ກອງປະຊຸມຄັ້ງປະຖົມມະລືກ ຂອງສະພາປະຊາຊົນແຂວງໄຊສົມບູນ ຊຸດທີ II ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 18 ພຶດສະພາ 2021 ນີ້ ທີ່ສະໂມສອນເມືອງອະນຸວົງ ພາຍໃຕ້ການເປັນປະທານຂອງ ທ່ານ ບຸນສຸກ ຈອມວິສານ, ປະທານສະພາປະຊາຊົນແຂວງ ໄຊສົມບູນ ຊຸດທີ I ໂດຍການໃຫ້ກຽດເຂົ້າຮ່ວມ ຂອງທ່ານ ພົນຕີ ຄໍາລຽງ ອຸທະໄກສອນ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງໄຊສົມບູນ, ມີຮອງເລຂາພັກແຂວງ-ຮອງເຈົ້າແຂວງ, ບັນດາທ່ານຄະນະປະຈໍາພັກແຂວງ, ສະມາຊິກສະພາແຫ່ງຊາດ ປະຈໍາເຂດເລືອກ ຕັ້ງທີ 18, ສະມາຊິກສະພາປະຊາຊົນແຂວງໄຊສົມບູນ, ບັນດາທ່ານຫົວໜ້າພະແນກການກົມກອງອ້ອມຂ້າງແຂວງ ເຂົ້າຮ່ວມ.
ກອງປະຊຸມ ຄັ້ງປະຖົມມະລືກ ຂອງສະພາປະຊາຊົນແຂວງໄຊສົມບູນ ຊຸດທີ II ຄັ້ງນີ້ ໄດ້ພິຈາລະນາ ແລະ ຕົກລົງບັນຫາສໍາຄັນພື້ນຖານຂອງທ້ອງຖິ່ນ ເປັນຕົ້ນແມ່ນ: ຮັບຟັງການລາຍງານຜົນສໍາເລັດຂອງການເລືອກຕັ້ງ ແລະ ຢັ້ງຢືນຄຸນລັກສະນະຂອງສະມາຊິກສະພາປະຊາຊົນແຂວງ ຊຸດທີ II; ພິຈາລະນາ, ຮັບຮອງເອົາການສະເໜີແຕ່ງຕັ້ງປະທານ-ຮອງປະທານ ສະພາປະຊາຊົນແຂວງ ຊຸດທີ II; ມີດັ່ງນີ້: ແຕ່ງຕັ້ງ ທ່ານ ແດງ ປະທຸມທອງ ຮອງເລຂາຄະນະບໍລິຫານງານພັກແຂວງ, ເປັນປະທານສະພາປະຊາຊົນແຂວງ ທັງເປັນປະທານຄະນະປະຈໍາສະພາປະຊາຊົນ ແຂວງໄຊສົມບູນ ຊຸດທີ II, ແຕ່ງຕັ້ງທ່ານ ຄໍາພູທອນ ວົງພະຈັນ, ກໍາມະການພັກແຂວງ, ເລຂາພັກເມືອງ, ເຈົ້າເມືອງອະນຸວົງ ເປັນຮອງປະທານສະພາປະຊາຊົນແຂວງ ແລະ ແຕ່ງຕັ້ງ ທ່ານ ພັທ ວິໄຊ ທໍ່ເພຍຫລວງ ຈົ່ງເສີ, ເປັນຮອງປະທານສະພາປະຊາຊົນແຂວງໄຊສົມບູນ ຊຸດທີ II; ພິຈາລະນາຮັບຮອງເອົາ ໂຄງປະກອບບຸກຄະລະກອນ ຂອງສະພາປະຊາຊົນແຂວງ ຊຸດທີ II, ການສະເໜີແຕ່ງຕັ້ງກໍາມະການຄະນະປະຈໍາ ສະພາປະຊາຊົນແຂວງ ຊຸດທີ II, ການສະເໜີແຕ່ງຕັ້ງ ເລຂາທິການ ແລະ ປະທານຄະນະກໍາມະການ ສະພາປະຊາຊົນແຂວງໄຊສົມບູນ ຊຸດທີ II ມີດັ່ງນີ້: ແຕ່ງຕັ້ງ ທ່ານ ນາງ ຂັນກາບ ໄຊຍະກຸມມານ, ສະມາຊິກສະພາແຫ່ງຊາດ ຊຸດທີ IX, ເປັນກໍາມະການຄະນະປະຈໍາສະພາປະຊາຊົນແຂວງ, ທັງເປັນເລຂາທິການສະພາປະຊາຊົນ ໄຊສົມບູນ; ທ່ານ ພັອ ຄໍາດອນ ຈັນທະວົງ, ສະມາຊິກສະພາແຫ່ງຊາດ ຊຸດທີ IX, ເປັນກໍາມະການຄະນະປະຈໍາສະພາປະຊາຊົນແຂວງ, ທັງເປັນປະທານຄະນະກໍາມະການ ຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ; ແຕ່ງຕັ້ງ ທ່ານ ວອນປະດິດ ດາລານຸວົງ, ສະມາຊິກສະພາປະຊາຊົນແຂວງ ຊຸດທີ II, ເປັນກໍາມະການຄະນະປະຈໍາສະພາປະຊາຊົນແຂວງ ໄຊສົມບູນ, ທັງເປັນປະທານ ຄະນະກໍາມະການເສດຖະກິດ, ແຜນການ ແລະ ການເງິນ; ທ່ານ ສົມດີ ຈັນທະວົງ, ສະມາຊິກສະພາປະຊາຊົນແຂວງ ຊຸດທີ II, ເປັນກໍາມະການຄະນະປະຈໍາສະພາປະຊາຊົນແຂວງ ໄຊສົມບູນ, ທັງເປັນປະທານ ຄະນະກໍາມະການ ວັດທະນະທໍາ-ສັງຄົມ ແລະ ບັນດາເຜົ່າ; ພ້ອມດຽວກັນນີ້ ໃນກອງປະຊຸມຍັງໄດ້ ພິຈາລະນາ ຮັບຮອງເອົາການສະເໜີ ສ້າງຕັ້ງ ພະແນກເຕັກໂນໂລຊີ ແລະ ການສື່ສານ ແຂວງໄຊສົມບູນ, ພິຈາລະນາຮັບຮອງເອົາການສະເໜີຍົກຍ້າຍ ແລະ ແຕ່ງຕັ້ງບຸກຄະລາກອນ ຂອງອົງການປົກຄອງແຂວງ ເຊິ່ງມີດັ່ງນີ້: ຍົກຍ້າຍ ແລະ ແຕ່ງຕັ້ງ ທ່ານ ຮືທໍ່ ເພຍຫລວງ, ກໍາມະການພັກແຂວງ, ຫົວໜ້າໂຄສະນາອົບຮົມແຂວງ ໄປຮັບໜ້າທີ່ໃໝ່ ເປັນເຈົ້າເມືອງອະນຸວົງ; ຍົກຍ້າຍ ແລະ ແຕ່ງຕັ້ງ ທ່ານ ອຸດອນ ສິງດາລາ, ກໍາມະການພັກແຂວງ, ຫົວໜ້າພະແນກຍຸຕິທໍາແຂວງ ໄປຮັບໜ້າທີ່ໃໝ່ ເປັນເຈົ້າເມືອງ-ເມືອງລ້ອງແຈ້ງ; ຍົກຍ້າຍ ແລະ ແຕ່ງຕັ້ງ ທ່ານ ອິນຕອງ ໂຄດປັນຍາ, ກໍາມະການພັກແຂວງ, ເຈົ້າເມືອງ-ເມືອງລ້ອງແຈ້ງ ໄປຮັບໜ້າທີ່ໃໝ່ ເປັນຫົວໜ້າພະແນກຍຸຕິທໍາແຂວງ; ສະເໜີແຕ່ງຕັ້ງທ່ານ ພູແກ້ວ ອິນທະວົງ, ກໍາມະການພັກແຂວງ, ເປັນຫົວພະແນກເຕັກໂນໂລຊີ ແລະ ການສື່ສານ ແຂວງ; ສະເໜີແຕ່ງຕັ້ງທ່ານ ດຣ ລີເຢີ ໄຊຍະຊ່າງ ເລຂາໜ່ວຍພັກ, ຮອງຫົວໜ້າພະແນກສາທາລະນະສຸກແຂວງ ຂື້ນເປັນຫົວໜ້າພະແນກສາທາລະນະສຸກ ແຂວງໄຊສົມບູນ ຄົນໃໝ່. ກອງປະຊຸມຄັ້ງນີ້ ໄດ້ອັດລົງດ້ວຍຜົນສໍາເລັດ ຢ່າງຈົບງາມ ເຊິ່ງໄດ້ດໍາເນີນເປັນເວລາເຄິ່ງວັນ.
Loading...