຊະນະອັນໃຫຍ່ຫລວງ ໃນການປະຕິວັດ ປະຊາທິປະໄຕໃໝ່. ເປັນຕົ້ນໃນລະຫວ່າງສົງຄາມໂລກຄັ້ງທີ 2; ສົງຄາມເພື່ອປົດປ່ອຍຊາດ; ສົງຄາມຕໍ່ສູ້ກັບກຳລັງປະກອບອາວຸດທີ່ຕ້ານການປະຕິວັດ; ສົງຄາມໂຄ່ນລົ້ມພວກສັກດີນາ; ສົງຄາມຕ້ານຈັກກະພັດ; ຕ້ານລູກແຫລ້ງຕີນມືພວກນາຍທຶນ ແລະ ກ້າວໄປເຖິງຜົນສໍາເລັດໃນການສະຖາປະນາ ສາທາລະນະລັດ ປະຊາຊົນຈີນ ໂດຍແມ່ນປະຊາຊົນຈີນເປັນເຈົ້າຂອງປະເທດຊາດຢ່າງແທ້ຈິງ, ຊຶ່ງສາມາດປົດປ່ອຍ ປະຊາຊົນຈີນ ອອກຈາກການເປັນຂ້ອຍຂ້າ ແລະ ກອບກູ້ ເອກະລາດ ອະທິປະໄຕຂອງຊາດຈີນ ໄວ້ໄດ້. ເລີ່ມຈາກຈຸດນີ້ຖືວ່າປະເທດຊາດຈີນ ໄດ້ສິ້ນສຸດລະບອບທີ່ເປັນເຄິ່ງຫົວເມືອງຂຶ້ນ, ເຄິ່ງສັງຄົມສັກດີນາ ແລະ ສິ້ນສຸດຄວາແຕກແຍກພາຍໃນປະເທດຊາດຈີນ, ສິ້ນສຸດຄວາມບໍ່ຍຸຕິທຳທີ່ຕ່າງຊາດເຄີຍເອົາລັດເອົາປຽບປະຊາຊົນຈີນ.
ພັກຄອມມູນິດຈີນ ໄດ້ເພີ່ມຄວາມພະຍາຍາມເພື່ອສົ່ງເສີມໃຫ້ປະຊາຊົນຈີນເອົາໃຈໃສ່ໃນການປັບປຸງຕົນເອງ ເພື່ອພັດທະນາທາງດ້ານເຕັກນິກວິທະຍາສາດ ເພື່ອຟື້ນຄືນຄວາມທັນສະໄໝ, ຄວາມມີວິທະຍາສາດຂອງຊົນຊາດຈີນ, ເຊິ່ງໃນອະດີດຕະການເຄີຍເປັນຜູ້ນຳໜ້າ ທາງດ້ານເຕັກນິກ ວິທະຍາສາດ, ເປັນຜູ້ຄົ້ນຄິດປະດິດສ້າງສິ່ງຂອງ ແລະ ເຄື່ອງມືຮັບໃຊ້ຕ່າງໆ ກ່ອນໝູ່ໝົດເຊັ່ນ: ຜະລິດເຈັ້ຍ ຕັ້ງແຕ່ປີ 202 ກ່ອນຄຣິສຕະຈັກກະຣາດ; ເຄື່ອງມືພິມໜັງສືທີ່ເຮັດດ້ວຍໄມ້ ປະມານປີ (ຄ.ສ 650-670); ເຄື່ອງຕີພິມຕົວໜັງສື ທີ່ປິ່ນໄດ້ ປະມານ ປີ (ຄ.ສ 960-1279); ໝື້ປືນ ປະມານປີ (ຄ.ສ 618-907); ເຂັມຊີ້ທິດ ປະມານປີ (ຄ.