ໃນໄລຍະ 5 ເດືອນຕົ້ນປີ 2024 ຜ່ານມາ, ທົ່ວແຂວງ ອັດຕະປື ມີອຸບັດຕິເຫດຕາມທ້ອງຖະໜົນເກີດຂື້ນທັງໝົດ 176 ຄັ້ງ, ມີພາຫະນະເປເພ 294 ຄັນ, ມີຄົນໄດ້ຮັບບາດເຈັບ 249 ຄົນ ແລະ ເສຍຊີວິດ 20 ຄົນ, ທຽບໃສ່ໄລຍະດຽວກັນຂອງປີຜ່ານມາຈຳນວນຜູ້ເສຍຊີວິດເພີ່ມຂື້ນ 7 ຄົນ ແລະ ລວມມູນຄ່າເສຍຫາຍຈາກການເກີດອຸບັນຕິເຫດທັງໝົດເກືອບ 2 ຕື້ກີບ.
ທ່ານ ຮ້ອຍເອກ ສົມໃຈ ນາມປະກາສິດ ຫົວໜ້າກອງສືບສວນ-ສອບສວນຄະດີອຸຕິເຫດກອງບັນຊາການປ້ອງກັນຄວາມສະຫງົບແຂວງ ອັດຕະປື ໄດ້ໃຫ້ສຳພາດເມື່ອວັນທີ 13 ມິຖຸນາ 2024 ນີ້ວ່າ: ສະພາບອຸບັດເຫດຕາມທ້ອງຖະໜົນໃນຂອບເຂດທົ່ວແຂວງອັດຕະປື ເພີ່ມຂື້ນ ເຖິງວ່າເຈົ້າໜ້າທີ່ຕໍາຫຼວດ ຈະໃຊ້ມາດຕະການຕ່າງໆ ເພື່ອຫຼຸດຜ່ອນການອຸບັດເຫດແລ້ວກໍ່ຕາມ, ຊຶ່ງສາຍເຫດທີ່ພາໃຫ້ເກີດອຸບັດເຫດແຕ່ລະຄັ້ງນັ້ນ ສ່ວນໃຫຍ່ເກີດຈາກການລະເມີດກົດລະບຽບການສັນຈອນຂອງຜູ້ຂັບຂີ່ ໂດຍສະເພາະ ຂັບຂີ່ລົດໄວເກີນກຳນົດ, ດື່ມສິ່ງມຶນເມົາແລ້ວຂັບຂີ່ ແລະ ອື່ນໆ.
ອຸບັດເຫດສ່ວນໃຫຍ່ແມ່ນເກີດຂຶ້ນແຕ່ເວລາ 10 ໂມງ ຫາ 12 ໂມງ ແລະ ອຸບັດຕິ ເຫດທີ່ເກີດຂື້ນແມ່ນຢູ່ໃນກຸ່ມພະນັກງານ-ລັດຖະກອນ, ກໍາມະກອນ ແລະ ກຸ່ມນັກ ຮຽນ-ນັກສຶກສາ, ອຸປະຕິເຫດເກີດຂື້ນຫຼາຍກວ່າໝູ່ແມ່ນຢູ່ເມືອງສາມັກຄີໄຊ ເກີດຂື້ນທັງໝົດ 72 ຄັ້ງ, ເສຍຊີວິດ 5 ຄົນ, ຮອງລົງມາແມ່ນເມືອງ ໄຊເສດຖາ ເກີດຂື້ນ 36 ຄັ້ງ, ເສຍຊີວິດ 7 ຄົນ, ເມືອງ ຊານໄຊ ເກີດຂື້ນ 23 ຄັ້ງ, ເສຍຊີວິດ 3 ຄົນ, ເມືອງ ພູວົງ ເກີດຂື້ນ 25 ຄັ້ງ, ເສຍຊີວິດ 3 ຄົນ ແລະ ເມືອງ ສະໜາມໄຊ ເກີດຂື້ນ 20 ຄັ້ງ, ເສຍຊີວິດ 2 ຄົນ.
ຂ່າວ: ວັດທະນາ
