ຄະນະນຳຫ້ອງການກະສິກຳ ແລະ ປ່າໄມ້ ເມືອງຈອມເພັດ ແຂວງຫລວງພະບາງ ໄດ້ເອົາໃຈໃສ່ຊຸກຍູ້ປະຊາຊົນ ກະກຽມລົງມືໃຫ້ທ່ວງທັນກັບລະດູການ ການຜະລິດລະດູແລ້ງ ໃນສົກປີນີ້ ໂດຍໄດ້ສົ່ງວິຊາການລົງຊຸກຍູ້ໃຫ້ປະຊາຊົນ ຢູ່ເຂດທີ່ມີເງື່ອນໄຂ ສຸມໃສ່ການປູກພືດລະດູແລ້ງ ຈຳນວນ 29 ບ້ານ, 218 ຄອບຄົວ ເພື່ອເຮັດໃຫ້ການຜະລິດລະດູແລ້ງ ໄດ້ຮັບຜົນດີ ໃນນີ້, ມີເນື້ອທີ່ນາແຊງເກືອບ 152 ເຮັກຕາ, ຜົນຜະລິດສະເລ່ຍຫລາຍກວ່າ 592 ໂຕນ ທຽບໃສ່ແຜນການລື່ນຄາດໝາຍ 0.14%, ປູກພືດໃສ່ສວນໃນເນື້ອທີ່ຫລາຍກວ່າ 528 ເຮັກຕາ, ຜົນຜະລິດໄດ້ຫລາຍກວ່າ 1.216 ໂຕນ, ປູກພືດໃສ່ທົ່ງນາ ເນື້ອທີ່ຫລາຍກວ່າ 485 ເຮັກຕາ, ຜົນຜະລິດໄດ້ 1.088 ໂຕນ, ລວມເນື້ອທີ່ປູກພືດລະດູແລ້ງທັງໝົດຫລາຍກວ່າ 1.014 ເຮັກຕາ, ຜົນຜະລິດໄດ້ຫລາຍກວ່າ 2.312 ໂຕນ, ເຊິ່ງເຂດທີ່ປູກພືດເດັ່ນກວ່າໝູ່ແມ່ນບ້ານນາຄຳ, ບ້ານໂພລາດ ແລະ ບ້ານບວມເລົາ, ພືດທີ່ປູກສ່ວນຫລາຍແມ່ນຜັກບົ່ວ, ຜັກທຽມ ແລະ ພືດຜັກຕາມລະດູການ.
ທ່ານ ວຽງສະຫວັນ ຈັນທະລັງສີ ຫົວໜ້າຫ້ອງການກະສິກຳ ແລະ ປ່າໄມ້ ເມືອງຈອມເພັດ ໄດ້ໃຫ້ສຳພາດເມື່ອບໍ່ດົນມານີ້ວ່າ: ສຳລັບແຜນການຜະລິດພືດລະດູຝົນ ໄດ້ວາງແຜນປູກເຂົ້ານາປີ ໃຫ້ໄດ້ 1.634 ເຮັກຕາ, ຄາດວ່າຜົນຜະລິດຈະໃຫ້ໄດ້ 6.296 ໂຕນ, ພືດທາດແປ້ງ ໃຫ້ໄດ້ຫລາຍກວ່າ 458 ເຮັກຕາ, ພືດຜັກ ໃຫ້ໄດ້ຫລາຍກວ່າ 627 ເຮັກຕາ, ພືດອຸດສາຫະກຳ ໃຫ້ໄດ້ຫລາຍກວ່າ 1.534 ເຮັກຕາ, ໄມ້ໃຫ້ໝາກໃຫ້ໄດ້ຫລາຍກວ່າ 200 ເຮັກຕາ ລວມເນື້ອທີ່ປູກພືດລະດູຝົນທັງໝົດຫລາຍກວ່າ 2.824 ເຮັກຕາ.
ຂໍ້ມູນຈາກ: ຂປລ.
