ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
20 ປີ ບໍ່ຄຳ-ທອງ ເຊໂປນ ສ້າງລາຍຮັບ ໃຫ້ແກ່ລັດຖະບານລາວດ້ານຕ່າງໆ ຫຼາຍກວ່າ 1,7 ຕື້ ໂດລາ
==========
ຕອນແລງວັນທີ 8 ທັນວາ 2023 ບໍລິສັດ ລ້ານຊ້າງ ມິເນໂຣນສ ຈໍາກັດ (ລຊມລ) ໄດ້ຈັດພິທີສະເຫຼີມສະຫຼອງ ເນື່ອງໃນໂອກາດຄົບຮອບ 20 ປີ ຄວາມສຳເລັດໃນການຂຸດຄົ້ນ-ຜະລິດຂອງ ບໍ່ຄຳ-ທອງ ເຊໂປນ ທີ່ໂຮງແຮມແລນມາກ ນະຄອນຫຼວງວຽງຈັນ, ໂດຍໃຫ້ກຽດເຂົ້າຮ່ວມ ຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ແລະພາກສ່ວນທີ່ກ່ຽວຂ້ອງ.
ທ່ານ ຫວາງ ຈຽນຫົວ ປະທານບໍລິສັດ ຊືເພີງໂກນ ຊຶ່ງເປັນບໍລິສັດແມ່ ຂອງ ບໍລິສັດ ລ້ານຊ້າງ ມິເນໂຣນສ ຈໍາກັດ ກ່າວວ່າ: ໃນຕໍ່ໜ້າ, ບໍລິສັດ ຊືເຟິງບໍລິສັດ ລ້ານຊ້າງ ມິເນໂຣນສ ຈໍາກັດ ມີເປົ້າໝາຍໃຫ້ບັນລຸ ແຜນງານ ໜຶ່ງແລວໜຶ່ງເສັ້ນທາງ ແລະ ຄວາມຕ້ອງການສອງຝ່າຍຂອງ ສປປ ລາວ ແລະ ສປ ຈີນ ກໍຄື ປະຊາຊົນຂອງທັງສອງປະເທດ. ໂຄງການບໍ່ຄໍາ-ເຊໂປນ ສືບຕໍ່ນຳຜົນປະໂຫຍດມາໃຫ້ແກ່ ຊຸມຊົນທ້ອງຖິ່ນ, ຜູ້ລົງທຶນ, ພະນັກງານ ແລະ ຜູ້ມີສ່ວນຮ່ວມທີ່ກ່ຽວຂ້ອງ ຢູ່ ໃນ ສປປ ລາວ. ບໍລິສັດໝາຍໝັ້ນຕໍ່ການເຕີບໂຕຢ່າງຍືນຍົງຢູ່ໃນ ສປປ ລາວ ເພື່ອປູທາງ ວາງພື້ນຖານໃຫ້ແກ່ຄວາມຈະເລີນຮຸ່ງເຮືອງໄປອີກສອງທົດສະວັດ ຢູ່ໂຄງການບໍ່ຄຳ-ທອງ ເຊໂປນ.
ທ່ານ ຫວາງ ຈຽນຫົວ ປະທານ ບໍລິສັດ ຊືເຟິງ ໂກນ ກ່າວຕື່ມວ່າ “ໃນຂະນະທີ່ພວກເຮົາສະເຫຼີມສະຫຼອງຜົນສຳເລັດຂອງ ບໍ່ຄຳ-ທອງ ເຊໂປນ, ພວກເຮົາກໍຍັງຈະ ສືບຕໍ່ໝາຍໝັ້ນຕໍ່ຫຼັກການປະຕິບັດທີ່ດີ ແລະ ຄວາມຮັບຜິດຊອບຕໍ່ສັງຄົມຂອງອົງກອນໃຫ້ດີທີ່ສຸດ. ການທົບທວນຄືນເສັ້ນທາງທີ່ໄດ້ນຳ ລຊມລ ມາສູ່ຈຸດນີ້ໃນມື້ນີ້ແມ່ນມີຄວາມສຳຄັນ. ລຊມລ ໄດ້ພົບພໍ້ຄວາມທ້າທາຍຫຼາຍປະການ, ແຕ່ຍ້ອນຄວາມມຸ່ງໝັ້ນ ແລະ ຄວາມມານະອົດທົນ ພວກເຮົາຈຶ່ງສາມາດສ້າງຜົນງານດ້ານທຸລະກິດຢ່າງດີເລີດ ແລະ ຜ່ານຜ່າຄວາມທຸກຍາກລຳບາກທັງໝົດປວງຕ່າງໆ.
