ການດຳເນີນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ 8 ໃນຕອນເຊົ້າມື້ນີ້ ຢູ່ຫໍປະຊຸມສະພາແຫ່ງຊາດຫຼັກ 6 ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ສະມາຊິກສະພາແຫ່ງຊາດ ໄດ້ຮັບຟັງການປະກອບຄຳເຫັນຈາກ ທ່ານ ນາງ ບົວຄຳ ທີບພະວົງ ກຳມາທິການຍຸຕິທຳສະພາແຫ່ງຊາດຕາງໜ້າຄະນະປະຈຳສະພາແຫ່ງຊາດ ຕໍ່ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2020 ແລະ ທິດທາງແຜນການປະຈຳປີ 2021 ຂອງອົງການໄອຍະການ ແລະ ສານປະຊາຊົນສູງສຸດ ໂດຍທ່ານໄດ້ສະແດງຄວາມຊົມເຊີຍຕໍ່ການເຄື່ອນໄຫວວຽກງານຂອງອົງການໄອຍະການປະຊາຊົນສູງສຸດເຫັນວ່າ ໄລຍະຜ່ານມາອົງການໄອຍະການປະຊາຊົນສູງສຸດໄດ້ເອົາໃຈໃສ່ປະຕິບັດວຽກງານຕາມພາລະບົດບາດ ສິດ ແລະ ໜ້າທີ່ຂອງຕົນຮັບຜິດຊອບຢ່າງຕັ້ງໜ້າ ໂດຍສະເພາະການຕິດຕາມກວດກາການປະຕິບັດກົດໝາຍຂອງອົງການສືບສວນສອບສວນ ເຮັດໃຫ້ການສັ່ງຟ້ອງຜູ້ຖືກຫາ ແລະ ການຖະແຫຼງຄະດີຕ່າງໆຕໍ່ສານມີຄຸນນະພາບດີຂື້ນກວ່າເກົ່າ ເຖີງວ່າຈະມີຜົນສຳເລັດແຕ່ງຍັງມີຂໍ້ຄົງຄ້າງທີ່ອົງການໄອຍະການປະຊາຊົນສູງສຸດຍັງເຮັດບໍ່ທັນໄດ້ດີເທົ່າທີ່ຄວນ ໂດຍສະເພາະການປະຕິບັດສິດສັ່ງຟ້ອງຜູ້ຖືກຫາ ແລະ ຖະແຫຼງຄະດີຕໍ່ສານຂອງອົງການປະຊາຊົນຂັ້ນອຸທອນ ແລະ ຂັ້ນລົບລ້າງບໍ່ທັນບັນລຸຄາດໝາຍທີ່ວາງໄວ້ຕາມທີ່ໄດ້ກຳນົດໄວ້ 97 ສ່ວນຮ້ອຍຂອງແຜນການປະຈຳປີ 2020, ການຕິດຕາມກວດກາປະຕິບັດຄຳຕັດສີນຂອງສານຍັງບໍ່ເປັນປົກກະຕິຕໍ່ເນື່ອງ.

ສ່ວນການປະກອບຄຳເຫັນຕໍ່ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2020 ແລະ ທິດທາງແຜນການປະຈຳປີ 2021 ຂອງສານປະຊາຊົນສູງສຸດ ທ່ານ ນາງ ບົວຄຳ ທີບພະວົງ  ໃຫ້ຮູ້ວ່າ ໄລຍະຜ່ານມາສານປະຊາຊົນໄດ້ຍົກສູງປະສິດທິພາບຂອງການດຳເນີນຄະດີ ເຮັດໃຫ້ການດຳເນີນຄະດີຕ່າງໆຂອງສານປະຊາຊົນມີຄວາມຖືກຕ້ອງ ແລະ ມີປະສິດທິພາບສູງ, ຄູ່ຄວາມຄະດີຕ່າງໆມີຄວາມພໍໃຈຕໍ່ຄຳຕັດສີນຂອງສານ ແຕ່ຍັງມີຈຸດອ່ອນຂໍ້ຄົງຄ້າງຈຳນວນໜື່ງທີ່ສານປະຊາຊົນສູງສຸດຍັງເຮັດບໍ່ທັນໄດ້ດີ ໂດຍສະເພາະການຄຸ້ມຄອງບໍລິຫານສານ ແລະ ການຂົນຂວາຍແກ້ໄຂຄະດີທີ່ເຂົາມາຜ່ານສານແຕ່ລະຄັ້ງຍັງຊັກຊ້າ, ບາງຄຳຕັດສີນຂອງສານຍັງມີລັກສະນະບໍ່ເດັດຂາດ ເຮັດມີເກີດຂໍ້ຜິດພາດ ເປັນສາເຫດເຮັດໃຫ້ການດຳເນີນຄະດີຂອງສານປະຊາຊົນ ແະ ສານທະຫານປະຕິບັດໄດ້ພຽງ 58 ກວ່າສ່ວນຮ້ອຍຈາກທີ່ເຄີຍວາງຄາດໝາຍໄວ້ 85 ສ່ວນຮ້ອຍ.

