ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

15 ມື້ ສປປ ລາວ ປອດຄົນຕິດພະຍາດໂກວິດ19, ຄົນເຈັບທີ່ຕິດເຊື້ອຈໍານວນ19 ຄົນ ປົວຫາຍດີແລ້ວ 7 ຄົນ.

ດຣ. ລັດຕະນະໄຊ ເພັດສຸວັນ ຫົວໜ້າກົມຄວບຄຸມ ພະຍາດຕິດຕໍ່ ກະຊວງສາທາລະນະສຸກ,  ຄະນະສະເພາະກິດ ຄວບຄຸມໂກວິດ 19 ຖະແຫລງໃນຕອນບ່າຍ ວັນທີ 27 ເມສານີ້ ເຖິງສະພາບການລະບາດຂອງພະຍາດ ໂກວິດ 19 ຢູ່ລາວວ່າ: ປະຈຸບັນ ມີຜູ້ຕິດເຊື້ອນອນຕິດຕາມ ປິ່ນປົວຢູ່ໂຮງໝໍພຽງແຕ່ 12 ຄົນ.ໃນນັ້ນ ຢູ່ໂຮງໝໍແຂວງຫຼວງພະບາງ ມີ 1 ຄົນ ເປັນເພດຊາຍ,  ເຫັນວ່າມີອາການຄົງຕົວ ຂັ້ນເບົາບາງ ແລະ ຍັງຕິດຕາມປິ່ນປົວຕາມອາການ. ຢູ່ໂຮງໝໍມິດຕະພາບ ມີ 11 ຄົນ ທັງໝົດເຫັນວ່າ ມີອາການເບົາບາງ ແລະ ຍັງຕິດຕາມປິ່ນປົວຕາມອາການ.

ສະເພາະ ສປປ ລາວ ກໍ່ຍັງເຫັນວ່າ 15 ມື້ທີ່ບໍ່ມີຜູ້ຕິດເຊື້ອໃໝ່. ໃນຈໍານວນຜູ້ຕິດເຊື້ອສະສົມ 19 ຄົນ ກໍ່ໄດ້ອອກໂຮງໝໍແລ້ວ 7 ຄົນ ແລະ ຍັງເຫຼືອ 12 ຄົນ ທີ່ຈະໄດ້ສືບຕໍ່ຕິດຕາມ ປິ່ນປົວຕາມອາການຢ່າງໃກ້ຊິດ.

ສະພາບການລະບາດຜ່ອນຄາຍລົງຄືແນວນີ້ ກໍ່ຍ້ອນວ່າ ປະຊາຊົນບັນດາເຜົ່າ ໄດ້ເປັນເຈົ້າການ ຮ່ວມໄມ້ຮ່ວມມື ໃນການຈັດຕັ້ງປະຕິບັດ ຄໍາສັ່ງ ເລກທີ 06/ນຍ, ແຕ່ພວກເຮົາ ຈະບໍ່ໄດ້ລົດລະມາດຕະການເຝົ້າລະວັງ ຕິດຕາມຄົ້ນຫາ ຜູ້ສົງໄສທີ່ຈະຕິດເຊື້ອ ໂດຍສະເພາະຜູ້ທີ່ຍັງຈຳກັດບໍລິເວນຕົນເອງຢູ່ສູນ ແລະ ຢູ່ເຮືອນ.

ສໍາລັບຜູ້ທີ່ຈະເດີນທາງຜ່ານຊາຍແດນເຂົ້າມາໃໝ່ ຈະຕ້ອງໄດ້ປະຕິບັດມາດຕະການ ເລີ່ມແຕ່ປະເທດຕົ້ນທາງເຂົ້າມາຜ່ານຊາຍແດນ ແລະ ເວລາເຂົ້າມາເຖິງປະເທດລາວ ຢ່າງຖືກຕ້ອງ ແລະ ເຂັ້ມງວດ ເພື່ອສະກັດກັ້ນ ບໍ່ໃຫ້ມີການລະບາດຄືນຄັ້ງທີ 2.

ຮອດວັນທີ 27 ເມສາ ທົ່ວໂລກມີຜູ້ຕິດເຊື້ອທັງໝົດ 2.965.363ຄົນ.ໃນນັ້ນ ອາເມລິກາ ມີຜູ້ຕິດເຊື້ອ963.168ຄົນ, ເສຍຊີວິດ 54.810ຄົນ.ເພີ່ມຂຶ້ນ 30.118ຄົນ, ເສຍຊີວິດເພີ່ມ 1.419ຄົນ.
ລັດນິວຢອກເກີດສະພາບພະຍາດໜັກໜ່ວງທີ່ສຸດໃນທົ່ວປະເທດມີຜູ້ຕິດເຊື້ອພະຍາດເຖິງ 288.045 ຄົນ, ທຽບໃສ່1ມື້ຜ່ານມາ ເພີ່ມຂຶ້ນ 5.902 ຄົນ, ມີຜູ້ເສຍຊີວິດທັງໝົດ 22.269 ຄົນ, 1 ມື້ຜ່ານມາ ມີຜູ້ເສຍຊີວິດເພີ່ມ 260 ຄົນ.

ສະເພາະກຸ່ມປະເທດອາຊຽນ ຍັງມີບາງປະເທດທີ່ມີອັດຕາການຕິດເຊື້ອ ແລະ ເສຍຊີວິດສູງຢູ່ ມີບາງປະເທດຕິດເຊື້ອໃໝ່ ໃນວັນທີ 27 ເມສາ 2020 ນີ້ ເຖິງ 931 ຄົນ ແລະ ເສຍຊີວິດໃນມື້ດຽວ ຢູ່ກຸ່ມປະເທດອາຊຽນ ເຖິງ 30 ຄົນ.