ທ່ານ ສີວິໄລ ແສງຈະເລີນ ຮອງເຈົ້າແຂວງໆຊຽງຂວາງ ພ້ອມດ້ວຍຄະນະລົງກວດກາ ຜົນກະທົບຈາກໄພພິບັດນ້ຳຖ້ວມ ຢູ່ບ້ານພຽງມອນ ເມືອງໜອງແຮດ ໃນວັນທີ 30 ສິງຫາ 2024.
ທ່ານ ນາງ ດວງສີ ວື່ ຮອງເຈົ້າເມືອງໆໜອງແຮດ ແລະ ຄະນະບ້ານພຽງມອນ ໄດ້ລາຍງານຜົນກະທົບຈາກໄພພິບັດຢູ່ເມືອງເມືອງໜອງແຮດ ເນື່ອງຈາກມີຝົນຕົກໜັກໃນວັນທີ 27 ສິງຫາ 2024 ຕິດຕໍ່ກັນຫລາຍຊົ່ວໂມງ ເຮັດໃຫ້ຫລາຍພື້ນທີ່ຂອງເມືອງໜອງແຮດ ໄດ້ຮັບຜົນກະທົບຈາກນ້ຳຖ້ວມ ເສັ້ນທາງເລກ 3977ແຕ່ບ້ານພະແຄະ ຫາບ້ານພຽງໂພ ຊາຍແດນເມືອງກວນ (ແຂວງຫົວພັນ), ເສັ້ນທາງ 4283 ແຕ່ບ້ານດິນດຳ ຫາ ບ້ານພຽງຫົ່ງ ເສັ້ນທາງແມ່ນຖືກຕັດຂາດ ລົດໃຫຍ່ບໍ່ສາມາດສັນ ຈອນໄດ້, ດິນເຈື່ອນຖົມທາງ, ນ້ຳເຊາະໜ້າທາງເປັນຮ່ອງເລິກ, ໜ້າທາງຂາດ, 4 ບ້ານໄດ້ຮັບຜົນກະທົບຄື: ບ້ານກໍດູ່, ບ້ານພຽງຫົ່ງ, ບ້ານສົບແຕນ ແລະ ບ້ານພຽງມອນ ໃນນີ້, ບ້ານກໍດູ່ ເຮືອນເປ່ເພ 5 ຫລັງ, ຊຶ່ງ 4 ຫລັງແມ່ນເປ່ເພ 100%, ເນື້ອທີ່ທຳການຜະລິດ 93 ເຮັກຕາ, ຈັກສິດຢາ 5 ເຄື່ອງ, ງົວ 2 ໂຕ ແລະ ເປັດໄກ່ ຈຳນວນໜຶ່ງ.
ສ່ວນບ້ານພຽງຫົ່ງ ນ້ຳໄຫລຊຸດິນເຂົ້າເຮືອນເສຍຫາຍ 1 ຫລັງ ຫໍພັກຂອງທະ ຫານຊາຍແດນກອງຮ້ອຍ 223, ບ້ານສົບແຕນ ເນື່ອທີ່ທຳການຜະລິດ 74 ເຮັກຕາ ງົວ 5 ໂຕ, ເຮືອຈັກ 1 ລຳ, ສວນຫຍ້າ 5 ເຮັກຕາ, ຕາໜ່າງເຫລັກ 9 ກໍ້ ແລະ ສັດປີກຈຳນວນໜຶ່ງ, ບ້ານພຽງມອນ ເນື້ອທີ່ທຳການຜະລິດື180,1 ເຮັກຕາ, ໜອງປາ 15 ໜອງ, ແບ້ 2 ໂຕ, ໝູ 6 ໂຕ, ສວນຫຍ້າ 9 ເຮັກຕາ, ສາຍທໍ່ນ້ຳ 1.650 ແມັດ, ຕາໜ່າງເຫລັກ 16 ກໍ້ ແລະ ເປັດ-ໄກ່ 35 ໂຕ ລວມມູນຄ່າເສຍຫາຍ 5 ຕື້ກີບ.
ຕໍ່ກັບເຫດການດັ່ງກ່າວ, ຄະນະກຳມະການຄຸ້ມຄອງໄພພິບັດແຂວງ-ເມືອງ ໄດ້ລົງແກ້ໄຂສຸກເສີນ ໂດຍສົມທົບກັບບໍລິສັດກໍ່ສ້າງເຂື່ອນໄຟຟ້ານ້ຳເນີນ 1 ແລະ ບໍລິສັດລາວສຳພັນ ພັດທະນາຈຳກັດ ຜູ້ດຽວ ປະຈຳຢູ່ຈຸດເສຍຫາຍ ໄດ້ລະດົມບໍລິສັດແກ້ໄຂເສັ້ນທາງສຸກເສີນກ່ອນ.
ໂອກາດນີ້, ທ່ານຮອງເຈົ້າແຂວງໆຊຽງຂວາງ ໄດ້ມີຄຳເຫັນໂອລົມຄະນະບ້ານ ແລະ ພໍ່ແມ່ປະຊາຊົນບ້ານພຽງມອນ ໂດຍໄດ້ເນັ້ນໃຫ້ພາກສ່ວນທີ່ກ່ຽວຂ້ອງ ລົງເກັບກຳຂໍ້ມູນຜົນເສຍຫາຍແກ້ໄຂສຸກເສີນ ແລະ ຟື້ນຟູໃຫ້ເຂົ້າສູ່ສະພາບປົກກະຕິໂດຍໄວ, ປະຊາຊົນເພີ່ມຄວາມສາມັກຄີໃຫ້ແໜ້ນແຟ້ນ, ຊ່ວຍເຫລືອເຊິ່ງກັນ ແລະ ກັນ, ເພີ່ມທະວີວຽກງານປກຊ-ປກສ, ຕິດຕາມເຝົ້າລະວັງໄພພິບັດ, ພະຍາດລະບາດ, ລົມພະຍຸ, ອັກຄີໄພ, ຝຶກຊ້ອມຈຳລອງເຫດການໄພພິບັດ, ເພີ່ມທະວີການປະສານງານໃຫ້ວ່ອງໄວ, ແກ້ໄຂໃຫ້ທັນການ, ສືບຕໍ່ຈັດຕັ້ງຜັນຂະຫຍາຍແຜນພັດທະນາ ເສດຖະກິດ-ສັງຄົມ ຂອງບ້ານໃຫ້ປະກົດຜົນເປັນຈິງ.
ການນຳຂອງແຂວງ ໄດ້ມອບເຄື່ອງອຸປະໂພກ ບໍລິໂພກ, ແນວພັນພືດ ໃຫ້ປະຊາ ຊົນບ້ານພຽງມອນ ລວມມູນຄ່າ 32 ລ້ານກວ່າກີບ ແລະ ມອບເງິນຈຳນວນ 40 ກີບ ໃຫ້ເມືອງ ເພື່ອໝູນໃຊ້ເຂົ້າໃນວຽກງານແກ້ໄຂໄພພິບັດ.
ຂ່າວ: ບຸນມີ ແສງທຸມມີ
