ຄະນະກໍາມະການຕ້ານໄພພິບັດຂອງ 4 ເມືອງພາຍໃນ 3 ແຂວງ ພາກໃຕ້ ຄື: ເມືອງ ສາມັກຄີໄຊ, ເມືອງ ສະໜາມໄຊ ແຂວງອັດຕະປື, ເມືອງ ປາກຊ່ອງ ແຂວງຈໍາປາສັກ ແລະ ເມືອງລະມາມ ແຂວງເຊກອງ ເຂົ້າຮ່ວມຝຶກອົບຮົມທົບທວນຄືນກ່ຽວ ກັບແຜນຮັບມືສຸກເສີນຂອງໂຄງການເຂຶ່ອນໄຟຟ້າເຊປຽນ-ເຊນ້ຳນ້ອຍ ໃນວັນທີ 11 ມິຖຸນາ 2024 ນີ້ ທີ່ຕາດຄູ່ ເມືອງປາກຊ່ອງ ແຂວງຈໍາປາສັກ.
ຈຸດປະສົງໃນການຈັດຊຸດຝຶກອົບຮົມຄັ້ງນິ້ ເພື່ອທົບທວນຄືນກ່ຽວກັບແຜນຮັບມືສຸກເສີນ ທັງເປັນການຕອບສະໜອງແຜນການຮັບມືສຸກເສີນໃຫ້ແກ່ຜູ້ໄດ້ຮັບຜົນກະທົບທັງໝົດ ເພື່ອຮັບປະກັນວ່າ ພະນັກງານໂຄງການ, ຂະແໜງການທີ່ກ່ຽວຂ້ອງຂອງລັດ, ອົງການປົກຄອງບ້ານ ແລະ ປະຊາຊົນ ຮູ້ວ່າຈະເຮັດແນວໃດໃນກໍລະນີເກີດເຫດສຸກເສີນຈາກເຂື່ອນໃດໜຶ່ງຂອງໂຄງການ ເຊັ່ນ: ບ້ານທີ່ຈະຖືກອົບພະຍົບ, ເສັ້ນທາງອົບພະຍົກ, ຈຸດເຕົ້າໂຮມທີ່ປອດໄພ ລວມທັງ ຂົວ-ເສັ້ນທາງຕ່າງໆ ທີ່ຈຳເປັນຕ້ອງຖືກປິດ, ເພືອຮັບປະກັນແຜນອົບພະຍົບໃຫ້ວ່ອງໄວ, ທັນການ ແລະ ການແຈ້ງການໃຫ້ທັນຕໍ່ສະຖານະການສຸກເສີນ ແລະ ເພື່ອຫຼີກລ້ຽງການສູນເສຍກໍລະນີເກີດໄພນ້ຳຖ້ວມຈາກເຂື່ອນແຕກ, ການປ່ອຍນ້ຳປະລິມານຫຼາຍ ຫຼື ນ້ຳລົ້ນຈາກເຂື່ອນ.
ໃນການຝຶກອົບຮົມ, ຜູ້ເຂົ້າຮ່ວມ ໄດ້ຮັບຟັງການນຳສະເໜີໂດຍລວມຈາກວິຊາການທິ່ກ່ຽວຂ້ອງເປັນຕົ້ນ: ການນຳສະເໜີແຜນທິ່ຕັ້ງລວມຂອງໂຄງການເຂຶ່ອນເຊປຽນ-ເຊນ້ຳນ້ອຍ, ຂັ້ນຕອນຮັບມືກໍລະນີສຸກເສີນ, ຕົວຢ່າງຂອງການແຈ້ງເຕືອນກໍລະນີສຸກເສີນ, ໜ້າທິ່ຮັບຜິດຊອບຂອງອຳນາດການປົກຄອງທ້ອງຖິ່ນ, ແຜນທີ່ວິເຄາະເຂດອຸທົກກະໄພຂອງເຂື່ອນໄຟຟ້າເຊປ່ຽນ-ເຊນ້ຳນ້ອຍ.
ຈາກນັ້ນ ບັນດາຜູ້ເຂົ້າຮ່ວມໄດ້ແລກປ່ຽນບົດຮຽນເຊິ່ງກັນ ແລະ ກັນ ເພຶ່ອເປັນການກຽມຄວາມພ້ອມໃນການຮັບມືກໍລະນີເກີດເຫດສຸກເສີນ ໃຫ້ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ.
Cr: ຂາວພອນ.