ທ່ານ ກາວ ປົວ ປະທານ ລຊມລ ໄດ້ຍົກໃຫ້ເຫັນຜົນສຳເລັດອັນສຳຄັນຂອງ ບໍ່ຄຳ-ທອງ ເຊໂປນ ໃນການນຳເອົາເງິນຕາຕ່າງປະເທດເຂົ້າມາຍັງ ສປປ ລາວ ແລະ ການປັບປຸງຊີວິດການເປັນຢູ່ຂອງປະຊາຊົນທ້ອງຖິ່ນຜ່ານ ໂຄງການ-ແຜນງານພັດທະນາຊຸມຊົນຢູ່ເມືອງວິລະບູລີ. ເຊິ່ງ ລຊມລ ຍາມໃດກໍຖື ການພັດທະນາພະນັກງານຄົນລາວເປັນບູລິມະສິດ ດ້ວຍການສ້າງສະພາບແວດລ້ອມການເຮັດວຽກທີ່ປອດໄພ, ການເຂົ້າເຖິງການຮັກສາສຸຂະພາບທີ່ມີຄຸນນະພາບ ແລະ ການຝຶກອົບຮົມເພື່ອຮັບປະກັນຄວາມສຳເລັດຂອງ ການດຳເນີນງານ-ຂຸດຄົ້ນ, ການຜະລິດຂອງບໍ່ຄຳ-ທອງ ເຊໂປນ.
ໃນໄລຍະ 20 ປີຜ່ານມາ, ບໍລິສັດ ລ້ານຊ້າງ ມິເນໂຣນສ ຈໍາກັດ ໄດ້ກາຍເປັນສັນຍາລັກຂອງການຂຸດຄົ້ນບໍ່ແຮ່ ແລະ ການເຕີບໂຕທີ່ດີເລີດຢູ່ໃນ ສປປ ລາວ, ຮັກສາກຽດຕິສັກຂອງບໍລິສັດຊັ້ນ A+. ໂຄງການບໍ່ຄຳ-ທອງ ເຊໂປນ ໄດ້ມີຄວາມພະຍາຍາມຢ່າງສຸດຄວາມສາມາດເພື່ອສົ່ງເສີມການພັດທະນາແບບຍືນຍົງ ແລະ ການເປັນຜູ້ນຳດ້ານສິ່ງແວດລ້ອມໃນອຸດສາຫະກຳບໍ່ແຮ່. ຄວາມພະຍາຍາມເຫຼົ່ານີິ້ລວມໄປເຖິງການຈັດຕັ້ງປະຕິບັດວຽກງານຟື້ນຟູ ແລະ ຕິດຕາມສິ່ງແວດລ້ອມຢ່າງເຂັ້ມງວດ. ດ້ວຍເຫດນັ້ນ, ໂຄງການບໍ່ຄຳ-ທອງ ເຊໂປນຈຶ່ງໄດ້ກາຍເປັນຜູ້ຜະລິດຄຳ ແລະ ທອງທີ່ໃຫຍ່ ແລະ ມີຄວາມຍືນຍົງທີ່ສຸດຢູ່ໃນ ສປປ ລາວ, ລຊມລ ໄດ້ລົງທຶນຫຼາຍກວ່າ 55 ລ້ານໂດລາ ເຂົ້າໃນການປັບປຸງໂຄງລ່າງພື້ນຖານ ລວມທັງ 34 ລ້ານໂດລາເຂົ້າໃນການສ້າງຕາຂ່າຍໄຟຟ້າແຫ່ງຊາດຈາກເມືອງທ່າແຂກໄປ ຫາມະຫາໄຊ ຜ່ານ ບໍ່ຄຳ-ທອງ ເຊໂປນ ເພື່ອຊື້ໄຟຟ້າຈາກ ລັດວິສາຫະກິດໄຟຟ້າລາວ. ລຊມລ ໄດ້ຂະຫຍາຍໂຄງການພັດທະນາຊຸມຊົນໄປຍັງເຂດຊົນນະບົດ ແລະ ຫ່າງໄກສອກຫຼີກ ກໍຄື ໄດ້ລົງທຶນປະມານ 56 ລ້ານໂດລາ ເຂົ້າໃນການເກັບກູ້ລະເບີດຕົກຄ້າງທີ່ຍັງບໍ່ທັນແຕກ (UXO), ລຊມລ ເປັນ ບໍລິສັດບໍ່ແຮ່ທີ່ຂຶ້ນທະບຽນທີ່ ສປປ ລາວ ໂດຍ ບໍລິສັດ ຊືເຟິງ ຈີຫຼົງ ໂກນ ມາຍນິງ ຖືຫຸ້ນ 90% ແລະ ລັດຖະບານລາວ 10%. ລຊມລ ເຮັດວຽກປະສານສົມທົບກັບ ຫຼາຍກະຊວງຂອງ ສປປ ລາວ ເຊິ່ງເປັນການຮ່ວມມືພາກລັດ-ເອກະຊົນ ທີ່ເປັນສັນຍາລັກສະແດງໃຫ້ເຫັນວ່າ ລັດຖະບານ ແລະ ບໍລິສັດເອກະຊົນເຮັດວຽກຮ່ວມກັນແນວໃດເພື່ອຜົນປະໂຫຍດຂອງສ່ວນລວມ.
ນັບຕັ້ງແຕ່ເລີ່ມດຳເນີນງານໃນປີ 2003, ບໍໍ່ຄຳ-ທອງ ເຊໂປນໄດ້ຜະລິດ ຄຳຫຼາຍກວ່າ 1,5 ລ້ານອອນ ແລະ ທອງ 1,1 ລ້ານໂຕນ ສ້າງລາຍຮັບໂດຍກົງໄດ້ຫຼາຍກວ່າ 1,7 ຕື້ ໂດລາ ໃຫ້ແກ່ລັດຖະບານລາວ ໃນຮູບແບບການຈ່າຍພາສີອາກອນ, ຄ່າຊັບພະຍາກອນແຮ່ທາດ ແລະ ເງິນປັນຜົນໃຫ້ແກ່ ສປປ ລາວ. ນອກຈາກນັ້ນ ບໍ່ຄຳ-ທອງ ເຊໂປນຍັງໄດ້ສ້າງຜົນປະໂຫຍດທາງອ້ອມຜ່ານການສ້າງວຽກເຮັດງານທຳ, ການຝຶກອົບຮົມ, ການພັດທະນາຊຸມຊົນ, ການຈ້າງງານ ແລະ ສ້າງລາຍໄດ້ໃຫ້ແກ່ຄູ່ຮ່ວມທຸລະກິດ ແລະ ຜູ້ສະໜອງທ້ອງຖິ່ນ. ໂຄງການຍັງໄດ້ສະໜອງ ຫຼາຍກວ່າ 20 ລ້ານ ໂດລາ ໃຫ້ແກ່ ປະຊາຊົນ 40.000 ຄົນ ອັນໄດ້ສ້າງຜົນປະໂຫຍດໃຫຍ່ຫຼວງໃຫ້ແກ່ເມືອງວິລະບູລີ, ສ້າງລາຍຮັບໃຫ້ແກ່ກຸ່ມນັກທຸລະກິດທ້ອງຖິ່ນເຖິງ 50 ລ້ານໂດລາ ເປັນລາຍໄດ້ຂອງຊຸມຊົນ.
