ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນບົດລາຍງານການຈັດຕັັ້ງປະຕິບັດບັນດາຄາດໝາຍການພັດທະນາຊົນນະບົດ ແລະ ແກ້ໄຂຄວາມທຸກຍາກໃນໄລຍະຜ່ານມາ ແລະ ທິດທາງ, ແຜນການໃນຕໍ່່ໜ້າຂອງລັດຖະບານທີ່ສະເໜີຕໍ່່ກອງປະຊຸມສະໄໝສາມັນເທື່ອທີ 7 ຂອງ ສະພາແຫ່ງຊາດຊຸດທີ IX ເມື່ອບໍ່ດົນມານີ້, ໄດ້ຍົກໃຫ້ເຫັນວ່າ: ມີ 5 ສາເຫດທີ່ເຮັດໃຫ້ການພັດທະນາ ຊົນນະບົດ ແລະ ແກ້ໄຂຄວາມທຸກຍາກມີຂໍ້ຄົງຄ້າງ ຄື:
1). ການຈັດຕັ້ງຜັນຂະຫຍາຍ ແລະ ນໍາພາຊີ້ນໍາຈັດຕັ້ງປະຕິບັດ ຕາມທິດນໍາໃນການພັດທະນາ ຊົນນະບົດ ແລະ ແກ້ໄຂຄວາມທຸກຍາກ ຍັງບໍ່ທັນເລິກເຊິ່ງ, ແທດເຖິງ ແລະ ສົມຄູ່ກັບການຖື ເປັນວຽກຍຸດທະສາດ, ເປັນວຽກງານສໍາຄັນຕົ້ນຕໍຂອງພັກ.
2). ຄວາມຮັບຮູ້ເຂົ້າໃຈ ຂອງຄະນະພັກ, ອົງການປົກຄອງ ແລະ ຂອຂະແໜງການຂັ້ນຕ່າງໆ ຕໍ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຍັງບໍ່ທັນເລິກເຊິ່ງ ແລະ ເປັນ ເອກະພາບກັນ. ສ່ວນຫຼາຍຍັງເຂົ້າໃຈວ່າ: ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ເປັນຄວາມຮັບຜິດຊອບ ຂອງກະສິກຳ ແລະ ປ່າໄມ້ ຈຶ່ງເຮັດໃຫ້ການວາງແຜນການ, ກົນໄກການຈັດຕັ້ງປະຕິບັດບໍ່ລວມສູນເອກະພາບ, ຕ່າງພາກສ່ວນຕ່າງເຮັດຕາມຄວາມຮັບຜິດຊອບຂອງໃຜລາວ, ຂາດການປະສານສົມທົບກັນທີ່ກົມກຽວ;
3). ການຈັດຕັ້ງຂັ້ນຮາກຖານບ້ານ ຢູ່ເຂດຊົນນະບົດ, ຫ່າງໄກສອກຫຼີກ ແລະ ເຂດລຽບຕາມຊາຍແດນ ຍັງອ່ອນຫຼາຍ, ນາຍບ້ານບາງບ່ອນບໍ່ຮູ້ໜັງສື, ປະຊາຊົນ ບໍ່ຮູ້ພາສາລາວ ເຮັດໃຫ້ການຈັດຕັ້ງຜັນຂະຫຍາຍ ແລະ ນໍາພາບັນຊາຈັດຕັ້ງປະຕິບັດຕົວຈິງ ພົບຄວາມຫຍຸ້ງຍາກພໍສົມຄວນ.
4). ການປຸກລະດົມກຳລັງແຮງສັງລວມຂອງສັງຄົມ ແລະ ຂອງທຸກພາກສ່ວນເສດຖະກິດ ເຂົ້າຮ່ວມປະກອບສ່ວນຈັດຕັ້ງປະຕິບັດຍັງບໍ່ທັນຫຼາຍ; ບໍ່ທັນມີນະໂຍບາຍຊຸກຍູ້ສົ່ງເສີມທີ່ລະອຽດ ຈະແຈ້ງ ເພື່ອຊຸກຍູ້ໃຫ້ແກ່ທຸກພາກສ່ວນເສດຖະກິດເຂົ້າຮ່ວມພັດທະນາຊົນນະບົດ, ແກ້ໄຂຄວາມທຸກຍາກ; ການຊ່ວຍບໍລິການເຕັກນິກ, ແນວພັນ, ຝຶກອົບຮົມໃຫ້ປະຊາຊົນບໍ່ທັນຫຼາຍ.
5). ຄວາມຕ້ອງການພັດທະນາມີຫຼາຍ, ແຕ່ທຶນຮອນງົບປະມານ ແລະ ບຸກຄະລາກອນມີຈຳກັດ ບວກກັບສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ, ໄພເງິນເຟີ້, ໄພພິບັດທາງທຳມະຊາດ, ພະຍາດລະບາດ ແລະ ອື່ນໆ.
May be an image of 3 people and text