ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

3 ເມສາ 2020 ຈຳນວນຜູ້ຕິດເຊື້ອໂຄວິດ-19 ຂອງສປປ ລາວ ຍັງຄົງທີ່ ເປັນມື້ທີ 2 ຕິດຕໍ່ກັນ ຢູ່ທີ່ 10 ຄົນ

ໃນໂອກາດຖະແຫລງຂ່າວກ່ຽວກັບສະພາບການແຜ່ລະບາດຂອງພະຍາດໂຄວິດ-19 ໃນຕອນບ່າຍມື້ນີ້ ວັນທີ 3 ເມສາ 2020 ທີ່ ກະຊວງສາທາລະນະສຸກ, ນະຄອນຫຼວງວຽງຈັນ, ທ່ານຮສຈ ປອ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ ທັງເປັນຜູ້ປະຈຳການຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19 ແຈ້ງໃຫ້ຊາບວ່າ: ຜ່ານການກວດວິເຄາະຫາເຊື້ອພະຍາດ ທັງໝົດ 22 ກໍລະນີ ໃນນັ້ນ ຢູ່ນະຄອນຫຼວງວຽງຈັນ 11 ຄົນ, ແຂວງຫຼວງນ້ຳທາ ແລະ ແຂວງອຸດົມໄຊ ແຂວງລະ 3 ຄົນ, ແຂວງໄຊຍະບູລີ 2 ຄົນ ແລະ ແຂວງ ຫຼວງພະບາງ, ແຂວງຫົວພັນ ແລະ ແຂວງວຽງຈັນ ແຂວງລະ 1 ຄົນ, ແມ່ນບໍ່ພົບຜູ້ຕິດເຊື້ອເພີ່ມ ຄືຍັງຄົງທີ່ ຢູ່ຈໍານວນ 10 ຄົນ ຄືເກົ່າ.

ປະຈຸບັນ, ລັດຖະບານໄດ້ສຸມໃສ່ຈັດຕັ້ງປະຕິບັດຫລາຍມາດຕະການ ເພື່ອຍົກລະດັບການປ້ອງກັນເຊື້ອພະຍາດໂຄວິດ-19 ໂດຍເນັ້ນໜັກໃຫ້ທຸກພາກສ່ວນເປັນເຈົ້າການໃນການຈັດຕັ້ງປະຕິບັດຄຳສັ່ງເລກທີ 06 ຂອງນາຍົກລັດຖະມົນຕີກ່ຽວກັບການເພີ່ມທະວີມາດຕະການສະກັດກັ້ນ, ປ້ອງກັນ ແລະ ຄວບຄຸມການແຜ່ລະບາດ ແລະກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ຢ່າງເຂັ້ມງວດ.

ຕໍ່ຜູ້ທີ່ໄດ້ສຳຜັດໃກ້ຊິດຈຳນວນດັ່ງກ່າວ, ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19 ໄດ້ຕິດຕາມຄົ້ນຫາ ເພື່ອກັກບໍລິເວນຕົນເອງຢູ່ເຮືອນຂອງເຂົາເຈົ້າ ແລະ ຈະມີທິມງານແພດໝໍໄປຕິດຕາມອາການທຸກມື້; ຖ້າຫາກມີອາການ ຫຼື ກວດພົບວ່າເປັນບວກກໍ່ຕ້ອງໄດ້ນຳມາປິ່ນປົວຢູ່ໂຮງໝໍຕາມຫຼັກການຂອງການປິ່ນປົວໂຄວິດ-19.

ແຕ່ສຳລັບຄົນເຈັບຈໍານວນໜຶ່ງທີ່ມີອາການດີຂຶ້ນແລ້ວ, ຄະນະແພດໝໍ ກໍ່ໃກ້ທີ່ຈະອານຸຍາດໃຫ້ອອກໂຮງໝໍແລ້ວ.

ທ່ານ ຮສຈ ປອ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ ໃຫ້ຮູ້ຕື່ມວ່າ ມາຮອດເວລາ 00 ໂມງຂອງວັນທີ 2 ເມສາ 2020, ທົ່ວໂລກມີລາຍງານກໍລະນີຕິດເຊື້ອພະຍາດ ທັງໝົດ 204 ປະເທດ/ເຂດປົກຄອງພິເສດ ແລະ 2 ເຮືອສໍາລານ, ມີກໍລະນີຢັ້ງຢືນຜູ້ຕິດເຊື້ອພະຍາດ COVID-19 ແລ້ວ 1,014,943 ກໍລະນີ ເພີ່ມຂື້ນ 79,747 ກໍລະນີ, ເສຍຊິວິດ 53,166 ເພີ່ມຂື້ນ 5,947 ກໍລະນີ ແລະ ປີ່ນປົວຫາຍດີ 212,018, ເພີ່ມຂື້ນ 18,029 ຄົນ.