ພາຍຫຼັງສະມາຊິກສະພາແຫ່ງຊາດແຕ່ລະເຂດເລືອກຕັ້ງໄດ້ຮັບຟັງການປະກອບຄຳເຫັນຈາກ ທ່ານ ນາງ ບົວຄຳ ທີບພະວົງ ກຳມາທິການຍຸຕິທຳສະພາແຫ່ງຊາດ ຕາງໜ້າຄະນະປະຈຳສະພາແຫ່ງຊາດຕໍ່ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2020 ແລະ ທິດທາງແຜນການປະຈຳປີ 2021 ຂອງອົງການໄອຍະການ ແລະ ສານປະຊາຊົນສູງສຸດແລ້ວ ທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດໃນນາມປະທານກອງປະຊຸມໄດ້ມີຄຳເຫັນ ແລະ ໃຫ້ທິດຊີ້ນຳໃນການປະກອບຄຳເຫັນຂອງສະມາຊິກສະພາແຫ່ງຊາດໃສ່ 2 ບົດລາຍງານດັ່ງກ່າວ ພ້ອມທັງສະເໜີໃຫ້ສະມາຊິກສະພາແຫ່ງຊາດປະກອບຄຳເຫັນໃສ່ 2 ບົດລາຍງານເພີ່ມຕື່ມ ເພື່ອໃຫ້ມີເນື້ອໃນຄົບຖ້ວນ ແລະ ຮັດກຸມກວ່າເກົ່າ.

ທ່ານ ນາງ ສີໃຄ ສີປະເສີດ ສະມາຊິກສະພາແຫ່ງຊາດເຂດເລືອກຕັ້ງທີ່ 11 ແຂວງບໍລິຄຳໄຊສະແດງຄວາມເຫັນດີ ເປັນເອກະພາບຕໍ່ການຈັດຕັ້ງປະຕິບັດວຽກງານວິຊາສະເພາະຂອງອົງການໄອຍະການປະຊາຊົນສູງສຸດເຫັນວ່າໄລຍະຜ່ານມາມີຫຼາຍໜ້າວຽກທີ່ຕິດພັນກັບຄວາມຮັບຜິດຊອບຂອງອົງການໄອຍະການຖືກແກ້ໄຂຢ່າງມີປະສິດທິພາບ ແລະ ປະສິດທິຜົນ.

ສຳລັບການດຳເນີນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ 8 ໃນຕອນບ່າຍມື້ນີ້ຕາມວາລະແລ້ວສະມາຊິກສະພາແຫ່ງຊາດແຕ່ລະເຂດເລືອກຕັ້ງຈະໄດ້ຮັບຟັງການໃຫ້ຄວາມກະຈ່າງແຈ້ງເພີ່ມຕື່ມຈາກປະທານອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ກ່ຽວກັບບົດລາຍງານການເຄື່ອງໄຫວວຽກງານປະຈຳປີ 2020 ແລະ ທິດທາງແຜນການປະຈຳປີ 2021 ຂອງອົງການໄອຍະການ ແລະ ສານປະຊາຊົນສູງສຸດ.

Loading...