ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມການປະສານສົມທົບ ວຽກ ງານປົກປັກຮັກສາຄວາມສະຫງົບເຂດຊາຍແດນ ແລະ ການຮ່ວມມືພັດທະນາເສດຖະກິດ-ສັງຄົມ ຄັ້ງທີ 18 ປະຈໍາປີ 2023 ລະຫວ່າງ ເມືອງ ຊານໄຊ ແຂວງອັດຕະປື, ເມືອງດາກຈຶງ ແຂວງ ເຊກອງ ແຫ່ງ ສປປ ລາວ ແລະ ເມືອງ ດັກໄລ ແຂວງກອນຕູມ ສສ ຫວຽດນາມ ໄດ້ຈັດຂຶ້ນໃນວັນທີ 23 ພະຈິກ 2023 ທີ່ເມືອງ ດັກໄລ ແຂວງກອນຕູມ, ໂດຍມີສະຫາຍ ສຸວັນສີ ແກ້ວວິເສີດ ກຳມະການພັກແຂວງ ເລຂາພັກເມືອງ ເຈົ້າເມືອງຊານໄຊ, ມີສະຫາຍ ອຸ່ນຄຳ ຫຼ້າທະຈັກ ຮອງເລຂາພັກເມືອງ ປະທານແນວລາວສ້າງຊາດເມືອງ ດາກຈຶງ, ໂດຍມີສະຫາຍ ທາຍ ວັນ ເທືອງ ກຳມະການພັກແຂວງ ເລຂາພັກເມືອງ ດັກໄລ ພ້ອມດ້ວຍບັນດາຜູ້ແທນທັງ 3 ເມືອງ ເຂົ້າຮ່ວມ.
ໃນກອງປະຊຸມ ຕ່າງໜ້າຄະນະຜູ້ແທນທັງ 3 ເມືອງ ໄດ້ລາຍງານການເຄື່ອນໄຫວວຽກງານ ແລະ ການຈັດຕັ້ງປະຕິບັດ ບົດບັນທຶກຊ່ວຍຈຳ ຄັ້ງທີ 17 ປະຈໍາປີ 2022 ທີ່ເມືອງ ຊານໄຊ, ເຊິ່ງເຫັນວ່າໃນໄລຍະຜ່ານມາປະຊາຊົນ ທີ່ດຳລົງຊີວິດຢູ່ຕາມບໍລິເວນຊາຍແດນ ທັງ 3 ເມືອງ ໄດ້ມີຄວາມຮັບຮູ້ ແລະ ເຂົ້າໃຈ ກ່ຽວກັບແນວທາງນະໂຍບາຍຂອງພັກ, ລະບຽບກົດ ໝາຍຂອງລັດ, ເພື່ອເຊີດຊູຄວາມຮັກຊາດ ແລະ ຄວາມເປັນເຈົ້າຕົນເອງປະກອບສ່ວນ ເຂົ້າໃນການພັດທະນາປະເທດຊາດ ແລະ ປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍທົ່ວສັງຄົມ, ມີຄວາມສະຫງົບປອດໄພໂດຍພື້ນຖານ, ເຄົາລົບອະທິປະໄຕຂອງກັນ ແລະ ກັນ ຕ່າງຝ່າຍຕ່າງໄດ້ຮັບຜົນປະໂຫຍດ, ພ້ອມທັງປົກປັກຮັກສາສືບທອດມູນເຊື້ອຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ເມືອງຊານໄຊ, ເມືອງດັກຈຶງ ແລະ ເມືອງ ດັກໄລ ໃຫ້ນັນມື້ມີຄວາມອຸດົມສົມບູນ ແລະ ຂຽວສົດງົດງາມ ຊົ່ວກາລະນານ, ໂອກາດດຽວກັນ ຜູ້ແທນທັງ 3 ຝ່າຍ ກໍໄດ້ຮ່ວມກັນປຶກສາຫາລື, ແລກປ່ຽນບົດຮຽນ ເຊິ່ງກັນ ແລະ ກັນ ໃນວຽກງານຕ່າງໆ ເປັນຕົ້ນ: ວຽກງານເສດຖະກິດ, ວຽກງານວັດທະນະ ທຳ- ສັງຄົມ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານພົວພັນການຕ່າງປະເທດ ແລະ ຜົນການຈັດຕັ້ງປະຕິບັດເນື້ອໃນບົດບັນທຶກຊ່ວຍຈຳ ຄັ້ງທີ 17, ທັງນີ້ ກໍເພື່ອເປັນການຍົກສູງການປະສານສົມທົບຮ່ວມມືກັນໃນການປົກປັກຮັກສາຄວາມສະຫງົບເຂດຊາຍແດນ ແລະ ການຮ່ວມມືພັດທະນາເສດຖະ ກິດ-ສັງຄົມ ຂອງ 3 ເມືອງ ໃຫ້ມີຄວາມສະຫງົບ, ເປັນລະບຽບຮຽບຮ້ອຍ, ສ້າງທຸກເງື່ອນໄຂອຳນວຍຄວາມສະດວກ ໃຫ້ພົນລະເມືອງແຕ່ລະຝ່າຍ ໄດ້ໄປມາຫາສູ່, ຢ້ຽມຢາມ, ແລກປ່ຽນຊື້-ຂາຍສີນຄ້າຢ່າງສະດວກສະບາຍ, ຖືກຕ້ອງ, ສອດຄ່ອງຕາມລະບຽບ, ກົດໝາຍຂອງສອງປະເທດ ເພື່ອຊຸກຍູ້ແຮງການພັດທະນາເສດຖະກິດ-ສັງຄົມຂອງ 3 ເມືອງໃຫ້ນັບມື້ດີຂຶ້ນເທື່ອລະກ້າວ.
ຈາກນັ້ນໃນພິທີ ຕ່າງໜ້າທັງ 3 ຝ່າຍ ກໍໄດ້ຮ່ວມກັນລົງນາມເຊັນບົດບັນທຶກຊ່ວຍຈໍາການຮ່ວມມື ຄັ້ງທີ 18 ປະຈຳປີ 2023 ຕື່ມອີກ.
ຂ່າວ-ພາບ: ເຂີຍເມືອງໜາວ