ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

41 ມື້ຜ່ານມາ ສປປ ລາວ ບໍ່ມີລາຍງານຜູ້ຕິດເຊື້ອພະຍາດໂກວິດ19

ວັນທີ 22 ພຶດສະພາ 2020, ຄະນະສະເພາະກິດໄດ້ເກັບຕົວຢ່າງມາກວດທັງໝົດ 150 ຄົນ, ໃນນັ້ນ ມີກໍລະນີສົງໄສ ທີ່ເປັນພະນັກງານແພດ ຢູ່ນະຄອນຫລວງວຽງຈັນ 4 ຄົນ, ແຮງງານລາວທີ່ກັບມາແຕ່ໄທ 114 ຄົນ, ແຮງງານຈີນ 32 ຄົນ ທັງໝົດຢູ່ແຂວງຫຼວງນ້ຳທາ.  ຜົນກວດທັງໝົດ ມື້ວານນີ້ ບໍ່ພົບເຊື້ອ.

ໂອກາດຖະແຫລງຂ່າວ ຕອນບ່າຍ ວັນທີ 23 ພຶດສະພານີ້ ຂອງຄະນະສະເພາະກິດ ທ່ານພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ຜູ້ປະຈໍາການຄະນະສະເພາະກິດໃຫ້ຮູ້ວ່າ: ປະຈຸບັນນີ້ທົ່ວປະເທດ ມີສູນຈໍາກັດບໍລິເວນຜູ້ທີ່ເດີນທາງຈາກຕ່າງປະເທດເຂົ້າມາລາວ ທັງໝົດ 93 ສູນ, ມີຜູ້ຈຳກັດບໍລິເວນຢູ່ສູນ 3,224 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດ ແລະ ບໍ່ມີຜູ້ຕິດເຊື້ອ.ສໍາລັບຜູ້ຕິດເຊື້ອທີ່ນອນຕິດຕາມຢູ່ໂຮງໝໍມິດຕະພາບ ຍັງມີ 5 ຄົນ ຍີງ 4 ຄົນ ທັງໝົດມີອາການປົກກະຕິ ຈະໄດ້ສືບຕໍ່ຕິດຕາມຕໍ່ໄປຈົນກ່ວາຈະກວດຫາເຊື້ອບໍ່ພົບ.

ທ່ານພູທອນ ເມືອງປາກ ໃຫ້ຮູ້ເຖິງສະພາບການກັ່ນກອງຜູ້ເດີນທາງເຂົ້າມາ ຕາມຈຸດຜ່ານແດນຕ່າງໆ ຂອງລະບົບເຝົ້າລະວັງພະຍາດ ແມ່ນການລາຍງານຈາກທົ່ວປະເທດມາຫາສູນປະຕິບັດງານສຸກເສີນ ຂອງກະຊວງສາທາລະນະສຸກ (ເລິ່ມແຕ່ວັນທີ 12 ເມສາ 2020 ເປັນຕົ້ນມາ) ໄດ້ເກັບຕົວຢ່າງມາກວດທັງໝົດ ມີ 5,194 ຕົວຢ່າງ. ບັນຫາສຳຄັນ ຂໍໃຫ້ບັນດາທ່ານເຂົ້າໃຈວ່າ ການຜ່ອນຜັນມາດຕະການຕ່າງໆ ແມ່ນນະໂຍບາຍຂອງພັກ-ລັດຖະບານ ທີ່ເປັນຮ່ວງເປັນໃຍຕໍ່ຜົນກະທົບດ້ານຊີວິດການເປັນຢູ່ຂອງພໍ່ແມ່ປະຊາຊົນ ແລະ ດ້ານເສດຖະກິດ-ສັງຄົມ ຊຶ່ງເປັນໂອກາດໃຫ້ພາກທຸລະກິດກໍ່ຄືພໍ່ແມ່ປະຊາຊົນບັນດາເຜົ່າ ໄດ້ກັບຄືນມາດຳເນີດກິດຈະການ ຫຼື ດຳເນີນຊີວິດເປັນປົກກະຕິເທື່ອລະກ້າວ ແຕ່ພ້ອມດຽວກັນນີ້ກໍ່ເປັນໂອກາດທີ່ຈະເກີດຄວາມສ່ຽງ ຂອງການລະບາດຮອບໃໝ່ ຖ້າຫາກວ່າພວກເຮົາ ບໍ່ປະຕິບັດວິທີການປ້ອງກັນການຕິດເຊື້ອຢ່າງເຂັ້ມງວດ ໂດຍສະເພາະຢູ່ສະຖານທີ່ໃຫ້ບໍລິການ, ພະຫະນະໃຊ້ບໍລິການ, ​ຜູ້ໃຫ້ບໍລິການ ແລະ ຜູ້ມາໃຊ້ບໍລິການ ເປັນຕົ້ນແມ່ນ: ການປະຕິບັດຫຼັກການອະນາໄມ, ການທໍາຄວາມສະອາດຂ້າເຊື້ອພະຍາດຢູ່ສະຖານທີ່ບໍລິການ, ການແທກອຸນຫະພູມຮ່າງກາຍ, ການລ້າງມືດ້ວຍນໍ້າສະອາດໃສ່ສະບູ ຫຼື ໃຊ້ເຈວລ້າງມື, ການປະຕິບັດໄລຍະຫ່າງທາງສັງຄົມ, ບໍ່ໃຫ້ແອອັດ, ການໃສ່ຜ້າປິດປາກ-ດັງ ເວລາອອກຈາກບ້ານ ຫຼື ໄປສະຖານທີ່ ທີ່ມີຄວາມສ່ຽງຕໍ່ການຕິດເຊື້ອ ທັງໝົດນີ້ໃຫ້ກາຍເປັນຄວາມຊິນເຄີຍໃນການດຳລົງຊີວິດປະຈຳວັນ. ພວກເຮົາຈຶ່ງຈະສາມາດສະກັດກັ້ນ ການລະບາດຂອງພະຍາດ COVID-19 ບໍ່ໃຫ້ກັບຄືນມາຮອບໃໝ່.​