ສ 202) ແລະ ອື່ນໆ, ທີ່ປະເທດຈີນ ໄລຍະນັ້ນຢືນຢູ່ແຖວໜ້າໝູ່ໃນໂລກ ທາງດ້ານເຕັກນິກວິທະຍາສາດ, ແຕ່ກົງກັນຂ້າມພາຍຫລັງທີ່ປະເທດຊາດຕົກເປັນເຄິ່ງຫົວເມືອງຂຶ້ນ, ເຄິ່ງສັກດີນາ ແລະ ຖືກຕ່າງຊາດຮຸກຮານ ຄອບຄອງ, ປະເທດຈີນໄດ້ກາຍເປັນປະເທດທີ່ຫລ້າຫລັງທາງດ້ານເຕັກນິກວິທະຍາສາດ. ຄວາມພະຍາຍາມຂອງປະເທດຈີນທີ່ຈະພັດທະນາຕົນເອງທາງດ້ານເຕັກໂນໂລຊີ ເພື່ອແລ່ນໃຫ້ທັນລະດັບ ແລະ ໃຫ້ສາມາດລໍ້າໜ້າໃນໝູ່ປະເທດທີ່ພັດທະນາໄດ້ນັ້ນ ບໍ່ແມ່ນເລື່ອງງ່າຍດາຍ ແລະ ບໍ່ສາມາດຈະເຮັດໄດ້ມື້ໜຶ່ງຍາມດຽວ, ພັກຄອມມູນິດຈີນ ນອກຈາກນຳພາປະຊາຊົນຈີນ ເພີ່ມຄວາມເອົາໃຈໃສ່ໃນຄວາມພະຍາຍາມເພື່ອພັດທະນາດ້ານຊັບພະຍາກອນມະນຸດ ໃຫ້ມີຄວາມຮູ້ຄວາມສາມາດສືບທອດຕໍ່ກັນ ຈາກຮຸ້ນສູ່ຮຸ້ນໃນແຕ່ລະຍຸກແຕ່ລະສະໄໝ, ປະຊາຊົນຈີນຍັງຖືກຕ່າງຊາດ ທີ່ພັດທະນາແລ້ວນັ້ນ ໄດ້ໃຊ້ຄວາມພະຍາຍາມໃນການຜູກຂາດຂໍ້ມູນຂ່າວສານດ້ານເຕັກໂນໂລຊີ, ເພື່ອກົດໜ່ວງຖ່ວງດຶງ, ສ້າງຄວາມຫຍຸ້ງຍາກສັບສົນ, ພະຍາຍາມນຳໃຊ້ມາດຕະການທີ່ບໍ່ຍຸຕິທຳ ເປັນສິ່ງກີດຂວາງ ເພື່ອບໍ່ໃຫ້ຈີນສາມາດເຂົ້າເຖິງແຫລ່ງຂໍ້ມູນ ໃນການພັດທະນາທາງດ້ານວິທະຍາສາດ ແລະ ເຕັກໂນໂລຊີ ຂອງ ປະເທດຈີນໄດ້, ໂດຍສະເພາະແມ່ນການຂຶ້ນທະບຽນລິຂະສິດຊັບສິນທາງປັນຍາ. ປະເທດຈີນ ບໍ່ສະເພາະແຕ່ຖືກປິດລ້ອມການເຂົ້າເຖິງຂໍ້ມູນຂ່າວສານດ້ານເຕັກໂນໂລຊີເທົ່ານັ້ນ, ແຕ່ຍັງຖືກປິດລ້ອມບໍ່ໃຫ້ບໍລິສັດຕ່າງຊາດ ຂາຍສິນຄ້າ ທີ່ປະກອບສ້າງຂຶ້ນດ້ວຍເຕັກໂນໂລຊີສູງ. ຍ້ອນຂໍ້ຈໍາກັດ ແລະ ມາດຕະການກີດຂວາງດັ່ງກ່າວນັ້ນ ໄດ້ສົ່ງຜົນກະທົບທີ່ຫຍຸ້ງຍາກທີ່ສຸດຕໍ່ຄວາມພະຍາຍາມໃນການຍົກລະດັບຄວາມຮູ້ ແລະ ການສ້າງຂີດຄວາມສາມາດໃນການຄົ້ນຄວ້າ, ການປະດິດຄິດສ້າງຕ່າງໆ, ເຊິ່ງທັງໝົດນີ້ແມ່ນໄດ້ບັງຄັບໃຫ້ ສປ ຈີນ ຈຳເປັນຕ້ອງໄດ້ເພິ່ງພາອາໄສ ຕ່ອງໂສ້ການຜະລິດຕ່າງໆ ທາງດ້ານເຕັກນິກ ວິທະຍາສາດຂອງປະເທດທີ່ພັດທະນາແລ້ວ. ອີງຕາມຂໍ້ມູນຈາກຂ່າວ ສານຈີນ ລາຍງານວ່າ ໃນຂະແໜງການຜະລິດສິນຄ້າທີ່ນຳໃຊ້ເຄື່ອງເຕັກນິກວິທະຍາສາດສູງ ຢູ່ໃນ ສປ ຈີນ 70% ຍັງໄດ້ອີງໃສ່ການສະໜອງດ້ານເຕັກນິກວິທະຍາສາດຈາກຕ່າງປະເທດ; 80% ຂອງເຄື່ອງອາໄຫລ່ ທີ່ຜະລິດເຄື່ອງທັນສະໄໝ ຕ້ອງໄດ້ນຳເຂົ້າຈາກຕ່າງປະເທດ, ບາງເຕັກນິກວິທະຍາສາດ ໃນຂະແໜງການທີ່ຜະລິດ ໄມໂກຣຈິບ ຍັງຕ້ອງໄດ້ນຳເຂົ້າເຕັກນິກວິທະຍາສາດຈາກຕ່າງປະເທດ 100%.
ໃນຄວາມພະຍາຍາມເພື່ອສ້າງໃຫ້ຈີນເປັນປະເທດທີ່ກ້າວໜ້າໃນການພັດທະນາດ້ານເຕັກນິກ ວິທະຍາສາດນັ້ນ ໃນ ປີ 2015 ພັກຄອມມູນິດຈີນ ໄດ້ວາງຍຸດທະສາດ “ຜະລິດໃນປະເທດຈີນ ປີ 2025 (made in China 2025)“, ເປົ້າໝາຍ ຂອງນະໂຍບາຍດັ່ງກ່າວນີ້ແມ່ນ ສປ ຈີນ ຈະພະຍາຍາມສູ້ຊົນຈັດຕັ້ງຜັນຂະຫຍາຍ ແຜນຍຸດທະສາດການພັດທະນາເສດຖະກິດ-ສັງຄົມ 5 ປີ ຄັ້ງທີ 13 ແລະ ຄັ້ງທີ 14 ຂອງ ພັກຄອມມູນິດຈີນ ໃຫ້ບັນລຸຜົນສຳເລັດເພື່ອສ້າງໃຫ້ປະເທດຈີນເປັນຖານການຜະລິດຂອງໂລກ (World’s factory) ທາງດ້ານເຕັກໂນໂລຊີ, ໂດຍການປັບປຸງຄວາມສາມາດໃນການຜະລິດອຸດສາຫະກໍາຂອງຈີນຈາກການນໍາໃຊ້ແຮງງານຄົນ ໄປສູ່ການນຳໃຊ້ເຕັກໂນໂລຊີທີ່ທັນສະໄໝ, ເຊັ່ນ: ຮອດປີ 2020 ການຜະລິດພາຍໃນ ສປ ຈີນ ສໍາລັບສິ້ນສ່ວນສໍາຄັນ ແລະ ອຸປະກອນຕ່າງໆ ດ້ານເຕັກໂນໂລຊີ ໃຫ້ໄດ້ 40%, ເມື່ອຮອດປີ 2025 ຈະໃຫ້ສາມາດບັນລຸ 70%. ແຜນການດັ່ງກ່າວແມ່ນສ້າງໃຫ້ ຈີນ ສາມາດສ້າງດ້ວຍຕົນເອງ ແລະ ກຸ້ມຕົນເອງ ດ້ານສິ້ນສ່ວນ ແລະ ອຸປະກອນ ສຳລັບບໍລິສັດທີ່ຜະລິດຢູ່ໃນປະເທດຈີນ, ເຊິ່ງຈະກ້າວໄປເຖິງການສ້າງໃຫ້ບໍລິສັດ ຈີນ ສາມາດເປັນຖານການຜະລິດທີ່ໝັ້ນຄົງແຂ່ງຂັນກັບຕະຫລາດສາກົນໄດ້. ບັນດາຂະແໜງການເປົ້າໝາຍຂອງຍຸດທະສາດ “ ຜະລິດໃນປະເທດຈີນ ປີ 2025” ມີຄື: ອຸປະກອນໄຟຟ້າ; ເຄື່ອງກົນຈັກກະສິກຳ; ຜະລິດຕະພັນອຸປະກອນແບບໃໝ່; ຜະລິດລົດໄຟຟ້າທີ່ປະຢັດພະລັງງານ; ເຄື່ອງຈັກໂຣເບີດ; ຂໍ້ມູນຂ່າວສານເຕັກໂນໂລຊີ ( IT ); ອຸປະກອນອາວະກາດ; ອຸປະກອນທາງລົດໄຟ; ອຸປະກອນ ວິສະວະກອນທາງທະເລ ແລະ ກໍ່າປັ່ນ ທີ່ນຳໃຊ້ລະບົບໄຮເຕັກສູງສຸດ; ແລະ ເຄື່ອງມືອຸປະກອນການແພດ.
ໃນໄລຍະທີ່ຜ່ານມາ, ຍ້ອນຄວາມພະຍາຍາມໃນການຊີ້ນໍາ ແລະ ນຳພາ ຂອງພັກຄອມມູນິດຈີນ, ລັດຖະບານ ແລະ ປະຊາຊົນຈີນ ສາມາດຜ່ານຜ່າທຸກວິກິດການໄປໄດ້ຢ່າງສຳເລັດຜົນ ເຊັ່ນ: ວິກິດການທາງດ້ານເສດຖະກິດໃນພາກພື້ນອາຊີໃນຊຸມປີ 1997, ວິກິດການເສດຖະກິດ ໃນພາກພື້ນອື່ນຂອງໂລກ ລວມທັງວິກິດການການແຜ່ລະບາດຂອງພະຍາດໂຄວິດ-19, ສປ ຈີນ ກໍ່ສາມາດຜ່ານຜ່າ ແລະ ເອົາຊະນະໄດ້, ຊຶ່ງເຮັດໃຫ້ໂລກຕ້ອງຍອມຮັບຮູ້ເຖິງຄວາມສາມາດໃນການນໍາພາຂອງພັກຄອມມູນິດຈີນ, ໃນກອງປະຊຸມສະພາຜູ້ແທນປະຊາຊົນທົ່ວປະເທດຈີນ ຄັ້ງທີ 5 ສະໄໝທີ 19, ໃນວັນທີ 5 ມີນາ 2022, ໄດ້ຮັບຟັງການລາຍງານ ຂອງທ່ານນາຍົກ ລີເຄີຊຽງ ກ່ຽວກັບ ສະພາບການພັດທະນາເສດຖະກິດຂອງ ສປ ຈີນ ສະເພາະໃນປີ 2021 ເຖິງແມ່ນວ່າ ປະເທດຍັງມີຜົນກະທົບດ້ານການແຜ່ລະບາດຂອງພະຍາດ ໂຄວິດ-19, ແຕ່ເສດຖະກິດຈີນຍັງສືບຕໍ່ຂະຫຍາຍຕົວ 8,1% ບັນລຸໄດ້ປະມານ 17.700 ຕື້ ໂດລາ, ເຊິ່ງກວມເອົາ 18% ຂອງ GDP ໂລກ ແລະ ເປັນເສດຖະກິດທີ່ໃຫຍ່ອັນດັບສອງຂອງໂລກ ໃນນີ້ຂະແໜງການອຸດສາຫະກຳເພີ່ມຂຶ້ນ 8,2% ການຂະຫຍາຍຕົວຂອງຂະແໜງການອຸດສາຫະກຳໄດ້ສ້າງຜົນດີໃຫ້ແກ່ການຄ້າສາກົນຂອງຈີນ ໄດ້ເພີ່ມຂຶ້ນໃນປີ 2021 ຈໍານວນ 21,4%. ສະເລ່ຍລາຍໄດ້ຕໍ່ຫົວຄົນປະມານ 12.000 ໂດລາ/ຄົນ/ປີ. ສິ່ງດັ່ງກ່າວ ເປັນການຢັ້ງຢືນເຖິງຄຳເຫັນຂອງທ່ານປະທານ ສີ ຈິ້ນຜິງ ທີ່ໄດ້ກ່າວໃນງານ ມິດຕິງ ສະຫລອງວັນຄົບຮອບ 100 ປີ ຂອງພັກຄອມມູນິດຈີນວ່າ: “ຜ່ານການຕໍ່ສູ້ທີ່ເດັດດ່ຽວໜຽວແໜ້ນພັກ ແລະ ປະຊາຊົນຈີນໄດ້ສະແດງໃຫ້ ຊາວໂລກເຫັນວ່າ ປະຊາຊົນຈີນ ບໍ່ພຽງແຕ່ມີຄວາມສາມາດ ໃນການປົດປ່ອຍ ໂລກທີ່ເກົ່າແກ່ໄດ້ເທົ່ານັ້ນ, ແຕ່ຍັງສາມາດສ້າງອັນໃໝ່ຂຶ້ນມາ, ນັ້ນມີພຽງແຕ່ ລະບອບສັງຄົມນິຍົມເທົ່ານັ້ນທີ່ສາມາດປົກປ້ອງປະເທດຈີນໄດ້ ແລະ ມີພຽງແຕ່ ລະບອບສັງຄົມນິຍົມເທົ່ານັ້ນທີ່ສາມາດພັດທະນາປະເທດຈີນໃຫ້ຈະເລີນກ້າວໜ້າໄດ້ “
ປັດຈຸບັນ ສປ ຈີນ ມີສະຖຽນລະພາບທາງດ້ານການເມືອງ, ການພັດທະນາເສດຖະກິດ-ສັງຄົມທີ່ໝັ້ນຄົງວ່ອງໄວ, ມີຄວາມກ້າວໜ້າດ້ານການພັດທະນາ ວິທະຍາສາດ ແລະ ເຕັກໂນໂລຊີ, ຈຶ່ງເຮັດໃຫ້ ສປ ຈີນ ມີຊື່ສຽງ, ມີບົດບາດ ແລະ ອິດທິພົນ ສູງເດັ່ນຂຶ້ນຢູ່ໃນເວທີສາກົນ. ໃນໄລຍະບໍ່ເທົ່າໃດປີມານີ້ ປະທານ ສີ ຈິ້ນຜິງ ໄດ້ສະເໜີຫລາຍຂໍ້ລິເລີ່ມໃໝ່ ເພື່ອຮ່ວມກັນພັດທະນາເສດຖະກິດ-ສັງຄົມໃນພາກພື້ນ ແລະ ສາກົນເປັນຕົ້ນແມ່ນ: ຂໍ້ລິເລີ່ມ ໜຶ່ງແລ້ວ, ໜຶ່ງເສັ້ນທາງ; ຂໍ້ລິເລີ່ມທະນາຄານການລົງທຶນເພື່ອພັດທະນາພື້ນຖານໂຄງລ່າງອາຊີ; ທະນາຄານພັດທະນາໃໝ່ໃນກຸ່ມ (BRICS); ການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ, ຄູ່ຮ່ວມມືເສດຖະກິດຮອບດ້ານໃນພາກພື້ນ (Regional Comprehensive EconomicPartnership (RCEP)); ນອກນັ້ນຍັງມີການຮ່ວມມືຕາມແລວເສດຖະກິດກັບປະເທດຕ່າງໆໃນພາກພື້ນອີກດ້ວຍ. ປະທານ ສີ ຈິ້ນຜິງ ກ່າວວ່າ ສປ ຈີນ ຈະສ້າງການພົວພັນສາກົນແບບໃໝ່ ແລະ ສ້າງປະຊາຄົມມວນມະນຸດ ທີ່ຮ່ວມຊະຕາກຳດຽວກັນ, ສົ່ງເສີມການພັດທະນາ ຂໍ້ລິເລີ່ມ ໜຶ່ງແລ້ວ ໜຶ່ງເສັ້ນທາງ ທີ່ມີຄຸນນະພາບສູງ ດ້ວຍຄວາມພະຍາຍາມຮ່ວມກັນ, ໂດຍໝູນໃຊ້ຜົນສຳເລັດໃໝ່ໃນການພັດທະນາຂອງປະເທດຈີນ ເພື່ອສະໜອງກາລະໂອກາດໃໝ່ໃຫ້ແກ່ຊາວໂລກ.