ນອກຈາກນັ້ນ, ໂຄງການ ບໍ່ຄໍາ-ທອງ ເຊໂປນ ຍັງເປັນຕົວຢ່າງທີ່ພົ້ນເດັ່ນຂອງການຂຸດຄົ້ນບໍ່ແຮ່ ແລະ ການພັດທະນາຢ່າງມີຄວາມຮັບຜິດຊອບຢູ່ໃນພາກພື້ນອາຊີຕາເວັນອອກສ່ຽງໃຕ້. ມາດຕະຖານດ້ານສິ່ງແວດລ້ອມຂອງ ໂຄງການ ໄດ້ເປັນທີ່ຍອມຮັບໃຫ້ເປັນແບບຢ່າງທີ່ດີເລີດຢູ່ໃນ ສປປ ລາວ.
ມາຮອດປັດຈຸບັນ, ບໍລິສັດ ລ້ານຊ້າງ ມິເນໂຣນສ ຈໍາກັດ ໄດ້ລົງທຶນຫຼາຍກວ່າ 20 ລ້ານ ໂດລາເຂົ້າໃນການຄຸ້ມຄອງສິ່ງແວດລ້ອມ, ວຽກງານຟື້ນຟູ ແລະ ຕິດຕາມສິ່ງແວດລ້ອມ. ເຊິ່ງເປັນໜຶ່ງໃນບໍລິສັດທຳອິດໃນ ສປປ ລາວ ແລະ ພາກພື້ນອາຊີຕາເວັນອອກສ່ຽງໃຕ້ທີ່ໄດ້ຮັບ ການຢັ້ງຢືນມາດຕະຖານສາກົນໃນລະບົບການຄຸ້ມຄອງສິ່ງແວດລ້ອມ ISO 14001.
ຄວາມມຸ່ງໝັ້ນຂອງ ລຊມລ ຕໍ່ການປະຕິບັດງານທີ່ດີເລີດໄດ້ເປັນຜົນເຮັດໃຫ້ ບໍລິສັດໄດ້ຮັບກຽດຕິສັກ ຂັ້ນ A+ ຈາກລັດຖະບານລາວ ມາເປັນທົດສະວັດ ແລະ ຍິ່ງໄປກວ່ານັ້ນ, ບໍລິສັດກໍໄດ້ຮັບຫຼາຍລາງວັນຍ້ອງຍໍສັນລະເສີນສຳລັບການປະກອບສ່ວນຕໍ່ການພັດທະນາເສດຖະກິດ-ສັງຄົມ ໃນ ສປປ ລາວ. ລາງວັນເຫຼົ່ານີ້ລວມໄປເຖິງ ລາງວັນຮອງອັນດັບໜຶ່ງຂອງ ລາງວັນອາຊຽນດ້ານບໍ່ແຮ່ດີເດັ່ນ 2023 ແລະ ລາງວັນນັກທຸລະກິດດີເດັ່ນ 2023 ຂອງລາວ. ນອກຈາກນັ້ນ, ບໍລິສັດຍັງໄດ້ຮັບລາງວັນບໍລິສັດດີເດັ່ນຂອງລາວ 2021 ໃນການສະກັດກັ້ນໂຄວິດ-19, ລາງວັນອາຊຽນດ້ານບໍ່ແຮ່ປີ 2017 ແລະ 2019, ລາງວັນອາຊຽນດ້ານການຂຸດຄົ້ນບໍ່ແຮ່ດີເລີດ 2016 ແລະ ລາງວັນອາຊຽນໃນວຽກງານພັດທະນາຊຸມຊົນ ແລະ ສັງຄົມແບບຍືນຍົງ.