ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

4 ບໍລີສັດສະໜັບສະໜູນມອບເງິນ ແລະ ເຄື່ອງປ້ອງກັນພະຍາດໃຫ້ລັດຖະບານເພື່ອຕ້ານໂຄວິດ-19:

ໃນຕອນບ່າຍຂອງວັນທີ 24 ເມສາ 2020 ທີ່ ສຳນັກງານນາຍົກລັດຖະມົນຕີ, ນະຄອນຫຼວງວຽງຈັນ, ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງເຊື້ອພະຍາດ ໂຄວິດ-19 ໄດ້ຮັບເຄື່ອງ ແລະ ເງິນຊ່ວຍເຫຼືອລັດຖະບານ ຈາກ 4 ພາກສ່ວນ, ລວມມູນຄ່າ 3 ຕື້ກວ່າກີບ, ໂດຍມີຄະນະສະເພາະກິດ ແລະ ພະນັກງານທີ່ກ່ຽວຂ້ອງ ຂອງແຕ່ລະພາກສ່ວນເຂົ້າຮ່ວມ.

ພາກສ່ວນທີ່ນຳເຄື່ອງ ແລະ ເງິນ ມາມອບຊ່ວຍເຫຼືອໃນຄັ້ງນີ້ ປະກອບມີ: 1). ບໍລິສັດ ສົມບູນການຄ້າ ຂາອອກ-ຂາເຂົ້າ ມອບເງິນຊ່ວຍເຫຼືອ ຈຳນວນ 2.000.000.000 ກີບ, ໃນນັ້ນ ມອບໃຫ້ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ກະຊວງສາທາລນະສຸກ ແລະ ຫ້ອງວ່າການສຳນັກງານນາຍົກລັດຖະມົນຕີ ພາກສ່ວນລະ 500.000.000 ກີບ, ກ່າວມອບໂດຍ ທ່ານ ອຸດົມສັກ ອຸດົມທອງກະເສີມ, ປະທານບໍລິສັດ ສົມບູນການຄ້າ ຂາອອກ-ຂາເຂົ້າ; 2). ບໍລິສັດ ວິສະວະກຳ ທາງລົດໄຟຈີນ ມອບເງິນ ຈຳນວນ 1.000.000.000 ກີບ, ກ່າວມອບໂດຍ ທ່ານ WANG QIHUI ທູດທີ່ປຶກສາເສດຖະກິດ ແລະ ການຄ້າ, ສະຖານເອກອັກຄະລັດຖະທູດຈີນ ປະຈຳ ສປປ ລາວ; 3). ບໍລິສັດ ບີຄຣີມ ພະລັງງານລາວ ມອບເງິນ 1.200.000 ບາດ (ສະກູນເງິນໄທ) ຫຼື ປະມານ 355 ລ້ານກີບ, ກ່າວມອບໂດຍ ທ່ານ SUARK KUMPET, ຜູ້ ຊ່ວຍຜູ້ຈັດການຝ່າຍບໍລິຫານ, ບໍລິສັດ ບີຄຣີມ ພະລັງງານລາວ; ແລະ 4). ກະຊວງພະລັງງານ ແລະ ບໍ່ແຮ່ ມອບເຄື່ອງປ້ອງກັນພະຍາດ ມູນຄ່າ 100.000.000 ກີບ ແລະ ເງິນສົດ 100.000.000 ກີບ, ກ່າວມອບໂດຍ ທ່ານ ຄໍາມະນີ ອິນທິລາດ, ລັດຖະມົນຕີກະຊວງພະລັງງານ ແລະ ບໍ່ແຮ່.

ໃນໂອກາດນີ້, ທ່ານ ສົມດີ ດວງດີ ໄດ້ກ່າວສະແດງຄວາມຊົມເຊີຍ ແລະ ຂອບໃຈ ຕໍ່ບັນດາບໍລິສັດຕ່າງໆ ທີ່ເຫັນໄດ້ຄວາມສຳຄັນໃນວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ລາວໃນຄັ້ງນີ້, ແລະ ລັດຖະບານຈະ ນໍາໃຊ້ເງິນ ແລະ ເຄື່ອງຈໍານວນເຫຼົ່ານີ້ ໃຫ້ເກີດປະໂຫຍດສູງສຸດ.