ຄວາມມີລະບຽບວິໄນຂອງພັກ ແລະ ການປະຕິຮູບພາຍໃນພັກ ແມ່ນແກ່ນສານທີ່ຖ່າຍທອດຈາກຮຸ້ນສູ່ຮຸ້ນຂອງພັກຄອມມູນິດຈີນ ເຮັດໃຫ້ພັກມີຄວາມເຂັ້ມແຂງໜັກແໜ້ນ, ມີຄວາມຕັດສິນໃຈສູງ, ເຮັດແທ້ ທຳຈິງ ຈຶ່ງໄດ້ຮັບການສະໜັບສະໜູນອຸ້ມຊູຈາກປະຊາຊາດຈີນ. ນັບຕັ້ງແຕ່ມື້ສ້າງຕັ້ງ ເປັນຕົ້ນມາ, ພັກຄອມມູນິດຈີນ ສາມາດຍືນຍົງຄົງຕົວຢູ່ໄດ້ 101 ປີ ດ້ວຍການປັບປຸງພາຍໃນພັກ ໃຫ້ສອດຄ່ອງ ແລະ ແທດເໝາະກັບ ສະພາບການປ່ຽນແປງຂອງໂລກ ແລະ ຍຸກສະໄໝ, ສອດຄ່ອງກັບ ສະພາບການພັດທະນາເສດຖະກິດ-ສັງຄົມ ຂອງປະເທດ, ສອດຄ່ອງກັບຄວາມມຸ້ງມາດປາຖະໜາຂອງປະຊາຊາດຈີນ. ຄວາມເດັດດຽ່ວໃນການປັບປຸງ ກໍ່ສ້າງຕົນເອງຢ່າງອົງອາດກ້າຫານນັ້ນ, ພັກຄອມມູນິດຈີນ ຈຶ່ງສາມາດປະຕິຮູບແລະ ປ່ຽນແປງການຊີ້ນຳ-ນຳພາສ້າງໃຫ້ລັດຖະບານ ສປ ຈີນ ເປັນລັດຖະບານຂອງປະຊາຊົນ ທີ່ມີຄວາມຊື່ສັດ ບໍລິສຸດ ປອດໃສ ຂາວສະອາດ ແລະ ຕ້ານການສໍ້ລາດບັງຫລວງ ເພື່ອຮັກສາຄວາມບໍລິສຸດ ແລະ ເຮັດໃຫ້ເປັນອຸປະນິໄສ ຂອງ ບັນດາສະມາຊິກພັກຄອມມູນິດຈີນ ຕະຫລອດໄປ.
(ຄົ້ນຄວ້າຮຽບຮຽງໂດຍ: ໂຄງການຄົ້ນຄວ້າຮ່ວມລາວ-ຈີນ, ສະຖາບັນການຕ່າງປະເທດ)
