ເມື່ອບໍ່ດົນມານີ້, ທ່ານ ເສິງໜິງ ຮອງຜູ້ອຳນວຍການໃຫຍ່ຝ່າຍຈີນຂອງບໍລິສັດຟີລິບຈາກໂຮນລັງ ໃຫ້ສຳພາດຕໍ່ນັກຂ່າວ CMG ວ່າ: “ລາຍຮັບຈາກທຸລະກິດຢູ່ຈີນຂອງບໍລິສັດຟິລິບສາມາດຮັກສາການຂະຫຍາຍຕົວໄດ້ຕະຫຼອດ ແລະ ຈັງຫວະການເຕີບໂຕຢູ່ຈີນໄດ້ນຳໜ້າທົ່ວໂລກ. ບໍລິສັດຟີລິບຮັກສາການລົງທຶນໄດ້ຫຼາຍ ແລະ ສ້າງລາຍຮັບໄດ້ຫຼາຍຢູ່ຕະຫຼາດຈີນ ຢ່າງສະເໝີຕົ້ນສະເໝີປາຍ”. ເປັນຫຍັງວິສາຫະກິດຕ່າງປະເທດຈິ່ງມີຄວາມໝັ້ນໃຈສູງຕໍ່ຕະຫຼາດຈີນຄືແນວນີ້?
ຄວາມໝັ້ນໃຈ ແມ່ນໄດ້ມາຈາກຕະຫຼາດຈີນເຊິ່ງເປັນຕະຫຼາດຂະໜາດໃຫຍ່. ເດືອນພຶດສະພາ ຜ່ານມານີ້, ຍອດມູນຄ່າການຈຳໜ່າຍເຄື່ອງອຸປະໂພກ-ບໍລິໂພກໃນສັງຄົມຈີນ ເພີ່ມຂຶ້ນ 3,7%, ສູງກວ່າເດືອນເມສາ 1,4%. ໃນໄລຍະພັກວັກຳມະກອນສາກົນປີນີ້, ນັກທ່ອງທ່ຽວຈີນໄດ້ເດີນທາງໄປທ່ອງທ່ຽວ 1,000 ກວ່າຕົວເມືອງໃນຂອບເຂດທົ່ວໂລກ.
ເວົ້າສະເພາະວິສາຫະກິດແລ້ວ, ການປະດິດສ້າງໃໝ່ເປັນພະລັງຂັບເຄື່ອນສຳຄັນທີ່ສຸດ. ຄວາມມີສະເໜ່ຂອງຕະຫຼາດຈີນ ຍ້ອນມີຄວາມໄວໃນການປະດິດສ້າງໃໝ່. ຕົວເລກຂໍ້ມູນ ຫຼ້າສຸດສະແດງໃຫ້ເຫັນວ່າ: ມູນຄ່າເພີ່ມຂອງອຸດສາຫະກຳການຜະລິດເຕັກນິກສູງຂະໜາດໃຫຍ່ຂອງຈີນໃນເດືອນພຶດສະພາປີນີ້ ເພີ່ມຂຶ້ນ 10% ເມື່ອທຽບໃສ່ເດືອນພຶດສະພາປີກາຍ; ຜົນຜະລິດລວມວົງຈອນໄຟຟ້າ, ອຸປະກອນເຄື່ອງພິມ 3D, ກຳປັ່ນຕູ້ບັນທຸກສິນຄ້າ ຫລື ຕູ້ຄອນເທນເນີ ແລະ ຜະລິດຕະພັນເຕັກນິກສູງອື່ນໆ ເພີ່ມຂຶ້ນຢ່າງວ່ອງໄວ; ຈັງຫວະການເຕີບໂຕດ້ານການລົງທຶນໃນອຸດສາຫະກຳເຕັກນິກສູງໄວກວ່າຈັງຫວະການເຕີບໂຕຂອງການລົງທຶນອະສັງຫາລິມະຊັບທັງໝົດ. ທັງໝົດນີ້ສະແດງໃຫ້ເຫັນວ່າ: ກຳລັງຂັບເຄື່ອນໃໝ່ທີ່ໄດ້ມາຈາກກຳລັງການຜະລິດໃນຄຸນນະພາບໃໝ່ສືບຕໍ່ເພີ່ມຂຶ້ນເລື້ອຍໆ.
ນອກຈາກນີ້, ຕະຫຼາດຈີນຍັງໄດ້ເພີ່ມຄວາມມີຊີວິດຊີວາໃຫ້ແກ່ເສດຖະກິດໂລກອີກດ້ວຍ. 5 ເດືອນຕົ້ນປີນີ້, ຍອດມູນຄ່າການຄ້າຂາເຂົ້າ-ຂາອອກສິນຄ້າປະເພດຈັບຕ້ອງໄດ້ຂອງຈີນ ເພີ່ມຂຶ້ນ 6,3% ເມື່ອທຽບໃສ່ໄລຍະດຽວກັນຂອງປີກາຍ ເຊິ່ງໄດ້ສ້າງສະຖິຕິສູງສຸດໃນປະຫວັດສາດ. ນອກຈາກໄດ້ສະໜອງຕະຫຼາດຂະໜາດໃຫຍ່ໃຫ້ທົ່ວໂລກ ຍັງໄດ້ສົ່ງອອກຜະລິດຕະພັນລະດັບສູງ, ຜະລິດຜະລິດຕະພັນປັນຍາປະດິດ ແລະ ຜະລິດຜະລິດຕະພັນສີຂຽວໃຫ້ແກ່ໂລກອີກດ້ວຍ ເຊິ່ງໄດ້ເພີ່ມພະລັງຂັບເຄື່ອນໃໝ່ໃຫ້ແກ່ການຟື້ນຕົວຂອງເສດຖະກິດໂລກ.
ຄຽງຄູ່ກັບພະລັງຂັບເຄື່ອນດ້ານການປະດິດສ້າງໃໝ່ທີ່ເພີ່ມຂຶ້ນເລື້ອຍໆ, ຈີນໄດ້ສືບຕໍ່ປະຕິບັດນະໂຍບາຍມະຫາພາກທີ່ດີ ແລະ ລົງເລິກການປະຕິຮູບ ແລະເປີດປະຕູສູ່ພາຍນອກ, ເສດຖະກິດຈະສາມາດຮັກສາທ່າອ່ຽງຟື້ນຕົວດີຂຶ້ນຢ່າງຕໍ່ເນື່ອງ ແລະ ມີເງື່ອນໄຂບັນລຸເປົ້າໝາຍການເຕີບໂຕໝົດປີທີ່ວາງໄວ້. ທັງໝົດນີ້ ຈະເປັນປັດໃຈສໍາຄັນທີ່ຈະສາມາດດຶງດູດວິສາຫະກິດຕ່າງປະເທດເຂົ້າມາເພີ່ມການລົງທຶນຢູ່ຈີນນັບມື້ເພີ່ມຂຶ້ນ.
