ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

19 ມື້ລຽນຕິດ ສປປ ລາວ ບໍ່ມີຜູ້ຕິດພະຍາດໂກວິດ19. ຂະນະຄໍາສັ່ງເລກທີ 06/ນຍ ຂອງນາຍົກໄດ້ຮັບການຜ່ອນຜັນ

ຮສ.ດຣ ພູທອນເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດ ຖະແຫລງພາຍຫລັງທ່ານສົມດີ ດວງດີ ຮອງນຍົກລັດຖະມົນຕີ  ລັດຖະມົນຕີກະຊວງການເງິນ ຫົວໜ້າຄະນະຄະນະສະເພາະກິດ ຖະແຫລງວ່າດ້ວຍການຜ່ອນຜັນບາງມາດຕະການຄໍາສັ່ງ ເລກທີ 06\ນຍ ຂອງນາຍົກລັດຖະມົນຕີ ແລ້ວ, ບາງຕອນທ່ານພູທອນ ເມືອງປາກໃຫ້ຮູ້ວ່າ: ໃນວັນທີ 30 ເມສາ 2020, ໄດ້ເກັບຕົວຢ່າງມາກວດທັງໝົດ 94 ຄົນ, ໃນນັ້ນ ຜູ້ມີອາການສົງໄສມາກວດຢູ່ໂຮງໝໍ 79 ຄົນ, ເກັບຕົວຢ່າງຜູ້ຕິດເຊື້ອທີ່ນອນປິ່ນປົວຢູ່ໂຮງໝໍມາກວດຄືນ 11 ຄົນ, ແລະ ແຮງງານລາວທີ່ກັບມາຈາກປະເທດໄທ 4 ຄົນ.ໃນຈໍານວນຜູ້ມີອາການສົງໄສ 79 ຄົນ ມີນະຄອນຫຼວງວຽງຈັນ 2 ຄົນ, ບໍລິຄຳໄຊ 1 ຄົນ,ໄຊຍະບູລີ 50 ຄົນ (ຊ່າງແປງໄຟຟ້າຄົນໄທທີ່ເຂົ້າມາ), ໂຮງໝໍມິດຕະພາບ 26ຄົນ, ທີ່ເປັນແພດໝໍໄດ້ສໍາເລັດໄລຍະການເຮັດວຽກປິ່ນປົວຄົນເຈັບ ໂກວິດ19. ຜົນກວດທັງໝົດ ແມ່ນ ບໍ່ພົບເຊື້ອ. ໝາຍຄວາມວ່າໃນວັນທີ 30 ເມສາ 2020 ບໍ່ມີກໍລະນີໃໝ່.

ການຕິດຕາມປີ່ນປົວຄົນເຈັບຢູ່ໂຮງໝໍ

  • ປະຈຸບັນ ມີຜູ້ຕິດເຊື້ອນອນຕິດຕາມ ປິ່ນປົວຢູ່ໂຮງໝໍແຕ່ 11 ຄົນ.
  • ຢູ່ໂຮງໝໍແຂວງຫຼວງພະບາງ ໄດ້ໃຫ້ອອກໂຮງໝໍໝົດແລ້ວ ແລະ ໄປຕິດຕາມຢູ່ເຮືອນ.
  • ຢູ່ໂຮງໝໍມິດຕະພາບ ມີ 11 ຄົນ ທັງໝົດເຫັນວ່າ ມີອາການເບົາບາງ, ຍັງຕິດຕາມເພື່ອກວດວິເຄາະຢັ້ງຢືນການບໍ່ພົບເຊື້ອ ຈຶ່ງໃຫ້ອອກໂຮງໝໍ.

ການຕິດຕາມສະພາບການລະບາດຂອງປະເທດໃກ້ຄຽງ ແລະ ສະພາບການລະບາດຢູ່ໃນທົ່ວໂລກ ເຫັນວ່າ: ມາຮອດເວລາ 6 ໂມງເຊົ້າ ວັນທີ 1 ພຶດສະພາ 2020, ທົ່ວໂລກມີການລາຍງານການລະບາດ ທັງໝົດ 212 (ປະເທດ/ເຂດ), ເພິ່ມຂຶ້ນອີກ 2 ປະເທດໃໝ່ ຄື Tajikistan ແລະ Comoros , ມີການຢັ້ງຢືນ ຜູ້ຕິດເຊື້ອພະຍາດ COVID-19 ແມ່ນ 3,303,096 ຄົນ, ເພີ່ມຂຶ້ນໃໝ່ 84,913 ຄົນ ,ເສຍຊິວິດ 233,777ຄົນ, ເພີ່ມຂຶ້ນໃໝ່ 5,748ຄົນ.