ໄລຍະ 4 ເດືອນຕົ້ນປີ 2024 ນີ້, ເມືອງວັງວຽງ ແຂວງວຽງຈັນ ສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ຫລາຍກວ່າ 3 ແສນຄົນ, ຄາດວ່າຫມົດປີນີ້ຈະບັນລຸບໍ່ຫລຸດ 8 ແສນຄົນ.
ທ່ານ ບຸນຈັນ ມາລາວົງ ເຈົ້າເມືອງວັງວຽງ ໃຫ້ຮູ້ເມື່ອບໍ່ດົນມານີ້ວ່າ: ເພື່ອຮອງຮັບບັນດານັກທ່ອງທ່ຽວ ທີ່ເດີນທາງເຂົ້າມາທ່ອງທ່ຽວວັງວຽງ ທີ່ນັບມື້ເພີ່ມຂຶ້ນ, ບັນດາຜູ້ປະກອບການ, ຫົວໜ່ວຍທຸລະກິດໂຮງແຮມ, ຣີສອດ, ຮ້ານອາຫານ, ສະຖານທີ່ທ່ອງທ່ຽວຕ່າງໆ ລວມເຖິງກິດຈະກຳທາງນໍ້າ, ທາງບົກ ແລະ ທາງອາກາດ ກໍໄດ້ຮັບການປັບປຸງ ແລະ ຍົກລະດັບການບໍລິການ.
ນອກຈາກນີ້, ຂະແໜງການທີ່ກ່ຽວຂ້ອງ ກໍໄດ້ມີການປະສານສົມພົບເຊິ່ງກັນ ແລະ ກັນ ໃນການສະກັດກັ້ນ ແລະ ຄຸ້ມຄອງລາຄາສິນຄ້າ ແລະ ການບໍລິການຕ່າງໆ ແນໃສ່ຄຸ້ມຄອງປົກປ້ອງຜົນປະໂຫຍດຂອງຜູ້ບໍລິໂພກ ກໍຄື ບັນດານັກທ່ອງທ່ຽວ.
ຢ່າງໃດກໍຕາມ ບາງສະຖານທີ່ທ່ອງທ່ຽວ ເປັນຕົ້ນແມ່ນການທ່ອງທ່ຽວທາງອາກາດ ແລະ ການບໍລິການທາງນໍ້າ ເຫັນວ່າ ກົດໝາຍ, ນິຕິກຳ ແລະ ລະບຽບການ ບາງດ້ານຍັງບໍ່ທັນຮັດກຸມເທົ່າທີ່ຄວນ.
ທີ່ມາ: ກິຕາ
