ເນື່ອງຈາກໄດ້ຮັບອິດທິພົນຂອງພາຍຸໝູນເຂດຮ້ອນ ເຈີມປາກາ ທີ່ພັດຜ່ານເຂດພາກເໜືອດ້ານຕາເວັນອອກຂອງສາທາລະນະລັດ ສັງຄົມນິຍົມຫວຽດນາມ ແລະ ເຮັດໃຫ້ກະແສລົມມໍລະສຸມຕາເວັນຕົກສ່ຽງໃຕ້ ທີ່ມີກໍາລັງແຮງພັດປົກຄຸມພາກກາງ ແລະ ພາກໃຕ້ຂອງປະເທດລາວໃນໄລຍະ 2-3 ວັນທີ່ຜ່ານມາ ຈຶ່ງເຮັດໃຫ້ເກີດມີຝົນຕົກຕິດຕໍ່ກັນຫຼາຍວັນໃນປະເທດລາວເຮົາເວົ້າລວມ ເວົ້າສະເພາະກໍ່ແມ່ນໃນເຂດເມືອງວິລະບູລີ ແຂວງສະຫວັນນະເຂດ ເຊິ່ງຝົນແມ່ນໄດ້ເລີ່ມຕົກລິນນັບແຕ່ວັນທີ 22 ກໍລະກົດ ເປັນຕົ້ນມາ ຈຶ່ງໄດ້ເຮັດລະດັບນໍ້າຕາມສາຍຫ້ວຍນ້ອຍໃຫຍ່ຕ່າງໆເຊັ່ນວ່າ : ສາຍນໍ້າເຊກອກ, ຫ້ວຍຄຽງ, ຫ້ວຍແຢງ, ສາຍນໍ້າເຊທ່າມວກ,ສາຍນໍ້າເຊບາຍ, ສາຍຫ້ວຍນໍ້າແລບ,ສາຍຫ້ວຍຄະແມະ ເຂດຈຸດກະແຕບນາຜາດ່າງ, ສາຍນໍ້າເຊນ້ອຍ, ນໍ້າເຊບາຍ ເຂດຈຸດສຸມເມືອງວັງ, ສາຍເຊສະງີ່ ແລະ ສາຍຫ້ວຍຕ່າງໆ ເຂດຈຸດສຸມອ່າງຄໍາ ໄດ້ເພີ່ມລະດັບສູງຂຶ້ນລົ້ນຝັ່ງໄຫຼອອກຖ້ວມໄຮ່ນາຮົ້ວສວນພື້ນທີ່ເຮັດການຜະລິດ, ຖ້ວມໜອງປາ ແລະ ເຮືອນຊານຂອງປະຊາຊົນໃນຫຼາຍບ້ານຂອງເມືອງ ວິລະບູລີ, ພ້ອມນີ້ນໍ້າກໍ່ໄດ້ໄຫຼກັດເຊາະຖະໜົນຫົນທາງ ເຮັດໃຫ້ເສັ້ນທາງ, ທໍ່ລອດທາງ ແລະ ຂົວບາງຈຸດໄດ້ຮັບຄວາມເສຍຫາຍຈໍານວນໜຶ່ງ, ເສັ້ນທາງຫຼາຍສາຍບໍ່ສາມາດສັນຈອນໄປມາໄດ້ດ້ວຍລົດ ເນື່ອງຈາກນໍ້າຖ້ວມ. ຕໍ່ກັບສະພາບການດັ່ງກ່າວ ແລະ ດ້ວຍຄວາມເປັນຫ່ວງເປັນໃຍຂອງການນໍາພັກລັດຂັ້ນເທິງ ຕໍ່ກັບຊີວິດການເປັນຢູ່ຂອງພໍ່ແມ່ປະຊາຊົນ ທີ່ປະສົບກັບໄພນໍ້າຖ້ວມໃນຄັ້ງນີ້; ດັ່ງນັ້ນ, ໃນຕອນບ່າຍຂອງວັນທີ 25 ກໍລະກົດ 2021 ຜ່ານມາ ທ່ານ ຄໍາຜຸຍ ສີບຸນເຮືອງ ກໍາມະການພັກແຂວງ ເລຂາພັກເມືອງ ເຈົ້າເມືອງວິລະບູລີ ພ້ອມດ້ວຍຂະແໜງການທີ່ກ່ຽວຂ້ອງຂອງເມືອງ ກໍ່ໄດ້ລົງເຄື່ອນໄຫວຕິດຕາມເບິ່ງສະພາບໄພນໍ້າຖ້ວມດັ່ງກ່າວ ເຊິ່ງທ່ານເຈົ້າເມືອງພ້ອມດ້ວຍຄະນະ ແມ່ນໄດ້ເດີນທາງໄປເບິ່ງນໍ້າຖ້ວມທາງ ຈຸດຂົວຂ້າມຫ້ວຍແຢງ ເສັ້ນທາງ 28 A ( ໃກ້ກັບບໍລິສັດຄູນໄຊ ), ຈາກນັ້ນ ກໍ່ໄດ້ສືບຕໍ່ເດີນທາງໄປຕິດຕາມສະພາບນໍ້າຖ້ວມ ຢູ່ເຂດຈຸດສຸມກະແຕບນາຜາດ່າງ ເຊິ່ງວ່າໃນເຂດນີ້ ນໍ້າແມ່ນໄດ້ເລີ່ມຖ້ວມແຕ່ຕອນເຊົ້າມືດຂອງວັນທີ 25 ກໍລະກົດທີ່ຜ່ານມາ, ທັງນີ້ກໍ່ແມ່ນເພື່ອເປັນການຕິດຕາມເບິ່ງສະພາບການໂດຍລວມ ແລະ ພ້ອມທັງຢ້ຽມຢາມໃຫ້ກໍາລັງໃຈອໍານາດການປົກຄອງ ແລະ ພໍ່ແມ່ປະຊາຊົນໃນເຂດດັ່ງກ່າວ ທີ່ປະສົບກັບໄພນໍ້າຖ້ວມໃນຄັ້ງນີ້ ພ້ອມທັງແນະນໍາໃຫ້ມີສະຕິກຽມພ້ອມຢູ່ຕະຫຼອດເວລາ ໂດຍສະເພາະຜູ້ທີ່ຢູ່ໃນເຂດພື້ນທີ່ລຸ່ມຕໍ່າ, ແຄມຫ້ວຍແຄມເຊ, ໃຫ້ຍົກຍ້າຍສັດລ້ຽງ ແລະ ສິ່ງຂອງທີ່ຈໍາເປັນໄປໄວ້ໃນເຂດທີ່ປອດໄພ ໃຫ້ຕິດຕາມສະພາບອາກາດຢູ່ຕະຫຼອດເວລາ. ສໍາລັບລາຍລະອຽດຂອງຄວາມເສຍຫາຍຂອງໄພນໍ້່າຖ້ວມໃນຄັ້ງນີ້ ແມ່ນຈະໄດ້ເກັບກໍາລະອຽດຕື່ມ ພາຍຫຼັງທີ່ສະພາບການກັບເຂົ້າສູ່ປົກກະຕິແລ້ວ ແລະ ໃຫ້ການຊ່ວຍເຫຼືອຜູ້ທີ່ໄດ້ຮັບຜົນກະທົບຕໍ່ໄປ.
Loading...