ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຫົວໜ້າຄະນະຈັດຕັ້ງສູນກາງພັກ ລົງເຄື່ອນໄຫວຊີ້ນໍາວຽກງານຮອບດ້ານ ຢູ່ເມືອງ ທົ່ງມີໄຊ ແຂວງໄຊຍະບູລີ

ໃນວັນທີ 18 ມີນາ 2020, ສະຫາຍ ຈັນສີ ໂພສີຄໍາ, ກໍາມະການກົມການເມືອງ, ເລຂາທິການສູນກາງພັກ, ເລຂາອົງ​ຄະນະພັກ, ແລະ ຫົວໜ້າຄະນະຈັດຕັ້ງສູນກາງພັກ, ພ້ອມດ້ວຍຄະນະ ໄດ້ລົງໄປເຄື່ອນໄຫວຢ້ຽມຢາມ ແລະ ຊີ້ນໍາວຽກງານຮອບດ້ານ ຢູ່ເມືອງ ທົ່ງມີໄຊ, ແຂວງໄຊຍະບູລີ, ໂດຍໄດ້ຖືກຕ້ອນຮັບຢ່າງອົບອຸ່ນຈາກ ສະຫາຍ ພົງສະ​ຫວັນ ສິດທະວົງ, ກໍາມະການສູນກາງພັກ, ເລຂາພັກແຂວງ, ແລະ ເຈົ້າແຂວງໆໄຊຍະບູລີ ພ້ອມດ້ວຍ ບັນດາການນໍາ ແລະ ປະຊາຊົນຊາວເມືອງ ທົ່ງມີໄຊ.
ໃນໂອກາດນີ້, ສະຫາຍ ຈັນສີ ໂພສີຄໍາ ແລະ ຄະນະ ໄດ້ຮັບຟັງການລາຍງານສະພາບການພັດທະນາຂອງເມືອງທົ່ງມີໄຊໂດຍຫຍໍ້ຈາກສະຫາຍ ສົມພອນ ໄຊດວງຕາ, ກໍາມະການພັກແຂວງ, ເລຂາພັກເມືອງ, ເຈົ້າເມືອງໆທົ່ງມີໄຊ, ໂດຍໃນບາງຕອນທ່ານໄດ້ກ່າວວ່າ: ພາຍໃຕ້ການຊີ້ນໍາໆພາຢ່າງໃກ້ຊິດຂອງພັກ-ລັດ, ເວົ້າລວມ, ເວົ້າສະເພາະແມ່ນອົງຄະນະພັກແຂວງທີ່ໄດ້ເອົາໃຈໃສ່ຊີ້ນໍາວຽກງານຮອບດ້ານດ້ວຍດີຕະຫຼອດມາ ຈຶ່ງເຮັດເມືອງ ທົ່ງມີໄຊ ມີຄວາມສະຫງົບໂດຍພື້ນຖານ, ສັງຄົມມີຄວາມເປັນລະບຽບຮຽບຮ້ອຍ, ປະຊາຊົນໄດ້ທໍາການຜະລິດ, ຊອກຢູ່ຫາກິນດ້ວຍຄວາມປອດໄພ ຈົນສາມາດຫຼຸດພົ້ນອອກຈາກຄວາມທຸກຍາກໄດ້, ເຮັດໃຫ້ເສດຖະກິດມີການຂະຫຍາຍຕົວຢ່າຕໍ່ເນື່ອງໃນລະດັບ 8,84% ຕໍ່ປີ, ລວມຍອດລາຍຮັບທັງໝົດບັນລຸ 163,90 ຕື້ກີບ, ສະເລ່ຍລາຍຮັບຕໍ່ຫົວຄົນແມ່ນໄດ້ 17,13 ລ້ານກີບ ຫຼື ເທົ່າກັບ 2.142 ໂດລາສະຫະລັດ, ການຜະລິດດ້ານກະສິກໍາໄດ້ມີຫຼາຍປັດໄຈໃໝ່ເກີດຂຶ້ນ ແລະ ຂະຫຍາຍຕົວໄປຕາມທິດຫັນເປັນທັນສະໄໝເທື່ອລະກ້າວ ໂດຍການນຳໃຊ້ເຕັກນິກ-ວິທະຍາສາດໃໝ່, ນຳໃຊ້ກົນຈັກເຂົ້າໃນການຜະລິດ ຕິດພັນກັບການປຸງແຕ່ງຂັ້ນຕົ້ນ, ການຜະລິດເຂົ້າໄດ້ທັງໝົດ 5.477 ໂຕນ, ສະເລ່ຍໄດ້ຮັບເຂົ້າເປືອກ 430 ກິໂລຕໍ່ຄົນຕໍ່ປີ, ແລະ ຜະລິດພືດອຸດສາຫະກໍາເປັນສິນຄ້າໄດ້ທັງໝົດ 2.356 ໂຕນ.


ໃນໂອກາດດຽວກັນນີ້, ສະຫາຍ ຈັນສີ ໂພສີຄໍາ ໄດ້ໃຫ້ກຽດຂຶ້ນໂອ້ລົມຕໍ່ຄະນະບໍລິຫານງານພັກເມືອງທົ່ງມີໄຊ ຊຸດໃໝ່, ເຊິ່ງກ່ອນອື່ນ ທ່ານໄດ້ເຈາະຈີ້ມວຽກງານບາງດ້ານເຊັ່ນ: ວຽກງານປກສ-ກອງຫຼອນ, ວຽກງານເສດຖະກິດ, ວຽກງານວັດທະນະທໍາ-ສັງຄົມ ແລະ ວຽກງານກໍ່ສ້າງພັກ-ພະນັກງານ. ພ້ອມກັນນີ້, ທ່ານກໍ່ໄດ້ຮຽກຮ້ອງມາຍັງຄະນະພັກຂອງເມືອງ ທົ່ງມີໄຊ ຈົ່ງສືບຕໍ່ເຮັດໃຫ້ເມືອງມີຄວາມສະຫງົບປອດໄພຮອບດ້ານ, ສືບຕໍ່ປົກປັກຮັກສາດິນແດນອັນຄົບຖ້ວນຂອງເມືອງໂດຍໃຫ້ເປັນໜ້າທີ່ຂອງໝົດທຸກຄົນ, ສືບຕໍ່ສ້າງເມືອງໃຫ້ນັບມື້ນັບມີການພັດທະນາ ໂດຍສ້າງແຕ່ຮາກຖານບ້ານຂຶ້ນມາ; ດ້ານເສດຖະກິດແມ່ນໃຫ້ສຸມໃສ່ທຸກວິທີທາງເພື່ອໃຫ້ປະຊາຊົນມີຢູ່ມີກິນ, ຮັ່ງມີເຂັ້ມແຂງ, ໂດຍການຊຸກຍູ້ສົ່ງເສີມໃຫ້ປະຊາຊົນປູກຝັງ-ລ້ຽງສັດ ຕິດຕາມທ່າແຮງ ແລະ ຄວາມອາດສາມາດຂອງປະຊາຊົນແຕ່ລະເຂດແຕ່ລະທ້ອງຖິ່ນ, ເອົາໃຈໃສ່ສືກສາອົບຮົມປະຊາຊົນ ແລະ ນັກຮຽນໃຫ້ເຂົ້າໃຈຕໍ່ແນວທາງປ່ຽນແປງໃໝ່ຂອງພັກ-ລັດ ເພື່ອບໍ່ໃຫ້ກຸ່ມຄົນບໍ່ດີສວຍໃຊ້, ຊຸກຍູ້ສົ່ງເສີມໃຫ້ນັກຮຽນທີ່ຮຽນຈົບມໍປາຍ ໃຫ້ໄດ້ຮຽນກ່ຽວກັບການປູກ-ການລ້ຽງສັດ. ນອກຈາກນີ້, ສະຫາຍຫົວໜ້າຄະນະຈັດຕັ້ງສູນກາງພັກ ຍັງໄດ້ແນະນຳໃຫ້ຄະນະພັກເມືອງທົ່ງມີໄຊ ໃຫ້ເອົາໃຈໃສ່ໃນການຜັນຂະຫຍາຍມະຕິກອງປະຊຸມໃຫຍ່ພັກຂອງຕົນໃຫ້ທົ່ວເຖິງຮາກຖານ ແລະ ພ້ອມກັນຈັດຕັ້ງປະຕິບັດມະຕິດ່ັງກ່າວໃຫ້ສໍາເລັດຕາມລະດັບຄາດໝາຍ, ພ້ອມທັງປຶກສາຫາລືກັນພາຍໃນຄະນະພັກເພື່ອຂຽນເປັນແຜນຍຸດທະສາດໃນແຕ່ລະປີຂອງແຕ່ລະວຽກ ແລະ ພ້ອມກັນຈັດຕັ້ງປະຕິບັດຕາມແຜນ, ທັງເອົາໃຈໃສ່ການຂະຫຍາຍພັກ-ພະນັກງານ, ການກໍ່ສ້າງພະນັກງານຜູ້ສືບທອດທີ່ໜຸ່ມນ້ອຍ, ແລະ ມີຄວາມຮູ້ຄວາມສາມາດເພື່ອປ່ຽນແທນ.
ຈາກນັ້ນ, ສະຫາຍຈັນສີ ໂພສີຄໍາ ແລະ ຄະນະ ກໍ່ໄດ້ໄປຢ້ຽມຢາມເມືອງ ໄຊສະຖານ, ໂດຍແມ່ນສະຫາຍ ປອ ສົມລິດ ເປືອກແກ້ວ, ຮອງເລຂາອົງຄະນະພັກແຂວງ, ປະທານສະພາປະຊາຊົນແຂວງ ໃຫ້ການຕ້ອນຮັບ ພ້ອມດ້ວຍການນຳ, ພະນັກງານ ແລະ ປະຊາຊົນຊາວເມືອງດັ່ງກ່າວ.
ໃນພິທີຕ້ອນຮັບ, ສະຫາຍກອງສີ ວົງສີ, ກໍາມະການອົງຄະນະພັກແຂວງ, ເລຂາພັກເມືອງ ແລະ ເຈົ້າເມືອງໆໄຊສະຖານກໍ່ໄດ້ຂຶ້ນລາຍງານສະພາບການພັດທະນາຂອງເມືອງ ໃຫ້ສະຫາຍຫົວໜ້າຄະນະຈັດຕັ້ງສູນກາງພັກ ແລະ ຄະນະ ໄດ້ຮັບຟັງ.
ຂ່າວ-ພາບໂດຍ: ອຸ່ນເຮືອນ ໂພທິລັກ
ນັກຂ່າວຫ້ອງວ່າການແຂວງໄຊຍະບູລີ