ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

34ມື້ຜ່ານມາ ສປປ ລາວ ບໍ່ມີຜູ້ຕິດເຊື້ອພະຍາດໂຄວິດ19

ດຣ ລັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຄະນະສະເພາະກິດ ຄວບຄຸມໂຄວິດ19 ຖະແຫລງຕໍ່ສື່ມວນຊົນ ຕອນບ່າຍວັນທີ 16 ພຶດສະພາ ທີ່ກະຊວງສາທາລະນະສຸກເຖິງການຄວບຄຸມພະຍາດໂຄວິດວ່າ: ການເຝົ້າລະວັງ ແລະ ວິເຄາະ: ໃນວັນທີ 15 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 109 ຄົນ, ໃນນັ້ນ ມີກໍລະນີສົງໄສມາກວດຄືນ 2 ຄົນ, ບຸກຄົນທົ່ວໄປທີ່ບໍ່ມີອາການ 31 ຄົນ, ຜູ້ອອກໂຮງໝໍ 3 ຄົນຄື ກໍລະນີທີ  2, 6 ແລະ 13 ກັກໂຕຄົບ 14 ວັນ ໄດ້ມາກວດຄືນ, ແຮງງານລາວທີ່ກັບມາແຕ່ໄທ 73 ຄົນ ຜົນກວດທັງໝົດຂອງມື້ວານນີ້ ບໍ່ພົບເຊື້ອ,  ນອກນັ້ນ ແມ່ນມີແຮງງານຈີນທີ່ເຂົ້າມາຈຳກັດບໍລິເວນຢູ່ໂຮງແຮມດອນຈັນພາເລດ, ໄດ້ເກັບຕົວຢ່າງໃນຕອນຄ່ຳຂອງວັນທີ 15/05/2020 ຈຳນວນ 111 ຕົວຢ່າງ ແຕ່ທັງໝົດບໍ່ມີຜູ້ຕິດເຊື້ອໃໝ່.

ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 15 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 4,424 ຕົວຢ່າງ, ກວດພົບເຊື້ອສະສົມ 19 ຄົນ (34 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).

ສ່ວນການຕິດຕາມຜູ້ເດີນທາງມາຈາກຕ່າງປະເທດໂດຍສະເພາະແຮງງານລາວຢູ່ສະຖານທີ່ຈຳກັດບໍລິເວນຕ່າງໆຂອງແຂວງ: ປະຈຸບັນນີ້ທົ່ວປະເທດ ມີສູນຈໍາກັດບໍລິເວນ ທັງໝົດ 66  ສູນ, ມີຜູ້ຈຳກັດບໍລິເວນຢູ່ສູນ 2,371 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດ ແລະ ບໍ່ມີຜູ້ຕິດເຊື້ອ.

ການຕິດຕາມປີ່ນປົວຄົນເຈັບຢູ່ໂຮງໝໍ : ປັດຈຸບັນ, ມີຜູ້ນອນຕິດຕາມຢູ່ໂຮງໝໍມິດຕະພາບ 5 ຄົນ ຍີງ 4 ຄົນ ທັງໝົດເຫັນວ່າມີອາການປົກກະຕິ.

ຮອດວັນທີ 16 ພຶດສະພາ ທົ່ວໂລກມີຜູ້ຕິດເຊຶ້ອ 4.543.304 ຄົນ, (ເພີ່ມຂຶ້ນ 24.650ຄົນ), ເສຍຊີວິດ 403.192 ຄົນ, (ເພີ່ມ 94.537 ຄົນ), ປົວດີ 1.639.531 ຄົນ. ອາເມລິກາ : ຕິດເຊື້ອ 1.475.388 ຄົນ, (ເພີ່ມຂຶ້ນ 24.650 ຄົນ) ຫຼາຍເປັນອັນດັບ 1 ຂອງໂລກ ເສຍຊີວິດ 88.232 ຄົນ.

ອັນດັບສອງແມ່ນແອັສປາຍ ມີຜູ້ຕິດເຊື້ອ 274.367 ຄົນ. ເສຍຊີວິດ 2.417 ຄົນ, ປົວດີ 188.967ຄົນ, ອັນດັບ3 ແມ່ນຣັດເຊຍ ມີຜູ້ຕິດເຊື້ອທັງໝົດ 262.843ຄົນ, ເສຍຊີວິດ 2.418ຄົນ, ປົວດີ 58.226ຄົນ.

ສ່ວນປະເທດສະມາຊິກອາຊຽນອັນດັບໜຶ່ງແມ່ນ ສິງກະໂປ: ມີຜູ້ຕິດເຊື້ອ 26.891 ຄົນ, ເສຍຊີວິດ 21 ຄົນ, ປົວດີ 7.248 ຄົນ, ອິນໂດເນເຊຍ: ຕິດເຊື້ອ 16.496 ຄົນ, ເສຍຊີວິດ 1.076 ຄົນ, ປົວດີ 3.803 ຄົນ, ຟິລິປິນ: ຕິດເຊື້ອ 12.091 ຄົນ, ເສຍຊີວິດ 806 ຄົນ, ປົວດີ 2.460 ຄົນ, ມາເລເຊຍ: ຕິດເຊື້ອ 6.855 ຄົນ, ເສຍຊີວິດ 112 ຄົນ, ປົວດີ 5.439 ຄົນ, ໄທ: ຕິດເຊື້ອ 3.025 ຄົນ, ເສຍຊີວິດ 56 ຄົນ, ປົວດີ 2.854 ຄົນ, ຫວຽດນາມ: ຕິດເຊື້ອ 314 ຄົນ, ບໍ່ມີຜູ້ເສຍຊີວິດ, ປົວດີ 260 ຄົນ, ມຽນມາ: ຕິດເຊື້ອ 182 ຄົນ, ເສຍຊີວິດ 6 ຄົນ, ປົວດີ 89 ຄົນ, ບຣູໄນ: ຕິດເຊື້ອ 141 ຄົນ, ເສຍຊີວິດ 1 ຄົນ, ປົວດີ 135 ຄົນ, ກຳປູເຈຍ: ຕິດເຊື້ອ 122 ຄົນ, ບໍ່ມີຜູ້ເສຍຊີວິດ, ປົວດີ 122 ຄົນ, ຕີມໍເລສເຕ: ຕິດເຊື້ອ 24 ຄົນ, ບໍ່ມີຜູ້ເສຍຊີວິດ, ປົວດີ 24 ຄົນ. ສ່ວນ ສປປ ລາວ ຍັງແມ່ນປະເທດຜູ້ຕິດເຊື້ອຕໍ່າກວ່າໝູ່ໃນອາຊຽນ ຄື 19ຄົນ ປົວດີແລ້ວ 14ຄົນ,ບໍ່ມີຜູ້ເສຍຊີວິດ.