ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ເເລະ ການຄ້າ ໄດ້ຂຶ້ນຊີ້ແຈງ ຕໍ່ຄຳຊັກຖາມຂອງບັນດາສະມາຊິກສະພາແຫ່ງຊາດ ໂດຍສະເພາະແມ່ນບັນຫາ ທີ່ເປັນປະເດັນຮ້ອນທີ່ສົ່ງຜົນກະທົບຕໍ່ຊີວິດການເປັນຢູ່ຂອງພໍ່ແມ່ປະຊາຊົນ ເປັນຕົ້ນແມ່ນ ລາຄາສິນຄ້າສູງ ຫຼື ເພີ່ມຂຶ້ນຫຼາຍເທົ່າຕົວ ທີ່ເປັນຜົນພວງຈາກພາວະເງິນເຟີ້, ເງິນກີບອ່ອນຄ່າ…
ທ່ານກ່າວວ່າ: ເພື່ອເຮັດໃຫ້ການຈັດຕັ້ງປະຕິບັດແກ້ໄຂບັນຫາດັ່ງກ່າວ ໄດ້ຮັບປະສິດທິຜົນດີຂຶ້ນຫຼາຍກວ່າເກົ່າ ກະຊວງອຸດສາຫະກຳ ແລະ ການຄ້າໄດ້ວາງທິດທາງ ແລະ ມາດຕະການ ໃນການຄຸ້ມຄອງລາຄາສິນຄ້າໃນຕໍ່ໜ້າ ຄື:
1). ປະສານສົມທົບກັບຂະແໜງການກ່ຽວຂ້ອງ ເລັ່ງແກ້ໄຂບັນຫາອັດຕາເງິນເຟີິ້ ແລະ ອັດຕາແລກປ່ຽນ ໃຫ້ມີປະສິດທີຜົນໄວຂຶ້ນຕື່ມ ເພື່ອຫລຸດຜ່ອນຜົນກະທົບຂອງອັດຕາເງິນເຟິ້ ແລະ ອັດຕາແລກປ່ຽນ ຕໍ່ລາຄາສິນຄ້າ.
2). ປະສານສົມທົບກັບຂະແໜງການກ່ຽວຂ້ອງ ເລັ່ງຄົ້ນຄວ້າ ແລະ ແກ້ໄຂຕົ້ນທຶນການຜະລິດສິນຄ້າ ທີ່ຈຳເປັນໃຫ້ມີມູນຄ່າຕໍ່າລົງ, ໂດຍສະເພາະສິນຄ້າກະສິກຳ ເຊັ່ນ: ເຂົ້າ, ຊີ້ນ, ປາ, ເປັດ, ໄກ່, ພືດ, ຜັກ, ໝາກໄມ້ ແລະ ອື່ນໆ ທີ່ສາມາດຜະລິດໄດ້ພາຍໃນ. ຄວນເບິ່ງປັດໄຈທີ່ເຮັດໃຫ້ສິນຄ້າເຫລົ່ານີ້ແພງ ເຊັ່ນ: ຫົວອາຫານ, ຝຸ່ນ, ແນວພັນ, ເຕັກໂນໂລຊີ ແລະ ການເພີ່ມຜະລິດຕະພາບ.
3). ສົ່ງເສີມການຮ່ວມມື ລະຫວ່າງ ສະຖາບັນຄົ້ນຄວ້າ ເພື່ອເຮັດການວິໄຈຢ່າງມີວິທະຍາສາດ ແລະ ຢ່າງມີຈຸດສຸມ, ຕິດພັນກັບການແກ້ໄຂ ບັນຫາເສດຖະກິດ ທີ່ຊໍ້າເຮື້ອ, ມີຄວາມສະຫຼັບຊັບຊ້ອນ ແລະ ພົວພັນກັບຫລາຍຂະແໜງການ ເປັນຕົ້ນ: ຂະແໜງເສດຖະກິດປາຍແຫລມ ທີ່ພົວພັນກັບທ່າແຮງ ແລະ ການຜະລິດພາຍໃນ ທີ່ພວກເຮົາສາມາດແຂ່ງຂັນໄດ້, ຫລຸດຜ່ອນການນຳເຂົ້າ ແລະ ສົ່ງເສີມການສົ່ງອອກ.
