ໃນບົດລາຍງານທີ່ ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ສະເໜີຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 10 ມິຖຸນານີ້ ໄດ້ຍົກໃຫ້ເຫັນຜົນສໍາເລັດຂອງການຈັດຕັ້ງປະຕິບັດວຽກງານການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງລັດຖະບານໃນໄລຍະ 5 ເດືອນຕົ້ນປີ 2024 ວ່າ: ລັດຖະບານ ໄດ້ສືບຕໍ່ເອົາໃຈໃສ່ສຸມທຶນຮອນໃນເຂົ້າໃນການປັບປຸງ ແລະ ກໍ່່ສ້າງບັນດາໂຄງລ່າງຮັບໃຊ້ການຜະລິດ ແລະ ປັບປຸງຊີວິດການເປັນຢູ່ຂອງປະຊາຊົນໃນເຂດຊົນນະບົດ, ເຂດຫ່າງໄກສອກຫຼີກ, ເຂດລຽບຕາມຊາຍແດນ ແລະ ເຂດຈຸດສຸມພັດທະນາຊົນນະບົດໃໝ່ຂອບເຂດທົ່ວປະເທດ ຕາມເງື່ອນໄຂຄວາມສາມາດຕົວຈິງງົບປະມານຂອງລັດ ແລະ ປຸກລະດົມທົ່ວສັງຄົມໃຫ້ມີສ່ວນຮ່ວມຫຼາຍຂຶ້ນ.
ຈາກມາດຕະການດັ່ງກ່າວ ເຮັດໃຫ້ 5 ເດືອນຕົ້ນປີ 2024 ສາມາດບັນລຸໄດ້ບັນດາຕົວຊີ້ວັດຕາມຄາດໝາຍຈໍານວນໜຶ່ງ ເປັນຕົ້ນ: ຄອບຄົວພົ້ນທຸກ ປະຕິບັດໄດ້ 9.195 ຄອບຄົວ, ເທົ່າກັບ 26,27% ຂອງແຜນການ (ມະຕິສະພາ 35.000 ຄອບຄົວ); ບ້ານພົ້ນທຸກ ສາມາດປະຕິບັດໄດ້ 58 ບ້ານ, ເທົ່າກັບ 11,6% ຂອງແຜນການ (ມະຕິສະພາ 500 ບ້ານ); ຄອບຄົວພັດທະນາ ປະຕິບັດໄດ້ 3.738 ຄອບຄົວ ເທົ່າກັບ 11,33% ຂອງແຜນການ (ມະຕິສະພາ 33.000 ຄອບຄົວ); ບ້ານພັດທະນາ ສາມາດປະຕິບັດໄດ້ 10 ເທົ່າກັບ 2% ຂອງແຜນການ (ມະຕິສະພາ 500 ບ້ານ); ຈັດສັນພູມລໍາເນົາ ປະຕິບັດໄດ້ 140 ຄອບຄົວ ເທົ່າກັບ 32,33% ຂອງແຜນການ (ມະຕິສະພາ 433 ຄອບຄົວ ແລະ ຈັດສັນອາຊີບ ປະຕິບັດໄດູ້ 10 ຄົນ ເທົ່າກັບ 0,17% ຂອງແຜນການ (ມະຕິສະພາ 6.000 ຄົນ).
ທ່ານ ນາຍົກລັດຖະມົນຕີ ໄດ້ຍົກໃຫ້ເຫັນຕື່ມວ່າ: ສໍາລັບທິດທາງແຜນການ 6 ເດືອນທ້າຍປີ 2024, ລັດຖະ ບານ ຈະສືບຕໍ່ຊຸກຍູູ້ ແລະ ສົ່ງເສີມທຸກພາກສ່ວນໃນສັງຄົມ ປະກອບສ່ວນເຂົ້າໃນການພັດທະນາຊົນນະບົດ ແລະ ແກ້ໄຂຄວາມທຸກຍາກ; ປັບປຸງການເຂົ້າເຖິງສິນເຊື່ອຂອງທະນາຄານທຸລະກິດຂອງລັດ ແລະ ທະນາຄານທຸລະກິດຂອງເອກະຊົນ, ພ້ອມທັງຊຸກຍູູ້ການປ່ອຍເງິນກູູ້ຈາກກອງທຶນພັດທະນາຕ່າງໆ ພາຍ ໃນຊຸມຊົນ ເພື່ອສົ່ງເສີມການຜະລິດຂອງປະຊາຊົນ; ສືບຕໍ່ຈັດຕັັ້ງປະຕິບັດກິດຈະກໍາຂອງກອງທຶນຫຼຸດຜ່ອນຄວາມທຸກຍາກ ແລະ ກິດຈະກໍາຂອງແຜນງານ ແລະ ໂຄງການຈາກທຶນຊ່ວຍ ເຫຼືອທາງການ, ກອງທຶນພັດທະນາຊຸມຊົນຈາກບັນດາໂຄງການສໍາປະທານຕ່າງໆ ເພື່ອການພັດ ທະນາຕາມແຜນກໍານົດ ໄວ້. ພ້ອມທັງສືບຕໍ່ຈັດຕັ້ງປະຕິບັດບັນດານະໂຍບາຍ ແລະ ນິຕິກໍາໃນການພັດທະນາຊົນນະບົດ ແລະ ແກ້ໄຂຄວາມທຸກຍາກ ໃຫ້ມີປະສິດທິຜົນ ເພື່ອແນໃສ່ເຮັດໃຫ້ຈໍານວນຄອບຄົວ ແລະ ບ້ານທຸກຍາກນັບມື້ຫລຸດລົງກວ່າເກົ່າ.
ຂ່າວອອນລາຍ : ວສລ