ໄລຍະນີ້ ດິນຟ້າອາກາດກ້າວເຂົ້າສູ່ລະດູຝົນ, ກະຊວງສາທາລະນະສຸກ ບໍ່ພຽງແຕ່ຄວບຄຸມການລະບາດຂອງພະຍາດ COVID-19ເທົ່ານັ້ນ ຍັງໄດ້ເອົາໃຈໃສ່ ປ້ອງກັນ ແລະ ຄວບຄຸມການລະບາດຂອງພະຍາດຕາມລະດູການອີກ ເປັນຕົ້ນແມ່ນ: ພະຍາດຖອກທ້ອງ, ໄຂ້ຫວັດ, ໝາກແດງ, ມາລາເຣຍ ແລະ ໄຂ້ຍຸງລາຍ, ປະຈຸບັນພາກສ່ວນສາທາລະນະສຸກ ໄດ້ເປີດຂະບວນການສັກຢາກັນພະຍາດທົ່ວປະເທດ.

ມາຮອດວັນທີ 22 ພຶດສະພາ 2020 ທົ່ວປະເທດມີຜູ້ຕິດເຊື້ອພະຍາດໄຂ້ຍຸງລາຍທັງໝົດ 1,337 ຄົນ, ເສຍຊີວິດ 4 ຄົນ ຢູ່ນະຄອນຫຼວງວຽງຈັນ 2 ຄົນ, ໄຊຍະບູລີ 1 ຄົນ ແລະ ແຂວງຄຳມ່ວນ 1 ຄົນ, ຖືວ່າເປັນພະຍາດທີ່ມີຄວາມຮຸນແຮງເຊັ່ນກັນ. ສະນັ້ນ ຈຶ່ງຂໍເຊີນຊວນພໍ່ແມ່ປະຊາຊົນບັນດາເຜົ່າ ຈົ່ງໄດ້ເປັນເຈົ້າການໃນການທຳລາຍແຫຼ່ງເພາະພັນຍຸງລາຍ ແລະ ນຳພາລູກຫຼານໄປສັກຢາກັນພະຍາດ ຕາມຕາຕະລາງສັກຢາ.

ມາຮອດເວລາ 6:00 ໂມງເຊົ້າ ຂອງວັນທີ 23 ພຶດສະພາ 2020, ທົ່ວໂລກມີການລາຍງານການລະບາດ ທັງໝົດ 213 (ປະເທດ/ເຂດ).ມີຜູ້ຕິດເຊື້ອພະຍາດ COVID-19 ແມ່ນ 5,296,944ຄົນ ໃນນີ້  (106,453 ໃໝ່)-ປະເທດອາເມລິກາ ຜູ້ຕິດເຊື້ອ 1.637.989 ຄົນ, ເພີ່ມຂຶ້ນ 26.493 ຄົນ, ເສຍຊີວິດ 96.377 ຄົນ , ເປັນອັນດັບ1 ຂອງໂລກ. -ເບຼຊິນ ມີຜູ້ຕິດເຊື້ອ 332.382 ຄົນ, ເພີ່ມຂຶ້ນ 21.461 ຄົນ, ເສຍຊີວິດ 21.116 ຄົນ,   – ຄົນ.-ຣັດເຊຍ ຜູ້ຕິດເຊື້ອ 326.448 ຄົນ, ເພີ່ມຂຶ້ນ 8.894 ຄົນ, ເສຍຊີວິດ 3.249 ຄົນ.

ສ່ວນປະເທດສະມາຊິກອາຊຽນ: ສິງກະໂປ: ຕິດເຊື້ອ 30.426 ຄົນ, ເສຍຊີວິດ 23 ຄົນ, -ອິນໂດເນເຊຍ: ຕິດເຊື້ອ 20.797 ຄົນ, ເສຍຊີວິດ 1.326 ຄົນ, -ຟິລິປິນ: ຕິດເຊື້ອ 13.597 ຄົນ, ເສຍຊີວິດ 857 ຄົນ, – ມາເລເຊຍ: ຕິດເຊື້ອ 7.137 ຄົນ, ເສຍຊີວິດ 115 ຄົນ, -ໄທ: ຕິດເຊື້ອ 3.037 ຄົນ, ເສຍຊີວິດ 56 ຄົນ, -ຫວຽດນາມ: ຕິດເຊື້ອ 324 ຄົນ, ບໍ່ມີຜູ້ເສຍຊີວິດ, -ມຽນມາ: ຕິດເຊື້ອ 199 ຄົນ, ເສຍຊີວິດ 6 ຄົນ, -ບຣູໄນ: ຕິດເຊື້ອ 141 ຄົນ, ເສຍຊີວິດ 1 ຄົນ, -ກຳປູເຈຍ: ຕິດເຊື້ອ 123 ຄົນ, ປົວດີໝົດແລ້ວ, -ຕີມໍເລສເຕ: ຕິດເຊື້ອ 24 ຄົນ,  ປົວດີໝົດແລ້ວ.